Toḍalatantra, Prathamaḥ paṭalaḥ
brūhi me jagatāṃ nātha
sarvavidyāmaya prabho
mahāvidyāsu sarvāsu
pūjyāsu bhuvanatraye
//
etāsāṃ dakṣiṇe bhāge
nānārūpaṃ pinākadhṛk
pṛthak pṛthak mahādeva
kathayasva mayi prabho
//
śṛṇu cārvaṅgi subhage
kālikāyāśca bhairavam
mahākālaṃ dakṣiṇāyā
dakṣabhāge prapūjayet
//
mahākālena vai sārdhaṃ
dakṣiṇā ramate sadā
tārāyā dakṣiṇe bhāge
akṣobhyaṃ paripūjayet
//
samudramathane devi
kālakūṭaṃ samutthitam
sarve devāḥ sadārāśca
mahākṣobham avāpnuyuḥ
//
kṣobhādirahitaṃ yasmāt
pītaṃ hālāhalaṃ viṣam
ata eva maheśāni
akṣobhyaḥ parikīrtitaḥ
//
tena sārdhaṃ mahāmāyā
tāriṇī ramate sadā
mahātripurasundaryā
dakṣiṇe pūjayecchivam
//
pañcavaktraṃ trinetraṃ ca
prativaktre sureśvari
tena sārdhaṃ mahādevī
sadā kāmakutūhalā
//
ata eva maheśāni
pañcamīti prakīrtitā
śrīmadbhuvanasundaryā
dakṣiṇe tryambakaṃ yajet
//
svarge martye ca pātāle
yā cādyā bhuvaneśvarī
etāsu ramate yena
tryambakastena kathyate
//
saśaktiśca samākhyātaḥ
sarvatantraprapūjitaḥ
bhairavyā dakṣiṇe bhāge
dakṣiṇāmūrtisaṃjñakam
//
pūjayet parayatnena
pañcavaktraṃ tameva hi
chinnamastādakṣiṇāṃśe
kabandhaṃ pūjayecchivam
//
kabandhapūjanāddevi
sarvasiddhīśvaro bhavet
dhūmāvatī mahāvidyā
vidhavārūpadhāriṇī
//
vagalāyā dakṣabhāge
ekavaktraṃ prapūjayet
mahārudreti vikhyātaṃ
jagatsaṃhārakārakam
//
mātaṃgīdakṣiṇāṃśe ca
mataṃgaṃ pūjayecchivam
tameva dakṣiṇāmūrtiṃ
jagadānandarūpakam
//
kamalāyā dakṣiṇāṃśe
viṣṇurūpaṃ sadāśivam
pūjayet parameśāni
sa siddho nātra saṃśayaḥ
//
pūjayedannapūrṇāyā
dakṣiṇe brahmarūpakam
mahāmokṣapradaṃ devaṃ
daśavaktraṃ maheśvaram
//
durgāyā dakṣiṇe deśe
nāradaṃ paripūjayet
nākāraḥ sṛṣṭikartā ca
dakāraḥ pālakaḥ sadā
//
rephaḥ saṃhārarūpatvān
nāradaḥ parikīrtitaḥ
anyāsu sarvavidyāsu
ṛṣir yaḥ parikīrtitaḥ
//
sa eva tasyā bhartā ca
dakṣabhāge prapūjayet
yā cādyā paramā vidyā
dvitīyā bhairavī parā
trailokyajananī nityā
sā kathaṃ śavavāhanā
//
yā cādyā parameśāni
svayaṃ kālasvarūpiṇī
śrīśivasya hṛdambhoje
sthitā saṃhārarūpiṇī
//
ata eva mahākālo
jagatsaṃhārakārakaḥ
saṃhārarūpiṇī kālī
yadā vyaktasvarūpiṇī
//
tadaiva sahasā devi
śavarūpaḥ sadāśivaḥ
tatkṣaṇāc cañcalāpāṅgi
sā devī śavavāhanā
//
śavarūpo mahādeva
mṛtadehaḥ sadāśivaḥ
mṛtadehaṃ mahādeva
salilaṃ vā kathaṃ nahi
//
yasmin vyaktā mahākālī
śaktihīnaḥ sadāśivaḥ
śaktyā yukto yadā devi
tadaiva śivarūpakaḥ
śaktihīnaḥ śavaḥ sākṣāt
puruṣatvaṃ na muñcati
//
Toḍalatantra, Dvitīyaḥ paṭalaḥ
śṛṇu devi pravakṣyāmi
yogasāraṃ samāsataḥ
ūrdhvamūlam adhaḥśākhaṃ
vṛkṣākāraṃ kalevaram
//
brahmāṇḍe yāni tīrthāni
tāni santi kalevare
bṛhadbrahmāṇḍaṃ yadrūpaṃ
tadrūpaṃ kṣudrarūpakam
//
brahmāṇḍe vartate tīrthaṃ
sārdhakoṭitrayātmakam
dvisaptatisahasrāṇi
prakāśaṃ vīravandite
//
caturdaśaṃ tu tanmadhye
tanmadhye tritayaṃ śubham
tanmadhye parameśāni
mahādhīrā ca muktidā
//
vāsukī yā mahāmāyā
bhujagākārarūpiṇī
sārdhatrivalayākārā
pātālatalavāsinī
//
saptasvargaṃ pareśāni
krameṇa śṛṇu sādaram
bhūrlokaṃ ca bhuvarlokaṃ
svarlokaṃ mahasaṃ tathā
//
janalokaṃ tapaścaiva
satyalokaṃ varānane
saptasvargamidaṃ bhadre
pātālaṃ śṛṇu yatnataḥ
//
atalaṃ vitalaṃ caiva
sutalaṃ ca talātalam
mahātalaṃ ca pātālaṃ
rasātalamataḥ param
//
rasātalācca satyāntaṃ
mahādhīrā pratiṣṭhitā
merumadhyasthitā nāḍī
mahādhīrā ca muktidā
//
satyaloke mahāviṣṇuṃ
śivaṃ brahmāṇḍasaṃjñakam
tasya saṃdarśanārthāya
vāsukī vyākulā sadā
//
svargaṣaṭkaṃ bhedayitvā
utthitā vāsukī yadā
sarvāḥ samudragāminya
ūrdhvasrotā bhavanti hi
//
evaṃ krameṇa deveśi
śarīre nāḍayaḥ sthitāḥ
iḍā ca piṅgalā caiva
suṣumṇā madhyavartinī
//
nāḍīdvayena deveśi
samīraṃ pūrayed yadi
tatastu prāṇamantreṇa
kuṇḍalī ca kramaṃ caret
//
sahasrāre mahāpadme
nitye cāvyayapaṅkaje
trāsayuktā kuṇḍalinī
praviśennityamandiram
//
sarvāḥ pātālagāminya
ūrdhvasrotā bhavanti hi
etasmin samaye devi
varṇamālāṃ vicintayet
//
aṣṭottaraśataṃ mūla
mantraṃ jñānena saṃjapet
ānayettena mārgeṇa
mūlādhāre punaḥ sudhīḥ
//
ṣaṭcakradevatāstatra
saṃtarpyāmṛtadhārayā
athānyat sampravakṣyāmi
yonimudrāsanaṃ priye
//
upaviśyāsane mantrī
prāṅmukho vāpyudaṅmukhaḥ
jānudvayaṃ karābhyāṃ ca
prakuryād dṛḍhabandhanam
//
ṛjukāyena deveśi
ājānu nāsikāṃ nayet
prāṇamantreṇa deveśi
samīraṃ bahuyatnataḥ
//
pūrayet parameśāni
kiṃcid vāyuṃ na recayet
ṛjukāyaṃ pareśāni
viparītaṃ prayatnataḥ
//
pūrvoktenaiva vidhinā
aṣṭottaraśataṃ japet
ṣaṭcakradevatāstatra
saṃtarpyāmṛtadhārayā
//
ānayettena mārgeṇa
mūlādhāre varānane
aśeṣarogaśamanaṃ
yonimudrāsanaṃ priye
//
bahu kiṃ kathyate devi
mahāvyādhivināśanam
bahu kiṃ kathyate devi
mantracaitanyakāraṇam
//
ātmasākṣātkarī mudrā
mahāmokṣapradāyinī
śatavaktraṃ yadi bhavet
tadā vaktuṃ na śakyate
//
pañcavaktreṇa deveśi
kiṃ mayā kathyate'dhunā
kuṣṭharogaviśiṣṭo'pi
sa bhavet kāmarūpakaḥ
//
Toḍalatantra, Tṛtīyaḥ paṭalaḥ
