Sekoddeśaḥ
om namaḥ kālacakrāya
sucandra āha -
sekaḥ saptavidhaḥ śāstastrividho 'nuttarastathā /
laukikottarasiddhyarthaṃ saṃkṣepāt kathayasva me // Sekod_1 //
bhagavānāha -
śṛṇu sucandra sekārthaṃ saptadhā trividhaṃ param /
nāḍīsaṃcāramāyāmamuddeśāt kathayāmi te // Sekoddeśa_2 //
uddeśastrividhastantre nirdeśastrividho bhavet /
pratyuddeśo mahoddeśaḥ pratinirdeśako 'paraḥ // Sekoddeśa_3 //
uddeśa eva nirdeśastantrasaṃgītirucyate /
pratyuddeśaśca nirdeśaḥ pañjikā padabhañjikā // Sekoddeśa_4 //
mahoddeśaśca nirdeśaṣṭīkā sarvārthasūcikā /
abhijñālābhibhiḥ sā tu kartavyā naiva paṇḍitaiḥ // Sekoddeśa_5 //
evaṃ ṣaṭkoṭibhiḥ śuddhaṃ vajrayogaiścaturvidhaiḥ /
catuḥsambodhibhiḥ skandhadhātvāyatanaṣaṭkulaiḥ // Sekoddeśa_6 //
paṭalaiḥ pañcabhiḥ śuddhaṃ lokadhātvādikairmataiḥ /
satyābhyāmādibuddhaṃ syāt kālacakrābhidhānakam // Sekoddeśa_7 //
ādau saptābhiṣeko yo bālānāmavatāraṇam /
trividho lokasaṃvṛtyā caturthaḥ paramārthataḥ // Sekoddeśa_8 //
satyadvayena dharmāṇāṃ deśanā vajriṇo mama /
lokasaṃvṛtisatyena satyena paramārthataḥ // Sekoddeśa_9 //
udakaṃ mukuṭaḥ paṭṭo vajraghaṇṭā mahāvratam /
nāmānujñāsamāyuktaḥ sekaḥ saptavidho nṛpa // Sekoddeśa_10 //
kāyavākcittasaṃśuddhirabhiṣekadvayaṃ dvayam /
anujñā jñānaśuddhiḥ syādanyā dhātvādiśuddhitaḥ // Sekoddeśa_11 //
udakaṃ dhātusaṃśuddhirmaulī skandhaviśodhanam /
paṭṭaḥ pāramitāśuddhirvajraghaṇṭā mahākṣaram // Sekoddeśa_12 //
buddhabhāṣā na vicchinnā arkendvekatraśodhanam /
viṣayendriyasaṃśuddhiḥ syādvajravratamacyutam // Sekoddeśa_13 //
nāma maitryādiśuddhiḥ syādanujñā buddhaśodhanam /
ete sapta sekā deyā vartayitvā tu maṇḍalam // Sekoddeśa_14 //
kumbho guhyābhiṣekaśca prajñājñānābhidhānakaḥ /
punareva mahāprajñā tasyā jñānābhidhānakaḥ // Sekoddeśa_15 //
kṣaraḥ kṣarastataḥ spando niḥspandaśca tato 'paraḥ /
kāyavākcittasaṃśuddhyā abhiṣekatrayaṃ kramāt // Sekoddeśa_16 //
caturtho jñānasaṃśuddhiḥ kāyavākcittaśodhakaḥ /
bālaḥ prauḍhastathā vṛddhaścaturthastu prajāpatiḥ // Sekoddeśa_17 //
prajñāstanāṅgasaṃsparśād bodhicittacyutaṃ sukham /
payodharābhiṣiktaḥ sa bālaḥ prāptaṃ yataḥ sukham // Sekoddeśa_18 //
guhyāsphālāccirājjātaṃ bodhicittacyutaṃ sukham /
prauḍho guhyābhiṣiktaḥ sa guhyāt prāptaṃ yataḥ sukham // Sekoddeśa_19 //
guhyāsphālāccirājjātaṃ vajrāgre spandataḥ sukham /
prajñājñānābhiṣiktaḥ sa vṛddhaḥ spandaṃ gato yataḥ // Sekoddeśa_20 //
mahāmudrānurāgādyajjātaṃ niḥspandataḥ sukham /
mahāprajñābhiṣiktaḥ sa yato niḥspandatāṃ gataḥ // Sekoddeśa_21 //
