Kuñjarakarṇa Dharmakathana
avighnam astu.
Canto 1. (Jagaddhita: - - - | ~ ~ - | ~ - ~ | ~ ~ - | ~ ~ ~ | ~ ~ ~ | - ~ - | ~ =)
1. saṅ dhīrāmrih ayuddha riṅ raṇa tapabrata makalaga vīraṣaḍripu
lagy abyūha samādhitattvaguṇa vāhananira karuṇādidhāraṇā
sanmudrā dhvaja siṅhanāda japamantra varadhanuh acintyabhāvanā
bodhijñāna śarottamāṅhilaṅakən ripu makaphala dharmaśūnyatā
(b) PT -darana, R -dharana, S -darana; (c) RS samudra; P -bāvana, R -bhavana, S -bavana, T -bhāvana.
2. sākṣāt mūrti bhaṭāra śākyamuni māravijaya sira saṅ samaṅkana
maṅgəh maṅgalaniṅ maṅə̄ praṇata bhakty aśikhara ri ləbūni jə̄ṅnira
stuty aṅkən pratimāpratiṣṭha ginəlar makuṭavidhi vinījan akṣara
hinyaṅni ṅvaṅ amogha tan saha sake padanira mara janmaniṅ hulun
(d) P iṅhyaṅ, RS inyaṅ.
3. lāvan deniṅ aṅarcane pada bhaṭāra sugata pinakeṣṭidevatā
nirvighnā ṅvaṅ amarṇa-marṇa mikətaṅ caritaniran adharmadeśanā
aṅkən cāmaniyāmrakāśakəna kastavanira pinavitra riṅ jagat
paṅgil rakva vənaṅ paṅahvata ri janmaniṅ ajarajar aṅrəgəp laṅə̄
(c) TV -āprakāsakna.
4. ndah sambodhananiṅ hulun ri sira saṅ kavi nipuṇa pinaṇḍiteṅ laṅə̄
ndātan kojara talpakāṅidanidan ṅvaṅ aṅikəta kathā palambaṅa
tan saṅkeṅ vihikan tuhun maṅiriṅeṅ gati para kavi mātra riṅ laṅə̄
tan samvas pva kuraṅ paṅavruh apa tan kavi kumavi turuṅ vruh iṅ krama
(d) Y pva kurasaṅavruh; P i krama.
5. sotan ta ṅvaṅ apuṅguṅ atpada maṅə̄ pati-tut i saṅ akīrti bhāṣita
tonən lvirnya hirimhirim sama saroruha riṅ apa ya sādhya tuñjuṅa
maṅkā teki haturnya tan sasiriṅeṅ para kavi sapanivyan iṅ lanə̄
aṅhiṅ teki inantusārivarivāṅikəta carita de kavīśvara
(a) T pati (tis i subscribed); (b) Y yama; (c) mss. samanivyan; (d) TV hinastusā-.
6. vvantən kuñjarakarṇa teki paṅaranya carita ya ta dadya pādika
ndan vyarthenapus iṅ kadi ṅvaṅ aḍusun viphala kadi mahāpupur harəṅ
simbantən makahayvaniṅ carita maṅkin amuvuhi panindaniṅ para
vyaktinyāmuhareki hāsyakaraṇa ṅhiṅ apuran iki de mahājana
(b) P adusun; (d) RS tasya-.
7. śrī vairocana pūrvaniṅ carita kālanira pinarək iṅ vatək sura
ṅkānen bodhivihāra nirmala samaṅkana ta siran adharmadeśanā
akṣobhyādi sabodhisattvaparivāra marəki sira bhakty amūrṣita
mvaṅ sakveh para bajrapāṇisuranātha yama baruṇa len dhanādhipa
Canto 2. (not known from elsewhere: ~ - - | ~ ~ - | ~ - - | ~ ~ =)
1. bharālipratisāra labdhe samaya
sudharmādhikatattva sampun katama
vəkasniṅ paramārthikovus kahiḍəp
varah śrī ṣaḍabhijña kāruṇyamaya
(a) RS bharalya-; P lan desamaya, RS labda samaya, TV labde samaya; (c) PV paramārthikavus, T -kāvus, R paramarsikovus.
2. təlas rakva bharāly amūjā prathama
gumantyaṅ hyaṅ anukramāyajña marək
savaṅ vṛṣṭy amṛtaṅ sudharmaśravaṇa
avas lvir tṛṇa buddhiniṅ hyaṅ masavuṅ
(b) Y mataṅnyaṅ; (d) TV kṛṇa; mss. masavaṅ.
3. huvus pveki dineśanan dharma kabeh
təkap hyaṅ jina tuṣṭa harṣan ruməṅə̄
paḍāṅarcana sādare śrī sugata
byatītan ry ulih iṅ vatək hyaṅ sakala
Canto 3. (Navaharṣa: ~ ~ - | ~ ~ - | ~ ~ ~ | ~ ~ ~ | - ~ ~ | - ~ ~ | =)
1. atha kuñjarakarṇacarita matapeṅ varamerugiri
pinakāgratapodhara tan alupa riṅ sugatasmaraṇa
makasādhana yoganira saphalavīrya sinādhyanira
tuvi rākṣasarūpa pinakamala hetuniran patapa
2. hana teki ri lambuh iṅ acala gihāśrama pūrvamukha
aṅuṅaṅ jaladhi prasama kadi tapovana riṅ gagana
səh ikaṅ kusumāṅjrah aparimita sarva phalanyan atə̄b
panəḍəṅnika tan pəgat asirasiran kadi tan ləvasa
3. ri hujuṅhujuṅ iṅ paraṅ arəja maṅuṅkul anoṅi juraṅ
matəḍuntəḍunan bañu kumusuh aghoṣa humuṅ gumuruh
asurak lvir i cāmaranika magiraṅgiraṅ adrəs aṅin
anaṅis mara cātakanika hana mə̄r bhramiteṅ gagana
(b) mss. matədun-tədunan; V kumucur; T aghāṣa.
4. vruh agə̄ṅ prihikaṅ girivana kayu teja samāśry asinaṅ
təkaniṅ kayu simbarən aniru vibhūṣy aṅəne vvit ikā
akaluṅkaluṅ odvad araras agəlaṅgəlaṅ arja kuniṅ
hana vṛkṣa kavuntat umarək irikaṅ valik-aḍəp i sor
(b) P vihika; (d) PTV kavuntan, RS kahuntat; RS amarəp, TV amarək; T valikhadəp.
Canto 4. (Śikhariṇī: ~ - - | - - - | ~ ~ ~ | ~ ~ - | - ~ ~ | ~ =)
1. savaṅ strīratna lvirniṅ acala ləṅə̄ṅ ləṅləṅ alaṅə̄
asiñjaṅ ñjrahniṅ pādapa huvus agandhāsəkar arūm
ghanāraṅ vastranyeki putih anavaṅ caṅlvi sahəle
savitnyan her-talyābharaṇanika tejākarakara
(b) Y jrah: (c) P gaṇāraṅ, RS ganara; P anavaṅ caṅlvi sahle, RS ana vaṅvaṅ lvir asəle, T anaravaṅ salvir asle, V anavaṅ caṅlvi rasəle.
2. rarasniṅ kambaṅ pahyas ikin avuvuh rūm hayu tinon
baṅun līlā harṣan pasidəha latā məṅgəp aśila
lənə̄ṅ rūpanya dyah lalita maṅilo toya valahar
huyaṅ ganyaṅ rāt kāraṇaniṅ apəpət patra kasirir
(b) P harṣanya sidəha; PT asilā; (d) RS kasisir.
3. hana lvir śṛṅgāraṅ gagana lavan adrīḍəpanika
gərəh mandrālon paṅhariharih i śabdanya karəṅə̄
kilat ramyāṅde raśmi paṅujivatanyāmrih akire
məluk mālap-sor vaṅkavanika təkāñumbana bañu
(a) RST naka; (b) P ikaṅ śabda, R iṅ śabdanya; (d) T mlukkālap-.
4. katon mātra jro pambəkan i bañuniṅ parvatanadī
arəṅvāṅ-imba lvir halis iṅ anukər vāhu kavava
kapiṅsəl vvahniṅ nyuh gaḍiṅ apiṅit emveṅ jala papah
ri sahniṅ meghāpiṇḍa mavudavudāvṛkṣa katilar
(c) P emva, R eṅ mvaṅ, S eṅ, TV emvā.
5. alūm aṅlih tah pādapa ləsu katīkṣṇan dinakara
tuṣārāṅluh hisnya bhramara manaṅis mə̄r kaləmahan
savah rāhniṅ siñjaṅ drava mara tahi-hyaṅnika mabāṅ
tumuṅkultuṅkul mraknika mapa tikaṅ vastu dinələ̄
(d) P vastunən liṅ.
Canto 5. (Turidagati: ~ ~ ~ | ~ - ~ | - ~ ~ | ~ - ~ | ~ ~ ~ | ~ ~ - | ~ - ~ | =)
1. tuhu mara yan viśeṣagirirāja sakahavan aṅāśrayeṅ laṅə̄
upaśama tiṅkah iṅ tahən ataṅkil apagəh apa tan salah-bhava
praṇata maṅañjali lvir i sulurnya sahaja marək aṅharas lemah
parəṅ ahatur səkar bhujagapuṣpa surabhi sahaśoka campaka
(d) P yahasoka.
2. arəṇa apavvahan gaḍiṅ ikaṅ tirisan amava mañcuṅ aṅlugas
jaladha ri agraniṅ gəgər aṅuṅkul amisah asavaṅ payuṅ putih
kahaḍaṅ asaṅgani svarani śaṅkhanika humuṅ i gəṇḍiṅ iṅ manuk
kadi hana bañv ahoma titis iṅ juraṅ anəkar-uraṅ səkar tibā
(b) RS aṅuṅgul; (c) RS sandiṅ; (d) TV -urā.
3. vvara havan iṅ vanāśrama tinuṇḍa pinarigi hinambalan vatu
sana-sini bañjaran səkar arūm səḍəṅ aməvəh aṅambvakən laṅə̄
cara-cara handvaṅ asla kayu mas kayu puriṅ acələkcələk putih
parajita maśridanta jagaśatru pinaḍapaḍa len səkar kuniṅ
(b) P śaṇa-; (c) mss. asəla.
4. paḍa tan asor səkarniṅ asanāsinaṅ akuniṅ apendah iṅ kuniṅ
vijah apajə̄ṅ kuniṅ kunəṅ ikaṅ kusuma mekar atə̄b paḍākuniṅ
təkani manuknikākuniṅ ikaṅ kapudaṅ anakəbinya vah kuniṅ
tuhu lakuniṅ haneṅ gunuṅ avarṇa kasih-arəp agañjaran kuniṅ
(a) RS apendat; (b) RST kunaṅ (PV kunəṅ); (d) P giniṅ.
5. patani pararyanan hana mahantən apatiga ləyəp kadīṅ tulis
hatur ika sopacāra taru sarvaphala kusuma ramya len pucaṅ
hujuṅan i patraniṅ pisaṅ-alas baṅun aharəpaṅ āptyaneṅ mara
bañu tan adoh ri sor titir aṅer-tali galita sakeṅ ruhur vukir
6. kidaṅ adulur laki stry asəmu polah iṅ atavatavan mareṅ vukir
liriṅ i matanya ləñjəp amanis kadi maṅatag araryaneṅ priyā
gaḍuṅ avilət silih-pəkul aluṅ lvir atuduh amarantya riṅ bukur
baṅun aməḍar təṅah pupus ikaṅ liraṅ aputih anaṅhi kūṅ lulut
(a) P atava-tavah; P mare; (c) T atuḍuh.
7. apan ika rakva mandaragiri prakaśita pinakādiniṅ vukir
satata sabhā vatək hyaṅ avilāsa dinulur ikaṅ apsarāpsarī
karaṇaniṅ adri ramya racananyan aniluman anopameṅ laṅə̄
abhinava toya nirmala ri śṛṅga hana raṇu patīrthan uttama
(a) Y ratva.
8. apituvi śṛṅganiṅ giri sumeru hibək ataparṣy atūt gəgər
saḍukuḍukuh katon atəp i raṅkaṅ ika pətuṅ anekavarṇana
hana taṅ inantya kāptin akətəbkətəb anatap inuttameṅ hajə̄ṅ
hana kumukus pilih ra tapa ganya suməlaṅ akulubkulub gaṅan
(c) P kapnəd, T kāptid.
9. ika ta haləpnya sor təkap iṅ āśrama patapaniraṅ mahāsura
vivara śilāputih kadi tutuknikaṅ acala sumeru kātara
arata viśāla marsik akilā sphaṭika vəṅi jugā yayāpaḍaṅ
bañu tuməḍun sake ruhur aṅuṅkuli vivara tibā mareh juraṅ
(d) PV sakeṅ.
10. yativara kuñjarāsura haneṅ vivara səḍəṅ ayoga dhāraka
aśila subaddha lagy aṅisapuṅ taṅan alih amitābhalakṣaṇa
pinahabənər śarīranira niścalan umulat iṅ agranāsikā
mari tan asattvadhātu kahiḍəp vimala valuya jāti śūnyatā
(b) Y aṅisapu (-ṅ lacking); (c) P niścaya-n.
11. kramanira rākṣasa ndan iki lakṣaṇanira tuhu bhāvaniṅ viku
təhər akaluṅ gaṇitri magəlaṅ guduha rahat iṅ ambarātəṅə̄
paragi təṅə̄ sinampətakən uttama satirun atəṅva riṅ manah
kadi makuṭājaṭāhalap ulah saṅ atakitaki niṣparigraha
12. ri huvusirāsamādhi sukhacitta larinira mijil sakeṅ giha
bhramita vulatnireṅ jaladhi ramya ri pasisi təkeṅ təṅah ləyəp
vəkasan avarṇa miśra lavan ambara ləṅit ahirəṅ katiṅhalan
linavəlavə̄niran kadi vəkasniṅ ahurip ana nitya niṣphala
(a) P vijil; (b) Y sisi katəkeṅ.
13. kṣaṇa humənəṅ sirāsəmu viraṅrvaṅ anuluyi manah panasbaran
gumuṇita gupta riṅ tvas aviveka satəkapanikaṅ nayottama
tan alavasaṅ prayojana tuməmva vibhava tuvi marya rākṣasa
karaṇanirākire marək anəmbaha ri pada bhaṭāra gautama
(a) RS panasbara.
Canto 6. (Pṛthvītala: ~ - ~ | ~ ~ - | ~ - ~ | ~ ~ - | ~ - - | ~ =)
1. saṅ ugratapa śīghra maṅkat ahavan viyat nirbhaya
hanan kadi khagendra maṅlayaṅ iṅ agraniṅ parvata
svabhāvanira yakṣa śakti madulur prabhāvādbhuta
prahāra kumusuh təkādrəs amusus tahən riṅ vukir
2. ləpas larinirāṅidul tucapa taṅ sakātuṅkulan
pradeśa mapatuṅgatuṅgalan akāṇḍakāṇḍālaṅə̄
təkeṅ vukir alasnya kubvan arəṇəb gagātūt hiriṅ
pucaṅ tirisan aryan arnəb atatā tahən vva-vvahan
3. gəgər paṅalusan hañar tinarukāpramāṇeṅ juraṅ
huvus tinapak iṅ vanāgni savalərvalərnyan gəsəṅ
dudug təka riṅ agra mākrəp atumaṅ harəṅnyāpupul
śilā kumalaśāputih rəṅat arekharekhā pəṭa
(b) RS savaṅva natarnya gəsəṅ, T savaṅ valərnya gəsəṅ (or gusəṅ?), V asavaṅ valərnyan gəsəṅ.
4. ikaṅ gunuṅ aroṅ katon hana i sor giha lvir gəḍoṅ
paraṅnika sumoṅ sajoṅ kadi masoṅ vinoṅvoṅ mara
sirobvan umulat paḍāmava vajoṅ kajoṅkoṅ tibā
aboṅ umuni kagyat avri ginəroṅnikaṅ moṅ alon
(b) Y kajoṅ (text sajoṅ); (d) P añoṅ; Y ginəra (-ā T).
5. adə̄dəṅ aputih vvay iṅ valahar embuh akveh gunuṅ
savah sphaṭikamārga śuddha lumarap bañunyālaris
tutug təka ri vindhyaparvata paḍāṅavetan ləpas
tumampuh i gihānikaṅ jaladhi ghūrṇitāgənturan
6. rərəb sinavaveṅ riris kilat alivran abhrāsinaṅ
sateja dumilah prabhāvanira kuñjarāvyomaga
paḍānahanahan mulat kaburəṅaṅ tuməṅheṅ laṅit
mapendah iki liṅnikaṅ vvaṅ apa tan hanā maṅkana
(d) P hanammaṅkana.