devadeva mahādeva
saṃsārārṇavatāraka
baddhayoniṃ mahāmudrāṃ
kathayasva dayānidhe
//
śṛṇu devi pravakṣyāmi
baddhayoniṃ samāsataḥ
upaviśyāsane mantrī
prāṅmukho vāpyudaṅmukhaḥ
//
gudacchidre maheśāni
svaliṅgāgraṃ niveśayet
śrotre caiva tathā netre
nāsāyāṃ ca tato mukhe
//
aṅguṣṭhādi maheśāni
krameṇa yojayet sudhīḥ
nāsikāyāṃ mukhe caiva
samīraṃ bahuyatnataḥ
//
pūrayet parameśāni
kiṃcid api na recayet
śabdapratyakṣatāṃ kṛtvā
varṇamālāṃ vicintayet
//
aṣṭottaraśataṃ mūla
mantraṃ tu prajapet sudhīḥ
so 'haṃmantreṇa deveśi
ānayettena vartmanā
//
ṣaṭcakradevatāstatra
saṃtarpyāmṛtadhārayā
kṛte phalaṃ maheśāni
kathayiṣyāmi te 'naghe
//
vada īśāna sarvajña
sarvatattvavidāṃ vara
mantramārgeṇa deveśa
kālikāyāḥ sudurlabham
//
śṛṇu devi sadānande
kālikāmantramuttamam
yasyāḥ prasaṅgamātreṇa
jīvanmukto bhavennaraḥ
//
śivādyaṃ bindunādāḍhyaṃ
vāmanetrāgnisaṃyutam
siddhavidyā tv iyaṃ bhadre
vidyārājñī sudurlabhā
//
idaṃ bījatrayaṃ cādyaṃ
gaganaṃ bindubhūṣitam
vāmaśravaṇasaṃyuktaṃ
dvaṃdvaṃ cāparakaṃ śṛṇu
//
īśānaṃ vahnisaṃyuktaṃ
vāmanetrendusaṃyutam
dvitīyaṃ parameśāni
sambodhanapadaṃ tataḥ
//
punar bījatrayaṃ kūrcaṃ
māyādvaṃdvaṃ ca ṭhadvayam
dvāviṃśatyakṣaraṃ mantraṃ
vidyārājñī sudurlabhā
//
vāgbhavādyā mahāvidyā
śrīkālī devatā smṛtā
praṇavādyā mahāvidyā
devatā siddhikālikā
//
nijabījadvayaṃ kūrcaṃ
bījaikaṃ parameśvari
tryakṣarī paramā vidyā
cāmuṇḍā kālikā smṛtā
//
etasyāḥ sadṛśī vidyā
siddhidā nāsti sundari
yathā ṣaḍakṣarī vidyā
tathā vidyā ca tryakṣarī
//
nijabījatrayaṃ bhadre
śmaśānakālikā tataḥ
punar bījatrayaṃ bhadre
vahnikāntāṃ samuccaret
//
caturdaśākṣarī vidyā
triṣu lokeṣu pūjitā
dakṣiṇākālikā siddha
kālikā guhyakālikā
//
śrīkālikā bhadrakālī
cāmuṇḍākālikā parā
śmaśānakālikā devi
mahākālīti cāṣṭadhā
//
nijabījaṃ maheśāni
sambodhanapadaṃ tataḥ
punaśca kālikābījaṃ
tato vahnivadhūṃ nyaset
//
iti cāṣṭavidhaṃ mantraṃ
sarvatantreṣu gopitam
śrutaṃ mahākālikāyā
mantraṃ paramagopanam
//
tārāyā mantrarājaṃ tu
śrotumicchāmi sāmpratam
yasyāḥ prasaṅgamātreṇa
bhavābdhau na nimajjati
//
tanmantraṃ vada īśāna
yadi sneho'sti māṃ prati
candrabījaṃ samuccārya
ādyaṃ vahnisamāgatam
//
vāmanetrendusaṃyuktaṃ
mantrarājamimaṃ priye
ekākṣarī mahāvidyā
triṣu lokeṣu pūjitā
//
īśānabindusaṃyuktaṃ
vāmakarṇavibhūṣitam
ekākṣarī mahāvidyā
mantrarājadvitīyakam
//
śiraṃ bindusamārūḍhaṃ
vāmanetrendusaṃyutam
ādyabījaṃ dvitīyaṃ ca
astramantraṃ samuccaret
//
praṇavādyā yadā vidyā
sogratārā prakīrtitā
vidyā caikajaṭā proktā
mahāmokṣapradāyinī
//
tārāstrarahitā tryarṇā
mahānīlasarasvatī
vāgbhavādyā yadā vidyā
vāgīśatvapradāyinī
//
śrībījādyā mahāvidyā
sadā lakṣmīpradāyinī
māyādyā paramā vidyā
sadā siddhipradāyinī
//
kūrcabījādikā caiṣā
śabdarāśiprakāśinī
gaganādyā mahāvidyā
nirvāṇamokṣadāyinī
//
prāsādādyā mahāvidyā
śivasāyujyadāyinī
prāṇabījādikā caiṣā
vāñchāsiddhipradāyinī
//
kālikādyā mahāvidyā
muktidā siddhidā sadā
kālikāyāśca tārāyā
ārādhanam ihocyate
//
prātarutthāya mantrajñaḥ
sahasrāre guruṃ yajet
ṣaṭcakraṃ bhedayitvā tu
cāṣṭottaraśataṃ japet
//
tataḥ praṇamya vidhivat
snānakarma samārabhet
adyetyādi samuccārya
sauramāsaṃ samuccaret
//
devatāprītaye paścāt
snāpayecchuddhavāriṇā
oṃkāraṃ ca samuccārya
gaṅge ceti samuccaret
//
yamuneti tataḥ paścād
godāvari sarasvati
narmadeti samuccārya
sindhukāverisaṃyutam
//
asmin jale ca saṃnidhiṃ
kuru śabdamatho vadet
ānayedaṅkuśākhyena
ravisaṃyuktamaṇḍalāt
//
mudrācatuṣṭayaṃ devi
darśayed bahuyatnataḥ
rudrasaṃkhyaṃ japenmantram
ācchādya mīnamudrayā
//
sūryāyābhimukhaṃ toyaṃ
niḥkṣipya ravisaṃkhyayā
mūlamantraṃ samuccārya
kṣālayeccaraṇadvayam
//
caraṇānniḥsṛte toye
trir nimajya japenmanum
mūlamantraṃ trir japtvā tu
mudrayā kumbhasaṃjñayā
//
jalādutthāya deveśi
tilakaṃ kulavartmataḥ
ātmavidyāśivais tattvair
ācāmet payasā tataḥ
//
vahnijāyānvitā mantrā
vijñeyāḥ praṇavādikāḥ
gaṅge cetyādinā devi
tīrthamāvāhanaṃ caret
//
mūlena darbhayā bhūmau
trivāraṃ nikṣipet sudhīḥ
tajjalena saptavāram
ātmābhiṣekamācaret
//
aṅganyāsaṃ tataḥ kṛtvā
vāmahaste sureśvari
gaganaṃ vāyubījaṃ ca
varuṇaṃ bhūmibījakam
//
vahnibījaṃ binduyuktaṃ
trivāraṃ japamācaret
anena manunā devi
tajjalaṃ cābhimantritam
//
mūlamantraṃ samuccārya
saptadhā tattvamudrayā
abhiṣecanamātreṇa
mucyate sarvapātakaiḥ
//
śeṣaṃ jalaṃ maheśāni
dakṣahaste samānayet
iḍayā pūrayettoyaṃ
kṣālayed dehamadhyagam
//
tataḥ piṅgalayā devi
tattoyaṃ tu virecayet
kṛṣṇavarṇaṃ tadudakaṃ
pāparūpaṃ vicintayet
//
purato vajrapāṣāṇe
phaṭkāreṇa vinikṣipet
hastaṃ prakṣālya cācamya
prāṇāyāmapuraḥsaram
//
tarpayet kuladevaṃ ca
sūryāyārghyaṃ nivedayet
devatārghyaṃ tataḥ paścād
gāyatrīṃ paramākṣarīm
//
praṇavaṃ ca samuddhṛtya
kālikāyai tato vadet
vidmahe iti saṃlikhya
śmaśānaṃ ca samuddharet
//