prajāpatiḥ sa vijñeyo janakaḥ sarvatāyinām /
vajrasattvo mahāsattvo bodhisattvo 'dvayo 'kṣaraḥ // Sekoddeśa_22 //
asau samayasattvaḥ syādvajrayogaścaturvidhaḥ /
kālacakra iha khyāto yogināṃ muktidāyakaḥ // Sekoddeśa_23 //
asyaiva sādhanaṃ kuryāt pratibhāsairacintitaiḥ /
dhūmādibhirnimittaistaiḥ prajñābimbairnabhaḥsamaiḥ // Sekoddeśa_24 //
astināstivyatikrāntaiḥ pratyayārthaiḥ svacetasaḥ /
paramāṇurajaḥsaṃdohaiḥ sarvataḥ parivarjitaiḥ // Sekoddeśa_25 //
dhūmamarīcikhadyotadīpajvālendubhāskaraiḥ /
tamaḥ kalā mahābindurviśvabimbaṃ prabhāsvaram // Sekoddeśa_26 //
pihitāpihitanetrābhyāṃ śūnye yannānukalpitam /
dṛśyate svapnavad bimbaṃ tad bimbaṃ bhāvayet sadā // Sekoddeśa_27 //
abhāve bhāvanā bimbe yogināṃ sā na bhāvanā /
bhāvo 'bhāvo na cittasya bimbe 'kalpitadarśanāt // Sekoddeśa_28 //
pratisenāṃ yathādarśe kumārī paśyedavastujām /
atītānāgataṃ dharmaṃ tattvayogyambare tathā // Sekoddeśa_29 //
asyā bhāvo na bhāvaḥ syādvastuśūnyārthadarśanāt /
vastuno 'bhāvato 'rtho 'sti māyāsvapnendrajālavat // Sekoddeśa_30 //
asati dharmiṇi hyeṣa dharmotpādaḥ pradṛśyate /
cintāmaṇirivānantasattvāśāparipūrakaḥ // Sekoddeśa_31 //
adṛṣṭaṃ pratisenāyāṃ kumārī caurādi paśyati /
tat prādeśikanetrābhyāṃ gatvā paśyanti sādhakāḥ // Sekoddeśa_32 //
yadi paśyati sadrūpaṃ svamukhaṃ kiṃ na paśyati /
yadi paśyatyasadrūpaṃ śaśaśṛṅgaṃ kathaṃ na ca // Sekoddeśa_33 //
na paśyatyanyacakṣurbhyāṃ svacakṣurbhyāṃ na paśyati /
dṛśyamānamajātaṃ tat kumāryā jātakaṃ yathā // Sekoddeśa_34 //
dṛṣṭe bimbe tataḥ kuryāt prāṇāyāmaṃ nirantaram /
urdhvādhastriṣu nāḍīṣu kāyavākcittarodhanāt // Sekoddeśa_35 //
candrārkarāhuviṇmūtraśukramārgapravāhiṣu /
toyāgniśūnyabhūvāyujñānadhātukajātiṣu // Sekoddeśa_36 //
candrasūryataminyo yāḥ kāyavākcittanāḍikāḥ /
viṇmūtraśukravāhinyaḥ prāṇe 'pāne krameṇa tāḥ // Sekoddeśa_37 //
candraḥ kāya
upāyasya prajñāyā vāgdivākaraḥ / prajñākāyastu viṇ
nāḍī virbhorvāṅmūtravā
hinī // Sekoddeśa_38 //
urdhvādhaścittanāḍyau dve taminīśukravāhinyau /
taminī cittamupāyasya prajñāyāḥ śukravāhinī // Sekoddeśa_39 //
ūrdhvādhaḥ ṣaṭkulaṃ hyetat kāyavākcittayogataḥ /
prajñopāyāṅgabhāvena saṃsthitaṃ sarvadehinām // Sekoddeśa_40 //
ariṣṭaṃ kāyavāṅnāḍyorūrdhvā
dho '
dhikamārutaiḥ /
taminīśukravāhinyorutpattimaraṇasthitiḥ // Sekoddeśa_41 //
utpāde mṛtyukāle ca maithune śukravāhinī /
taminī ca vahatyūrdhve saṃkrāntau viṣuve raveḥ // Sekoddeśa_42 //
lagnodayābhisaṃdhau ca viṣuvaṃ vahati madhye /
ṣaṭpañcāśat
sapādañca śvāsocchvāsaṃ narādhipa // Sekoddeśa_43 //