7. tiniṅhalanirāparə̄ giri sumeru lambvaṅ kidul
baṅun sira sinambhrameṅ alas akon marārāryana
humuṅ svaranikaṅ manuk vijavijah lvir asvāgata
lutuṅnika lumumpat agya susugun kadi kṣepa ya
(a) ST -āparā; (b) RT marāryana.
8. bhaviṣyati katon kṛtābhinava taṅ vihārāhaləp
agopura suvarṇa ratna mapucak maṇīndrārjuna
ndatan pagati taṅ divākara śaśāṅka keraṅiraṅ
təkapniṅ atibhāsvarānələhi bapra śuddhākila
(c) RS divaṅkara; Ed. śaśaṅka.
9. vavaṅ sira təkeṅ vihāra varabodhicittāmala
tumuntən umarək kṛtāñjali ri pāduka hyaṅ jina
vruh iṅ paramadevakarṣaṇa viśeṣapūjastuti
ya kāraṇa bhaṭāra tuṣṭa tumuluy manantve sira
10. vəkaṅku tija bhāgya saṅ tapa marək ri jə̄ṅniṅ hulun
ndya donta laki yan parery aku mapaṅ pinintānaku
huvus vruh aku yan tasak bratatapanta ṅūnīṅ vukir
usə̄n təpətakən juga prih ikanaṅ kayogīśvaran
11. na liṅnira bhaṭāra buddha sumahur ta saṅ tāpasa
bhaṭāra huniṅan ṅhulun varahaniṅ sudharmādhika
maran saphalajanma marya makajāti yakṣākṛti
apan pisaniṅun manəmvakəna vīrya devaprabhu
12. muvah mapa ta vastu sambulih i janmaniṅ rāt kabeh
nimittanika yan hanaṅ tuməmu duhkha lāvan sukha
ləvəs mara ri tan paḍanya hana kasyasih mvaṅ sugih
pitovi hana pūrṇarūpa savaneh manaṇḍaṅ mala
(d) P lara (text mala).
13. nahan pataña saṅ tapāsura ri jə̄ṅnira hyaṅ jina
pradīpta ravitulya rakva karuṇan bhaṭāreṅ jagat
ya kāraṇani buddhi saṅ yati mekar savaṅ paṅkaja
haləpnya kahatur mareṅ pada bhaṭāra tuṣṭāmuvus
(a) Ed. tapāśura; (a) RS raja, T rajā (text ri jə̄ṅ).
14. ya teku laki janma mūlya maṅaran pavitreṅ jagat
ri denyan aharəp ri dharma tuhu sādhu labdheṅ hayu
apan sipi kətaṅ havas vihikaneṅ rusitniṅ dadi
aməṅpəṅa ri kālaniṅ hurip aṅiṣṭya dharmottama
15. hana vruh i kadibyan iṅ paramadharma yan gəgvana
tathāpi tiḍapuccha tan harəp atakvaneṅ paṇḍita
pijər jənək amukti vīrya kasukhan ginə̄nnyenivə̄
mataṅnya larapanya vismṛti jaḍeṅ sudharmakrama
(a) TV kadivyan.
16. svabhāvanikanaṅ lalər maharəp iṅ kudis rāh kanin
purīṣa mahaha śṛgāla bavi gāgak āptīṅ dagiṅ
tukar vyasana kāptiniṅ vvaṅ atimūḍha mūrkhāvərə̄
sudharma hita kahyun iṅ paramasādhu tan gəṅ galak
(b) P gaḍiṅ.
17. hana vvaṅ avamāna liṅnya taya dharmaniṅ devatā
anāgatanikaṅ gave hala-hayu ndya donyan təmu
nihan sanu sadṛbyaniṅ hyaṅ alapənku norānulah
pitovin ika dṛvyaniṅ vvaṅ aparan kavədyeriya
(b) Y nika (T -ā); (c) Y -drəvya; P norannulah, RS noran ulah; (d) P kavədyoriya, Y kavədya (-ā T) riya.
(c-d): Note inconsistency dṛbya/dṛvya.
18. ikaṅ vvaṅ avamāna maṅkana pəgat hiḍəpnyeṅ hati
ndatan tuhu pəgat kasaṅśayan ikāvərə̄ kevala
ləhəṅ gatinikaṅ tahən sapadi janma mattādhama
apan dadi ləpas pratiṣṭhanən i mantra saṅ paṇḍita
(c) P mattādharma.
Canto 7. (Śārdūlavikrīḍita: - - - | ~ ~ - | ~ - ~ | ~ ~ - | - - ~ | - - ~ | =)
1. āpan durlabha taṅ dadi vvaṅ inusirniṅ sarvabhāveṅ jagat
yadyan mānuṣa durlabha-ṅ vvaṅ atəmah jalv āmiśeṣeṅ priyā
yan jalv ātika durlabhaṅ vvaṅ atəmah vidvān suśīlāpagəh
yadyan paṇḍita durlabhā vihikaneṅ vidyākriyādyāgama
(b) P durlabha ṅvaṅ, RS durlabha vaṅ; P priya (RSV do not indicate vovel length!); (c) RSV jalva ika, T jalvāhika; PV durlabha ṅvaṅ, RS durlabha vaṅ.
2. yadyan vruhvruha riṅ kriyāgama tuhun saṅ vruh riṅ arṣārusit
yadyan vruhvruha rakva mevəh ikaṅ utsāheṅ samastāgama
saṅ dhīreṅ sakalāgamārusit ikaṅ nityāmarah riṅ jagat
yadyan mājara riṅ jagat saṅ aharəp riṅ dharma mevəh dahat
3. putraṅku pva pavitradharma kaharəptāṅhiṅ vəkaskun hiḍəp
konkonən rumuhun kitānaku lakun prāpteṅ kavah hyaṅ yama
donantan vulateṅ samastagatisaṅsāreṅ kavah pātaka
salvirnyan tañakən ri saṅ yamapati ry antukta tākv ājara
(a) P vəkasku hidəp; (c) P ndonanta-n, Y donanta (-ā T).
4. lvāmbəktānaku hayva saṅśaya məne vasvas jugaṅ pātaka
rapvan teki təpət kite sarasaniṅ dharmāpagəh niścaya
āpan byakta panonta duṣkṛtinikaṅ sañjīvasattvādhama
śīghrātānaku maṅkatāstu kita nirvighnan kuminkin hayu
(b) RSV niscala; (c) T duṣkṛta tikaṅ; (d) P śīghrattānaku, RSV sigra tanaku, T śīghrātānaku; P -āstutita.
5. ṅkā saṅ kuñjarakarṇa maṅkat i huvusnyāmvit ri saṅ hyaṅ jina
sotan rākṣasa siddhacāraṇa sumīləm riṅ samudrālaris
prāpteṅ bāyucatuṣpathe təṅah ikaṅ pat mārga maṇḍəg laku
vvantən bhūta si kālagupta kadunuṅ kālih lavan niṣkala
(b) PRSV iṅ; P -āṅlaris.
6. yekānantva ri kuñjarāsura paran dontan para ṅke laki
lavan syāpa ṅaranta toh varahakən vāk jātya hayvākalib
āpan ṅvaṅ rva rumakṣa mārga ḍatəṅ iṅ svargā lavan rorava
akv īkin matuduh svakarmanikaṅ ātmānuṅ paranyan dunuṅ
(a) Ed. kuñjarāśura; P ndonta-n, Y donta (-ā T); (c) mss. svarga; T lavan; (d) RS ātmahənu.
7. mojar saṅ tapa tan dva mājar irikaṅ bhūtāṅəmit riṅ havan
ṅvaṅ saṅ kuñjarakarṇa teki paṅarankv iṅ rāt mahārākṣasa
saṅ hyaṅ śīghran asanmateṅ hulun akon prāpteṅ bhaṭārāntaka
nāhan donku ḍatəṅ tuhun varahakən taṅ mārga maṅken tutən
(c) PSV śrīgana, R srigama, T śrīgaṇa; PTV sanmata, RS sanmate.
8. lavan teki varah ṅhulun ri paran iṅ mārgāñaturdikvidik
ndyāṅ ātmā malivat havan mapa tika lvirnyan padudvan hənū
ah maṅkā pva tañanta mājarakəna ṅvaṅ yan kitāhyun vruha
ai saṅ kuñjarakarṇa rəṅvakəna tah śabdaṅku yatnā kita
(b) PT lvirnyāpadudvan; (d) T he.
9. riṅ pūrveśvaramārga yeka havan iṅ śaktīṅ tapa mvaṅ brata
nā lor iṅ harilokamārga havan iṅ śūrātapeṅ papraṅan
kulvan mārganiraṅ mahāmara havan saṅ dānaśūreṅ jagat
ndan riṅ dakṣiṇa taṅ yamālaya hənūniṅ pāpa muṅsir kavah
(b) T lor riṅ.
10. yekin mārga tutənta marsik agənət prāpteṅ mahārorava
hayvālon apa yan samastakaluṣan tkeṅ nilāṇḍāṅasut
āpan byakta pituṅ vulan lavas ikāṅher taṅ pətəṅ durgama
tovin meh təka saprahāra ḍatəṅanya ṅke gəlis prih lajun
(c) P pitūṅ ulan.
11. sampun kuñjarakarṇa niścaya laris riṅ mārga lampahnira
prāpteṅ lohasubhūmipattana ṅaranyātyanta riṅ lvānika
piṅgirnyāgni murub midər kumuliliṅ tambaknya tan pantara
madhyanyan hana vṛkṣa khaḍga maphalāstrākveh sutīkṣṇāluṅid
(b) RS -pataka, TV -pātana; (c) P kumaliliṅ, S kumulitiṅ; (d) P madhyāntā tka kavṛkṣa (tka subscribed).
12. ṅkāne sor tṛṇa khaḍga sarva niśitān priṅganya tan popama
ndan rakveki paran vatək yamabalāṅgrək salvir iṅ pātaka
mvaṅ saṅghāta kidul gunuṅ vəsi mahākrūrāntakāṅde takut
molah lvir babahan tumaṅkab amaṅan pāpāprameyan rəmuk
(a) P ṅkāneṅ; P niśitā; (b) P ndā; (d) PV tumaṅsabh, RS umaṅkab, T tumaṅjab; STV -āpramoha-n.
13. maṅə̄ kuñjarakarṇa yan lumihat iṅ pāpāpupul riṅ təgal
kapvācihna kaduṣkṛtanyan acəmər tan śobha dehākuməl
saṅsāran kasihan lanā sinakitan deniṅ vatək kiṅkara
lvir burvan sahananya pinrih inirup ginrək mareṅ durgama
14. abyūran malayū vaneh silih-iḍək rəsnyeṅ vatək kiṅkara
sakvehkvehnya bubar binurv alulunan kempun tibāgənturan
siṅsal bhagna śivak śirahnya vinaduṅ len taṅ gulunyāpasah
mvaṅ taṅ bhinna jajanya rantas apaśeṣosusnya rantan vutah
(a) TV rəsnye; (b) R kemput, S kempu, T kempən; (d) R apasahasusnya, S apasahosusnya; RS rantas (text rantan).
15. mañcurmuñcar ikaṅ vinūk gigir ikāṅruṅkuṅ taṅisnyāṇḍahuṅ
amlas-harṣa vuvusnya ḍū laki dudut taṅ śūla muṅgv iṅ gigir
bhedaṅ pāpa vaśāṅdudut kadaluruṅ pəñculnya tātan haris
rək ṅə̄s ḍuh pukulun ndatan sipi laranyan mār jajaṅkvāhənək
(a) PT -ānduhuṅ; (b) RS ḍuh, T dūh; (c) P beñculnya; (d) P laranyāpar.
16. vvantən tātma pilih vatək praṅ aṅunus vahvasnya nityenagəm
ndātan dhāraka yan binurv inikuniṅ bhūtāṅusir sāhasa
yekā maṅsvakən iṅ vatək yamabalākveh taṅ tibāvrəg layū
mvaṅ taṅ vahv apulih tumut katavurag śūlanya molih dulur
(d) Y kaṅ.
17. maṅkin krodha masə̄ vatək yamabalāṅgəgv astra dīrghākṛti
lyus ndātan bana kāri mātra tikanaṅ pāpāvədin kantuna
āpan siṅ kavənaṅ hinosan iki jə̄ṅnyan rimpuṅ āśāṅrəpa
mevvīvuṅ lvaṅ aneka riṅ sakapisan denyāṅabət pātaka
(c) Y jarnya-n; P sāsāṅrəpa; (d) PRS mevivū.
18. lavan taṅ kavənaṅ hanan kadi vihuṅ pinrih sinujyan vəsi
saṅsāran vinatək tatan mati təhər yāṅrəñcal āśānaṅis
kavlas-harṣa vaneh inantəpakən iṅ śūlāṅrak aṅde takut
lyan tekaṅ sinikəp lanenadu vəḍus təṇḍasnya sampun rəmuk
(a) Y sinujvan.
19. pakṣi khaḍga saroṣa sāhasa təkāṅrəṅgut vatək pātaka
harṣan ton irikaṅ samastakaluṣāglar ceḍikākveh pəgat
vvantən rodra muvah vatək yamabala śvānāśirah rākṣasa
yekāñaṇḍak agantiganti manəsəb lavan varāhādbhuta
(b) T -āglarnye cadika; (d) P manəsək.
20. mavrəg tan vruh i polahanya malayū taṅ pātakāmrih hurip
ṅə̄sṅə̄sən ya kavəs paḍākuyukuyū gəñjor gupuh kaṅlihan
mośvāsādrəs aṅambəkambək alisus ryamban yan asriṅ tibā
kedək deni samanya pāpa kaluluh kepvan kavantiṅ miṅəl
(c) RS osvasa-; RS yambanya, P riyyambarna; (d) RS kavanti.
21. tovi nyāsani duṣkṛtinya gumaven ton riṅ marīcy āhaləp
vvainiṅ raṇv ahəniṅ ri cittanika lumre sornikaṅ pādapa
hyunyeṅ vvai prasamāruhunruhunan osyan muṅsi hə̄bniṅ kayu
tan dvan prāpta kahaṇḍəm iṅ tṛṇa taji trus lad karurvan phala
(a) Y duskṛtanya; TV gumave; (b) RS lumreṅ; (c) V prayamāṅruhun-; (d) P tandvā; P lūd.
22. ṅkā taṅ rākṣasa bahnivaktra sumuyug maṅsv aṅhuyaṅ pātaka
bhraṣṭāsiṅ kaparək bibal ginəsəṅan ṅuṇḍas babak len lucut
rukṣābāṅ mələkah śarīra kumisik sandhinya deniṅ panas
saṅsāranya tatan pəjah tan ahurip glānāṅgəgə̄ duhkhita
(a) P masy aṅ-, S maṅv aṅ-, TV masv aṅ-; (b) P kuṇḍas; (c) P kumisit.
23. vvantən pāpa binurv anambah akətər bhāvanyan amlas-harəp
liṅnyoḍuh pukulun manəhta huripən veh janmajanman muvah
paṅgil ṅvaṅ maləseṅ hayu praṇata bhakty aṅkən ri jə̄ṅ saṅ viku
o maṅke ya harəp viratya ri kapaṅgihnyan gavemv iṅ hala
(d) PRS om maṅke, V o maṅkin.
24. āpan yan kuma vehanaṅkva ta ya janmeṅ rāt maluy duryaśa
śīrṇaṅ dharma vihāra śāla kuṭi len salvirnikaṅ śāsana
syuhən taṅ bhuvanāstamadhya ya nimittaṅkun pramāderi ko
oyū lvāmbək ikaṅ mahākaluṣa śūlaṅkun təkery aṅgamu
(a) PV janmāṅ, T janmā; (c) Y ta (text taṅ); (d) Y oyuh.
25. tampuhniṅ varaśūla ri pyah ikanaṅ pāpānrus ardhālaris
mumbul rāhnya sakeṅ kanin hana mijil saṅkeṅ iruṅ mvaṅ tutuk
glānāśāmrih asambasambat apəyəh śabdanya deniṅ lara
nāhan hetunikālayū sahananiṅ pāpāvədin kantuna
Canto 8. (Daṇḍaka: 46-49 × × ~ ~ ~ | ~ ~ ~ [: - ~ -:])
1. atha səḍəṅ alayə̄ṅ vatək pātakāvrəg tumon śīrṇa rovaṅnyan akveh sinujyan ta yeṅ śūla siṅ kary amet uṅgvanāhət=hətan taṅ vatək pātakāvor səsək tan vriṅ rātnyan silih-kol silih-tuṇḍuṅ amrih təṅah kedəkan deni rovaṅnya śīghrāṅaḍal yan tumaṅgal suməṇḍal ri jə̄ṅniṅ dulur ṅkān pinañcal kabuñcah cacal ghrāṇanikāprameyan tibāṅaṅsaraṅsar jumoṅkoṅ manoñjol i sorniṅ pakompolan iṅ rovah aṅhiṅ lamun tan katon deni śocānikaṅ rākṣasāmigrahāmburv anūt riṅ vatək pātaka
(a) RST alayu; V pāpakā-; (b) P kaṅary, RS hary; (c) RST silih kol lacking-, (d) T śīghrāṅadəg; (e) T ṅkā pinañcul; (g) P makoñjol; (h) Y -āburu.