vāsinīṃ ṅeyutāṃ devi
dhīmahīti tato vadet
tanno ghore maheśāni
prajapettu pracodayāt
//
gāyatrīṃ prapaṭhed dhīmān
trivāraṃ jalamutkṣipet
tato japenmahāmantraṃ
gāyatrīṃ paramākṣarīm
//
aṅganyāsaṃ tataḥ kṛtvā
ācamya parameśvari
iṣṭadevīṃ maheśāni
dhyātvā tu parimaṇḍale
//
oṃ tārāyai vidmahe iti
mahogrāyai tato vadet
dhīmahīti tataḥ paścāt
tato devi pracodayāt
//
prāṇāyāmaṃ tataḥ kṛtvā
cāṣṭottaraśataṃ japet
sūtrākāreṇa deveśi
pūjāvidhirihocyate
//
svastivācanasaṃkalpaṃ
ghaṭaṃ saṃsthāpya yatnataḥ
mantreṇācamanaṃ kāryaṃ
sāmānyārghyaṃ tato nyaset
//
tajjalair dvāram abhyukṣya
dvārapūjāṃ samācaret
trividhaṃ vighnam utsārya
bhūtāpasaraṇaṃ tataḥ
//
āsanaṃ ca samabhyarcya
gurudevaṃ namet sudhīḥ
karaśuddhiṃ ca tālaṃ ca
trayaṃ digbandhanaṃ tataḥ
//
vahninā veṣṭanaṃ kāryaṃ
bhūtaśuddhim athācaret
mātṛkāyāḥ ṣaḍaṅgaṃ ca
kuryād āntaramātṛkām
//
mātṛkādhyānam uccārya
bāhye tu mātṛkāṃ nyaset
pīṭhanyāsaṃ tataḥ kṛtvā
prāṇāyāmaṃ samācaret
//
ṛṣyādikaṃ karāṅgaṃ ca
varṇanyāsaṃ samācaret
ṣoḍhānyāsaṃ tato devi
vyāpakaṃ tadanantaram
//
evaṃ samāhitamanās
tattvanyāsaṃ samācaret
bījanyāsaṃ tato devi
vyāpakaṃ vinyaset sudhīḥ
//
mūlena saptadhā dhyānaṃ
mānasaiḥ pūjanaṃ caret
viśeṣārghyaṃ pīṭhapūjāṃ
punardhyānaṃ sanetrakam
//
mudrādidarśanaṃ kāryam
āvāhanaṣaḍaṅgakam
dhenvādikaṃ tataḥ prāṇa
pratiṣṭhāṃ mūlapūjanam
//
ājñāprārthanamaṅgāni
kālyādīn paripūjayet
brāhmyādīnasitāṅgādīn
mahākālaṃ prapūjayet
//
khaḍgādīn gurupaṅktiṃ ca
punardevīṃ prapūjayet
balidānaṃ tato homaṃ
prāṇāyāmaṃ tato japam
//
japaṃ samarpayeddhīmān
prāṇāyāmaṃ tataścaret
etasmin samaye devi
kāraṇādīn samāharet
//
arghyaṃ dattvā maheśāni
cātmānaṃ ca samarpayet
stutiṃ ca kavacaṃ smṛtvā
cāṣṭāṅgaṃ praṇamet sudhīḥ
//
śivo'ham iti saṃcintya
saṃhāreṇa visarjayet
aiśānyāṃ maṇḍalaṃ kṛtvā
cāṇḍālyucchiṣṭapūrvikām
//
arghyaṃ saṃdhārya śirasi
candanaṃ tu lalāṭake
naivedyaṃ kiṃcit svīkṛtya
viharecca nijecchayā
//
saṃkṣepapūjāmathavā
kuryānmantrī samāhitaḥ
ādau ṛṣyādikaṃ nyāsaṃ
karaśuddhistataḥ param
//
aṅgulīvyāpakanyāsau
hṛdādinyāsa eva ca
tālatrayaṃ ca digbandhaḥ
prāṇāyāmastataḥ param
//
dhyānaṃ mānasayāgaṃ ca
arghyasthāpanameva ca
pīṭhapūjāṃ punardhyānaṃ
tataścāvāhanaṃ caret
//
jīvanyāsaṃ tataḥ kṛtvā
pūjayet paradevatām
aṅgapūjāṃ ca kālyādīn
brāhmyādīṃścāṣṭabhairavān
//
mahākālaṃ pūjayitvā
gurupaṅktiṃ yajettataḥ
khaḍgādīn pūjayitvā tu
punardevīṃ prapūjayet
//
prāṇāyāmaṃ tataḥ kṛtvā
pūjayet sādhakāgraṇīḥ
devyā haste japaphalaṃ
samarpaṇamathācaret
//
prāṇāyāmaṃ tataḥ kṛtvā
cāṣṭāṅgaṃ praṇamet sudhīḥ
stutiṃ ca kavacaṃ smṛtvā
viśeṣārghyaṃ pradāpayet
//
ātmasamarpaṇaṃ kṛtvā
saṃhāreṇa visarjayet
aiśānyāṃ maṇḍalaṃ kṛtvā
cāṇḍālyucchiṣṭapūrvikām
naivedyaṃ kiṃcit svīkṛtya
viharecca nijecchayā
//
Toḍalatantra, Caturthaḥ paṭalaḥ
śrutā pūjā kālikāyās
tārāyā vada sāmpratam
yasyāḥ prasaṅgamātreṇa
vācaś cittāyate nṛṇām
//
śṛṇu cārvaṅgi subhage
tārāyāḥ pūjanaṃ mahat
mantreṇācamanaṃ kṛtvā
gurudevaṃ namettataḥ
//
jalaṃ saṃśodhya hastau ca
pādau ca kṣālayettataḥ
mantreṇācamanaṃ kṛtvā
tataḥ pīṭhaṃ vicintayet
//
śikhāṃ baddhvā tato devi
trividhaṃ vighnanāśanam
bhūmyāsanaṃ ca saṃśodhya
vastre granthiṃ vidhāya ca
//
kāyavākśodhanaṃ kṛtvā
tataḥ puṣpaviśodhanam
yantraṃ kṛtvā sādhakendraḥ
sāmānyārghyaṃ ca vinyaset
//
dvārapālāṃśca saṃpūjya
pīṭhapūjāṃ samārabhet
pīṭhaśaktīśca lakṣmyādyās
tataḥ pīṭhamanuṃ japet
//
bhūtaśuddhiṃ pravakṣyāmi
viśeṣamiha yadbhavet
kūrcayuktena haṃsena
pūrakeṇa sureśvari
//
kuṇḍalyā saha cātmānaṃ
caturviṃśatibījakam
tatra līnāni deveśi
paramātmani sādhakaḥ
//
māyayā saṃdahet pāpaṃ
puruṣaṃ kajjalaprabham
kumbhakena varārohe
bhasma kuryād vicakṣaṇaḥ
//
vadhūbījena deveśi
bhasmanā saha recayet
pūrakeṇa tu kūrcena
lalāṭe'mṛtasaṃcayam
//
cintayet parameśāni
kumbhakenāmṛtāmbudhim
āṃ hrīṃ kroṃ vahnibījāntaṃ
hṛdi caikādaśaṃ japet
//
tatastu cintayed dhīmān
oṃkārād raktapaṅkajam
tasyopari punardhyāyet
huṃkāraṃ nīlasaṃnibham
//
tasyopari punar dhyāyed
bījabhūṣitakartṛkām
tasyopari paraṃ binduṃ
śivarūpaṃ ca avyayam
//
vālukāyāḥ sahasraika
bhāgaṃ binduṃ sudurlabham
bindumadhye maṇidvīpaṃ
śatayojanavistṛtam
//
bindumadhye paraṃ jyotir
budbudākāramaṇḍalam
yathaiva budbude devi
pratibimbaṃ prapaśyati
//
tathā nirīkṣaṇaṃ kāryaṃ
prakuryājjñānacakṣuṣā
maṇidvīpaṃ tu tanmadhye
suvarṇavālukāmayam
//
parito bhāvayenmantrī
parikhāto manoharam
madhye kalpadrumaṃ dhyāyed
ātmānaṃ tāriṇīmayam
//
udyadādityasaṃkāśaṃ
jyotirmaṇḍalamuttamam
caturdvārasamāyuktaṃ
hemaprākārabhūṣitam
//
bahucāmaraghaṇṭādi
devakanyāsuśobhitam
mandavāyusamāyuktaṃ
gandhadhūpair alaṃkṛtam
//
tanmadhye vedikāṃ dhyāyen
nānāratnopaśobhitām
suvarṇasūtraracitaṃ
cintayecchattram uttamam
//
tadadhaścintayenmantrī
ratnasiṃhāsanaṃ priye
tatra devīṃ cintayecca
yathoktadhyānayogataḥ