adhikān pañcasaptatyā ṣaṭśatāṃśca divāniśam /
ekaviṃśatsahasrāṃśca ṣaṭśatairadhikāṃśca yān // Sekoddeśa_44 //
vāmā ca dakṣiṇā nāḍī vahatyūnānanena tān /
satripakṣitrivarṣāṇi śatavarṣe hi madhyamā // Sekoddeśa_45 //
vāmā savyordhve candrārkau lalaneḍā piṅgalāparā /
toyatejaḥsvabhāvinyau padmadhṛgratnadhṛṅmate // Sekoddeśa_46 //
adho viṇmūtravāhinyau pṛthvīvāyusvarūpake / madhyanāḍī ca vāmā ca
cakradhṛk khaḍgadhṛṅmate
// Sekoddeśa_47 //
ūrdhvādho madhyamā savyā rāhuśukrapravāhinī / śūnya
jñānasvabhā
vinyau vajradhṛgvajradhṛṅmate // Sekoddeśa_48 //
viṇnāḍī candramārgeṇa raviṇā mūtravāhinī /
jātau mṛtyau viṣuve rāge rāhuṇā śukravāhinī // Sekoddeśa_49 //
yā nābhyūrdhve 'vadhūtī sā suṣumnā tamovāhinī /
yādhaḥ khagamukhā sā ca śaṅkhinī śukravāhinī // Sekoddeśa_50 //
nābhyabje hṛdaye kaṇṭhe lalāṭoṣṇīṣapaṅkaje /
bhūtoyāgnimarucchūnyaṃ saṃhāreṇa pravāhinī // Sekoddeśa_51 //
nirgacchantī viśantī
sā
sṛṣṭinā viśati kṣitau /
karṇikāt karṇikāmadhye 'vadhūtyā gatirāgatiḥ // Sekoddeśa_52 //
nābhau guhye ca maṇyabje kāyavākcittavāhinī /
nirgacchantī viśantī sā saṃhārasṛṣṭirūpiṇī // Sekoddeśa_53 //
śaṅkhinī sarvajantūnāmapānānilavāhikā /
eṣā strīṇāṃ sukhācchukraṃ ṛtau raktapravāhinī // Sekoddeśa_54 //
prajñopāyāṅgabhāvena ūrdhve savyāvasavyayoḥ / adho viṇmūtravāhasya rajaḥśukra
pravāhayoḥ
// Sekoddeśa_55 //
caṇḍālī rajaso vāhāt khagamukhā śukravāhataḥ / ūdhve ṛtau smṛ
tā strīṇāṃ ḍombī puṃ
so 'vadhūtikā // Sekoddeśa_56 //
vijñānādyaṃ sadā vāme nāḍyāṃ maṇḍala
pañcakam / bhūmyādi
dakṣiṇe nāḍyāṃ madhye vahati ṣaṣṭhamam // Sekoddeśa_57 //
nābhipadmadale ṣaṣṭi maṇḍalāni yathākramam /
vāme ca dakṣiṇe lagne meṣādye vṛṣabhādike // Sekoddeśa_58 //
mūle v
āme tataḥ savya ūrdhve
madhye
'
nilaḥ kramāt /
ekaikamaṇḍalaṃ daṇḍādbhūmyādyaṃ nāsarandhrayoḥ // Sekoddeśa_59 //
nāḍikā vahati śvāsān saṣaṣṭitriśatān kramāt /
aṣṭādaśaśataśvāsānnāḍyaḥ pañca vahanti tān // Sekoddeśa_60 //
ṣaṣṭi nāḍyo divārātraṃ maṇḍalānīti dehataḥ /
dalamadhye tataḥ pūrve savye vāme 'pare kramāt // Sekoddeśa_61 //
ākāśādyaṃ sadā vāme bhūmyādyaṃ dakṣiṇe 'parāt /
vijñānādibhavo vāme saṃhāraḥ kṣmādi dakṣiṇe // Sekoddeśa_62 //
apare pūrve dharā vāyuḥ prajñopāyaḥ parasparam /
aṅguṣṭhānāmikādvābhyāṃ yato vaktre 'bhiṣiñcanam // Sekoddeśa_63 //
savye vāme havistoyaṃ prajñopāyaḥ parasparam /
madhyamātarjanīdvābhyāṃ yataḥ khaḍgo bhaviṣyati // Sekoddeśa_64 //
ardhacandrākṛtirmudrā daṃṣṭrā kartī kanīyasī /
śūnyamakṣaramūrdhvādhaḥ prajñopāyaḥ parasparam // Sekoddeśa_65 //
