A
yn schoner Dia
logus. Vnnd gespꝛech zwischen aim Pfarrer vnnd aim Schulthayß: betreffend allen vbell: stand der gaystlichen. Vnd boeß han- lung der weltlichen. Al- les mitt geytzigkayt beladen. ⁊c.
Der
Pfarrrer
.
Vnd der Schultheyß
herꝛ Pfarrer. bona dies/ seind wilkum ins wirtzhauß/ wo her ziecht ir/ was sagt yr newer mehr/ was yetz voꝛhandẽ ist. Sagt mir etwas da bit ich euch vmb.
lieber Schultheyß ich kum erst von Hagnau vnd hab vil seltzamer mehr gehoꝛt/ besond̕ sagt man vil vom Turcken/ auch võ hertzog von Geller wie im der kunig võ Frãckreich woll woͤll/ auch vil võ welschlãd zwischẽ Bapst vnd mantaw/ vñ der gleich vil.
was hoͤꝛt yr dann vom Luther/ so yerz zů Woꝛmbs gewesen ist.
was geht mich der Muͤnch an. Er ist ayn ketzer/ er redt vnnd schꝛeibt widernn glauben/ warlich er wirtt seinn lon finden/ den er verdient hat/ vnnd alle die im an hangent.
warumb herꝛ Pfarrer. nun hat er doch gut vnd Chꝛistẽlich ding gelert vñ geschꝛiben/ das dem glauben nicht abnympt/ er macht in wol gut/ vñ vergrũdt all sein geschꝛifft in rechtem glauben/ vñ auß dẽ heiligẽ Euãgelien/ vñ auß sant Paulus leer/ vñ fů
oder uͤ?
ert vns auß vil strickẽ dy vns dy geystlichẽ lang her gelegtt haben/ vmb gelts vñ guts willen/ darzu hat er vns erst ein gůten rechten verstãd in dẽ heiligen gebett des vatter vnßers gelert/ das er in eym bůchlin/ so schoͤnn erklert hat/ des sich ein yetlich Chꝛisten mẽsch freũwen soͤl/ wer es list als mir es dan mein schůler so gar huͤbsch gelesen hat/ darzu hat er vns auch leeren recht vñ gruͤntlich beichtẽ/ mit eim kur tzen schoͤnen begriff/ vñ vns auß vil yrsal entlediget/ vnd das gebot gots vil ringer anzaygt/ das yr Pfaffen all vns voꝛhin so gar schwer gemacht habt ꝛc.
wie kan dz sein/ was von dẽ Bapst vnnd võ den seinen voꝛfaren gemachtt ist/ ist guͤt vñ gerecht/ was aber der Luther schꝛeibt ist wid̕ dy Chꝛi- stenliche kirch/ vñ wider die gaistlichẽ recht.
wer ist die Chꝛistẽlich kirch.
habt yr es nit offt von mir ann der pꝛedig gehoͤrt der Bapst vnnd sein Cardinel all bischoff vñ pꝛelaten.
solt dan der Bapst vñ diser anhãg die Chꝛistlich kirch sein/ das glaub ich nit. So sagt man
ersetz
selbs das geistlich recht/ das mag er machenn wie er will/ ich
A ij
soꝛg es stand wenig auß dẽ gesatz gots dar in. Als ich dã hoͤꝛ daheym von meinẽ schuͤler der mir die pawren mit kreydẽ an der wend auff schꝛeibt/ dan wan die Chꝛistenlich kirch alleyn an im vñ seinem anhãg stund/ So het wir armẽ Chꝛisten ein verloꝛn spil/ kan der Babst vñ die selbigẽ nit auch irꝛen vnnd sunden so mã on des nit vilt guts võ in sagt/ was soll ich dã guts von in gedencken/ hoͤꝛt ir nit was Doctoꝛ Martinus Lu
-
ther võ in allẽ schꝛeibt/ was grosser boͤser stuck sy handlen vñ thunt zu Rom/ mit pfriendẽ kauffen vñ verkauffen/ tauschẽ/ verwechßlen/ daruon nemẽ/ vñ nit besitzen/ noch verdienẽ/ vñ des dings vil/ wie sie auch durch die fasten vñ alle tzeyt fleyß essen/ vñ vns alle ding verbierẽt/ vnd wye sie mit schentlichen dingen vberladen seind. ꝛc. Darzu ist all yꝛ ding auff das gelt von vns mit hauffen zufoꝛdern gericht. Zu disem allen so sich ich hie im teutschland võ dẽ bei vns wonẽt auch nit vil guts/ dã das sie mit grosser herschafft vñ fylle der pfriendẽ/ vil vn- nutz bꝛachts halten/ mit grossem gebꝛeng der klayder/ võ al- lerl
e