2. hana ta ya maṅusir gunuṅ lohasaṅghāta mevvīvu lakṣa prakāranya śīrṇā təmahniṅ mahāparvata lvir rəcah mombakan rāh baṅun guntur aṅde takutniṅ vatək pāpa meh prāpta riṅ parvata ṅkān valuy muṅsir iṅ vṛkṣa khaḍgāpitovin tinūt denikaṅ kiṅkarākveh rapuh kaṅlihan prāpta riṅ vṛkṣa khaḍgā vvagan trus ya deniṅ tṛṇāstrāṅrəpāsambasambat ry anak mvaṅ laki-strī bapebunya maṅkin taṅisnyāsru deniṅ vvatək bhūta rakveṅ iṣuvṛkṣa bhedanya riṅ pāpa riṅ kāna hə̄bniṅ varāstradruma
(b) TV tah (text təmah); (h) mss. rakvāṅ; PRV rikāna, S rikama.
3. makakərəcik ikaṅ phalāstrānibe taṇḍas īkaṅ mahāpāpa len puṇḍak iṅ pṛṣṭhaka lvirnya laṇḍak jajanyeki sambar kacukcak gətihnyāsavaṅ dhātu muñcar kacūrṇan təkapniṅ vatək kiṅkarāmigrahāneka bhāvanya tan vriṅ vəlas yar vunuh lvir bavi lvir ayam siṅ kaharṣanya mattāṅinum rāh vaneh aṅgilut jə̄ṅ taṅan bhairavā yāṅuvuh ghora śabdanya mohāpulaṅ śoṇitābhrāṅigəl ramyaramyan ya taṇḍak sumaṇḍaṅ ta yosus pupurnyan tahi lyan nanah bo hanāṅrəmbarəmbat pukaṅ
(a) RS -ānibeṅ; P īkaṅ, T ikaṅ; (e) P bhavī, RS lvir bavi lacking; P māthāṅinūm, RS matəkaṅinum; (f) RS yaṅuhuh.
4. makin alara luyuk tikaṅ pātakan ton ri rovarinyan akveh sinaṅsāra deniṅ vatək kiṅkarāsaṅgəm osyan vaśānambaluṅ kaṇṭha len taṅ rumante təṅahniṅ vatək pāpa nāhannikaṅ tan kənāmet havan miṅgat aṅdoha saṅkeṅ ayahbhūmi nora pva mārganya māpan tinambak riṅ agny ujvalāgə̄ṅ ya hetunya tā pātakāṅuṅsi kivulnya mukvūk vatək kiṅkarākveh tiba kedəkan vetniṅ avrəg layū ṅkān silih-raṅkul amrih ta yārbut sikəp sañjatāglut silih-vor lavan pātaka
(b) RS -asaṅgam, T -āsaṅkəm, V -asaṅgham; (c) P rumante; (f) V taṅ T -nyāmūk-vūk, V nyamuk.
Canto 9. (Sragdhara: - - - | - ~ - | - ~ ~ | ~ ~ ~ | ~ - - | ~ - - | ~ - =)
1. tatkāla kleśaniṅ kiṅkaragaṇa kapahuṅ denikaṅ pātakāmuk
tan vriṅ rovaṅnya kevran sinaləsək inirup laṅguk astranya kabvaṅ
akveh mamrəp dulurnyāṅhaṅunaṅun anəpak taṅ srəṅən kasrəg opək
boṅgan baṅgāṅjəjək jə̄ṅnyan akiyu kavaləs karva sampun binuñcaṅ
(c) P dulurkaṅ-, S dulurnya-, TV dulurtaṅ-; P open; (d) P baṅkāṅ-; PV binañcaṅ.
2. maṅsə̄ taṅ bhūtavadvāgalak aṅamahamah kātarārampak agyā
mvaṅ sattvāsambhava krūra mahiṣa bhujaga vyāghra mātaṅga barvaṅ
yekānīrṇeṅ vatək pātaka kahala davut lvaṅnyan akveh matimbun
saṅsāraṅ pāpa mətv aṅ daləman aravayan tah rumuṅkuṅrumaṅkaṅ
(a) RS -aṅrampak; (d) T mətv ā.
Canto 10. (Śikhariṇī: ~ - - | - - - | ~ ~ ~ | ~ ~ - | - ~ ~ | ~ =)
1. hana rvaṅ lakṣa kvehnya sinudukan iṅ śūla madava
parəṅ riñcuṅ lvirnyan banava kajahat kaṇḍəm ananā
pinaṅgaṅ riṅ bahny ujvala kasih-arəp liṅnya karəṅə̄
pahəmpvan ḍū saṅ kiṅkarabala manəhta mpu huripən
2. mavas tiṅhal saṅ tāpasa kasihan iṅ pātaka kabeh
kapiṅrəs mavlas tar vənaṅ asiha riṅ pāpa kahala
rumab romanyan paścat atutur i sih saṅ hyaṅ i sira
ya hetunyānambah ri saparaparah śrī daśabala
(b) P mavlad vnaṅ, RS mavəlas ta vənaṅ, T ta māvlas tar vnaṅ.
3. hahā saṅ hyaṅ vairocana vara dahat sihta saphala
pakon saṅ hyaṅ prāpten yamani tuhu bhāgyaṅkun inutus
ya kevəhniṅ janman karakətan ikin kleśa vipatha
nahan lvirnyan ṅke pātaka tuməmu saṅsāra satata
4. samaṅkā mər śīghran laku katəka rakveh yamapada
kavahvan ramyāścārya sira mulat iṅ svarga subhaga
haləpniṅ nyāsātyanta racananikānopama ləyəp
agopuntən vaiḍūrya maṇimaya puñcaknya dumilah
(c) P nikaṅ nopama; (d) Ed. vaidurya.
5. tuhun tuṅgal doṣanyan amivalakən tvasniṅ umulat
ri denya prabhāghnālaya tuhu ya tan śāntikapada
kavah tāmbrākveh gomukha hana ri heṅ kadbhuta tinon
sinoṅan deniṅ vṛkṣa curiga phalanyāstra niśita
(b) T denyā-; P śaktikapada.
Canto 11. (Mṛdukomala: - - - | ~ ~ - | ~ - ~ | ~ ~ - | ~ - ~ | ~ ~ =)
1. prāpteṅ jro pura saṅ tapāṅdunuṅi saṅ hyaṅ antakapati
ṅkāneṅ veśma suvarṇa sambhrama bhaṭāra rakva matamuy
dūran tan vruha jāti saṅ ḍatəṅa teki śakramanira
sampun paṅktya səgəhnirānukhani kintu liṅnira nihan
(b) Y ṅkāne; (d) RS pastya, TV paktyā.
2. bhāgyan kuñjarakarṇa saṅ matapa riṅ sumeru himavan
ah ndyekī parananta len mapa gaventa masku ri kami
svecchāṅlālana harṣajāməṅaməṅ iṅ yamāṇḍabhavana
tambeyan mara riṅ yamālayan ujar ta saṅ kasəgəhan
(a) P sā; (b) T ndyekin; (d) P tambiryan.
3. don i ṅvaṅ para saṅ hyaṅ antaka kinon tumona kaluṣa
salvirnyan humiḍəp samastagativigraheṅ yamapada
ndan saṅ hyaṅ yama rakva mājarakəneki kāraṇanika
maṅkā teki vəkas bhaṭāra jina riṅ hulun yva ginəgə̄
(a) P ndon; (d) P vkasan, V ya.
4. sambaddhaṅkv iki yan kinon ḍatəṅa riṅ yamāntakapada
ṅūni ṅvaṅ tumameṅ vihāra varabodhicitta vimala
pūjāmantra paṅastutiṅku ri bhaṭāra gautamapati
harṣāṅrəṅv i sudharma sambulihaniṅ dadīki tinañan
(a) RTV sambandhaṅkv.
AG: the reading sambandha seems preferable.
5. ndātan rakva vavaṅ sirājari sudharma riṅ hulun usən
ṅkān motus ḍatəṅe yamāṇḍa makadon tumona kaluṣa
yapvan rakva huvus ḍatəṅ ṅvaṅ ikihən siran pavaraha
nāhan hetu ni saṅhulun para ri loka saṅ yamapati
(b) V ḍatəṅeṅ.
6. ah maṅkā pva təkap bhaṭāra maṅutus təkanta ri kami
maṅke ṅvaṅ mucape kita kramaniṅ ātma pāpa katəmu
ṅhiṅ tekī tiga hetuniṅ phala kabhuktyan iṅ hala-hayu
polah śabda manah salah siki hala nya kāraṇanikā
(b) P mucapeṅ; (d) P nike.
7. təkvan lvirnya kaniṣṭha madhyama hanottama kramanika
sor taṅ kāyikadoṣa deniṅ apaśabda duṣṭa paruṣa
sor taṅ śabda halanya deni halaniṅ manah yan ahala
lvir bvatniṅ girirāja pāpanika yan samūha katiga
(a) Ed. kaniṣṭa; (c) P sot iṅ (text sor tan).
8. opən taṅ tiga sambah arpaṇakəneṅ bhaṭāra sugata
kāyādhyātmika vīryavan phalanikin vibhūti katəmu
śabda svarga phalanya yan rahayu kastavanya satata
ambək nirmalabhāvanānəmahakən kamokṣan apagəh
9. ambək nāstika melik iṅ paraguṇāthaveṅ tan aguṇa
pāruṣyeṅ vacanan prabañcana ləñok biṣāmadulakən
duṣṭeṅ polah amaty añidra paradrəvya len paravadhū
yekin doṣanikaṅ tigāmuhara pāpa duhkha katəmu
(a) Y nisnika; (c) RS dusta, TV duṣṭe.
10. tonən lvirnikaṅ ātma pāpa tinəmunya riṅ yamapada
saṅ jīvanya tatan pəjah tan ahurip lanān sinakitan
yapvan doṣanikākədik ya ta vinigrahālpi tan agə̄ṅ
kapvānūti yathākramanya ri saduṣkṛtinya katəmu
(b) P lanā; (c) R -aləpit tan.
11. yan drəvyārtha suvarṇa ratna ṅuniveh pirak paśu pari
ṅhiṅ hīṅanya karīṅ umah ri sapatinya tan təmu muvah
yapvan mitra kadaṅ śmaśāna juga yeki hīṅan ikahən
aṅhiṅ lvir prativimba taṅ sukṛtaduṣkṛteriya tumūt
(d) P kaṅ.
12. āpan tan dadi tan kabhuktya phalaniṅ gave hala-hayu
kūnaṅ siṅ sukha duhkha tan hana vaneh panaṅkan ikana
saṅkeṅ svātma jugan tumuntun i sakarma ṅūni katəmu
nāhan hetuni saṅ mahāsujana tan pramāda tuməmu
(c) P ātma, TV svāta.
13. yan tan kohutanaṅ manah sakaharəpnya tan pahuvusan
tṛṣṇeṅ indriya lobha śaktinika tan tinaṅgvan iriya
byāpāreṅ viṣayā gavenya ya ta duryaśāmulaṅuni
tan vyarthan vinatəknikaṅ hala mareṅ kavah vəkasika
(a) P yā; P kotutanaṅ, RST kohutana (T -ā).
14. vyaktinyan paḍa muṅsi riṅ yamani nitya tan papəgatan
vvantən mārga linampahanta mara ṅūni marsik agənət
mvaṅ taṅ lohasubhūmipattana sayojaneki hibəkan
deniṅ kvehniṅ adharma duṣkṛta ri martyaloka kujana
15. ndātan maṅkanaṅ ātmamārga ḍatəṅ iṅ surālaya samār
lumrā rəṅkəd ikaṅ tṛṇāṅkura latāsəvə̄ sumarasah
tistis tiṅgənəsən hanan kadi purāpurāṅ ana samun
mevəh taṅ vvaṅ aṅuṅsya yogya ḍatəṅ iṅ surālayasabhā
(a) T sumār; (b) P -āṅrəṅkəd; (c) P tiṅgənəsin; Y puraṅ-purāṅ; (d) P aṅusya.
16. ḍū maṅkā pva nimittaniṅ kujana pāpa riṅ yamapada
ndyānuṅ hetunikāhurip muvah asambhavan tuhu pəjah
āpan māti ri martyaloka kəta liṅnikaṅ vvaṅ irikā
ah maṅkā pva tañanta yuktinikaṅ ātmabheda ya rəṅə̄n
(a) P pāpa niṅ; (c) P māti riṅ, RS mabiri; (d) RS rəṅə̄.
17. nāhan lvirnikaṅ ātma yan lima śarīra mātra mapupul
ātmādinya kalih parātma lavan antarātma katiga
pāpatnyeki nirātma piṇḍanika cetanātma kalima
tṛṣṇeṅ cetana kāraṇanya dadi tuṅgal ātma kalima
Canto 12. (Jaloddhatagati: ~ - ~ | ~ ~ - | ~ - ~ | ~ ~ =)
1. nimittanika yan mareṅ yamapada
təkapnikaṅ adharma duṣkṛta tumūt
balaṅku ya mamigraheriya sadā
apan krama ni duṣkṛtinya tumagih
2. kunaṅ ta sira saṅ viśeṣa kaluput
viśāta sira maṅlugas ry avakira
pratīpa vatu tulya tar papatuduh
sirāgavay i rūpaṅ ātma kalima
(c) Y pradīpa.
3. pitovi hana riṅ śarīra sakala
ndatan vənaṅ atah sireki tinuduh
apan sira haneṅ hiḍəp mvaṅ atuduh
dumeh pisaniṅun siran kahiḍəpa
(a) P niṅ; RS mabala, TV bala.
4. lavə̄ mara varahku teki ri kita
paṅavruhana saṅ hyaṅ ojar ahələm
bhaṭāra jina saṅ priyastuti sira
apan sira viśeṣamūrti mavarah
5. bhaṭāra yama toh yaśanta tulusa
ghṛṇānta ri si kuñjareki saphala
muvah mapa kətaṅ kavah vinasəhan
ndya donanika yan huvus vinasəhan
6. valiṅkv iriya baryanesyana kabeh
balik ya kumurəb tar esi sasiki
mapeki karaṇanya maṅkana ləgə̄
ike pva patañanta mājara kami
(a) P valikv; (d) T ika; T mājari; V patanyaṅkva pājara.
7. haneki mara pāpa bhāra labuhən
lavasnya riṅ aveci vigrahan usən
ikiṅ śatasahasravarṣa ya kəlan
gənəp pva ya haneṅ kavah kasih-arəp
8. samaṅkana təkā saṅ astra śakuni
ruməṅguta riṅ ātma duṣṭa kaluṣa
ya və̄rakəna rakva riṅ taru vəsi
mvaṅ antəpakəneṅ rvi khaḍga niśita
(c) Y rikanaṅ (text rakva riṅ).
9. huvus pva ya vavan mareṅ təgal ayah
ginantuṅana riṅ pətuṅ sukunikā
apuy murub i sornya tan papəgatan
paḍeka lavasanya riṅ sakalagi
(b) PTV agantuṅana; (d) RS padeki.
10. kunaṅ matika meh marā ri yamani
pituṅ vəṅi vəkas hiner ya ḍatəṅa
ya kāraṇanikaṅ kavah vinasəhan
anuṅ paṅəlaneriyan təka hələm
11. uḍuh saphala de bhaṭāra mavarah
hanan kadi linād hatiṅku ruməṅə̄
harəp ṅhulun adadya mānuṣa jəmah
katon kasihan iṅ dadi vvaṅ arusit
12. muvah tañakənaṅkv i saṅ yamapati
syapeki paṅaranya pātaka kəlan
arah pva varahən ṅhulun kita laki
kadi vruha kiteki nāma rasikā
(a) P tañakənakv, V tanyakəniṅkv.
Canto 13. (Sragdhara: - - - | - ~ - | - ~ ~ | ~ ~ ~ | ~ - - | ~ - - | ~ - =)
1. vvantən gandharvanātha prakaśita subhageṅ kendran atyanta śakti
tan len nāmanya saṅ pūrṇavijaya paḍa riṅ svarga lāvan hyaṅ indra
akveh rakveki duśśīlanika tan apagəh riṅ mahādharma ṅūni
nāhan hetunya yar vigrahan alavas usən denikaṅ bhūtavadva
(c) Y durśīla; (d) Y ya; P avalas.