daśamaṇḍalasaṃyoge aṅgulīnāṃ parasparam /
karatale puṭite mūrdhni ekaśūkaṃ sakartikam // Sekoddeśa_66 //
viṣuvattanmadhye nāḍyāṃ sṛṣṭisaṃhārakārakam /
skandhadhātutrivajrāṇāmekatvaṃ madhyamāgatau // Sekoddeśa_67 //
candrārkanāḍikāruddhe ruddhā viṇmūtranāḍikāḥ /
rāhunāḍīvi(ni)ruddhe syādruddhādhaḥ śukravāhinī // Sekoddeśa_68 //
mukte muktā bhavantyetāḥ sṛṣṭisaṃhārakārikāḥ /
saṃcāra eṣa nāḍīnāṃ prāṇāpānatrimārgataḥ // Sekoddeśa_69 //
vāmāyāṃ dakṣiṇāyāṃ vā pravahatyadhiko
'
nilaḥ / ekarātraṃ tathā pañca trivarṣairmara
ṇaṃ
tataḥ // Sekoddeśa_70 //
pañca diktithayo viṃśati tattvānyekottaraṃ kramāt /
trayastriṃśaddinārohaḥ ariṣṭaṃ dakṣiṇe ravau // Sekoddeśa_71 //
tridvyekasamakairmāsaiḥ ṣaṭtriyugmendubhirdinaiḥ /
tithidikpañcaguṇadvyekairāyurgacchati dehinām // Sekoddeśa_72 //
mūlādekottareṇa syādvāme candrasya rohaṇam /
dinairmāsairdinairmāsais
tridināni dvimāsakau // Sekoddeśa_73 //
dine 'riṣṭaṃ śubhe māse vṛddhihānistatastayoḥ /
madhyamārohaṇaṃ mṛtyoḥ śatābdaparipūrṇataḥ // Sekoddeśa_74 //
samaviṣamadinaistasya janmajāto 'tha maṇḍalaiḥ /
rohaṇaṃ savyavāme ca pakṣadvayavināśanāt // Sekoddeśa_75 //
anyathā maraṇaṃ na syā
t pakṣadvayasya
saṃsthiteḥ / savyāvasavyasaṃcārā
ta
pañcamaṇḍalavāhataḥ // Sekoddeśa_76 //
ariṣṭalakṣaṇaṃ jñātvā prāṇaṃ bindau niveśayet / avadhūtīpadamāśritya
bhāvayet
paramākṣaram // Sekoddeśa_77 //
vajrotthānaṃ sadā kuryāccandrārkagatibhañjanāt /
anyathā nāvadhūtyaṅge viśati prāṇamārutaḥ // Sekoddeśa_78 //
apāno 'dhaśca śaṅkhinyāṃ maraṇaṃ tadaveśataḥ /
ariṣṭavañcanaṃ hyetadānandairyogināṃ bhavet // Sekoddeśa_79 //
śukrāgamanamānandamuṣṇīṣādūrṇṇāpaṅkaje /
kaṇṭhe hṛdi paramānandaṃ viramānandaṃ tato bhavet // Sekoddeśa_80 //
vividhaṃ ramaṇaṃ nābhau guhyapadme yadāgatam /
guhyādvajramaṇiṃ yāvat sahajānandamacyutam // Sekoddeśa_81 //
apratiṣṭhitanirvāṇaṃ mahārāgo 'kṣaraḥ prabhuḥ /
virāgādyaccyutaṃ saukhyaṃ tannirvāṇaṃ pratiṣṭhitam // Sekoddeśa_82 //
śukrendūdaya uṣṇīṣe pūrṇā guhye saroruhe /
kalā ṣoḍaśamā yā sā maṇipadme vajramūrdhagā // Sekoddeśa_83 //
tadūrdhvaṃ cyutikālaḥ syāt kṛṣṇapratipadāgame /
ravistūrṇāpadaṃ yāti amāvasyāṃ virāgataḥ // Sekoddeśa_84 //
kalā ṣoḍaśamā tasya uṣṇīṣakamale gatā /
naṣṭacandra ihākhyāto viraktī rāgasaukhyataḥ // Sekoddeśa_85 //
adhaścandrāmṛtaṃ yāti maraṇe sarvadehinām /
ūrdhve sūryarajo rāhuvijñānaṃ bhāvalakṣaṇe // Sekoddeśa_86 //
ataścandrāmṛtasyordhve kartavyaṃ gamanaṃ nṛpa /
adho 'rkarajaso rāhuvijñānasyākṣare sukhe // Sekoddeśa_87 //
