Die grossen dieb hencken die kleinen.
Dat ueniam coruis, uexat censura palumbes.

Die kleinen dieb henckt mann / gegen den grossen zeucht man die hüt ab. Kleine dieb henckt man ann galgen / die grossen inn seckel. Anacharsis hat das Recht einer spinnen wepp verglichen / dardurch die grossen Hummeln faren / die kleinen Mücklin behangen. Wer baß mag / der thůt baß / stoßt den andern inn sack / vnd ist der andern aller herr Diomedes war zur zeit Alexandri Magni ein kleiner dieb vnd Meerräuber / als er gefangen für Alexandrum ward gefürt /hett er sich berwegen er müst sterben / wolt jhm vor gnůg vmb sein leben reden / vnd sprach freudig vor Alexander: Ich / der ich einn angriff vff dem Meer hab thon / werd für dich bracht als ein tauber / Du der du eben dasselbig mit gewalt thůst / alle land vnnd leut beraubest / wirst ein Imperator genant. An der that haben wir keinn vnderscheydt / dann daß du ein grösserer rauber / es alles mit gewalt thůst / [15] vnd dir darzů des volcks gunst hilfft / vnnd in dem du ein grösserer bößwicht bist / daß dich kein not / sonder ein lauter vnersettlicher ehrdurst vnd můt wil darzů treibt /Mich aber die enge vnd schmäle meiner narung. Hett ich dein glück / ich wolt mir des raubens nit wünschen / sonder an dem zehntausenten teyl deines glücks vergnüget sein. Als vil nun das gesetz belangt / bistu vil ärger dann ich / weil du tausent beraubest /eh ich einen. Allein bringest dein ding vnd tyrannei mit gewalt hinauß / vnd trittest alle gesatz mit füssen / so můß es recht sein vnd heyssen. Werest du allein an meiner statt / so werest ein rauber / Nun so du es mit des pöfels hülff thůst, so wirst ein Imperator genant. Alexander verwundert sich des menschen künheyt / vnd hieß jn vnder die ritterschafft zelen / daß er ietz sein vorig handwerck vnder jm trieb / vnnd was er beraubet / on verletzung der gsatz / Alexandro raubet.