Gott kompt langsam / aber wol.
Serò Jupiter diphther am inspexit.

Es můß ein schlechter Wirt sein / der einer zech nit zuborgen hat. Gott windet oder haspelt aller menschen misset hat auff ein klüngeln. Gott kan wol ein ürten borgen. Gott sihet ein zeitlang langmütig durch die finger einer besserung wartende / daß niemandt ab seiner eil vnnd gähe zuklagen habe / vnnd sein langmütigkeyt begere. So aber die zeit seiner gnaden vnd gedult fürüber kompt / daß er in das Register sihet /vnd mit seinn knechten abrechnen wil / gehet die zeit seiner iustitien vnd rechts an / das vns vil zuschweer wirt sein.

Dann schaffet er etwa einn menschen / der sein rach außricht / vnnd sein iustitien hie exequter. Dahin sihet das Sprichwort: Wann Gott ein ding verdreußt / so fahets auch an die menschē zu verdriessen. Vnnd pflegt Gott schälck mit schälcken zustraffen. Einn zeitigen schalck mit einem vnzeitigen / biß der vnzeitig auch zeitig außgenützt / der besem verkert / vnnd die růt stumpff wirt / dann můß sie auch inn ofen. Daher kompts / daß mann spricht: Grosse herrn dencken lang. Es mag leicht einer einn punct im blůt odder schwartzen bůch haben / kompt noch einer / so helff dir Gott. Ein punct mag dir wol verzigen sein / aber nit vergessen / Kommestu noch ein mal ins blůtbůch /so rechnet mann den ersten verzigen / aber nit vergessen puncten / zu dem andern / Also wil jm Gott auch thůn / Ezech. xviij.