ūrṇṇābje sarvabuddhānāṃ candrāmṛtasya pūrṇimā /
amārkarajaso guhye kaloṣṇīṣe maṇau tayoḥ // Sekoddeśa_88 //
iti vajrapadaṃ śāsturviparītaṃ sarvadehinām /
apratiṣṭhitanirvāṇādviparītaṃ yānti dhātavaḥ // Sekoddeśa_89 //
maṇau cittaṃ
ca
guhye vākkāyo nābhau mahāsukhāt /
dharmasambhoganirmāṇāḥ śuddhakāyāt spharantyamī // Sekoddeśa_90 //
adhopāyasya rājendra prajñā
yā
ūrdhvato bhavet /
lalāṭe kāyavajramasyā grīvahṛnnābhipaṅkaje // Sekoddeśa_91 //
vākcittajñānavajrāṇi nirmāṇādyāt spharantyamī /
spharaṇaṃ skandhadhātūnāṃ nirāvaraṇataḥ sukhāt // Sekoddeśa_92 //
karmamudrāsamāpattyā jñānamudrāvalambanaiḥ /
mahāmudraikayogena vṛddhiṃ yāti tadakṣaram // Sekoddeśa_93 //
vṛddhasya na ca syāt vṛddhiḥ kṣīṇasya kṣīṇatā na ca /
astaṃgatasya nāstamanamuditasyodayaṃ na hi // Sekoddeśa_94 //
na prakāśaḥ prakāśasya pihitaṃ pihitasya na /
jātasyaiva na janma syān mṛtasya maraṇaṃ na ca // Sekoddeśa_95 //
muktasya na ca muktiḥ syādasthitasya ca cāsthitiḥ /
abhāvo na hyabhāvasya bhāvo bhāvasya naiva ca // Sekoddeśa_96 //
kṣarasyāpi kṣaro na syādakṣarasya na cākṣaraḥ /
svabhāvābhāvadharmāṇāṃ māyotpādaḥ kṣayastathā // Sekoddeśa_97 //
na kṣayaṃ yānti bhūtāni na jāyante svabhāvataḥ /
niḥsvabhāvamidaṃ viśvaṃ bhāvābhāvaikalakṣaṇam // Sekoddeśa_98 //
svaprajñāliṅgitaṃ cittaṃ padme vajramaṇau gatam /
tatra candragataspando niḥspandākṣarabhāvanā // Sekoddeśa_99 //
kāyavākcittanāḍīṣu kāyavākcittabhāvanā /
samāhārastrivajrāṇāṃ śaṅkhinyāṃ jñānabhāvanā // Sekoddeśa_100 //
prajñārāgadrutānāṃ ca bindūnāṃ śirasaḥ kramāt /
pūrṇāpadaṃ praviṣṭānāṃ bandhanaṃ paramārthataḥ // Sekoddeśa_101 //
yathoditaḥ kramāccandraḥ kalābhiryāti pūrṇatām / vāsanāharaṇaṃ pūrṇā
na
candracchedo na pūraṇam // Sekoddeśa_102 //
tathoditaṃ kramājjñānaṃ bhūmibhiryāti pūrṇatām / kleśādyāharaṇaṃ pūrṇā
na
jñānacchedo na pūraṇam // Sekoddeśa_103 //
yathā madhyaśaśāṅkena pūrṇāyāṃ na sthiraḥ śaśī /
saṃsāravāsanāṅkena tathā cittaṃ sukhe 'kṣare // Sekoddeśa_104 //
utpattiḥ pralayaḥ pakṣaḥ
śuklaḥ
kṛṣṇaḥ pratiṣṭhitaḥ /
tayormadhye tu yā pūrṇā sā pūrṇā na pratiṣṭhitā // Sekoddeśa_105 //
ekakṣaṇābhisambuddhaṃ pūrṇāyāṃ niścalaṃ bhavet /
yadā vajramaṇau citaṃ tat sarvakṣaṇapūrakam // Sekoddeśa_106 //
na sthitiḥ śuklapakṣe 'sya gamanaṃ nāsite kvacit /
pakṣadvayasya madhyasthaṃ pūrṇāyāṃ gatamadvayam // Sekoddeśa_107 //
uṣṇīṣādudayaṃ tasya pūrṇā vajramaṇau bhavet / savirāgāt kalāhāni
r
vajrāddhāneḥ prapūrṇatā // Sekoddeśa_108 //
uṣṇīse hyudayo bhūyaḥ pūrṇā vajramaṇau punaḥ /