2. maṅke pvāmukti riṅ svarga tuməmu phalaniṅ puṇyakarmanya ṅūni
ndan vvantən duṣkṛtanyāṅiku yatika tumūt kapva yāminta bhuktin
nāhan pājar bhaṭārāntakapati ri siraṅ tāpasa lvir kagə̄man
ḍū maṅkā kupva saṅ pūrṇavijaya ta karih pātakātyanta bhāra
(b) T tapva; (d) S lara (text bhāra).
3. siṅgih ṅvaṅ sānakādharma rasika karaṇaṅkvātapāṅuṅsir adri
deniṅ dāgeri saṅ pūrṇavijaya tuməmu svarga vidyādharendra
tambis ta ṅvaṅ pramādeṅ gati pijər aharep vīrya riṅ svarga ramya
byaktā ṅganya ṅhulun muṅgva ri niraya yatan bhaktya riṅ śrī jinendra
(b) TV tuməmu-ṅ; TV -dhanendra.
4. maṅke vyaktinya saṅ pūrṇavijaya tuməmuṅ kleśaniṅ deha kuṣṭan
nirdon denyānəmuṅ svargavibhava ratuniṅ deva vidyādharākhya
ndātan lupteki doṣanya dadi kabalik iṅ pātakāgə̄ṅ bhinukti
ndan dūran vruhvruheṅ pātaka rasika təkapniṅ kavīryan pramāda
5. maṅke vyaktiṅkv i saṅ hyaṅ yama tulusa juga ṅvaṅ magurveṅ sudharma
āpan ṅhiṅ sambhavāṅraṅkəpana ri sihira śrī mahāśākyasiṅha
tovin lambā tvas i ṅvaṅ maśaraṇa ri turuṅniṅ hulun bhakty anəmbah
nāhan liṅ saṅ tapa hyaṅ yama sira vihikan yan pakon śrī jinendra
(d) P tapā, V tape; RS sira lacking; R vihikana.
6. sampun saṅ tāpasāṅañjali ri sukunira hyaṅ yamāṅde katuṣṭan
yekātakvan muvah yan dadi maluya tikaṅ pātakeṅ martyaloka
mvaṅ yan tansah vinighnan ri yamapada sadāṅgə̄ṅ mahāduhkha tībra
mājar saṅ hyaṅ yamāvāsananika ri huvusnyan pamuktiṅ yamāṇḍa
(a) P -āñjali; (d) SV mojar; P huvusnyā; P mamukti-ṅ, RSV pamukti.
7. ndan cihnanyeki saṅkeṅ niraya hinanakən janma riṅ martyaloka
kadyaṅganyaṅ hayan kuṣṭa vuta tuli bisu bhrānta vuṅkuk bule vval
siṅkəl gondoṅ kətəṅ mvaṅ vəlu busuṅ avatuk maṅgirih vyādhi lumpuh
yan svasthaṅ dāsadāsī ya putuputu kumiṅ jaṅgitan vādi valyan
(a) P yinanakən, RS inənakən, TV hinənakən; (c) Y siṅkəṅ; T goṇḍoṅ; P kətəṅ, RS kəjəṅ; PRSV vilu; (d) P svastā.
8. lāvan taṅ bhāra doṣanya yatika matəmah mleccha caṇḍāla tuccha
dadyaṅ lintah hulər sthāvara paśu mṛga len gāḍaphāt mīna pakṣi
nāhan taṅ pāpajanma lvir ika tan ahaləp bheda saṅ sādhujanma
yekin liṅ hyaṅ yamāṅde tutur i manah i saṅ tāpasātyanta tuṣṭa
(b) RSV dadya; RTV svāvara; R kadadat, S kadadəmit, T gāḍapāt (?), V kaḍaḍat.
9. mamvit saṅ tāpaseṅ hyaṅ yama ri təlasirāṅarcana ṅkān lumampah
lagy ālonlon lanā lvir həlahəla mihat iṅ svargamārgātiramya
tovin kāṅən siraṅ pūrṇavijaya labuhən riṅ kavah dlāha rakva
gə̄ṅ kāruṇyeṅ pamitran karaṇanira mareṅ kendran otus prayatna
(a) T tāpase; (b) P ālon lolanā (or lālanā, with taling crossed out?).
Canto 14. (Śikhariṇī: ~ - - | - - - | ~ ~ ~ | ~ ~ - | - ~ ~ | ~ =)
1. tuməṇḍas riṅ svargedran umulat i ramyāṣṭakapada
riṅ indrasvargan vetan analapadāgneya kaparək
kidul ṅkā svarga hyaṅ yama kaparək iṅ rākṣasapati
kakulvan svarga hyaṅ baruṇa kaparək mārutapada
(a) RTV svargendran.
2. kuverasvargeṅ uttara paramayakṣādhikapada
riṅ aiśānya śrīśānapada sira bhūtendra sinivi
katon taṅ triśṛṅgālaya ləvih i madhye śivapada
kidulnyan brahmasvarga muvah aṅalor viṣṇubhavana
(b) RS riairsanya, TV riṅ airśānya; (c) P śrī śṛṅgālaya.
3. vəkasniṅ svarga hyaṅ baruṇa lavan iṅ rākṣasapati
ikā svarga śrī pūrṇavijaya cinunduk saṅ atapa
haləpniṅ svargānekaracana paniskāra dumilah
təkapniṅ veśma svarṇa muvah ataviṅ gopuramaṇi
(b) T cinuṇḍuk.
Canto 15. (Jagadnātha: ~ - ~ | ~ ~ - | ~ - ~ | ~ ~ - | ~ ~ ~ | ~ ~ ~ | - ~ - | ~ =)
1. samantara kavəṅyan amrih aṅusir paranani saṅ iniṣṭi pājarən
tuhun kadi śaśāṅka taṅ rajatabapra gupuramaṇi sarva bhāsvara
təlas kahalivat sirerikaṅ apantv akəmit i yava tan panaṅśaya
apan vruh i samitra saṅ pravara pūrṇavijaya ya ta hetuniṅ laris
(a) Ed. samāntara; V aṅiṣṭi; (c) Y kalivatan; RSV apintv.
2. ḍatəṅ tumama riṅ lavaṅ ri daləm asyaṅ atəhər anatabnatab lavaṅ
səḍəṅ pva maturū sira pravara pūrṇavijaya ri kisapvan iṅ priyā
siraṅ kusumagandhavaty adhikanāmaniran ahayu kastavenaləm
kataṅgamaṅ anaṅhi saṅ sənəṅ ajar sira ri hananiṅ asyaṅ iṅ lavan
(b) RV siraṅ; mss. priya; (c) T nira hayu; (d) V kataṅgama manaṅis; R anaṅis, S anaṅi.
3. samaṅkana saṅ apsarādhipa ruməṅvakən analiṅa śabda saṅ ḍatəṅ
kakaṅkv asura kuñjareki liṅirāsyah aṅutus aməhākənaṅ lavaṅ
kakaṅku tija bhāgya teki kadi riṅ svapəna ḍatəṅ i kālaniṅ vəṅi
haneki yayi kārya bhāra karaṇaṅkva halinalin i masku tan sipi
(b) P aməṅākəna, R ambə̄kəna-ṅ, T aməṅākəneṅ, SV = text; (d) V ali-alin.
4. ṅhulun marək i jə̄ṅ bhaṭāra sugatādhipa riṅ amṛtabodhi nirmala
kumon ta sira muṅsireṅ yamapadāṅlihatana riṅ amukti pātaka
mavās pva mulati ṅvaṅ iṅ sakalapātaka paḍa humiḍəp larādhika
tuhun hana ta roravan vinasəhan tinañakən i kakanta don ikā
(a) Y ri; Ed. jə̄n.
5. kitekana kəlan sahasraśatavarṣa mara ya lavasanta riṅ kavah
huvus pva kita riṅ kavah vavan iṅ astrataru təkap ikaṅ khagāsura
təlasnya mara riṅ ayahdharaṇipattana ta kita ginantuṅ iṅ pətuṅ
kunaṅ mara hiner pituṅ vəṅi vəkas kita lumabuha rakva riṅ kavah
(c) RS -pataka, T -pātakana.
6. nahan mara varah bhaṭāra yama ṅūni ri kami kita hayva tālupa
ṅhulun muliha deniṅ agya marəkeṅ padakamala bhaṭāra gautama
na liṅ ra tapa kuñjareki vahu rakva tumurun i baturnikaṅ salə̄
sinambut iki jə̄ṅniran tinaṅisan təkap i saṅ amarāpsarādhipa
(c) S sala, V hənu.
7. ahah kaka mapolahaṅku sipi gə̄ṅ i kavədi ni arinta pātakā
rəbut kaka sakeṅ kavah jəmah arinta palar amaləsāmbək uttama
palakv i sira saṅ yamādhipa huripku valuyakəna riṅ kadevatan
yadin pva vəlin iṅ suvarṇa maṇi ratna rajata huripiṅ hulun kaka
8. uḍū mapa ta dāya ni ṅvaṅ apa tan hana mara ya paṅoṣadheriya
si pāpa kəta tan haneki ya vəlin hurupana maṇi ratna kañcana
ndya gantyanika masku yan mahutaṅ artha kəna sahurən iṅ samaṅkana
gatintaṅ apadharma pātaka juga kramanika panahurta tan vaneh
(c) Y ganta; (d) TV apa karma.
9. hanā hyun i kakanta milva kita riṅ hulun umarək i jə̄ṅ mahājina
sədəṅnira haneṅ vihāra varabodhi vimala paramādhikottama
riṅ eñjiṅ iki maṅkat antən iriṅən təkap ikaṅ amarāpsarāpsarī
kakanta yayi rovaṅanta təhər aṅhaturakəna ri jə̄ṅ mahājina
9(d)-12(c) lacking in RS.
10. samaṅkana varāpsarādhipa kumon mataga bala surāpsarāpsarī
lavan kasih ireki vinvit ira marma vacananira kady avor madhu
ariṅku kita karya riri gṛha kakantan umarəka ri jə̄ṅ rnahājina
hayunta kəkəsən si mūlya pahayun tan alavasa kakanta riṅ paran
11. na liṅ vivudhanātha maṅkana ri saṅ kalulut ira sinaṅgrahenamə̄r
prahāsananirāṅharas pipi hanan sumuṅakən i səpahnireṅ vaja
mənəṅ kapənətan ndatan huniṅa rakva saṅ ahayu ri pamvit iṅ sənəṅ
kasaṅśayani citta yan lumarisālama karaṇani luhniran hili
(d) Ed. kasaṅsaya ni; P lumarasā-, V lumarisapata.
12. taṅeh yan uniṅan sapolah ira lavan i pasəgəsəgəhnireṅ tamuy
vaṅun rahina kāla sampun arahup vivudhapati madan mabhūṣaṇa
tuhun sahananiṅ balāṅiriṅ i lampahira paḍa sənādha maṅhadaṅ
təgəpni vinavanya liri susuruhan ya maṅinaki ri buddhiniṅ tuhan
(d) RS tuvan.
Canto 16. (Suvadanā: - - - | - ~ - | - ~ ~ | ~ ~ ~ | ~ - - | - ~ ~ | ~ =)
1. maṅkat gandharvanāthāhaləp aṅiriṅakən sāmitra sutapa
ramyaṅ vidyādharī mvaṅ vivudhabala tumūt ṅkāne vuri pənuh
lvir tārāsaṅgha lumrāsinaṅ aṅalih anūt vyomānuluhi dik
deniṅ raktāmbarālaṅkṛtanikara savah tejanya dumilah
(a) Y iṅiriṅakən; TV saṅ mitra; (b) T ṅkāneṅ; (c) RS tarasiṅga; PV lumraṅ sinaṅ; (d) Y -ambara laṅ kṛta-.
2. śīghra prāpteṅ vihāra prakaśita maṅaran sambodhi vimala
ṅkā taṅ siṅhāsana svarṇa maṇi hinanakən de pūrṇavijaya
parṇah sthānānira śrī daśabala mavarah dharmādi saphala
āstām lvirniṅ vitānāṅḍiri sumaji patāka mvaṅ dhvaja pajə̄ṅ
(a) P sambodhimala; (b) Y hinənakən; (d) P -āḍiri, RSV -aṅdiri, T -āṅdiri; P pātaka.
3. lavan vastrottarīyābharaṇa dinuluran naivedya mahaləp
dhūpa mvaṅ dīpa gandhākṣata sadulur ikaṅ pādyārgha tan adoh
mālyārum puṣpamālā prakaṭa vaṅinika mrik mār saha jənu
ṅkāmūjā saṅ rva ri śrī sugatapati nihan toccāraṇanira
(a) V vastrottama riya; P dinulurānnaiṅvedya, RS dinuluran nivedya; V nevedya; (c) RS prakasa, T prakaśa; (d) R tocaranira, T tocāraṇanira.
Canto 17. (Śārdūlavikrīḍita: - - - | ~ ~ - | ~ - ~ | ~ ~ - | - - ~ | - - ~ | =)
1. oṃ səmbahniṅ aṅarcane padayuga śrī dharmarājādhika
saṅ muṅgv iṅ varalokadhātu makacaityaṅ byoma tar popama
saṅ hyaṅ riṅ sakalātma niṣkala dadintānanta śuddhākṛti
hyaṅniṅ hyaṅ tridaśāsurādi bhamitan bodhyagrimudrādhara
(b) P makacettyaṅ; Y makacetya byoma tan; (d) TV boddhyotri-; R -asrimudradara, S -agri-.
2. byāpibyāpaka riṅ samastabhuvvana prajñāvak iṅ nirmala
sthānanteṅ bhava śūnyatā ganal alit sūkṣmanta dūrāparək
saṅ sākṣāt paramārthasāri ri hiḍəpniṅ prāṇa devāśraya
īcchānteki sinaṅgah an kita haneṅ tīrtheṅ vukir sāgara
3. hyunteṅ puṇya parārtha kāraṇa tinūtniṅ bodhisattvātmaka
sə̄hniṅ vīrya mahāpradhāna kaharan saṅ dharma śuddhāmita
lvir varṣeṅ masa kārtikāmṛtani sihteṅ loka tulyāṅkura
lumrā lvir śaśi sūrya teja karuṇanteṅ sarvasatvāpagəh
(b) P riṅ (text niṅ); TV sandharma; (d) P -āpaguh.
4. nāhan tādinikaṅ stutīnujarakən saṅ bhakty amūjārarəm
ṅkā yan mojar i jə̄ṅ bhaṭāra mahatur səmbah təhər sādara
sājñā śrī ṣaḍabhijña sampun umulat ṅvaṅ lvirnikaṅ pātaka
tovin vaspada de varah yamapatī mūlanya yan kilviṣa
5. paṅhyaṅni ṅvaṅ i jə̄ṅ bhaṭāra sugatā śuddhanta maṅke təḍan
vvantən teki manəhta karva varahən riṅ dharmatattvādhika
rapvan tan hana vighnaniṅ hulun avas muṅsī pada hyaṅ jina
āpan tan maharəp maṅuṅsya phalaniṅ svargālpa vāhyāśraya
(a) RS pan hyaṅ, T pahyaṅ; RS maṅke tədan, T maveṅkantḍan, V maṅken təḍan; (c) RS muṅsir.
6. tan muktyeṅ bhavacakra durgama bhayātyantābalik duhkhita
vyaktinyāṅdadiṅ anta pūrṇavijaya svargāpsarendrādhipa
nistanyan bhaya maṅkaneka labuhən rakveṅ kavah gomukha
ndan liṅ hyaṅ yama pātakanya tiga ri ṅvaṅ ndan tigaṅ tvas huvus
(b) V vyaktinyan-; V -vijayaṅ; (c) P sistanyan; (d) ta(va) ri ṅvaṅ (va added), R tiga vaṅ, T tiga riṅ vvaṅ, SV = text.
7. om putraṅku mahāpavitra kaharəptātyanta riṅ kottaman
an mahyun kita muṅsyaṅ uttamapada nyaṅ mokṣamārgā rəṅə̄n
ndin toṅgvanta daṅū ri kālani bibintānvam səḍəṅ kanyakā
ndy uṅgvanteṅ bapa ṅūni dug taruṇa riṅ śūnyāthaveṅ antara
(b) RS hana hyun; (c) P ndī.
8. saṅkeṅ rāgani saṅ yayah bibi nimittanyāmaṅun saṅgama
saṅkeṅ liṅgani saṅ yayah kita mijil ndah lvir timah syuh drava
siṅgih kāma haranya maṅkana ratih nāmanta rakteṅ bibi
muṅgv iṅ padmavikāśagarbhaniṅ ibu ṅkā yan mapiṇḍākṛti
(c) P kteṅ, RS rakəteṅ.