//
yogasāre yathoktaistu
upacāraiḥ prapūjayet
prāṇāyāmaṃ tataḥ kṛtvā
ṛṣyādinyāsamācaret
//
varṇanyāsaṃ tataḥ kṛtvā
karāṅganyāsamācaret
tālatrayaṃ choṭikābhir
daśadigbandhanaṃ caret
//
ṣoḍhānyāsaṃ tataḥ kṛtvā
vyāpakaṃ tadanantaram
viśeṣārghyaṃ ca saṃsthāpya
pañcatattvaṃ viśodhayet
//
sudhādevīṃ samānīya
pañcīkaraṇamācaret
kumbhe puṣpaṃ samādāya
trikoṇe triḥ prapūjayet
//
vāmadehaṃ tridhā coktvā
khecarīṃ daśadhā japet
tathā cānandagāyatrīm
ṛcaṃ ca trir japet sudhīḥ
//
brahmaśāpaṃ śukraśāpaṃ
kṛṣṇaśāpaṃ sureśvari
digjapānnāśayeddhīmān
tato mantratrayaṃ japet
//
churikāṃ cāmṛtaṃ caiva
prītisaṃrakṣaṇīṃ tathā
pāvamānaṃ ca trir japtvā
śoṣaṇādīn samācaret
//
vāruṇaṃ trir japeddevi
cāmṛtaṃ saptadhā japet
vidyātattve dhenumudrāṃ
pradarśya mūlamaṣṭadhā
//
kuṇḍalinīṃ samutthāpya
śivo'haṃ bhāvayettataḥ
māṃsaṃ mīnaṃ śodhayitvā
mudrāśodhanamācaret
//
śaktiṃ ca kulapuṣpaṃ ca
śodhayet sādhakottamaḥ
devān pitṝn ṛṣīṃścaiva
tarpayediṣṭadevatām
//
śodhitaṃ dravyamādāya
viśeṣārghye vinikṣipet
tato brahmamayaṃ dhyātvā
pūjādhyānaṃ samācaret
//
nāsārandhrāt samānīya
pīṭhe puṣpaṃ nidhāya ca
tataścāvāhanaṃ kṛtvā
pañcamudrāḥ pradarśayet
//
ṣaḍaṅgena ca sampūjya
punarmudrāṃ pradarśayet
jīvanyāsaṃ tataḥ kṛtvā
upacāraiḥ prapūjayet
//
ṣaḍaṅgāni ca sampūjya
akṣobhyaṃ pūjayedadhaḥ
gurupaṅktiṃ pūjayitvā
daśamūleṣu pūjayet
//
mahāpūrvāṃś ca kālyādīn
yajedvairocanādikān
punardevīṃ prapūjyātha
baliṃ dadyādvicakṣaṇaḥ
//
prāṇāyāmaṃ tataḥ kṛtvā
mantradhyānaṃ samācaret
japaṃ kṛtvā maheśāni
devyā haste samarpayet
//
prāṇāyāmaṃ punaḥ kṛtvā
tattvasvīkāramācaret
tasmai dattvā svayaṃ nītvā
prajapet sādhakāgraṇīḥ
//
pītvā pītvā japitvā ca
muktaḥ koṭijanaiḥ saha
pratipātre japenmantram
aṣṭottaraśataṃ sudhīḥ
//
stutiṃ ca kavacaṃ smṛtvā
cāṣṭāṅgaṃ praṇamet sudhīḥ
viśeṣārghyaṃ pradātavyam
ātmānaṃ ca samarpayet
//
rudrarūpī svayaṃ bhūtvā
saṃhāreṇa visarjayet
yonimudrāṃ tato baddhvā
kṣamasveti visarjayet
//
aṅganyāsaṃ maheśāni
prāṇāyāmaṃ tataḥ param
aiśānyāṃ maṇḍalaṃ kṛtvā
nirmālyena prapūjayet
//
nirmālyavāsinīṃ ṅe'ntāṃ
caṇḍeśvaryai namo namaḥ
nirmālyaṃ dhārayet śīrṣe
candanaṃ ca lalāṭake
//
gurusthāne likhed yantraṃ
vicared bhairavo yathā
saṃkṣepapūjanaṃ devi
mānasaṃ tattvavarjitam
//
atroktamācaredatra
nānyat saṃcārayet sudhīḥ
anyatsaṃcāraṇāddevi
kruddhā bhavati tāriṇī
//
tattvajñānaṃ ca mānaṃ ca
śaktimātre hi pārvati
ityetat kathitaṃ devi
kimanyat śrotumicchasi
//
Toḍalatantra, Pañcamaḥ paṭalaḥ
tvatprasādānmahādeva
pavitrāhaṃ na cānyathā
śambhunāthārcanaṃ deva
śrotum icchāmi sāmpratam
//
śṛṇu pārvati vakṣyāmi
yanmāṃ tvaṃ paripṛcchasi
nakulīśaṃ samuddhṛtya
manusvaravibhūṣitam
//
bindunādakalāyuktaṃ
prāsādākhyaṃ mahāmanum
asya mantrasya māhātmyam
ūrdhvāmnāye mayoditam
//
namaskāraṃ samuddhṛtya
vāntaṃ netravibhūṣitam
vāruṇaṃ mukhavṛttaṃ ca
vāyuṃ lalāṭasaṃyutam
//
ayaṃ pañcākṣaro mantraḥ
pañcāmnāyaphalapradaḥ
praṇavādi yadā devi
tadā mantraṃ ṣaḍakṣaram
//
prāsādākhyaṃ samuddhṛtya
ardhanārīśvarāya ca
punaḥ prāsādamuddhṛtya
mantraṃ paramagopanam
//
evaṃ bahuvidhākāraṃ
vigrahaṃ me nagātmaje
kaṇṭhe tu garalaṃ devi
na kalau bhāvayet kvacit
//
yadīcchedātmano mṛtyuṃ
yadi unmattam icchati
tadaiva sahasā devi
nīlakaṇṭham upāsate
//
duradṛṣṭavaśād devi
nīlakaṇṭhastavādikam
karoti kārayedvāpi
mama hatyāṃ karoti saḥ
//
ata eva maheśāni
sa pāpiṣṭho na cānyathā
niṣiddhācaraṇaṃ pāpaṃ
karoti yadi pāmaraḥ
//
putradārādhanaṃ tasya
nāśameti na saṃśayaḥ
kaṇṭhe tu garalaṃ devi
yadi pūjāparo bhavet
//
ihaloke daridraḥ syān
mṛte śūkaratāṃ vrajet
nīlakaṇṭhasya yanmantraṃ
yadi kuryāt puraskriyām
//
pakṣāntare maheśāni
tasya mṛtyurna cānyathā
śṛṇu devi pravakṣyāmi
pārthivaṃ śivapūjanam
//
tatrādau parameśāni
gurudevaṃ namet sudhīḥ
oṃ harāya namaskāraṃ
mṛttikāmāharet sudhīḥ
//
maheśvarāya namaskāraṃ
liṅgaṃ nirmāya yatnataḥ
śūlapāṇe ihoccārya
susaṃpratiṣṭhito bhava
//
anena manunā devi
jīvanyāso vidhīyate
śakāraṃ bindusaṃyuktaṃ
dīrghamuktaṃ ṣaḍaṅgakam
//
tasya dhyānaṃ pravakṣyāmi
śṛṇuṣva susamāhitā
oṃ dhyāyennityaṃ maheśaṃ rajatagirinibhaṃ cārucandrāvataṃsaṃ
ratnākalpojjvalāṅgaṃ paraśumṛgavarābhītihastaṃ prasannam
padmāsīnaṃ samantāt stutam amaragaṇair vyāghrakṛttiṃ vasānaṃ
viśvādyaṃ viśvabījaṃ nikhilabhayaharaṃ pañcavaktraṃ trinetram
//
puṣpaṃ śirasi saṃdhārya
mānasaiḥ pūjanaṃ caret
punardhyātvā maheśāni
śive puṣpaṃ nidhāya ca
//
pinākadhṛgiti coccārya
ihāgaccha dvayaṃ vadet
iha tiṣṭha tato dvaṃdvaṃ
saṃnidhehi dvayam iha
//
iha sanni tato ruddha
svaśabdaṃ ca tato vadet
yāvat pūjāṃ samuccārya
tataścaivaṃ karomyaham
//
snānīyaṃ ca paśupatiṃ
ṅeyuktaṃ ca namaścaret
vedādyaṃ yojayeddevi
brāhmaṇaḥ sādhakottamaḥ
//
etat pādyaṃ maheśāni
ṣaḍakṣaramanuṃ tataḥ
namaskāraṃ samuccārya
sarvaṃ dadyād vicakṣaṇaḥ
