metre: Śārdūlavikrīḍita
kvedaṃ dāśabalaṃ guṇair aśabalaṃ caryāvibhutvaṃ vibho
janmasyandanikāvivartanajaḍaṃ cetaḥ kva cedaṃ mama
yenāvandhyaphalodayās tvayi bhavanty abhyāhitāḥ pāṃsavas
tena stutyanubandhinā mukharatām ālambate bhāratī
//
cittālambanalaṅghinaḥ śamadṛśām āveṇikāḥ sadguṇā
vācāṃ gocaratāṃ tu yānti kalayā sthūlā hi vo mādṛśām
ratnāny ambunidher upāmbupulineṣv āvir bhavanty arthinām
antarbhinnataraṅgadyotarucakajyotsnāni gṛhṇāti kaḥ
//
yā vo bodhipathānuyānamahatām utsāhinī karmaṇām
āsīl lokahitodaye jina kṛpāviṣyandinī santatiḥ
sānekāpacitaḥ punāti bhagavan saṃkīrtyamānādhunā
jñeyābhogavisāriṇo gatamalāḥ prāg eva bodhau guṇāḥ
//
uddāmadviradasya rāgavaśino vṛttiṃ puronmādinīm
ālokyāvyativartinā praṇihitā bodhau dhiyo yat tvayā
vinyasyanta ivāmarās tvayi ciraṃ dharmābhiṣekaśriyaṃ
tenākampitakeśarāntam asṛjan puṣpopahāraṃ divaḥ
//
kṣudduḥkhaglapitodarīṃ giridarīrandhrāntarālasthitāṃ
dṛṣtvā śāvakaghālanaikarabhasāṃ vyāghrīṃ dayāghrātadhīḥ
yat tvaṃ valkalinīṃ jaṭājanavatīṃ mūrtiṃ samutsṛṣṭavāṃs
trāṇaṃ tena bhavān bhavādrivivaravyāvartināṃ dehinām
//
yat prāleyasitopalādribahalāṃ mātaṅgatāṃ bibhratā
kāntārāntaravartināṃ tanubhṛtām ucchittaye vyāpadām
śailendraṃ pṛthulopalaṃ calayatā muktas tvayātmā taṭān
manye matsariṇāṃ nitāntamalinās tena kṣatā vṛttayaḥ
//
yal lokāmbaracandracandravapuṣā candraprabhatve tvayā
kalmāṣāntaśikhaṃ śikhāmaṇirucā dattaṃ dvijāyārthine
nālāl lūnam ivāravindam asinā vyutkṛttamūlaṃ śiras
tenaiṣāṃ jagatāṃ gato 'si gurutām usṇīṣavan mūrdhani
//
bālān bālasarojakomalatanūn yat putrakān arthine
paryastākṣacalacchikhaṇḍakabhṛto dārāṃs ca bhāvanugān
prādās tvaṃ jina tena nūnam ahhavan mārāṅganānāṃ mukhaṃ
saṃkocāñcitapakṣmalocanadalaṃ lajjālasāmantharam
//
śayyāsvapnavicāriṇā vanabhuvāṃ bhūtvā purā pakṣiṇā
bhinnāśeṣakale jagaty avikale jyāyaḥpathāśaṃsinā
vistāraṃ gamitaṃ vrataṃ vratabhṛtāṃ yan nātha kāpiñjalaṃ
tenājñānarujāṃ kirīṭakiraṇacchāyās padaṃ vo gatāḥ
//
yat parṇāmbuphalāśinīṃ śaśatanuṃ tvaṃ nātha bibhrat purā
tatkālātithaye kṛpāparicayād ātithyam āvedayan
ārūḍhaḥ sphuṭavisphuliṅgam analaṃ tenādhunāpi kṣitāv
indor maṇḍalalāñchanaṃ śaśamayaṃ yuṣmadyaśo laksyate
//