savirāgāt kalāhānirjñānahānirna dehinām // Sekoddeśa_109 //
mahāsukhasvabhāvo
'
sya pūrṇāśabdena gīyate /
anyabhāvāntaraṃ sarvaṃ sṛṣṭisaṃhārahetukam // Sekoddeśa_110 //
bhavādgacchati nirvāṇaṃ tasmādeti punarbhavam /
svapakṣābhyāṃ yathāṃ candro 'yanābhyāṃ bhāskaro yathā // Sekoddeśa_111 //
pūrṇāyāṃ niścalasyāsya bhūmibhiḥ paripūrṇatā /
dvyayutadvyaṣṭaśataiḥ śvāsairakṣarakṣaṇabhakṣitaiḥ // Sekoddeśa_112 //
pakṣadvayaṃ vyatikramya bhūmibhiḥ paripūritam /
dvādaśākārasatyārthaṃ ṣoḍaśākāramakṣaram // Sekoddeśa_113 //
bhūmibhirdvādaśākāraṃ pūritaṃ paramādvayam /
kalābhiḥ pūritaṃ cittaṃ ṣoḍaśākāramakṣaram // Sekoddeśa_114 //
ekārthamadvayaṃ dharmaṃ paramārthamavinaśvaram /
pūrṇāvasthāṃ gataṃ cittaṃ āsamantāt prapūritam // Sekoddeśa_115 //
virāgādimahārāgaṃ vajrānaṅgaṃ mahākṣaram / paripūrṇamasaṃkliṣṭaṃ pakṣadvaya
sya
vāsanaiḥ // Sekoddeśa_116 //
yathā nadyudakaṃ viṣṭaṃ samudre tatpayaḥsamam / tathā bhāvasamūho 'yamakṣare tatsamo
'
kṣaraḥ // Sekoddeśa_117 //
yathā dhātusamūho
'
yaṃ rasatvaṃ yāti bhakṣitaḥ /
bījairbījasva bhāvaṃ ca phalakāle mānavarjitam // Sekoddeśa_118 //
evaṃ bhāvasamūho 'pi paramākṣarabhakṣitaḥ /
paramākṣaratāṃ yāti sarvākārasvarūpadhṛk // Sekoddeśa_119 //
na daṃśe vedanāṃ vetti nānyatra cāpi daṣṭakaḥ /
na viṣayānindriyadvāraiḥ pūrṇāvasthāṃ viṣe gate // Sekoddeśa_120 //
evaṃ na ca maṇau yogī nānyatra vetti satsukham /
na viṣayānindriyadvāraiścitte pūrṇakalāṃ gate // Sekoddeśa_121 //
yathā lohaikadeśe 'pi saṃsthito hi mahārasaḥ /
lohaṃ tīvrāgnisaṃtaptaṃ vedhayedāsamantataḥ // Sekoddeśa_122 //
tethaivaikapradeśe 'pi saṃsthitaṃ sukhamakṣaram /
cittaṃ kāmāgnisaṃtaptaṃ vedhayedāsamantataḥ // Sekoddeśa_123 //
yathā ca viddhalohānāṃ naiva malo bhavet kvacit /
tathā ca viddhacittānāṃ na vāsanā bhavet kvacit // Sekoddeśa_124 //
hematvaṃ hi gataṃ lohamagninā nirmalaṃ bhavet /
bhūyo bhūyastathā cittaṃ nirmalaṃ rāgavahninā // Sekoddeśa_125 //
yathā mahāmaṇisparśādyāti śīlā pradīptatām /
tathākṣarasukhasparśāt sukhatāṃ cittameti vai // Sekoddeśa_126 //
kimatra bahunoktena lokasaṃvṛtisatyataḥ /
avitarkyo rasasadbhāvo lohasyāvedhanaṃ prati // Sekoddeśa_127 //
vitarkyo jñānasadbhāvaḥ kiṃ punaḥ paramārthataḥ /
malāgantukaliptasya cittasyāvedhanaṃ prati // Sekoddeśa_128 //
nāgantuko malaścitte na cittāccirakālikaḥ /
na cittena vinā jāto na citte saṃsthito 'vyayaḥ // Sekoddeśa_129 //
yadyāgantuka eva syāccittaṃ prāgamalaṃ tadā /
cirakālī yadā cittāttasyaiva sambhavaḥ kutaḥ // Sekoddeśa_130 //
yadi cittaṃ vinā jātastadā khakusumaṃ yathā /