Canto 18. (Upendrabajra: ~ - ~ | - - ~ | ~ - ~ | - =, Indrabajra: - - ~ | - - ~ | ~ - ~ | - =)
1. tinūt hanekiṅ varapañcabhūta
təkvan gaveniṅ pṛthivī śarīra
gavenikaṅ teja yateka cakṣuh
vvay tar vaneh mukhya gavenya jihvā
(a) R aneki, S haneki, T tanekī; (d) P = text: vvay tar, R vayəta, S vayta, T vvayāta, V veta; mss. jīva.
2. samīraṇośvāsa gavenya tan len
ākāśa tekaṅ gumave śirahta
kabeh paḍāsambuṅ apiṇḍa jīva
sambuṅnikaṅ bhūmi ya cetanātmā
(d) P sabuṅ.
3. pasambuṅ iṅ vvai yatikaṅ nirātmā
ndah sambuṅ iṅ teja taṅ ātma sākṣāt
pasambuṅ iṅ bāyu taṅ antarātmā
sambuṅniṅ ākāśa kətaṅ parātmā
(a) T vvayanikaṅ; (b) P ndā; (d) P pasambuṅnikaṅ hakasa parātmā.
4. ya don iṅ ātmā lima riṅ śarīra
ātmā parātmā lavan antarātmā
muvah nirātmā saha cetanātmā
na lvirnyaṅ ātmān lima riṅ śarīra
(a) RS na don; (c) RS (muvah lacking) niratma kalavan ikaṅ cetanatma; (d) V lvirnyan; P ātmā.
Canto 19. (Basantatilaka: - - ~ | - ~ ~ | ~ - ~ | ~ - ~ | - =)
1. ātmā ṅaranyaṅ avaloka mulat rikiṅ rāt
tar paṅrəṅə̄ svara kabeh yatikaṅ parātmā
uśvāsa bāyu ya sinaṅgah ikāntarātmā
ndan śabda vastunika taṅ maṅaran nirātmā
(a) RS ṅaranya; Y hana loka; (b) RS tan, V an; (c) TV yan inaṅgah.
2. tovin kətəg-kətəg iṅ aṅga ya cetanātmā
tṛṣṇa svakāryanikaṅ ātma limeṅ śarīra
yekan śarīranikanaṅ varapañcabhūta
yapvan gənəp tithimasanta mijil samaṅkā
(d) V -masanya.
Canto 20. (Bhujaṅgaprayāta: ~ - - | ~ - - | ~ - - | ~ - =)
1. sinuṅsuṅ kitenāpti de saṅ bibinta
asiṅ saprakāranya mānak ginəṅnya
ahorātri dīnāturū syaṅ sumaṇḍah
lukan kasyasih mabratāmet huripta
(c) P ahoratrya; P cumaṇḍa.
2. lavan saṅśayātākusut glāna rukṣa
təkapnyāsih iṅ putra maṅde putək tvas
lanāmrārthaneṅ svastha dīrghāyuṣanta
ləvəs kaṣṭa denyāṅivə̄ mopakāra
(a) P lavan ta.
3. nda nāhan hutaṅteṅ bapenduṅta ṅūni
lalu pvātuhāntukniṅ utsāha yatna
kasənvan təkapniṅ śaśāṅkārkateja
ya tan vruh manaṅgah bapenduṅ samaṅkā
(a) R utaṅte.
4. mijil taṅ musuh ṣad haneriṅ śarīra
yatekāmisan ry aṅga pañcāṅga sākṣāt
bhaṭārādidevanya muṅgv iṅ śarīra
səḍəṅtānakəby ambək aṅde kamānan
(a) mss. hana riṅ; (b) TV yatikā-; RST (y)yanga; (c) P -nya lacking; TV muṅgv ī.
5. ahəṅkāra sampay ta yeṅ vvaṅ daridra
tan atvaṅ mucap riṅ viku vṛddhaśīla
lalī saṅkan iṅ janma lavan paranya
ya donyan katon denta pāpeṅ yamāṇḍa
(a) P sampayayeṅ; (d) Y pāpe.
6. hutaṅniṅ dadi vvaṅ ya toṅgvannikā pat
jagatmukhya saṅ hyaṅ guru mvaṅ kamūlan
kabhaktin ri saṅ hyaṅ panāhurta riṅ hyaṅ
jagat hayva duhkha prihən tuṣṭaniṅ rāt
(c) PT ri hyaṅ, V saṅ hyaṅ (text riṅ hyaṅ = RS).
7. hutaṅ riṅ guru prih sahurteṅ svaśiṣya
hutaṅ riṅ bapenduṅ sahurteṅ suputra
makopāyaniṅ tar pəgat bhakti nitya
sabhāgyan tuməmvaṅ kamokṣan pradhāna
(b) T bapebu; (c) P ni; Y tan.
Canto 21. (Mṛgāṅśa: - - - | ~ ~ - | ~ - ~ | ~ ~ - | ~ ~ ~ | ~ ~ ~ | =)
1. yekin janmarahasya mūlya pavarahkv iri kita pituhun
ndah yatneriya paṅrəṅə̄ varavarahku tan imanimanən
ṅhiṅ maṅke phala mon tuməmvakən ujar mami saphala dahat
astu kleśa vināśa teki ri śarīramu kalih anaku
(a) P mituhun; (b) P iman-iman, V ima-imanən.
2. nā liṅ śrī sugatāmadharmakən i saṅ rva paramasulabha
ṅkā tānəmbah i jə̄ṅ bhaṭāra sira saṅ yativara sumahur
sājñā saṅ hyaṅ anugrahānulusa māsiha riṅ aśaraṇa
nirjanmaṅkv i samokṣasādhana təḍan ri pada jinapati
3. om putraṅku pavitra mūlya juga sādhyamu saphala dahat
ndā nāhan mara paṅhilaṅ halaniṅ indriya sakalamala
toya jñāna viśuddha paṅrahupa paṅdyusa ya lagilagin
rapvan bhraṣṭa kətaṅ gələhgələh amighnani hana riṅ avak
(c) P pārahupa; (d) TV yapvan.
4. tan vvai riṅ vulakan pitovi tan i śaṅkha saha japa vidhi
tan siddhā hilaṅā kətaṅ gələgələhnikiṅ avak ahala
ndātan dūra sakeṅ śarīra putus iṅ həniṅ inulahakən
yekā nirmala kājar īya paramārtha kinatəṅətakən
(a) Y tan i saṅkana sahaja vidhi (P pa subscribed in japa); (b) TV hilaṅāṅ; (d) TV kājariṅya; RST kanatəṅətakən.
Canto 22. (Sragdhara: - - - | - ~ - | - ~ ~ | ~ ~ ~ | ~ - - | ~ - - | ~ - =)
1. nāhan tekaṅ sinājñan ya tuhutuhu śarīraṅkun āvak bhaṭāra
ya ṅkā ya ṅke sinaṅguh ya kita ya ta kami khyāti riṅ svargaloka
nistanyan maṅkanevəh saṅ avaśa vihikan ry arthaniṅ yopadeśa
putraṅkun mahyun iṅ mokṣapada pagəhakən hayva buddhi prapañca
(b) P yyaṅ ka hyaṅ ke; RS yaṅka yaṅke sinaṅgah ya tika ya ta kami; TV sinaṅgah.
2. āpan durgrāhya ta yārusit aganal alit durlabhā vvaṅ tuməmva
yadyan ṅganya vruheṅ arthanika juga yayan byakta maṅgih pavitra
bhāgyan vikv amrih asaṅva sira kaləpasən tan kəneṅ kleśamāla
ndan hayvātāpilih riṅ tiga kita yadiyan bauddha śaivārṣi dibya
(a) PV ṅvaṅ; (b) TV yaya; P maṅgəh; (d) Y kiyadinayan; Ed. boddha.
3. he he putraṅku kālih marəka kita ri jə̄ṅniṅ hulun ṅke paliṅgih
vvantən vastv āviśeṣānilibakən i kita ndah gatinyocapənku
ndā nāhan tānaku ṅhiṅ hika rinəbut i saṅ bauddhaśaivārṣipakṣa
ndātan maṅgātut āpan paḍa luməvihakən ry ādidevanya sovaṅ
(a) TV parəka; (b) P -ocapanku; (c) Ed. boddha-.
Canto 23. (Jagaddhita: - - - | ~ ~ - | ~ - ~ | ~ ~ - | ~ ~ ~ | ~ ~ ~ | - ~ - | ~ =)
1. maṅkā lvirnika saṅ guməgvani tapabrata maparəbutan manahnika
nāhan kāraṇaniṅ vatək viku haneṅ janapada kasilib ndatan ləpas
nora vruh ri patuṅgal iṅ yaśa siki rva təlu dadi aneka tan vaneh
lvir glar sogata pañcabuddha ṛṣi pañcakuśika viku śaiva pañcaka
(d) S pañjaka.
2. ndan salvirnya yayan śarīra mara sinyaṅ irika ya nihan paṅavruha
akṣobhyāvakiraṅ mahākuśika garga niyata sira ratnasambhava
saṅ metrīky amitābha saṅ ṛṣi kuruṣya makaṅaran amoghasiddhy avas
saṅ pātañjala tāku tan hana vaneh ṅhulun adhipati bauddhadevata
(b) TV irā (text iraṅ); (d) Ed. boddha-.
3. yapvan pañcaviśikki yuktinira pañcasugata paramārtha tan vaneh
akṣobhyāvakira hyaṅ īśvara tuhun cinarita juga bheda lakṣaṇa
hyaṅ brahmā sira ratnasambhava mahāmara siraṅ amitābhadevatā
tan lyan saṅ hyaṅ amoghasiddhi madhusūdana ṅaranira yan caturbhuja
(a) RSV pañcaviniki, T pañcaviṇīki.
4. ndā nāhan ri patuṅgatuṅgalan ikaṅ bhuvana vihikananta riṅ tuhu
ṅvaṅ vairocana buddhamūrti śivamūrti pinakaguruniṅ jagat kabeh
nāhan donkv iṅaran bhaṭāra guru kaprakaśita təka riṅ sarāt kabeh
aṅhin byāpaka riṅ samastabhuvanāku juga varaviśeṣadevatā
(b) RS pinakadinika guru-gu(ru lacking ṅi S), T pinakānika guru guru, V pianakadiguruguru nikaṅ, all instead of Śivamūrti pinakaguru.
5. saṅsiptanya bapaṅku hayva kita tan tuhu-tuhu makabuddhi nirmala
hayvāṅastava pakṣa pāpa hana melika ruməgəpa śānti kevala
astu pvānaku siddhasādhya kita karva laki phalamu labdhadeśanā
nāhan vākyani buddhi saṅ hyaṅ i siraṅ rva yativara muvah maṅañjali
6. śṛddhā saṅ hyaṅ adharmadeśana tatan kapalaṅalaṅ aveh anugraha
ndātan kojara jāti rākṣasa manəhta təkap i karuṇānta don ika
lavan saṅ vivudhendra pūrṇavijayāṅga rasika mari kuṣṭa durmala
sambegaṅ hulun amvitāhulihanaṅ patapan umusiraṅ mahāpada
(c) RSV kasta, T kaṣṭa; (d) Y -āṅulihana; P tapapan umuṅsiraṅ, T pan umusiraṅ.
7. sampun mamvit anambah iṅ pada bhaṭāra ri valuyanireṅ tapovana
saṅ vidyādhara kojara pva kavəkas marək i pada bhaṭāra gautama
maṅsə̄ prāptaṅ umaṇḍəma praṇata bhakty amalaku vidhi mokṣa vigraha
prāyaścittanirātəhər vuruṅa pātaka kəlan iṅ aveci gomukha
(b) P kva (text pva).
8. mojar teki bhaṭāra tan hana maroṣadhani təkaniṅ antakakṣaya
yāvat bhāva śarīra sakṣaṇa katatvan ika niyata tan hana sthiti
putraṅku pva śarīrabhāva riṅ apanta luputa kita riṅ samaṅkana
ndan vvantən phala mon huvus kṛtavarāmiḍəṅərakən i dharmaniṅ hulun
(b) V saksanika tatvanika; P sakṣaṇika tatva niyata tan hana sthitiṅstanā.
9. nidrā teki havanta māti tuvi tan kalavasana mamuktya pātaka
hīṅanteṅ nirayāṅgəgə̄ lara saṅaṅ vəṅi katutur i sojariṅ hulun
ākāranya dasaṅ vəṅīrika kitāvaluya muvaha pūrṇa śāśvata
salvirniṅ varavigraheri kita dadya kahala viparīta niṣphala
(a) TV mamukti; (c) T daśā.
10. aṅhiṅ teṅətiṅət ri kālaniṅ aturva ruməgəpa ri citta nirmala
sampun teki pəsatniṅ ātma pəkul iṅ tutur i kavaluyanya riṅ śava
ndah yekānaku jīvavāsita ṅaranya vənaṅa kita dūralālana
nā liṅ śrī ṣaḍabhijña rakva ya sinambahakən ira saṅ apsarādhipa
(b) P məsat.
11. sambahniṅ praṇatāṅabhakti ri padadvayakamala bhaṭāra nityaśa
vāhyādhyātmika sādarārcana ri jə̄ṅta lihatana təkap jinādhipa
saṅ sākṣāt gumave jagaddhita sadāśrayaniṅ aśaraṇa kriyāsmṛti
māyākāra pakātmaraksa pəta vimba ri hati pinakeṣṭidevatā
12. saṅsiptan ri huvusny anugraha bhaṭāra kahiḍəp abhiṣeka tan vaneh
aṅhiṅ teki bhaṭāra buddha juga kāraṇani kaparipūrṇaniṅ hulun
ndātan səṅgahən ambək iṅ kuhira mamvita muliha manəhta sanmatan
nāhan liṅnira saṅ prabhu pravara pūrṇavijaya təlas iṅ prayojana
(d) P vara supūrṇa-.
Canto 24. (Aśvalalita: ~ ~ ~ | ~ - ~ | - ~ ~ | ~ - ~ | - ~ ~ | ~ - ~ | - ~ ~ | ~ =)
1. atha ri huvusnirāmuhun aṅañjalī pada bhaṭāra buddha caritan
mijil iniriṅniṅ apsarabalādhikāra surakanyakāṅaləpakən
prasama mulat kapūhan aṅaləm ri pūrṇavijayan hilaṅ malanira
kunaṅ ikaṅ apsarī huvus aseva rāga suratāsmu garjita marək
(d) RS asevvaka.
2. tan asuvay iṅ havan lakunirālaris təka ri kendran ālaya huvus
pinapag i saṅ priyā kusumagandhavaty adisusatya bhakti masənəṅ
irika sirāvarah kramanirenanugrahan anindyadharma saphala
sahajan aminta tuṅgun aturū daśaṅ vəṅi lavasniran tan avaran
(d) V saṅaṅ.
3. kunaṅ ika saṅ priyenutus atuṅgva mogha kadi suṅkavāṅunəkunək
rudita sumək ri cakṣu apa tan sakeṅ vacanalaṅghane sənəṅira
tuhun agave kasaṅśaya ri citta pājarira saṅ tapāsura daṅū
alavas amuktya pāpa riṅ avecy ayahdharaṇipattaneki katahā
(a) V iki; (b) R sumyə̄ṅ, S sumə̄ṅ, T sumə̄k; (d) PT pātaneki, R patakeki, S pataneki.
4. samayaniran pataṅya sapuluh kuləmnira tathāpi tan ya kahiḍəp
tumahataha pva saṅ kusumagandhavaty apusən iṅ sənəṅ matilara
kaharəp ireki ṅūni tumute saduhkhani sənəṅnireṅ yamapada
lalu vinəkas matuṅgva paturūnireṅ vivudhanātha tan kena vihaṅ
(c) RS yamalaya.
5. atha ri paratra pūrṇavijaya ndan ātmanira muṅsir iṅ yamapada
irika ta gadgadaṅ yamabalāṅatag ri savatəknya sāyudha ḍatəṅ
prasama sumuṅsuṅ arbut amupuh vaśāmraṅ anuduk ta yeṅ kuku makas
dumulurakən mareṅ yamani tan panampar agələṅ riṅ ātma kaluṣa
(b) R saka gadgada yama-, S sa gadgada yama-; TV gadgadā; (d) T pāməpər, V panampər; P kaluṣā.
Canto 25. (Śārdūlavikrīḍita: - - - | ~ ~ - | ~ - ~ | ~ ~ - | - - ~ | - - ~ | =)
1. byātītan vivudhādhipātmaniran aṅgə̄ṅ glāna muṅgv iṅ kavah
saṅ kārīṅ suraloka rakva caritan śokānaṅis duhkhita
sakvehniṅ vivudhāṅganānivi ri saṅ gandharvanāthālara
tovin sambatiraṅ sudevy anaṅis aṅlad prāṇa maṅde vəlas
(b) P kārī; (c) T -āṅganātuvi.