yat kopāruṇadṛṣṭinā kalabhuvā kṛtvā bhruvor bhaṅginīṃ
lekhām ullasitāsinā vidalitapratyaṅgam āśaṅkinā
tvām āsīt kṣaṇam apy avikṣatadhiyaṃ tyaktukṣamā na kṣamā
manye tena niraṅkuśāḥ smaraśarāḥ puṅkheṣu bhaṅgaṃ gatāḥ
//
yad dveṣī kariṇā cirātatadhanur dantais tvayābhyarcitaḥ
ṣaḍdantena satā sitonnatabṛhajjīmūtapuñjatviṣā
kośākarṣaṇavāntabhūrirudhirakṣodāruṇais tena vaḥ
pātāle 'pi bhujaṃgamaiḥ ślathaphaṇair adyāpi daṃṣtrārcyate
//
saṃrambhāt phaṇināṃ phaṇāhaticalād bhīmormimālād apāṃ
patyur yan makaracchaṭāvilulitāt paryastanaukā narāḥ
premṇā kāyamahāplavena bhavatā tīrāntam āpāditās
tatkarmātiśayena tena nikhilā lokāḥ kalatrīkrtāḥ
//
śailān maṇḍalino vilaṅghya viṣayāṃs toyāvalīmekhalān
yac cintāmaṇinā narendra badaradvīpāntarālodarāt
labdhvā pūrṇaphalās tvayā praṇayinām āśāvabandhāḥ kṛtās
tvattas tena samudbhavanti viduṣāṃ saddharmaratnāṅkurāḥ
//
sāndrābhrāntavitānanīlavapuṣām ojomuṣāṃ rakṣasāṃ
khaḍgotkṛttadalair vipāṭitaśirārandhrasravallohitaiḥ
yan māṃsair akṛthāḥ kṣudhāvyupaśamaṃ svair avyapetoṣmabhir
yogā janmarudho bhavodbhavatṛṣām ucchedinas tena vaḥ
//
śyenottrāsaviśuṣkakampitagalasyotsaṅgasaṃsarpiṇo
yan niḥsaṅgaratā śivāya śibinā rājñā satā pakṣiṇaḥ
raktodgārakalaṅkitātulatulām āropitā te tanur
māras tena dukūlapakṣmataralaṃ nītas tulālāghavam
//
lakṣmīm apy avadhūya vāñchitaphalām ākhaṇḍam ādhvaṃsinīṃ
yat tiryakpratisandhibandham adhamaṃ kṛtvā bhavāñ janmanām
cakre marmabhidāṃ rujāṃ svapiśitaiḥ prābandhakīnāṃ śamaṃ
tena kleśaviṣacchidāṃ tava dhiyāṃ avyāhatāḥ śaktayaḥ
//
yat sandoham iva śriyāḥ phalam iva procchrāyi puṇyaujasāṃ
digdhaṃ raktakaṇaiḥ sphuratkuvalayacchāyābhinīlāyitam
utpāṭyākṣatalocanadvayam adād viprāya niścakṣuṣe
tenāndhasya tamasvato 'sya jagatas tuṅgaikadīpo bhavān
//
ity ātmārthanibandhinedam ṛṣivākyālaṃkṛtaṃ darśitaṃ
leśasyāpi na kīrtanaṃ jina kṛtaṃ tvadvarṇarāśer mama
tārābdhānavatāṃ jalaṃ jalapurām ākarṣatā vāridher
velānteṣv iva rodhasāṃ jalalavacchedo hi saṃlakṣyate
//
tvaccaryātiśayāṃśaleśaracanād yaḥ śreyasām udbhavaḥ
sambhāro vipulaprasādavikasadbhaktyācitāṃśasya me
tenātyantaparopakāranirataḥ svārthe 'pi mandādaro
bhūyāt sarvavidāṃ parārthaviduṣāṃ yānaikatāno janaḥ
//
jātakastava ācāryajñānayaśasaḥ