yadi sthitaḥ sadā citte na naśyet sarvatastadā // Sekoddeśa_131 //
tāmrasya kālimā yadvadrasayogena naśyati /
na tasya sattvatā naśyennirmalatvena yā sthitā // Sekoddeśa_132 //
tadvaccittamalaḥ śūnyatāyogena praṇaśyati /
na tasya jñānatā naśyennirmalatvena yā sthitā // Sekoddeśa_133 //
rasaviddho yathā loho na punarlohatāṃ vrajet /
sukhaviddhaṃ tathā cittaṃ na punarduḥkhatāṃ vrajet // Sekoddeśa_134 //
na virāgāt paraṃ pāpaṃ na puṇyaṃ sukhataḥ param /
ato 'kṣarasukhe cittaṃ veśanīyaṃ sadā nṛpa // Sekoddeśa_135 //
vaktuṃ na śakyate saukhyaṃ kumāryā surataṃ vinā /
yauvane surataṃ prāpya svato vetti mahāsukham // Sekoddeśa_136 //
evaṃ na śakyate vaktuṃ samādhirahitaiḥ sukham /
samādhāvakṣaraṃ prāpya svato vindanti yoginaḥ // Sekoddeśa_137 //
akṣarajasukhajñāne sarvajñairapi śaṃkyate /
tathā kvacinna kartavyo virāgo manaso 'sukhāt // Sekoddeśa_138 //
cyutervirāgasaṃbhūtirvirāgādduḥkhasaṃbhavaḥ /
duḥkhāddhātukṣayaḥ puṃsāṃ kṣayān mṛtyuriti smṛtaḥ // Sekoddeśa_139 //
mṛtyoḥ punarbhavasteṣāṃ bhavān mṛtyuścyutiḥ punaḥ /
evaṃ virāgasaṃbhūteḥ sattvānāṃ nānyathā bhavaḥ // Sekoddeśa_140 //
tasmāt sarvaprayatnena cyutirāgaṃ vivarjayet /
yenākṣarasukhaṃ yāti yogī saṃsārabandhanāt // Sekoddeśa_141 //
kāmuko 'pi virāgānna kāmaśāstraṃ samīhate /
mayokte kiṃ punastantre yogī duḥkhaṃ samīhate // Sekoddeśa_142 //
śukrākṣarasvabhāvena sādhayet paramākṣaram /
ādhāre cyutimāpanne ādheyasya virāgatā // Sekoddeśa_143 //
ādhārādheyasaṃbandho yāvannākṣaratāṃ vrajet /
cittamakṣaratāprāptaṃ nādhārādheyalakṣaṇam // Sekoddeśa_144 //
akṣarodbhavakāyasya ūrṇṇācakragatasya tu /
ālikālisamāyogo hūṃkāro neṣyate nṛpa // Sekoddeśa_145 //
bimbaṃ śūnyodbhavaṃ hetuḥ phalamakṣarajaṃ sukham /
phalena mudrito heturhetunā mudritaṃ phalam // Sekoddeśa_146 //
śūnyatā bimbadhṛgghetuḥ karuṇākṣaradhṛk phalam /
śūnyatākaruṇābhinnaṃ bodhicittaṃ tadacyutam // Sekoddeśa_147 //
nirvāṇarahitaṃ bimbaṃ saṃsārātītamakṣaram /
śāścatocchedanirmuttastatoryogo 'dvayo 'paraḥ // Sekoddeśa_148 //
abhāvo nāsti bimbasya abhāvodbhūtalakṣaṇāt /
bhāvo nāstyakṣarasyāpi bhāvasambhūtalakṣaṇāt // Sekoddeśa_149 //
bhāvābhāvasamāyogo vajrayogo 'dvayo 'paraḥ /
rūpārūpavinirmuktaḥ pratiseneva darpaṇe // Sekoddeśa_150 //
bimbaṃ na bhavamāyāti nāpi nirvāṇamakṣaram /
anyonyāliṅgitaṃ śāntaṃ napuṃsakapadaṃ param // Sekoddeśa_151 //
prajñāhetorajātatvāt prajñāhetūdbhavaṃ phalam /
prajñāhetorajātatvāt prajñājātaṃ na hetujam // Sekoddeśa_152 //
ato na hetujaṃ jñānaṃ prajñājñānamanuttaram /