2. ah saṅ līna kiteṅ paturvan alalis dentā matiṅgal priyā
prāyaṅkun kaka milv asiṅ saparanā yan muṅsireṅ rorava
maṅke pvātilarā kitānilibakən yāṅde kəsəlniṅ hati
sis kāṅən kasihanta riṅ yamapadāmuktyaṅ mahāvigraha
(a) PT priya; (c) P pvattilara; Y səkəl; (d) T siṅ; RST kakahanta, V kahananta.
3. vvantən teki manəhta rovaṅani maskv aṅhera riṅ rorava
āpan gə̄ṅni vəlasku denta kasihan ndin sambatənteṅ kavah
bhāgyan teki manəhta həlyanani maskvāṅgantyanaṅ pātaka
paṅgil maṅlvaṅane hutaṅ riṅ apadharmākveh kabhuktīṅ kavah
(b) TV sambutənteṅ; (c) P -ān gantyanaṅ; (d) RS malvaṅane.
4. herən ṅvaṅ kaka rovaṅanta kasihan muktyaṅ mahāvigraha
rovaṅrovaṅa maskv iṅ astrataru mon yan gantuṅən riṅ pətuṅ
yadyan ṅvaṅ vunuhən kavalyana təkapniṅ kiṅkara hyaṅ yama
tan vədy āku tuhun kita vruha jugan rantənta satyāsənəṅ
(a) P airən, T herəd; (d) RS satyeṅ sənəṅ.
Canto 26. (Udgatavisama: ~ ~ - | ~ - ~ | ~ ~ - | ~ ~ ~ | ~ ~ ~ | - ~ - | ~ = // - ~ ~ | ~ ~ ~ | ~ - ~ | ~ = // ~ ~ - | ~ - ~ | ~ ~ - | ~ - ~ | =)
1. iti maṅkana śrutini sambatira kusumagandhikānaṅis
dagdha manahira lələh kalaran
ri haturnika prihati śoka kasyasih
2. alisū gupe ləsu śarīranira təkap i śaktiniṅ lara
sə̄k hatinira vulat ardha pətəṅ
kaləṅə̄r sumuṅkəm i vijaṅni saṅ sənəṅ
3. paricārikāpsaravadhū tumuluṅ i sira marma sārjava
ḍū patutur ibu nahan pavuṅū
niyatāhurip muvaha teki saṅ pəjah
(b) P natan.
4. paṅadeśan i ṅvaṅ i katuhvan i samayanirāpsarādhipa
tonən i marinira kuṣṭamala
viparīta mithya sira teki liṅnira
(a) T katūtan; (b) Y a (text i).
5. ri təlasny anugraha bhaṭāra daśabala ri saṅ surādhipa
tan hana mari ya kasaṅśayanən
apan uttamāmṛta sudharma liṅnira
(b) T marika ya saṅśayanən, V mara rika saṅśayanən.
6. ndya ta vāsananta rari tan tumutura ri kakuṅta saṅ pəjah
herən i samayanirāhuripa
ri halintaṅ iṅ samaya sādhya taṅ pati
7. na vuvusniṅ apsaravadhū mapitutur agave srəp iṅ manah
mogha ta ya təkapirān karəṅə̄
hana mātra paṅlilir i saṅ kakiṅkiṅan
(a) TV mamitutur.
Canto 27. (Kusumavilasita: - ~ ~ | - ~ - | ~ ~ ~ | - ~ ~ | ~ ~ ~ | ~ - ~ | - ~ =)
1. ndan sira saṅ haneṅ niraya rakva carita ri saṅaṅ kuləmnira
ṅkān kahanan tutur sira tatan sapira karasa tīkṣṇaniṅ kavah
ndug sapuluh kuləmnira samādhi rinəgəpira cittanirmala
bhraṣṭa tikaṅ kavah lavan apuynya mati mahəli ratnapaṅkaja
(c) RST dug.
2. mvaṅ taru khaḍga ramyaparijāta təmahan ika sarvaśobhita
vvahnyan anindyaratna maṇi kostubha makusuma hāra kañcana
komala patrapādapanikāmrik avaṅi rudhiranya motkaṭa
mary ahapək masaṅhir apəṅuk saguṇanika balik maveh sukha
(b) P haratna kañcana, RS hara kañcana; (d) RS mahaṅir.
3. rākṣasa bahnivaktran umulat paravaśaniṅ aveci nirhapuy
sambut ikaṅ triśūla təhər aṅdhik anudiṅi kivāndrəṅ aṅgrəgut
syuh kahala triśūlanika mūr kadi havunika kādrəsan barat
luṅha kameraṅən muvah akon ri dulurika gumanty amigraha
(a) P avaiciniṅ apuy, RS avveci nir apuy; (b) PRSV aṅdik.
4. tan dva təkāgalak śakuni khaḍga maṅabalaṅakən karaṅ vəsi
sādrisuta pramāṇanika dūli təmahan iki kabvaṅ iṅ tavaṅ
maṅkana salvir iṅ yamabalāṅhalahala paḍa mogha keraṅan
hetunikaṅ vatək yamanirākṣasa humatur i saṅ hyaṅ antaka
(a) V galak təka; RS -ābalak; (b) Y ika (text iki); (d) Y nika.
Canto 28. (Kilayu anədəṅ: - - ~ | ~ ~ ~ | ~ ~ - | ~ - ~ | ~ ~ - | ~ ~ ~ | ~ ~ ~ | =)
1. səmbahnikiṅ asurasamantabhṛtya ri padāntakapati huniṅan
saṅ pūrṇavijaya pukulun kinonakən i saṅ hyaṅ alavasa kəlan
hīṅanya mara śatasahasravarṣa lavasanya yatika karəṅə̄
maṅke pva ya təka sapuluh kuləm niyata bhagna dadi surapada
(a) P ikiṅ.
2. sarvāyudhani bala bhaṭāra śīrṇa təmahanya hana dadi havū
mvaṅ tīkṣṇaniṅ asura dhanañjayāsya dadi sīta mari katatakut
tar pamyati sahanani vigrahanya savatək yamabala kabalik
nāhan haturiṅ asurabhṛtya saṅśaya yamāntaka sira ruməṅə̄
(b) RST asara-, V aṅara-; RS -āsa; P sitta marika katatakut; (c) Y tan; (d) RS saṅga ya, TV saṅgha ya.
3. ṅkā hyaṅ yama lumaku mareṅ aveci dinulurnikaṅ asurabala
yar ton pva sira ri paripūrṇayovananiṅ ātma kadi manasija
bhedaṅkarika nupamaṅ ātma pātaka haneṅ yamapada kahala
nāhan karaṇanira sumāntva riṅ vacana sārjava rəsəp amanis
4. e saṅ lituhayu kadi kāmadeva mara riṅ yamani kari kita
hetunta vənaṅ amariśīrṇakən yamani dady amarapadasabhā
āpan kita hinatur amuktya pāpa riṅ avecin alavasa kəlan
maṅke kita təka sapuluh kuləm ndi tika deniṅ amahivagakən
5. saṅ hyaṅ yamapati mucapa ṅhulun ri kita hetuniṅ anəmu varah
saṅ hyaṅ daśabala sira tāṅanugrahani tan malavasa kaluṣā
īṅankv iki kəlan iṅ aveci gomukha saṅaṅ vəṅi tan adhikara
ṅhiṅ taṅ yamabala marikədv amigraha ya donika paḍa kabalik
(a) Y yama mapa (text yamapati); (c) V nəlan.
6. saṅ hyaṅ paramaguru munīndra ta pva maṅanugrahani vara dahat
atyanta kita laki sinanmateṅ kadi sira hyaṅ iṅ amara kabeh
ndah mantuka ta kita mare svanāthani bapaṅku valuyana muvah
vvantən dumulurakəna kālarātri paṅaranya yatika tumuta
(c) P mareṅ; (d) P śālarātri maṅaranya kita.
Canto 29. (Basantatilaka: - - ~ | - ~ ~ | ~ - ~ | ~ - ~ | - =)
1. mantuk bhaṭāra yamarāja tatan vivakṣan
saṅ nātha pūrṇavijayātmanireki vaktan
mañjiṅ mareṅ śava muvah sira tan vimārga
ṅkā tāṅlilir kadi mataṅy aturū tan imbā
(a) Ed. vivākṣan; (b) RSV vaksan, T vāksan; (c) P vimargā; (d) P ka.
2. kagyat siraṅ kusumagandhavatī sudevī
marme sənəṅ siran umaṇḍəm anambah asvi
vetniṅ manah gəməgəmən kahavan sukhāmbək
yar ton pamarbaṅun i saṅ vivudhendra jīvan
(b) P nira.
3. saṅ nātha pūrṇavijayāvarah iṅ sudevī
rakryan huvus ṅvaṅ anavur hutaṅ iṅ yamāṇḍa
saṅsāra duhkha kasihan kinəleṅ aveci
akveh pamigrahanikaṅ yamabhṛtya ṅūni
4. ndah prāptaniṅ samayarātri kakanta yogī
meṅət ṅhulun ri pavəkas paramārthabuddha
bhagnaṅ kavah mahəli nākasabhādiramya
saṅ hyaṅ yamādhipa kapūhan ike təkapku
(b) P meṅhə̄t; (c) P nakkasabhā-.
5. tan lyan pamitra juga dibya mahāviśeṣa
ndan mitra sādhu mara sādhananiṅ subhāgya
sādhutva yeki kaka kuñjarakarṇa bhāra
tan len nimittaniṅ umuṅsi ri jə̄ṅ jinendra
(a) V samitra; (b) RTV nda; (c) RS sadhutvi.
6. taṅ mitra sādhu kadi vaṅva gələṅnya riṅ tvas
ndātan vənaṅ ya purugən ri səḍəṅnya mūrkha
yan śānta buddhinika tulya harəṅ paḍanya
byaktānularnulari solahulahnya nitya
(a) T tlas.
7. aṅhiṅ katənku tumute ra kakaṅku tan len
ṅkāneṅ sumeru himavān patapanya ramya
nityāmrihājapa matāku maṅivva yoga
rapvan lanāsiha bhaṭāra tathāgatendra
This stanza is lacking in T; (a) V tantənku; (c) RSV maṅiva yoga.
8. ndah tambay eñjiṅ umarək ṅvaṅ i jə̄ṅ jinendra
sakvehnikaṅ surabala pva muvah surastrī
konən samāṅhiriṅa saṅgəpaniṅ pamūja
yapvan huvus marək ayajña marākv iṅ adri
(a) T ṅhiṅ (text ndah - see 7a!); (c) V saṅkəpan; (d) T maraku.
Canto 30. (Jagaddhita: - - - | ~ ~ - | ~ - ~ | ~ ~ - | ~ ~ ~ | ~ ~ ~ | - ~ - | ~ =)
1. nāhan tojariraṅ surādhipa rasanya karaṇani pasuṅsut iṅ priyā
āpan deni lulutnya tan kəna kinas həla-həla manivīṅ pasaṅgaman
vetniṅ kiṅkiṅ unəṅnya ṅūni katilar vahu-vahu sukha maṅhəbaṅhəbaṅ
maṅke pvātapa rakva sādhyanira nora palarən iṅ aseva sanmata
(a) P kojar; mss. priya; (b) T luputnya.
2. kubdha prārthananiṅ varāpsaravadhū sumavurakəna yan ḍatəṅnira
pūjāmaṅguṅ asaṅgame tilam agañjarana turida mādəgeṅ lulut
vvantən pveki gəluh lukar saha virāgakusuma kaharan kupat ləpas
tan hopən karuhun sajinyan asalahsalaha tapih i mehaniṅ gati
(a) TV sumahurakəna; (b) V asaṅgameṅ.
3. maṅke bhrāntani buddhiniṅ suravadhū salahasa ri hatinya tan padon
āpan rakva hiḍəpnya mantən alulut vivudhapati ri rūmniṅ apsarī
nāhan hetuni kūṅnirāvətu taṅis maṅajarakən i duhkhaniṅ hati
ṅkān pamvit sahananya mantuka ri pamrəman ahavadi denikaṅ vəṅi
(a) P maṅka; (c) T -āmətu; (d) RS ṅka mamvit; Y aṅavani.
4. devī gandhavatī ləvəs prihati śoka sivuhən apa tan vriṅ enaka
sotan taṅ vinuvus patibrata ruməṅvakən ujar i sənəṅnirātapa
ləṅləṅ glāna vimūrchitāṅaṅənaṅən ry ulahanira yadin katiṅgala
tan vriṅ dāya məhah tumuṅkul anaṅis kapusəṅən anəsəl purākṛti
(a) PT enakā; (d) SV kapusəṅan.
5. maṅkin rūpanirāvənəs kadi maṅambvakən i rarasirāṅjrah iṅ kapāt
mambətniṅ təṅah aṅlih arja savaṅ olah i kəlab iṅ aśokapādapa
kəmbəṅkəmbəṅ i luhnirānalaga riṅ pamatan asəmu nīlapaṅkaja
lvir kumbaṅ maṅisəp səkar svaranirānaṅis aṅisəkisək ndatan humuṅ
(a) T -āñjrah; (c) RS matan; V mata anulari nila-.
6. śrī vidyādharanātha pūrṇavijayāṅariharih ujar iṅ priyambada
dyaṅkv induṅ saṅ aninditeṅ hayu kakanta papagən i manisnikuṅ mata
hayvāṅluh mulatiṅ hulun rari hañar təka ri kita kakanta suṅsuṅən
gə̄ṅny ūnəṅkv i rarasta hetuniṅ amarbaṅun arah apa tan sinanmata
(d) RSV ari apa, T arih apa; V sinanmatan.
7. maskv induṅ mapa marmaniṅ vuyuh avor taṅis amahala rūmta devatī
mepu ṅvaṅ ri vivalta kady acala durgama bhayaniṅ atīrtha sanmatan
jroniṅ pambəkan aṅjuraṅ ləṅit adoh kadi humañuta rāganiṅ hulun
yāṅde tvaskv aputək pətəṅ sinaput iṅ turida kadi samūhaniṅ limut
(b) RS bhava.
8. pintən duhkha manahta deni lavas iṅ hulun aṅurati sevake kita
norātuṅgv i daganta riṅ pakasutan tuməkakəna sakāptiniṅ hati
siṅgih masku kakanta tan maras apan tuhu yadin ika doṣaniṅ hulun
yadyan ṅganya sadəṇḍaniṅ tan atəmən maṅəmasana sadenya lampunən
(c) Y paṅgih; Y yan ika sadoṣa.
Canto 31. (Mṛdukomala: - - - | ~ ~ - | ~ - ~ | ~ ~ - | ~ - ~ | ~ ~ =)
1. nāhan liṅ vivudhendra məṅgəp aṅalap kasor vulatira
marmāpet sivi harṣajāṅusapi luhniraṅ suravadhū
romāvrā kavaveṅ mukhenajumajumnirān ginəluṅan
eñjuh ramya ṅisapvakən tumaña don saṅ antən anaṅis
(a) P vulat nira; (b) Y nireṅ; (d) Y tumiba.
2. ndin tan munya marī manuk maha minunyan arja pinikat
keñcut harṣa kaveni deni pamarəknya tan vənaṅ adoh
maṅkā teki haturniraṅ kusumagandhavaty anuti kūṅ
mājar mandra pəgatpəgat svaranirāsrət asvi səsəgən
(a) RS mata minunyan, TV maha hinunyan; T pikat; (d) P mārjja.
3. e nāthaṅku nimittani ṅvaṅ anaṅis ri denta malalis
sihteṅ kuñjarakarṇa mitra kita teka rakva ta tumūt
sis hānuṅ palarənku yan linəbur iṅ tapāməgati kūṅ
aṅhiṅ kenakaniṅ hulun tumuta tan sahānuta tapa
(b) RS rakva ya, TV rakva na; (c) TV tānuṅ.
4. maskv induṅ karaṇaṅkv aṅuṅsira kaśaktin amriha tapa
eraṅ ṅvaṅ ri turuṅniṅ indradayitāṅabhakti ri kita
hyaṅ śakrādinikaṅ caturbhuvanapāla katvaṅa kabeh
yapvan siddha viśeṣanāyaka kitaṅ hulun juga sivin
(d) V yapvan siddha nayaka kiata viśeṣa yogya sasivin.
5. mvaṅ yan masku vanəh kiteṅ surapada hyun iṅ janapada
ṅkā ṅvaṅ dadyana rājaputra lituhayv anindya guṇavan
maskvādadyana rājaputri hayu tan hanāniriṅana
ramyāniṅ vinaraṅvaraṅ kadi hañar vruhāna hirikā
(d) P vruhihirikitā.