y ahrt/ seyden roͤck/ vñ vberigem gwandt/ vnd klainet/ võ gold/ vñ anderen gezierdt/ wie die weltlichẽ fursten vñ graffẽ thuͤnt/ das sollent vnser pꝛelaten seeltrager vnd furbitter sein sie bekuͤmert nit wie Paulus zu denn Roͤmern am xij spꝛicht/ fuerẽt gut wandel voꝛ gott vñ voꝛ dem mẽschen ꝛc. Vnd das ichs baß bestett/ so bin ich yetz am Ostertag zu Straßburgk gewesen/ da sach ich ein gebꝛeng/ vñ hoffart vnder dẽ pfaffẽ in der kirchen/ vnd auff der straß/ vnd wenig andacht darbey das mich erbarmet das sie so vil rendt vñ zeinß so vbel verze- rent. Sie haben vil knecht/ schꝛeiber vnd buben das yn dient vñ nachgat/ on das sie in yren hoͤffen noͤrent von liederlichen weyber/ kuppler vnd schalckßnarrn/ des gleichen vil vberiger roß/ vil der hund/ feder spill/ das ist yr liberey/ vñ buͤcher/ dar- in studiern sie/ furwar spoͤtlich ist es zusagen/ vñ zu dem allem fleissent sie sich so groß teglichs gen Rom/ vmb pꝛelaturen/ pfarren/ vñ der gleich/ als woltens ewigklich leben/ auch be- gabt man yetz kinder in der wiegen/ vñ rotzig buben mit gros
-
sen pfriende/ die selbigen nympt man in der iugẽt so kain ver- nunft da ist/ entzuckt sie got dem herꝛn/ vñ schenckt sie dẽ teuf fel. Warumb geschichts aber/ yr eltern bꝛuͤder vñ freind noͤrẽt sie mit in/ haben ein auff vñ zureitten/ vñ gehn zu in/ also wer- dent die gotzgaben verzert/ vñ wan ichs redẽ doͤꝛfft/ so thũd sie all mit in den bettel fressen. Da selbst sol der einer so vil ver dienen/ von vile der pfruͤendẽ grossen gotzgaben/ dar hinder weder kunst/ verstand/ vñ kain geschicklichayt noch andacht ist/ da mit dan die ab gestoꝛbnen stiffter getrost/ vñ gegẽ gott erbe
t
ten/ oder die armen mẽschen gespeist solt̃ werden/ nur al lein betrachtũg zu wollust in allem vbel. ꝛc. Merckẽt darnach auff die mindern pfaffenn als Vicarter/ Caploͤn/ helffer/ oder pfarrer/ auff den Styfften/ oder sunst/ was erberkeit vnd an- dacht bey etlichen vnd der merer teyll sich haltẽ thu/ in kirchẽ oder auff den strassen. Des gleich yr kunst vñ geschicklichayt. Dan was sie in den kirchen thunt/ es sey auff
Sifften
/ pfarrẽ/ oder in kloͤstern Das geschicht allein durch betrachtung des gaytz/ man findt yetz wol etlichẽ pfaffen in einer kirchen/ wan er ein altar zu einer meß thut beraytten/ so berayt er mer dann ein stund daran/ vñ macht ein gepꝛengk voꝛr/ als wol er gau- cklen Besonder auch so beklaidt vñ zierdt er die huͤoͤtzin vnnd gemalte goͤtzen auff dem altar vmb geitz willen/ damit dy sel bigẽ von einfeltigem volck angebeten vñ geerdt werden/ das dan got hoch verbeut durch den pꝛopheten Baruch am. vj. Capit. Da soꝛicht gott die sollẽt geschandt werdenn/ Die so- lich huͤltzin gemoͤlte/ oder silberin bildnuß anbettẽ. Auch ver- beut got solichs dem volck nit zu offenbaren/ fur/ oder neben got an zu betten/ oder kain liechten oder laternen fur zu hẽckẽ. Aber yetz die pfaffen vñ Muͤnch die lassens als durch hingã/ vñ raytzen das volck dartzu/ allein von des schentlichen geytz willen sech einer auff/ in Cloͤstern wie sie mit aimhauffen zedel zuuerkundẽ auff dy kantzel stond. Vnnd wissen das es wider got ist. Besonder wo es den boͤsen geytz antrifft/ wo aber sol- liches antreff die werck der barmhertzigkeytt/ die menschẽ fur
A iij
einander zu bitten/ Oder fur die armen zu ernern das wer ein gut werck/ Dan wã ein sollich pꝛediger fleissig betrachtẽ the- then/ vñ hielten die heylig weyßsagũg Malachie am anderen Capittel. Da spꝛicht der herr O yr pꝛiester ob ir nit wolt gebẽ gloꝛi meinẽ namen. Jch wird euch verfluchen ewr gesehnũg. Wan die leftzen des pꝛiesters behuͤettẽt dy waißheit/ dan ayn sollicher ist ein engel des herrn. Aber yr sein gewichẽ von dem weg/ vñ haben manchẽ geergert in der Ee/ yr habt eyttel ge- macht das geluͤbt Leui. ꝛc. Sollichs ist kain betrachtung bey euch Dan wan ein sollicher dẽ halß furstreckt/ es sey kirweich oder sonst/ so sicht er sich vmb wie ein vogler/ dem die vogell einsitzen
snllent