//
pūjayitvā maheśāni
cāṣṭamūrtiṃ prapūjayet
śarvo bhavastathā rudra
ugro bhīmaḥ paśoḥ patiḥ
//
mahādevaṃ ca īśānaṃ
ṅeyutaṃ kuru yatnataḥ
kṣitiṃ jalaṃ tathā cāgniṃ
vāyuṃ cākāśameva ca
//
yajamānaṃ tathā somaṃ
sūryaṃ ca mūrtinā saha
sarvatra ṅeyutaṃ kṛtvā
pūjayet sādhakottamaḥ
//
praṇavādinamo'ntena
vāmāvartena pūjayet
mūrtayo'ṣṭau śivasyaitāḥ
pūrvādikramayogataḥ
//
āgneyyāntāḥ prapūjyātha
vidyāṃ liṅgiśivaṃ yajet
aṣṭottarasahasraṃ vā
śataṃ vā prajapettataḥ
//
guhyātiguhyagoptā tvaṃ
gṛhāṇāsmatkṛtaṃ japam
siddhirbhavatu me deva
tvatprasādānmaheśvara
//
tatastoyaṃ samādāya
japaṃ caiva samarpayet
mukhavādyaṃ tataḥ kṛtvā
cāṣṭāṅgaṃ praṇamet sudhīḥ
//
saṃhāreṇa mahādeva
kṣamasveti visarjayet
evaṃ pūjā prakartavyā
śaktimantrān yajed yadi
//
prāsādādīn mahāmantrān
yadi dīkṣāparo bhavet
śaktidīkṣā na kartavyā
kadācidapi mohataḥ
//
sa śaiva iti vikhyātaḥ
sarvatantreśvaro bhavet
athātaḥ sampravakṣyāmi
sūtraṃ paramagopanam
//
haro maheśvaraścaiva
śūlapāṇiḥ pinākadhṛk
paśupatiḥ śivaścaiva
mahādeva iti kramāt
//
aṣṭamūrtis tato devi
pūjayet sādhakottamaḥ
tato japenmaheśāni
mukhavādyaṃ tataḥ param
//
etadanyanna kartavyaṃ
śaktidīkṣāparo yadi
niṣiddhācaraṇāddevi
pāpabhāg jāyate naraḥ
//
nyūnādhikaṃ mahādevi
yadi pūjādikaṃ caret
sa guruṃ cāpi śiṣyaṃ ca
śivahatyāṃ prayacchati
//
nyūnādhikaṃ maheśāni
yadi caikākṣaraṃ bhavet
varṇasaṃkhyā maheśāni
brahmahatyā bhaviṣyati
//
ata eva sa pāpiṣṭhaḥ
satyaṃ satyaṃ sureśvari
evaṃ pūjāṃ vidhāyādau
tataścānyaṃ prapūjayet
//
ādau śivaṃ pūjayitvā
śaktipūjā tataḥ param
yat kiṃcid upacāraṃ hi
tasya kiṃcinnivedayet
//
anyathā mūtravat sarvaṃ
gaṅgātoyaṃ bhaved yadi
ata eva maheśāni
ādau liṅgaṃ prapūjayet
//
śivasnānodakaṃ devi
mūrdhni saṃdhārayed yadi
satyaṃ satyaṃ maheśāni
śivatulyo na saṃśayaḥ
//
śivarūpī svayaṃ bhūtvā
devīpūjāṃ samācaret
śaivavaiṣṇavadaurgārka
gāṇapatyaindradīkṣitaḥ
//
ādau liṅgaṃ pūjayitvā
yadi cānyat prapūjayet
tatphalaṃ koṭiguṇitaṃ
satyaṃ satyaṃ na saṃśayaḥ
//
anyadevaṃ pūjayitvā
śivaṃ paścād yajed yadi
tasya pūjāphalaṃ caiva
bhujyate yakṣarākṣasaiḥ
//
iti te kathitaṃ kānte
tantrāṇāṃ sāramuttamam
bahu kiṃ kathyate devi
bhūyaḥ kiṃ śrotumicchasi
//
Toḍalatantra, ṣaṣṭhaḥ paṭalaḥ
śrutaṃ mahākālikāyā
mantraṃ paramagopanam
saṃkṣepaṃ kathitaṃ nātha
vāsanāṃ vada māṃ prati
//
śṛṇu devi mahāmantra
vāsanāṃ sarvasiddhidām
yasyāḥ śravaṇamātreṇa
mantrāḥ siddhā bhavanti hi
//
kakārasyordhvakoṇeṣu
prāṇo vāyuḥ pratiṣṭhitaḥ
apāno vāyukoṇe ca
samāno madhyadeśataḥ
//
udāno 'ṅkuśakoṇe ca
mātrāyāṃ vyāna eva ca
bījaṃ tu kālikārūpaṃ
prakāraṃ śṛṇu pārvati
//
kalābhāge jaṭājūṭaṃ
keśaṃ ca parameśvari
bindumastakabhālaṃ tu
nāsā netraṃ ca pārvati
//
śrotrayugmaṃ tathā vaktraṃ
skandanād avyavasthitam
caturbāhuṃ tathā dehaṃ
stanadvaṃdvaṃ kaṭidvayam
//
hṛdayaṃ jaṭharaṃ pādaṃ
tathā sarvāṅguliḥ śive
brahmarūpaṃ kakāraṃ ca
sarvāṅgaṃ tanusaṃśayaḥ
//
śakāraṃ kāmarūpaṃ ca
yonirūpaṃ na cānyathā
candrasūryāgnirūpaṃ ca
rephaṃ paramadurlabham
//
sarvāṅgadyotanaṃ tejo
jagadānandarūpakam
bindunirvāṇadaṃ nādaṃ
mahāmokṣapradaṃ sadā
//
sarvavighnaharaṃ devi
kakāraṃ toyarūpakam
sarvapāpaharaṃ rephaṃ
tasmād vahnirna cānyathā
//
īkāraṃ parameśāni
śaktiṃ cāvyayarūpiṇīm
mahāmokṣapradā devī
tasmānmāyā prakīrtitā
//
kakāraṃ brahmarūpaṃ ca
makāraṃ viṣṇurūpakam
rephaḥ saṃhārarūpatvāc
chivarūpo na cānyathā
//
brahmaviṣṇuśivaḥ sākṣāt
kakāraṃ parameśvari
anuccāryaṃ tadeva syād
vinā māyāyutaṃ śive
//
māyāyuktaṃ yadā devi
tadā muktipradaṃ mahat
ata eva maheśāni
māyāśaktirnigadyate
//
kakāraṃ dharmadaṃ devi
īkāraścārthadāyakam
rakāraṃ kāmadaṃ kānte
makāraṃ mokṣadāyakam
//
ekatroccāraṇāddevi
nirvāṇamokṣadāyinī
māhātmyaṃ devadeveśi
kiṃ vaktuṃ śakyate mayā
//
jihvākoṭisahasreṇa
vaktrakoṭiśatena ca
janmāntarasahasreṇa
varṇituṃ naiva śakyate
//
vidhivallakṣajāpena
puraścaraṇam ucyate
etadrūpaṃ mahāmāyāṃ
kūrcabījaṃ tu sundari
//
vāgbhavaṃ praṇavaṃ devi
etadrūpaṃ na saṃśayaḥ
agnijāyā mahāvidyā
etadrūpaṃ na saṃśayaḥ
//
drutasiddhipradā vidyā
vahnijāyā parā manuḥ
sambodhanapadenaiva
sadā saṃnidhikāriṇī
//
atha vakṣye mahāvidyā
puraścaraṇam uttamam
kathitaṃ mantrarājasya
tripuraścaraṇaṃ śṛṇu
//
divā lakṣaṃ japenmantraṃ
haviṣyāśī jitendriyaḥ
divyavīramate devi
rātrau lakṣaṃ japet sudhīḥ
//
atha ṣaḍakṣarasyāsya
śṛṇu devi puraskriyām
divyavīramatenaiva
viṃśatyekena pārvati
//
tathā ca tryakṣaraṃ mantraṃ
prajapet sādhakāgraṇīḥ
dhyānapūjādikaṃ sarvaṃ
samānaṃ vīravandite
//
etasyāḥ sadṛśī vidyā
phaladā nāsti yogini
sarvamantrasya caitanyaṃ
śṛṇu pārvati sādaram
//
sahasrāre mahāpadme
bindurūpaṃ paraṃ śivam
kuṇḍalinīṃ samutthāpya
haṃsena manunā sudhīḥ
//
nāsāgre yā sthirā dṛṣṭir
jāyate parameśvari
tadaiva mantracaitanyaṃ
kuṇḍalīcakragaṃ bhavet
//
sahasrāre mahāpadme