6. akveh deniran aṅlipurlipurakən manah saṅ avuyuṅ
sotan taṅ kavisaṅgraheṅ kaləṅənan biṣāmətu lulut
yāṅde həntya ri buddhi saṅ kadi kalaṅvan iṅ masa kapat
kekət rāganiran kaṅən təkap i saṅ surādhipa mati
(a) V ahuyuṅ; (b) T -āməku, V -aməkul; (d) TV pati.
7. sampun māri vuyuṅnirāṅajəṅi kūṅ vaśāmarəpəhi
maṅgəh prāyaṅ anūti riṅ kaka yathāsukhāṅrəsəpakən
ṅrasniṅ saṅgamayogasandhi ginəlarnirāpsarapati
mūrcha tvasnira saṅ mavantah i katəmvan iṅ rasa ləyəp
(b) TV maṅgəh lacking, V paḍa added after kaka.
8. akveh yan caritan sapolahira riṅ kuləm tan ucapən
kadyāmuṅpuṅ i raśminiṅ suravadhū sakāpti tinəkan
jambat lagy anapis mareṅ saṅ amalih karāsikanira
līlāmukti laṅə̄ hanan panaḍah iṅ natar saha kasih
Canto 32. (Sragdhara: - - - | - ~ - | - ~ ~ | ~ ~ ~ | ~ - - | ~ - - | ~ - =)
1. ndah luṅhāṅ kāla rātri krama təlas inatag saṅ vatək devasena
śīghrādan salviriṅ bhūṣaṇa parəṅ umijil riṅ ləbuh mvaṅ priyanya
lavan kanyāpsarī sampun araras aməpək tyas tameṅ tiṅkah aśrī
pantəs solahnya kadyāṅətəri sahananiṅ kāpusan rāgapāśa
(a) RSV sira, Tnira (text təlas); (b) Ed. śighrādan; (c) Y hyas; (d) Y aṅədəri saha nikapunpunan.
2. aṅhiṅ kantun saragnyāhyas asuvay amilih riṅ gəluṅ rājasiṅha
moghā rapvan vəḍar deni kəḍikəḍik ikaṅ roma muṅgv iṅ śirahnya
tovin bvatniṅ paṅimbuh rva təlu kinəkəsan riṅ gəluṅ haśrayeṅ gə̄ṅ
olək taṅ pahyasan kābaban aparəpək iṅ darśanāṅvab tutuknya
(a) TV apilih; RS gəlaṅ; (b) mss. vədar; PRST kədi-kədik, V kədhik-kedhik; (c) RS gəlaṅ; (d) T hāləp (text olək).
3. vvantən vidyādharī rvaṅ siki mavisivisik sotan iṅ sekacitta
ndan rakvājar larāmbək salahasa ri gatinyan tan ahyun sinomah
maṅke sepnyan təlas denika manaha silih saṅ harəp rūmnya ṅūni
kañcit cunduk pva denya ndan ikana mahidu lvir kapeṅin təḍāmlā
(c) P manatha; (d) TV cuṇḍuk; P denyāṅdan ika mahidūr lvir; R maṅidul; S maṅidu; TV kapeṅin dāmlā.
4. ndah śrī gandharvanātha krama huvus arasuk bhūṣaṇānekavarṇa
abhrā devāmbarā cāmaranira tinaman citra mās raktavarṇa
līlānuntun ri devīnira nəhər umijil tan karālon lumampah
akveh vidyādharī mvaṅ vivudhabala paḍārabdha maṅanty asove
(a) Ed. bhūṣanāneka-.
5. maṅkat vidyādharendrāhaləp iniriṅ ikaṅ devasenāprameya
mvaṅ taṅ vidyādharī ramya maṅiriṅi sira ky arja gandharva saśrī
āpan sampun tiniṅkah saṅ aṅiriṅ i harəp riṅ vayah len karaśmin
tan pendah lvir vatək manmatha mahasahas iṅ sāgarācaṅkramāsraṅ
(c) P haləp.
6. eṅgal prāpteṅ vihāra prakaśita maṅaran bodhicittātiśuddha
pinrih taṅ ramyaniṅ nyāsa kahaləpanikaṅ devapūjānivārya
sampun pañcopacārāparimita humaḍaṅ sarvayajñopakāra
ṅkāmūjā rakva san pūrṇavijaya dinulur denikaṅ devasaṅgha
(c) T ta humadaṅ, V umaḍaṅ; (d) P -saṅghya.
Canto 33. (Mālinī: ~ ~ ~ | ~ ~ ~ | - - - | ~ - - | ~ - =)
1. irika ta hana manyup kāla advandva śaṅkha
gumuruh abaruṅ atry ābheri lāvan mṛdaṅga
murava paḍahi boñjiṅ len mahāsāra muṇḍa
dvanika paḍati vindā mārdavāsraṅ svaranya
(a) P kālahanvandva, RS kala advandvan, TV kālahadvandva; Ed. śaṅka; (b) RS atri beri; (c) RS padati; PTV boñji; R munan, TV munda; (d) TV dhvanika; Y paḍahi.
2. tuvin amuvuhi ramyāṅ apsara mvaṅ surastrī
mijilakən i guṇanyānṛtta lālitya riṅ de
vijah agaməl anekaṅ vadva ghūrṇa dhvaninya
pinakaśubhaviramyāṅdadyakən tuṣṭacitta
(b) RS mijilakəna; T lāgityāṅde, V lagitya riṅ de; (c) P ghūrṇaṅ; (d) RS pinaka guda ri ramya, TV pinakagubariramya.
3. agəlis asəmu cumbv an kinnarābhaṇḍagarya
kalih ika paḍa kambo lāghavādhārabhaṇḍa
kadi gilagila harṣānəmvakən bhāva hāsya
calita tuhu matampil solahiṅ vruh tar olug
(b) RS lagava dara banda, V laghava dhara bhandha; (d) R cali tutu, ST calita tutu; V tutut atampil; P tarolu, T tarogul.
4. aparimita kiduṅniṅ deva lāvan surastrī
sahananika manojña prastutī devapūjā
hana ta maṅabhivādeṅ śloka soccāraṇārūm
gurulaghunira patyātūt lavan kaṅsi vīṇa
(d) Ed. kaṅśivinna.
5. ikaṅ i vuri luməṅhe hyus luse tan sasampur
kadi minaha katonā madhya rosnyāṅgaluṅgaṅ
pujipuji savaveṅ rosniṅ vuluh danta śuddha
syapa ləviha kadi ṅvaṅ ceṣṭaniṅ buddhy aḍaṅhan
(a) P ika ri; RS lyan, TV lyas (text hyus); R ta saṅ sampur, STV tāsasampur; (b) T -āṅgaluntaṅ.
6. saṅ atəlasan anṛttāninditānvam tuvuhnya
iniriṅ i vuri len taṅ cārakākveh ri vuntat
pilih amənaṅ ataṇḍiṅ rūm sakeṅ kāmaloka
hayunika tuvin aṅsal yan təkeṅ rūmnya devī
(b) P tā; RS sato kveh riṅ untat; (d) RS deva.
7. atha səḍəṅ asəlur taṅ ghoṣaniṅ sarvapūjā
atiśaya karəṅə̄ riṅ svargaloka prakāśa
paḍa sukha manah apty aṅrəṅvakən saṅ vatək hyaṅ
gumuṇita riṅ ulah mahyun tumontona ramya
(c) P mahaptyaṅ- (tṛ subscribed after ha); Y apta rəṅvakən.
8. yama baruṇa kuvera mvaṅ bhaṭārendra mukhya
paḍa təka sira lāvan saṅ vatək devatārṣi lvir
inatagakən eṅgal prāpta riṅ bodhicitta
praṇata paḍa hanəmbah sādare jə̄ṅ jinendra
(b) RS deva rəsi; (d) P sādaray, RS sādara.
Canto 34. (Śārdūlavikrīḍita: - - - | ~ ~ - | ~ - ~ | ~ ~ - | - - ~ | - - ~ | =)
1. ṅkā saṅ hyaṅ yama mojar atvaṅ i pada śrī śākyasiṅhādhipa
saṅ hyaṅ ndyeki nimitta pūrṇavijayeṅgal pātakanyan
hilaṅ āpan ṅūni ranak bhaṭāra ruməṅə̄ sojar vatək devatā
an rakvālavaseṅ kavah rasika len riṅ lohabhūpātana
(b) RS -nya ṅ ilaṅ.
2. lāvan kāraṇa tattva bhūtanika ṅūnīṅ rāt dumeh pātaka
hetunyan patəmah surādhipa tuhun kleśanya tapvan hilaṅ
nāhan takvanira hyaṅ antakapati ṅkā saṅ hyaṅ ojar sira
he sakveh para devatā miḍəṅəre śabdaṅku yatnā kita
(d) PTV miḍənəreṅ.
3. vvantən ṅūni ri martyaloka kahananyaṅ vadva nityenaləm
khyātīṅ rāt vara bhūmimaṇḍala ṅaranyārnəb subhikṣāhaləp
ṅkā taṅ śreṣṭha haranya mūladhara səh riṅ dṛvya mas mvaṅ maṇi
kāsihnyāhayu nāma saṅ sumaliṇī hatyanta bhaktīṅ sənəṅ
(a) Y madhyaloka; T kahananyā; PRT -enaləp; (b) RS ṅaranyarnah, T ṅaranyarṇag; (d) RS kasihnyayu anama; T antyanta; P bhaktī.
4. vvah durśīla vənaṅ malap sakaharəp strī dṛvyaniṅ vvaṅ vaneh
bvat kopāṅavamāna hīna mṛṣaśabda crolnya coreṅ laku
hiṅsākarma masampay iṅ vvaṅ atuha mvaṅ riṅ vatək paṇḍita
sakvehniṅ vvah adah kaniṣṭha ri hiḍəpnya śreṣṭha mūrkhāvərə̄
(d) PTV aḍah.
5. yekā tāṅhanakən yaśāhaləp i piṅgirniṅ havan gə̄ṅ ayun
ramyāpan hana dharmapātra saphalākveh tvak səkul brəm kilaṅ
lāvan dāna suvarṇa ratna rajatā vastrāmbara mvaṅ paśu
āstām taṅ kahatur təlas mara ri saṅ hyaṅ dharma siddhaṅ ləpas
(d) RSV sida ləpas.
6. vvantən teki muvah vvaṅ atpada ṅaranyotsāhadharma sthiti
ndan kāsihnya ṅaran sudharmika śuci vruh bhakty agurv iṅ sənəṅ
santoṣāhəniṅ iṅ manah lakibi dharmeṣṭi tiśṛddheṅ tamuy
sāntuknyāgəmət iṅ gaṅan lalab ulihnyākāyikan sakrama
(c) Y ri laki (text lakibi); RS darmestiti grədeṅ; T dharmesthī; (d) Y santusnya-.
7. nāhan rakva vinehakən dinuluranyan citta tuṣṭāhəniṅ
aṅkən riṅ halivat havan ḍatəṅ arāryan ṅke gṛhanyālaṅə̄
tovin ramya natarnya marsik agənət lumrāṅ səkar tanduran
ṅkāne heṅ payaśan muvah tiki haneṅ jro muṅgv i saṇḍiṅ bale
(a) T -āsənəṅ; (b) T tkeṅ, V təke; (d) PV ṅkaneṅ; RSV hane; PRSV muṅgvasaṇḍiṅ; RS iṅ bala (text bale).
8. moghāsaṇḍiṅ i kīrti mūladhara taṅ veśmāparək riṅ hənū
yekān hetuni duhkha mūladhara ri sy utsāhadharmāyaśa
krodhan tuṇḍuṅ ikaṅ vvaṅ atpada tumūt riṅ buddhidharmeṅ jagat
luṅhāləs ri huvusnikāṅulihulih kālih priyā kasyasih
(c) RS nyatan (text krodhan); (d) RS luṅaṅles; Y rikaṅ (text kālih) PRSV priya.
Canto 35. (Basantatilaka: - - ~ | - ~ ~ | ~ - ~ | ~ - ~ | - =)
1. honyeki mūlyaphala parvata dibya ramya
ṅkānaṅ gavenya patapan masamīpa mārga
dhīrabratārcana samādhi ginəṅnya nitya
lāvan sinambinika puṇya parārtha riṅ vvaṅ
(a) P ūnye; (b) P ṅkānā; (d) RST sinambikika.
2. jīvāntakanya paḍa mati lavan kasihnya
nirbāṇalakṣaṇanikāṅhanakən prabhāva
sādhyanya mokṣa ləpaseṅ varaloka dhātu
ṅhiṅ puṇya vāhya maṅikət karaṇanya maṅsul
3. ṅkā yan vineṅku ya madadyana saṅ hyaṅ indra
kāsihnya devyanika nāma śacībhaṭāri
sampun pratiṣṭhita riṅ indrapadāmarendra
utsāhadharma satirun təkap iṅ dadi vvaṅ
4. maṅkā si mūladhara māti lavan priyanya
siṅgih ya pūrṇavijayāmaḍa saṅ hyaṅ indra
āpan phalanya maṅivə̄ yaśa dāna puṇya
kāsihnya ṅūni ya ta gandhavatīki maṅke
5. mogha pva duṣkṛtanikāṅgrək amukti vighna
nāhan ta hetunika kuṣṭan amukti pāpa
nāntən pamitran ika nāma si karṇagotra
ndan śilpikanya magave tapa teka ṅūnī
(c) Y karṇagātra.
6. yekātha dady atapa kuñjarakarṇayakṣa
prāpteṅ hulun ya ruməṅə̄ varadharma yukti
enak ta denya ruməgəp savarahku dharma
mantuk ta yātapa muvah vəkasanya mokṣa
(a) RS yeka dadya (S sadya), TV yekāgadadya.
7. mvaṅ teki pūrṇavijayan samayopadeśa
hetunya yan tan alavas kinəleṅ aveci
hīṅanya nāraka saṅaṅ vəṅi tan dva pūrṇa
nāhan phalanya ruməṅə̄ pavarahku dharma
Canto 36. (Toṭaka: ~ ~ - | ~ ~ - | ~ ~ - | ~ ~ =)
1. ya ta hetunikaṅ varadeva kabeh
varadharma gəgən sipi dibyanira
rumuvat śmala pāpa sakeṅ yamani
tuvi mārganiṅ uttamamokṣapada
(c) Y mala.
2. yadi mānuṣavālaka yan vihikan
tija bhāgya sulakṣaṇa jāti viku
guməgə̄ ry upakāra bhaṭāra sadā
pahavas yan amaṅgiha siddha ləpas
3. iti maṅkana śabda bhaṭāra jina
prasamaṅ hyaṅ anambah atipraṇata
təlas amvit umantuka tapva sira
madulur suranātha surārṣi mulih
(b) Y prasamā.
Canto 37. (Vīralalita = Jagatpramudita: - ~ ~ | - ~ - | ~ ~ ~ | - ~ - | ~ ~ ~ | =)
1. sampun i saṅ vatək hyaṅ umulih mareṅ surapada
ṅkā ta marək muvah vivudhanātha pūrṇavijaya
bhakty anamaskṛtātaña viśeṣaniṅ bratatapa
mvaṅ phala yogyaniṅ sakaladānapuṇya ginave
(b) V parək; (c) Y anamaskṛtī.
2. śabda bhaṭāra mājara sireṅ surāpsarapati
sor phalaniṅ samastayaśapuṇya vāhya ginave
svarga phalanya tan tuməmu mokṣa śuddhabhavana
tan kadi polih iṅ brata tapānu bhāra ginəgə̄
(b) R sapala, STV sopala; (d) T molih.
3. vvantən avāhyapuṇya makadon kamokṣan inusir
dānamayādi śīlamaya bhāvanāmaya ləvih
yeka tiga prakāranika puṇya yogya gavayən
iṣṭinikārpaṇākəna ri saṅ triratnaśaraṇa
(d) Y iṣṭinakā-.
Canto 38. (Śārdūlavikrīḍita: - - - | ~ ~ - | ~ - ~ | ~ ~ - | - - ~ | - - ~ | =)
1. mvaṅ taṅ dāna catuṣprakāra kahatur puṇyādhikāreṅ jagat
kambaṅ pālava len gaṅan kayu uyah toyānna sāsiṅ hana
yogyan vehakəneṅ vvaṅ ahyun atəhər śabdāhniṅ ambək ləbā
yekin tāmiṣadāna pūrva kavilaṅniṅ dāna pat kavruhi
(b) T pallava; Y vuyah; PT toyāna, RSV toyana; (c) TV yogyā; (d) V yeki; T tāmasadāna; R lacks purva ka-, S purva kaṅ vilaṅ.