phalena hetunānyonyaṃ na parasparamudraṇam // Sekoddeśa_153 //
hetuḥ phalaṃ ca yat sarvaṃ tat pratītyasamudbhavam /
anyonyamudritaṃ bimbaṃ notpannaṃ na ca nirvṛtam // Sekoddeśa_154 //
prajñā cātyantanirvṛtā utpannaśca paro 'kṣaraḥ /
hetuphalavinirmuktirna parasparamudraṇam // Sekoddeśa_155 //
ajātasyāniruddhasya yajjñeyasyeha darśanam /
tat svacittasya nānyasya bāhyajñeyavibhāgataḥ // Sekoddeśa_156 //
ato na cātmanātmānaṃ mudrituṃ śakyate kvacit /
kiṃ chinatti mahākhaḍga ātmānamātmadhārayā // Sekoddeśa_157 //
bandhyāduhitṛsaṃgena svapne saukhyaṃ yathā bhavet /
gaganodbhavabimbena sevitena tathātmanaḥ // Sekoddeśa_158 //
na prajñā nāpyupāyo 'sau sahajaḥ prajñayā saha /
āpūrṇaścaiva saukhyena sarvāvaraṇavarjitaḥ // Sekoddeśa_159 //
ākāśavannirāvaraṇo viṣayendriyavarjitaḥ /
sarvataḥ sarvabhūtastha acchedyo bhedavarjitaḥ // Sekoddeśa_160 //
svayambhūrvajrasattvo 'sau mahārthaḥ paramākṣaraḥ /
mahārāgo mahāsattvaḥ sarvasattvaratiṃkaraḥ // Sekoddeśa_161 //
bodhisattvo mahādveṣaḥ kleśakṣayī mahāripuḥ /
samayasattvo mahāmoho mūḍhadhīmohasūdanaḥ // Sekoddeśa_162 //
vajrayogo mahākrodhaḥ kruddhamāramahāripuḥ /
kālacakro mahālobhaḥ kṣaralobhaniṣūdanaḥ // Sekoddeśa_163 //
vajramabhedyamityāha mahārthaṃ bhagavāniha /
sattvaṃ tribhavasyaikatā taduktaṃ paramākṣaram // Sekoddeśa_164 //
paramākṣarasukhāpūrṇo bhūmibhiḥ paripūritaḥ /
mahārāgo mahāsattvaḥ sarvasattvaratiṃkaraḥ // Sekoddeśa_165 //
bodhau vyavasthitaḥ sattvo bodhisattvastato 'calaḥ /
kleśādidveṣasaṃghānāṃ mahādveṣo mahāripuḥ // Sekoddeśa_166 //
samayaścandrāmṛtaṃ śukramacyutistasya bhakṣaṇam /
samayasattvo 'nayā vṛttyā mūḍhadhīmohasūdanaḥ // Sekoddeśa_167 //
ekatvaṃ sarvavajrāṇāṃ prajñākāyākṣaraiḥ saha /
mahākrodho mahāśatrurmārāṇāṃ krodharūpiṇām // Sekoddeśa_168 //
mahākṣarasukhopāyāt sattvārthaṃ na tyajet kvacit /
sattvān moktuṃ mahālobhaḥ kṣaralobhaniṣūdanaḥ // Sekoddeśa_169 //
ete hyuktāḥ ṣaḍākārā akṣarajñānavedanā /
vijñānarūpasaṃskārasaṃjñāḥ skandhakulāni te // Sekoddeśa_170 //
jñānāgnyambarapṛthivīvāyūdakā yathākramam /
manaścakṣuḥśrutikāyanāsajihvāstathaiva ca // Sekoddeśa_171 //
śabdarasadharmadhātukagandhaspraṣṭavyarūpiṇaḥ /
krodharāṭ ṣaṇmukho bhīmaḥ ṣaṭkulaiḥ pariśodhitaḥ // Sekoddeśa_172 //
kāyaguhyendriyacittaṃ trividhaṃ maṇḍalaṃ sadā /
prajñopāyatrivajrāṇāṃ jāyate vajrasattvatā // Sekoddeśa_173 //
idaṃ sekasya sādhanaṃ paramākṣarasādhanam /
nāḍīkulasamāyuktamuddeśāccandra bhāṣitam // Sekoddeśa_174 //
iti śrīsekoddeśaḥ samāptaḥ