kuṇḍalyā sahitaṃ gurum
bhāvayet sarvamantrāṇāṃ
caitanyaṃ jāyate priye
//
tadaiva prajapenmantraṃ
siddhidaṃ nātra saṃśayaḥ
idānīṃ tāriṇīmantra
vāsanāṃ vada śaṃkara
kālikā mokṣadā nityā
tāriṇī bhavavāridhau
//
kalākeśaṃ maheśāni
bindumastakamīritam
nādaṃ ca vaktraṃ bhālaṃ ca
nāsāṃ netraṃ ca pārvati
//
bhujacatuṣṭayaṃ dehaṃ
stanadvaṃdvaṃ ca vakṣasam
makāreṇa tu deveśi
pṛṣṭhaṃ caiva kaṭidvayam
//
takāreṇa yonideśaṃ
gudaṃ pādadvayaṃ tathā
sarvāṅgulīr nakhaṃ caiva
bhāvayet sādhakottamaḥ
//
candrasūryātmakaṃ rephaṃ
vahnibījaṃ na cānyathā
sarvā nāḍyastathā jyotī
romaṃ ca bhūṣaṇādikam
//
śakāraṃ ca mahāmāyā
śaktirūpaprakāśinī
mūrdhādipādaparyantaṃ
śaktibījaṃ sudurlabham
//
asya mantrasya māhātmyaṃ
kiṃ mayā kathyate'dhunā
aśvamedhasahasrāṇi
vājapeyaśatāni ca
//
kāśyāditīrthaṃ deveśi
sārdhakoṭibhuvātmakam
pūrṇāṃ śasyena deveśi
saptadvīpāṃ vasuṃdharām
//
merutulyasuvarṇaṃ tu
brāhmaṇe vedapārage
sadakṣiṇaṃ vrataṃ sarvaṃ
caturvedasuvistaram
//
gāṃ caiva bhūmisaṃsthaṃ ca
hastyaśvaṃ ca tathaiva ca
balidānaṃ maheśāni
pitṛyajñaṃ tathaiva ca
//
vihitaṃ ca mahāpuṇyaṃ
yaduktaṃ śāstravedibhiḥ
sakṛjjapānmaheśāni
kalāṃ nārhanti ṣoḍaśīm
//
ekoccāreṇa deveśi
kiṃ punarbrahma kevalam
sṛṣṭisthitilayādīnāṃ
kartāro nātra saṃśayaḥ
//
saguṇaṃ nirguṇaṃ sākṣāt
nirākāraṃ ca mūrtimat
vaikharīyaṃ mahāvidyā
varṇāśritā suniścalā
//
yato nirakṣaraṃ vastu
atastārā prakīrtitā
brahmavidyāsvarūpeyaṃ
bhogamokṣaphalapradā
//
janmakoṭisahasreṇa
varṇituṃ naiva śakyate
pañcavaktreṇa deveśi
kiṃ mayā kathyate'dhunā
//
ekākṣarī mahāvidyā
triṣu lokeṣu pūjitā
ekākṣarīvihīno yo
mantraṃ gṛhṇāti pārvati
//
kalpakoṭisahasreṇa
tasya siddhirna jāyate
sakāro viṣṇurūpaśca
takāraśca prajāpatiḥ
//
rephaḥ saṃhārarūpatvāc
chivaḥ sākṣānna saṃśayaḥ
yā cādyā paramā vidyā
sā māyā paramā kalā
//
nirākāraṃ paraṃ jyotir
binduṃ cāvyayasaṃjñakam
binduśabdena śūnyaṃ syāt
tathā ca guṇasūcakam
//
binducakrāmṛtā devi
plavantī cārdhamātrayā
ardhamātrākṛtirnādo
vyāpako viśvapālakaḥ
//
yatheyaṃ vaikharī vidyā
kūrcavidyā tathaiva ca
māhātmyaṃ caiva pūjāyāṃ
bhedo nāsti sureśvari
//
satāraṃ ca tathā binduṃ
māyā pañcākṣarī parā
vibhakte cākṣare caiva
kriyate mūrtikalpanā
//
sārdhapañcākṣarī vidyā
tāriṇī mūrtimat svayam
tadrūpaṃ pakṣirūpaṃ hi
vāgbhavaśca haripriyām
//
praṇavaṃ kāmabījaṃ tu
gaganaś ca śivaṃ śive
astrabījaṃ tadeva syād
vahnijāyāṃ sureśvari
//
sambodhanapadenaiva
sadā saṃnidhikāriṇī
pañcākṣareṇa deveśi
tāriṇī kāmarūpiṇī
//
tathā pañcākṣaraṃ paśya
brahmaviṣṇuśivātmakam
śaktirūpaṃ nirākāraṃ
tathā pañcākṣareṇa tu
//
yathā pañcākṣarī vidyā
tathā vidyā ṣaḍakṣarī
tathaiva ṣoḍaśī vidyā
tathā vidyā ca vyakṣarī
//
tathaivāṣṭākṣarī vidyā
tathā navākṣarī parā
māhātmyaṃ dhyānapūjāyāṃ
bhedo nāsti sureśvari
//
atisnehena deveśi
kiṃ mayā na prakāśitam
prāṇānte'pi paśoragre
vaikharīṃ na prakāśayet
//
Toḍalatantra, Saptamaḥ paṭalaḥ
mahāyogamayī devī
khecarī paramā kalā
yogajñānaṃ vinā siddhir
nāsti satyaṃ sureśvara
//
brūhi me devadeveśa
kṣudrabrahmāṇḍamadhyataḥ
kimādhāre sthitā nātha
saptadvīpā vasuṃdharā
//
samudrasaptakaṃ nātha
kimākāraṃ pratiṣṭhati
mūlādhāre mahīcakre
saṃsthitā mānavādayaḥ
//
kṣudrarūpā janāḥ sarve
kimākāreṇa saṃsthitāḥ
svakīyāṅgulimānena
mārutaṃ kathaya prabho
//
mūlādhāre sthitā devi
saptadvīpā vasuṃdharā
valayākārarūpeṇa
samudrāḥ sapta saṃsthitāḥ
//
jambudvīpaṃ madhyadeśe
tadbāhye lavaṇāmbudhiḥ
śākadvīpaṃ maheśāni
tadbāhye dadhisāgaraḥ
//
tadbāhye śālmalīdvīpaṃ
sāgaro dugdhatadbahiḥ
tadbāhye pāṭalādvīpaṃ
tadbāhye tu jalāntakaḥ
//
pṛthivyāṃ vartate devi
yadrūpā mānavādayaḥ
tena rūpeṇa deveśi
mūlādhāre tu jantavaḥ
//
ṣaṇṇavatyaṅgulaṃ devi
mārutaṃ parikīrtitam
mārtaṇḍasthitimānaṃ tu
adhikaṃ parikīrtitam
//
kiyad bhuvaṃ tu brahmāṇḍaṃ
vada bhūtalavāsinaḥ
aṅgulyekena kiṃ mānaṃ
kathayasva dayānidhe
//
aṅgulyekena deveśi
sahasrābdaṃ prajāyate
ṣaṇṇavatisahasrābdaṃ
bhaved bhūtalavāsinaḥ
//
pādāṅguṣṭhādigulphāntaṃ
priye randhrasahasrakam
randhraṃ candrasahasrābdaṃ
gulphādijānusaṃdhiṣu
//
jānvādigudaparyantaṃ
mānaṃ viṃśasahasrakam
mūlādhārādiliṅgāntaṃ
caturvarṣasahasrakam
//
liṅgādinābhiparyantaṃ
bhavedṛṣisahasrakam
nābhyādihṛdayāntaṃ ca
grahasaṃkhyasahasrakam
//
hṛdādikaṇṭhaparyantam
ṛṣisaṃkhyasahasrakam
viśuddhādikamājñāntaṃ
mānaṃ rudrasahasrakam
//
ājñācakrācchivāntaṃ vai
diksahasraṃ sureśvari
sūryasaṃkhyāsahasraṃ tu
samīraścādhikaḥ smṛtaḥ
//
śarīrasahakāreṇa
hāso vṛddhiśca jāyate
ṣaḍguṇo ratikāle ca
triguṇo bhojanādbahiḥ
//
dhamane cāṣṭadhā proktaḥ
samīro vṛddhitāṃ gataḥ
sadguror upadeśena
mantramārgeṇa pārvati
//
yadi caikāṅgulaṃ hrasvaṃ
sahasrābdaṃ sa jīvati
evaṃ krameṇa deveśi
samatā yadi vā bhavet
//
jitvā mṛtyuṃ maheśāni
śambhuvad viharet kṣitau
ata eva maheśāni
yonimudrā mayoditā
//
prāṇāyāmena deveśi