2. yapvan rakṣaṇa kahyun iṅ vvaṅ avədīṅ mārgeṅ umah riṅ raṇa
saṅke gə̄ṅni takutnya yan kavənaṅeṅ duṣṭātirodreriya
rakṣan yogyanikan prihən təmən anuṅ yatnāta riṅ lakṣaṇa
yekātah bhayadānapuṇya gavayən saṅ vīra dhīrottama
(a) Ed. rakṣana; P margeṅumamah, RS marge lumah; (b) PS -ariya; (d) P dhīradhirottama, R viradarosama, SV viradarotama, T vīradhārottama.
3. yapvan vvaṅ vuta deni puṅguṅ ika tan pendah pətəṅ riṅ vəṅi
tan vriṅ dāyanikin harəp vruha ta yeṅ heyopadeyakrama
yogyan pājarən iṅ hitārtha sələhaṅ dharmāditattvāgama
ndah yekin varadharmadāna vinuvus de saṅ mahāpaṇḍita
(b) V deya; PTV ye; T heyopadehakrama; (c) T pūjarən.
4. metrīdāna nihan prayojananikaṅ yogāsih iṅ rāt sadā
salvirniṅ bhavaniṅ svabhāvika gəgən jñānālilaṅ nirmala
jātī bhāsvara bhūta hitya juga satvāvor lavan devatā
muktaṅ kleśa kabeh ləpas tuməmu buddhisvarga yāṅde sukha
(b) RS svabhavaka; (c) Y jātyā; RST nūta tā sahita, V nut tata sahita; (d) TV mukteṅ.
Canto 39. (Vīralalita = Jagatpramudita: - ~ ~ | - ~ - | ~ ~ ~ | - ~ - | ~ ~ ~ | =)
1. maṅkana kupva sandhiniṅ upāya puṇya rahayu
ṅhiṅ pukulun tulustulusa saṅ hyaṅ ojara muvah
lvīraniṅ aṅgəgə̄ brata tapa ndyaṅ uttama tutən
ambalan iṅ təkeṅ jinapadāṅusir kaləpasən
(d) ST kaləpasan.
2. om sy anaku prih uṅsi taṅ anəmvaṅ uttamapada
āpan anopamādhika viśeṣa tan tuhu ləpas
milva gave ndatan paviparītakarma viphala
tan hana duhkha vighna bhaya kevalā ya ta sukha
(b) T anottamā-.
3. lvir talagāṅ sudharma racaṇan təkapta matapa
jñāna viśuddha toyanika rakva śīta hinəniṅ
advayabhāvanāmulakan amṛtasrava mijil
brahmavihāraśīla makatampakanyan apagəh
(a) P tkap tapatapa, T tkamatapa; (c) PT āmṛtaśrava; (d) V mapagəh (text -n apagəh).
4. yāṅkəna cakravākanika tumrapaṅ bratahita
byakta haləpnya yan lagi japan ta tuñjuṅanikā
mantra manohara svarani kumbaṅanya karəṅə̄
siddhapavitraniṅ ləpas ikiṅ sudharmanalinī
(b) P japān tuñjuṅikā.
5. kohutanaṅ svacitta juga simpən iṅ brata kabeh
śuddhanikaṅ trikāya paramārtha siṅhitakəna
śāntika goraveṅ sakalasattva limpadakəna
donya salisvaniṅ kuśalamārganiṅ kaləpasən
(d) ST kaləpasan.
6. yeki ta śāsanaṅku pituhun təkapta ləkasi
yāvat anūt kitānaku ri sūtra ni ṅvaṅ apagəh
nora bhayanta tan hana musuh ta vanya ri kita
tāvat ikaṅ kamokṣan inusirta siddha kavənaṅ
(d) RST tīvat.
7. hayva kitātmapīḍana yan abratā dadi tivas
tonən ikaṅ vvaṅ iṅ janapadātapeṅ girivana
glāna śarīra pāḍana ləkasnikābratatapa
svarga pinetnya vīryani dadinta tan hana vaneh
(a) P kitapiḍana; TV yan lacking-, Y agratā-; (b) T konən.
8. yan katəmuṅ prabhūttama ri madhyaloka ya jəmah
vīryavibhūti kevala makāśramanyan atapa
duhkhanikaṅ jagat kadi samudra tan dva katəmu
lvānika tan pahīṅan adaləm linaṅhuyan ikā
(a) RST katəmu; (d) R linaṅnya nika, V linaṅyan ika.
9. vyādhi pakombak iṅ jaladhi duhkha vigraha karaṅ
lvirnya tarəṅgasaṅgha tikanaṅ rajah sumarasah
ndah patiniṅ jagat drəs i bañunya mogha humilī
ātma siləm təkeṅ yamani yan pramāda riṅ ulah
(b) RSV sumarasa.
10. tattvanira hyaṅ īśvaran amigraha lvir aburu
śvānanirāñjarādrəs atuhāṅgyakən kavənaṅa
vyādhi si duhkha roga paribhūtane balanira
hrūnira tāmisany amati sattva janma sakala
(b) RS nirantara-; RS atuta-; (d) RSV tasasany, T tāśasany.
11. kabhyudayan ṅaranya tapa tan pareṅ kaləpasan
tovi bahu prakāranika bhedalakṣaṇa kabeh
salvir ikaṅ manah kapasuk iṅ śubhāśubhakṛti
yeka kaniṣṭhaniṅ dudu gave kabandhana muvah
(a) RV kaləpasən; (d) RS nista.
12. puṇya parārthadharma gumave sukheṅ parajana
yan nirapekṣa riṅ valəsa teka sakramanikā
dhīra suśīla śakti ya makambəkāhniṅ apagəh
yeka ta madhyamārtha makamārgaṇa trinayana
(a) T -dharma lacking, V yata instead of dharma; V gumaveṅ; PV suke; (c) RSV -aniṅ, T -āniṅ; (d) RSV madyamata; RST tribayana.
13. nāhan ujar bhaṭāra ṣaḍabhijña dharmakathana
maṅkin atən riṅ uttamapadeki pūrṇavijaya
hetunirāmrihātapa mareṅ sumeru himavān
mvaṅ sira gandhavaty aṅusiraṅ tapānuta sənəṅ
Canto 40. (Girīśa: ~ ~ ~ | ~ ~ ~ | - - - | - - ~ | ~ ~ ~ | =)
1. ri huvusira manambah riṅ śrī śākyamunisura
mijil iniriṅ i sakvehniṅ vadvā vivudha tumut
sukha manahira līlāpan siddhaṅ kṛtasamaya
abhinavanira tan len siddhāniṅ laris atapa
(d) P siddhanni ṅ-, RS sidaniṅ, V siddhaniṅ.
2. rinasanira ləhəṅ yan prāpteṅ parvata tumuluy
supadi sira təkā riṅ kendran maṅkata matapa
tinaha kasuvayāṅher kekət riṅ viṣaya daṅū
makin atəguh i gə̄ṅniṅ tṛṣṇāmbandhana pinəgat
(a) P tumiliy; (b) lacking in P; V maṅkatatapa.
3. karaṇaniran arāryan ramyāhəmhəman apupul
hana patani mapañjaṅ ya toṅgvanira pinarək
huvus ahaləp atiṅkah padmāsthāna kinənakən
irika ta sira mojar maṅde vlasnikaṅ anivi
(a) PRV ramyaṅhəmhəman, T rāmyaṅhə̄mhə̄man; (c) T padmasthāna, V padmasvana; (d) P niṅ anivi.
4. kṣamakəna vuvus i ṅvaṅ de gandharvabala kabeh
ṅhulun atiki viśāteṅ adry amrihmriha matapā
muliha ta kita maṅke riṅ svargālaya valuyi
apan iki gatini ṅvah lvir nāthānilihi bala
(b) SV ateki; (c) P vuluyi, Y valuya.
5. yadi hana suranātha dlāhāṅgantyani sinivi
umuyahana samudra ṅvaṅ maṅke mucap i kita
rusit iṅ aṅiriṅ ambək riṅ svāmin paṅinakana
tuhutuhu dṛḍha bhaktyāśuśrūṣānuṅ ulahakən
(a) P yadiyana.
6. jhaṭiti parəṅ anəmbah sakveh saṅ vivudhabala
ṅuni hayunira kanyā gandharva praṇata marək
kimuta lara saṅ antən sakveh saṅ mamalihi kuṅ
hana tumaṅisi jə̄ṅ śrī gandharvādhipa masayut
(a) RS aititi, V jətiti.
Canto 41. (Jagaddhita: - - - | ~ ~ - | ~ - ~ | ~ ~ - | ~ ~ ~ | ~ ~ ~ | - ~ - | ~ =)
1. tāṅeh yan huniṅan pataṅgəh ikaṅ apsarabala kalavan varāpsarī
śrī vidyādharanātha tṛṣṇa pinəgatnira makakaraṇaṅ sthirabrata
nāhan hetuniran laris lumaku maṅkat atapa makapaṅharəp priyā
sampun rakva sulakṣaṇa kramanirāmagəhi tapa mahāyanabrata
(a) T taṅgeh, V tan ṅeh; (c) P priya, RS riya, T priyā.
2. mantuk riṅ suraloka taṅ suravarāpsarabala saha devakāminī
śokāśa prihatin ri deni taya pūrṇavijaya sinivīṅ surālaya
āpan mevəh ameta nātha masiheṅ bala kadi sira saṅ huvus licin
vruh riṅ maryada yukti nityaśa dumadyakəna guṇani saṅ kanirguṇan
(a) RS kaṅ.
3. tekvan tiṅkah iṅ apsarī sahananiṅ sama kapihutaṅan karāsikan
ləṅləṅ mukṣa manahnya yan maṅəni polahira vivudhanātha riṅ daṅū
prāpteṅ veśma tinurvakən laranikenimurimur apa tan kənenimur
tontonən ri sagātra saṅ sənəṅ aniṅgal iriya masaputsaput mukha
4. bhrāntāpan prativimbaniṅ manah anaṅgraha riṅ apa kənāvaran ṅhulun
yāvat rūpa katona vimba hana riṅ manah anuti dumadyakən tutur
tāvat maṅkana rakva taṅ vacana kāśravaṇa dadi mavimba riṅ manah
saṅ yogī luməbur tutur hiḍəp apan ya pinakahələt iṅ kamokṣakan
(c) P pavimba.
5. akveh yan caritan varāpsaravadhū sahananika paḍāśa sūkṣəka
len tāṅlālana suṅkavāməṅaməṅ iṅ taman analimur onək iṅ lara
vvantən rakva guritniraṅ vivudhanātha kavəkas irikaṅ yaśāhaləp
yekānuṅ vinacanya lagi kahiḍəp hananiran aṅucap lavan priyā
(a) P paḍāsa, Y paḍāka; V suksəkan; (d) T priya.
6. rakryan saṅ paśarīra varganiṅ akūṅ sahita turida mitra riṅ lulut
saṅ rovaṅkva kadaṅ vulat liriṅ avor smita saphala yan iṅ raras hati
tuṅgal ṅvaṅ mikətaṅ vilāpa hana riṅ puḍak amisani rāganiṅ lulut
donkvātəmva lavan kitāpagəh inuṅsir apatutan asānak iṅ ṭikā
(a) T maśarīra; (c) T amiṣani; RTV niṅhulun, S riṅulun.
7. riṅ janmāntara tan saheṅ kita yadin satəmahani ariṅku riṅ taman
yadyan tuñjuṅa masku dadya talagaṅ hulun ahəniṅ anindya paṅdyusan
donya ṅvaṅ varaniṅ rarā yan adamū ṅhiṅ atəvasa pavitra don ikā
yan kālanta sināhaseṅalap amogha madaləma kakanta rakṣakā
(a) P niyariṅku; (b) Y ahəniṅa nitya; (c) TV paran iṅ; V rare; (d) Y -alaya moga; P maḍaləma, T maləma, V maləma ri.
8. yan paṅdadya kitāsana ṅvaṅ ibu dadya jalada marək aṅhəmū javuh
bhuktin sihkv atəmah riris yak agərəh mapaga səmini kuṅta hat=hatən
ndak ton harṣani maskv akəmbaṅ anəḍəṅ vruha kita ri vilāśaniṅ hulun
ndan riṅ ṣatpada tan saheṅ marək i rūmta katuturana deṅkv añumbana
(a) P kitānśaṇa; PTV jalaḍa; (c) P ndan; RS masku kəmbaṅ; (d) P denkv.
9. nāhan lambaṅ i saṅ viśāta vinacanya vinaluvaluyan vināhyakən
ambəkniṅ vivudhāṅganālara təñuh kadi kahilaṅan ātmajīvita
maṅkin tan kavənaṅ kinas laranika lvir apuy amaṅaniṅ mraṅ ujvala
sambatnyāmlas-asih titir musapi luhnika malupa ri luṅsuriṅ tapih
(c) P amaṅani; (d) P luṅsur eṅ.
10. ah saṅ duṣṭa kiteṅ paturvan apa yan tan avədi ri varāstraniṅ smara
ṅkā pamraṅniṅ alisniṅ adyah aluṅid kəlab i pamatan iṅ kinevala
tan kevəh ri panumbak iṅ susu jajanta kaka pujipuji sthiraṅ brata
siṅ heman kararaṅku mūlya hinalap tatan avəlas añidra riṅ hulun
(d) P keman.
11. luṅhātiṅgal adoh kita ṅvaṅ anuṅgalakəna paṅucapta māsihan
enak ṅūni sinākṣyan iṅ madana bhāgya ri hati pəjaheṅ pasaṅgaman
vāhyāsatya təkapta mojar anəsəp laṭi təvas ataləh luhik dahat
sotkv aṅhiṅ sira vidhyaniṅ smara panumpala vənaṅa maluy mareṅ hulun
(a) RSV ṅvaṅiṅasaṅgalakəna, T ṅvaṅisatiṅgalakna; (c) Y sahyāsatya; P tvas atalələluhik, RS idəp ataləh luvik, T hiḍəp ataləh tuvik, V hidəp ataləh luvik; (d) PT vidya.
12. lvāmbək māsku məneṅ kuləm məkasana ṅvaṅ asəkuṅa sudhīra maṅhyaṅa
pūjan riṅ śayanāsəkar paṅisiniṅ gəluṅ asəpana gandhaniṅ pupur
lumrāṅ kəmbaṅ urā sugandha burat amrik aməḍara tapihnya lepana
rūpākāra gəgə̄n təlas haturanaṅkv i kita caru təṅah palar təka
(a) Y kuləm luməkasa; (c) T amədara (PV = text!); (d) P gəgən; Y aturanaṅkva.
13. maṅkā sambat iṅ apsarī katanəhan lara turida tiniṅgal iṅ sənəṅ
lvir norāpsaranātha sambhava sivin gatinika pada ləṅləṅ iṅ manah
tar vruh paṅdan ikaṅ vidhī hana riṅ āśrama phalanika puṇya riṅ jagat
byakta dṛvyani saṅ mivə̄ṅ kuśaladharmaṅ amarapada len varāpsarī
(c) Y tan vruh; Ed. aśrama.
14. nāhan hīṅanikiṅ kathe huvus i pūrṇavijaya gumave tapabrata
rikāneṅ hyaṅ vara meruparvata lavan kasihiran apagəh mahāyani
sampun kuñjarakarṇa siddha ləpas iṅ jinapada tuməmuṅ kamokṣakan
ṅkā rakveki muvah ləpas pravara pūrṇavijaya sira mokṣa sapriyā
(a) T tiṅkah (text hīṅan); (b) T ṅkāne hya.
15. yekī kuñjarakarṇadharmakathana kṣamakəna kəta de saṅ aṅrəṅə̄
tan samvas katunan laṅə̄ təkapira mpu ḍusun avətu mātrabhāṣita
puṣpāñjalya ri jə̄ṅniran kavi samenaka pakənanirāstu sanmatan
təkvan sihnira antusān panikəlan tanah amuruki tiṅkah iṅ maṅə̄
(a) V yekin; (c) V sanmata; (d) P antupan, T hantu, V hantus Saṅ (sic!).
16. vyarthaṅ nāṭyan amenak iṅ śruti tuhun palalun iki paṅantyanantyanan
yadyan kālihanāpusən muvah apaṅlvaṅ anəmu kavi rovaṅ iṅ maṅə̄
ndonyā tan kavurāpus iṅ hulun aṅuṅsya paramapadanāgave hayu
kāṅkən siddha manojñavaṅ manah ilunya ri para kavi mitra suśrama
(a) RS natyana dadya masruti, T nāṭyana dadya māśruti, V nathya madadya masruti; RS -antyana; (b) Y yadin; P kavi subscribed after rovaṅ!, TV kavi abest; RS amaliṅan iṅ, TV apāliṅan iṅ (text apaṅlvaṅ); (c) Y donya; Y kahura; Y aṅuṅsya vacana niraṅ āgavehayu; (d) R taṅ amanah, STV taṅ manah (after manojña!).