tathaiva yonimudrayā
tathaivābhyāsayogena
yadi vāyuḥ samo bhavet
//
jitvā mṛtyuṃ maheśāni
khecaro jāyate'cirāt
pramāṇaṃ kathitaṃ sarvaṃ
manuṣyasya priyaṃvade
//
śvāsocchvāsavikāsena
kuṇḍalī gaganaṃ caret
idānīṃ pṛthivīmānaṃ
vada me parameśvara
//
saptasvargasthito yo yo
yā yā śaktiḥ sthitā sadā
tatsarvaṃ śrotumicchāmi
yadi sneho'sti māṃ prati
//
mūlādhāre mahīcakre
saṃsthitā mānavādayaḥ
teṣāṃ mānena deveśi
cārdhaṃ caiva dvisaptatiḥ
//
dviguṇaḥ parameśāni
tadbāhye lavaṇāmbudhiḥ
evaṃ krameṇa deveśi
dviguṇaṃ parikīrtitam
//
ḍākinīsahito brahmā
mūlādhāre tu sundari
rākiṇīsahito viṣṇuḥ
svādhiṣṭhāne vyavasthitaḥ
//
lākinīsahito rudro
maṇipūre sureśvari
anāhate mahāpadme
kākinīsahito haraḥ
//
viśuddhākhye vasennityā
sākinī ca sadāśivaḥ
hākinī paraśivo devaś
cājñācakre sureśvari
//
sahasrāre mahāpadme
viśvarūpaḥ paraḥ śivaḥ
mahākuṇḍalinī tatra
sthitā nityā sureśvari
//
kutra mūle mahāpīṭhe
vartate parameśvara
mūlādhārādadhobhāge
pātālaṃ kīdṛśaṃ prabho
//
mūlādhāre kāmarūpaṃ
hṛdi jālaṃdharaṃ priye
pūrṇagirim adhobhāge
uḍḍīyānaṃ tadūrdhvake
//
vārāṇasī bhruvormadhye
jvalantī locanatraye
māyāvatī mukhavṛtte
kaṇṭhe cāṣṭapurī tathā
//
nābhimūle maheśāni
ayodhyāpurī saṃsthitā
kāñcīpīṭhaṃ kaṭīdeśe
śrīhṛṭṭaṃ pṛṣṭhadeśake
//
mūlādhārāt śataṃ caiva
atalaṃ parikīrtitam
sutalaṃ ca varṣaśataṃ
talātalaśataṃ priye
//
ṛṣibāṇenduvarṣāntaṃ
saṃsthitaṃ ca mahātalam
śatadvayāntaṃ pātālaṃ
dviśataṃ vai rasātalam
//
mūlādhārācca deveśi
dve'ṅgulī cāntike sthite
tayormadhye ca pātālās
tiṣṭhanti parameśvari
//
iti te kathitaṃ kānte
yogasāraṃ samāsataḥ
na vaktavyaṃ paśor agre
prāṇānte'pi kadācana
//
Toḍalatantra, Aṣṭamaḥ paṭalaḥ
sārdhatrikoṭināḍīnām
ālayaṃ ca kalevaram
krameṇa śrotum icchāmi
tad vadasva mayi prabho
//
lomni kūpe sapādārdha
koṭayaścaiva sundari
hastāsye ca tadā pāde
'gnilakṣanāḍayaḥ sthitāḥ
//
udare ca tathā pāyau
pañcalakṣāḥ prakīrtitāḥ
hṛdādisarvagātreṣu
navalakṣāḥ prakīrtitāḥ
//
atha pārśve tathā carme
tathaiva sarvasaṃdhiṣu
rudrānnyūnaṃ sthitaṃ lakṣaṃ
śarīre nāḍayaḥ priye
//
iḍā ca piṅgalā caiva
suṣumnā citriṇī tathā
brahmanāḍī ca tanmadhye
pañcanāḍyaḥ prakīrtitāḥ
//
kuhūś ca śaṅkhinī caiva
gāndhārī hastijihvikā
nardinī ca tathā nidrā
rudrasaṃkhyā vyavasthitā
//
etā nāḍyaḥ pareśāni
suṣumnāyāḥ prajāyate
vedākṣivasurandhrāstu
bāṇasaṃkhyajalāntakāḥ
kimādhāre padmamadhye
saṃsthitāḥ parameśvara
//
yogapadmasya māhātmyaṃ
mayā vaktuṃ na śakyate
mūlādhāre padmamadhye
laṃbījaṃ cātiśobhanam
//
laṃbījasya bindumadhye
pṛthvīcakraṃ manoharam
valayākārarūpeṇa
samudrāḥ saptakāḥ sthitāḥ
//
bindumānaṃ mahādeva
kathayasva mayi prabho
krameṇa yogapadmasya
pramāṇaṃ vada śaṃkara
//
paramāṇutribhāgaika
bhāgaṃ binduṃ suvistaram
tanmadhye sāgarāḥ sarve
saptadvīpā vasuṃdharā
//
avyayaṃ paramaṃ sūkṣmaṃ
bindurūpaṃ paraṃ śivam
pramāṇaṃ cāsya devasya
kiṃ vaktuṃ śakyate mayā
//
brahmalokaṃ pareśāni
nādopari vicintayet
ḍākinīsahito brahmā
tathaiva nivaset sadā
//
lakāraṃ pārthivaṃ bījaṃ
śaktirūpaṃ sureśvari
pṛthvīcakrasya madhye tu
svayambhūliṅgam adbhutam
//
sārdhatrivalayākāra
kuṇḍalyā veṣṭitaṃ sadā
liṅgacchidraṃ svavaktreṇa
kuṇḍalyācchādya saṃsthitā
//
tenaiva vartate vāyur
iḍāpiṅgalayoḥ sadā
sahasrāradarśanāya
sadā jāgratsvarūpiṇī
//
yadaiva brahmamārgeṇa
sahasrāre samutthitā
tadaiva parameśāni
śvāsocchvāsavikāśanam
//
kesarasya tu madhye ca
catuḥpattre sureśvari
anantarūpiṇī durgā
śambhuś cānantarūpadhṛk
//
nānāsukhavilāsena
sadā kāmena vartate
liṅgacchidraṃ samākṛṣya
saṃsthitā kuṇḍalī katham
//
kathayasva sadānanda
sarvajñastvaṃ sureśvara
liṅgamadhye mahattejo
vahnirūpaṃ ca sundari
//
yat kiṃcid vāyuyogena
brahmāṇḍo dahyate yataḥ
ataḥ sā kuṇḍalī devī
mukhenācchādya saṃsthitā
//
tenaiva pārthive liṅge
binduśaktiṃ niyojayet
binduśaktiṃ samutthāpya
liṅgapūjā prakīrtitā
//
Toḍalatantra, Navamaḥ paṭalaḥ
tripurāyā mahāmantraṃ
nityātantre śrutaṃ mayā
idānīṃ śrotum icchāmi
navārṇasya ca vāsanām
//
bhūmiś candraḥ śivo māyā
śaktiḥ kṛśānusādanau
ardhacandraśca binduśca
navārṇo merurucyate
//
bhūmibījajapādeva
bhūpatir jāyate 'cirāt
candrabījajapādeva
mahāsaundaryamāpnuyāt
//
śivabījajapād eva
śivavadviharet kṣitau
ekatroccāraṇāt satyaṃ
caturvargaphalapradam
//
yattvayā kathitaṃ nātha
yogajñānādikaṃ layam
yāvat kāmādi saṃdīpyo
bhāvayogo na labhyate
//
ūrdhvaretā mahāyogī
tadadhaḥ śaktiyogataḥ
brūhi me jagatāṃnātha
kathaṃ dīrghāyuṣaṃ bhavet
//
śṛṇu devi pravakṣyāmi
yena dīrghāyuṣaṃ bhavet
śrutvā gopaya yatnena
na prakāśyaṃ kadācana
//
pūjayet kālikāṃ devīṃ
tāriṇīṃ vātha sundarīm
ṣoḍaśenopacāreṇa
pañcatattvena pārvati
//
dinatrayaṃ pūjayitvā
ṣaṭcakraṃ cintayedatha
tatastu parameśāni
mālāmantraṃ samabhyaset
//
ṣoḍaśī vā mahāpūrvā
pattre cābhyāsamācaret
catuṣpattre cāṣṭavāraṃ
ṣaṭpattre dvādaśaṃ japet
//
daśapattre viṃśatiṃ ca
dvādaśe vedanetrakam
ṣoḍaśe daśasaṃkhyaṃ tu
caturvāraṃ śruvo'ṣṭakam
//
kumbhakena japenmantraṃ
mālāṣaṭke sureśvari
evaṃ krameṇa deveśi
sthiramāyuryadā bhavet
//
prajapedakṣamālāyāṃ
yena mṛtyuṃjayo bhavet
mūlacakrācchiro'ntā ca
suṣumnā parikīrtitā
tadgarbhasthā ca yā śaktiḥ
sā devī kuṇḍarūpikā
//
sadā kuṇḍalinī devī
pañcāśadvarṇabhūṣitā
mālārūpā kathaṃ deva
iti me saṃśayo hṛdi
//
sahasrāre mahāpadme
bījakośe śivālaye
haṃsena vāyuyogena
pūrakeṇa samānayet
//
sahasrāraṃ tu samprāpya
śivaṃ dṛṣṭvā tu kāminī
mālākāreṇa talliṅgaṃ
saṃveṣṭya kuṇḍalī sadā
//
akārādilakārāntā
kṣakāraṃ vaktrasaṃyutam
caramārṇaṃ sarandhraṃ ca
nijapucchena kāminī
//
bhedayitvā svapucchena
nāgapāśaṃ tadūrdhvake
etatkāraṇaṃ saṃvyāpya
saṃsthitā kuṇḍalī yadā
//
tadaiva prajapenmantram
amaratvaṃ sa vindati
recanāt kāminī devī
praviśantī svaketanam
//
na tatra prajapenmantraṃ
japānmṛtyumavāpnuyāt
recake chinnamālāyāṃ
satyaṃ hi suravandite
//
chinne sūtre bhavenmṛtyuḥ
puraiva kathitaṃ mayā
iti te kathitaṃ kānte
yato mṛtyuṃjayo bhavet
//
athavā nijanāsāgre
dṛṣṭimāropya yatnataḥ
vāyuṃ saṃdhārya yatnena
ekoccāreṇa coccaret
//
mālāmantraṃ ṣoḍaśīṃ vā
tathā cāṣṭādaśākṣarīm
sahasraṃ prajapenmantraṃ
pratyahaṃ yadi pārvati
//
jitvā mṛtyuṃ jarāṃ rogaṃ
dīrghakālaṃ sa jīvati
etadanyaṃ mahāyogaṃ
bhogārthī nahi labhyate
//
athavā parameśāni
ḍāmaroktavidhānataḥ
yajet kātyāyanīṃ devīṃ
bhūtapūrvāṃ prayatnataḥ
//
tadā pañcasahasrābdaṃ
niścitaṃ tu sa jīvati
iti te kathitaṃ sarvaṃ
deharakṣaṇakāraṇam
//
na bhogī bhogamāpnoti
yogī yogo na labhyate
etattattvena deveśi
bhogo yogāyate dhruvam
//
yanmālāyāṃ japenaiva
kiṃ phalaṃ labhate naraḥ
pṛthak pṛthaṅ mahādeva
pattramālāphalaṃ vada
//
bhūmikāmī japen mantraṃ
mūlādhāre catuṣṭaye
svādhiṣṭhāne japādeva
mahendro jāyate'cirāt
//
maṇipūre japādeva
bhavet svargasya bhājanam
anāhate mahāpadme
japād brahmapuraṃ vrajet
//
viśuddhākhye japādeva
viṣṇuloke vased dhruvam
ājñācakre ca japtavye
śvetadvīpe vaset sadā
//
yanmālā parameśāni
bāhyamālā prakīrtitā
antarmālā mahāmālā
pañcāśadvarṇarūpiṇī
//
māhātmyaṃ tasya deveśi
kiṃ vaktuṃ śakyate mayā
sahasrāre sthirībhūya
yadi cāṣṭaśataṃ japet
//
tatphalāt koṭibhāgaikaṃ
bhāgaṃ cānyena vidyate
pṛthivyāmavyayo deho
bhavatyeva na saṃśayaḥ
//
yanmālāyāṃ japenmantram
abhyāsārthaṃ hi pārvati
iti te kathitaṃ devi
cirajīvī yathā bhavet
//
idānīṃ parameśāni
bhūtakātyāyanīṃ śṛṇu
vedādyaṃ śabdabījaṃ ca
mahāmāyāṃ tataḥ param
//
astrayugmaṃ vahnijāyā
manuḥ saptākṣaraḥ paraḥ
śrīśivo'sya ṛṣiḥ prokto
virāṭ chanda udāhṛtam
//
bhūtakātyāyanī devī
dharmārthakāmadā sadā
praṇavena ṣaḍaṅgaṃ ca
prāṇāyāmaṃ ca sundari
//
dhyānamasyāḥ pravakṣyāmi
śṛṇu sundari sādaram
gauravarṇāṃ muktakeśīṃ
sarvābharaṇabhūṣitām
//
paṭṭavastraparīdhānāṃ
sadā ghūrṇitalocanām
vāmapāṇau raktapūrṇa
kharparaṃ dakṣiṇe kare
//
madyapūrṇasvarṇapātrāṃ
grīvāyāṃ hārabhūṣitām
śaraccandrasamābhāsāṃ
pādāṅgulivirājitām
//
evaṃ tāṃ varadāṃ nityāṃ
bhāvayet siddhihetave
sāmānyārghyaṃ tato devi
svavāme vinyasettataḥ
//
jīvanyāsādikaṃ kṛtvā
pūjayet parameśvarīm
ṣoḍaśenopacāreṇa
pañcatattvena sundari
//
yajettāṃ bahuyatnena
gṛhamadhye dinatrayam
tato japenmahāmantraṃ
gajāntakasahasrakam
//
tataśca pūjayed devīṃ
śūnyāgāre dinatrayam
pratyahaṃ prajapenmantraṃ
gajāntakasahasrakam
//
eva kṛte maheśāni
yadi siddhirna jāyate
tataśca prajapenmantraṃ
pitṛbhūmau dinatrayam
//
tataḥ siddhirbhaved devi
satyaṃ satyaṃ hi supriye
tadvākyaṃ prārthanāvākyaṃ
ḍāmarākhye mayoditam
//
Toḍalatantra, Daśamaḥ paṭalaḥ
kākīcañcuṃ mahāmudrāṃ
kathayasva dayānidhe
yena rūpeṇa deveśa
dehāsanaparo bhavet
//
anākulena deveśi
jihvāṃ paramayatnataḥ
tālumūle nyaset paścāt
tato vāyuṃ pibet śanaiḥ
//
dantairdantān samāpīḍya
kākīcañcuṃ samabhyaset
bahuyonyuktavidhinā
sarvakarmāṇi sādhayet
//
athātaḥ sampravakṣyāmi
svalpayoniṃ śṛṇu priye
gudachidre dakṣagulphaṃ
saṃdhau liṅgaṃ vinikṣipet
//
nābhirandhre'thavā gulphaṃ
dhārayed vāmahastake
bahuyonyuktavidhinā
cānyat sarvaṃ samāpayet
//
mudrā caitanyatantre ca
māhātmyaṃ kathitaṃ mayā
yathā hemagirirdevi
yathā vegavatī nadī
//
candrādikaṃ yathā devi
cirajīvī tathā bhavet
daśāvatāraṃ deveśa
brūhi me jagatāṃ guro
//
idānīṃ śrotumicchāmi
kathayasva suvistarāt
kā vā devī kathaṃbhūtā
vada me parameśvara
//
tārā devī nīlarūpā
vagalā kūrmamūrtikā
dhūmāvatī varāhaṃ syāt
chinnamastā nṛsiṃhikā
//
bhuvaneśvarī vāmanaḥ
syānmātaṃgī rāmamūrtikā
tripurā jāmadagnyaḥ syād
balabhadrastu bhairavī
//
mahālakṣmīr bhavet buddho
durgā syāt kalkirūpiṇī
svayaṃ bhagavatī kālī
kṛṣṇamūrtiḥ samudbhavā
//
iti te kathitaṃ devy
avatāraṃ daśamameva hi
etāsāṃ pūjanād devi
mahādevasamo bhavet
āsāṃ dhyānādikaṃ sarvaṃ
kathitaṃ me purā tava
//