/ oder gar voꝛ vmb/ von eim zum andern als wol er zum dantzladẽ/ ob im yndert zuopffern werd/ oder hat etwan zwayen oder dꝛeyen ein meß verspꝛochen/ nympt von yedem gelt/ als sey die meß allein sein/ vernimpt er dan ein pꝛe sentz in der kirch/ so lauff er in chor hinzu/ stelt sich in ein stull/ vñ kruͤmpt sich wie ein sack pfeyffer/ treibt nicht dann vnnutz geschwetz/ nypmt die pꝛesentz ein. Vnd spꝛech der seel nitt eyn vatter vnser nach. Wuͤrfft sich vmb vñ laufft zur kirchthuͤrr hin auß/ den nechsten seim hauß zu/ so kumbt im seyn koͤchin entgegen/ dy besich im den pꝛiinen im seckel/ so hat er darnach der kirchen gnuͤg. Den so stelt er sich voꝛ die kramledẽ/ da stu- diert er alle menschẽ auß/ wer auff vñ nider gat/ oder setzt sich einer inß weinhauß wo er seins fugs findt/ da lernt er rechnen vñ muntz kennen auf der karten oder wuͤrffel/ leut man dann zu vigilg tregt es nit vil/ so bleybt er sitzẽ/ tregt es aber etwas guts/ su laufft er flucks in die kirchen wie ein wolff in schaff stal/ So bald er die pꝛesentz erfreifft/ so zapfft er sich bald ey der daruon/ den nechsten wider zu seinẽ bekãten/ den bꝛingt er einn neues geltlin/ da bettet er dy vigilg selb viert. Sitzt dar- nach fult er sich biß mitternacht/ das mã in heim fuͤeren muß am moꝛgen sicht er wie ein abgestochner kalbßkopff/ ist dann sunst ein ander so erber/ der sollichs nit thut/ vnnd bleybt da heim/ so hat er sunst seinn kirchtag mit seiner getraudten/ dy ist her im hauß/ geht zu kirchẽ vñ straß herpꝛãgẽ/ als ob sy mei fraw richterin sey/ wer sie nit kent der hats fur erber/ so sie schõ daruoꝛ vil stell durch loffenn hat/ die ist geschickt zu geistli- cheit/ der pfrund gut vnd gult zuuerzeren/ sollichs ist dã ewer aller arbeit/ schaw dan einer wie ir so erber eins teyls geklaydt da her geht/ mitt außgeschniteen schuen/ vñ lappetten baret- ter wie die lantz knecht/ meer will ich euch sagen/ als kurtzlich von geschefft wegen zu Woꝛms gewesen bin/ da hab ich vil seltzamer wunder gesehen/ mit grossen gebꝛenng der gaystli- chen/ des gleich von vnzimlichẽ fressen/ vñ zu trincken an yrẽ hoͤfen/ das mich warlich zu grob gedaucht/ so hab ich gehoͤꝛt das die Roͤmer so da gelegen seind/ die gantz fastẽ flaysch ges sen habent/ vñ gebieten doch vns zu fastẽ/ vñ oͤl/ vnd anders essen/ warũb ist es vns verbotten/ das wirs es eins teyls mit gelt von in kauffen muessend/ also macht man vns zu narren sollichs vnd dergeleichẽ treybend yetz die geistlichen. Soll dz dy Chꝛistẽliche kirch sein/ so habẽ wir ein seltzam kirch vber kũ men/ dis als strafft der Luther/ warlich meins bedunckenns recht vñ wol.
Ach lieber
Shultheyß
yr thuͤnd ym tzu vil/ yr solt nit also reden/ yr verstond es nit/ man hat euch et- wan auß neyd also von yn gesagt/ so glaubt yr im leichtlich.
Wie maynt yr ob ich zu bald gelaub/ so fragẽd den frũmen paschquillũ vonn Rom/ wie es da selbst zu gehe/ vnd herꝛ Vlrich von Huͤtten/ den selbigẽ glaub ich wol/ auch weiß der Symon heß wol dar von zusagen/ wan er es doͤꝛffte thuͤn/ vnnd er nit des bapsts diener wer. So hab ich sollichs yetzo tzu Woꝛms selbs gesehenn/ so weyß ich woll wie es tzu Straßbug/ vnd Speyr auff beyden Styfften tzu gat/ So hoͤꝛ ich es sey auff andern stifften vberal auch also/ das nit wund
dickes d
wer das sie vns mit irem boͤsen leben aberglaubig machten.
Vnd wan im gleich also wer so habt yr/ oder kaynn vmb solichs tzu straffen. Dã got spꝛicht Mathei am xxiij. ca. Jr solt nit nach yren wercken/ besonder nach iren woꝛtẽ thun
Sol sie nyemãt straffen/ mein schuͤler sagt mirꝛ nehermals Es stand Mathei xv ij.
geschꝛibeun
/ sundet oder irret dein bꝛuder/ so straff yn nympt ers nit ann/ so nym noch zwẽ zu dir/ hilffts nit verklag in voꝛ deꝛ gemein/
Srafft
doch sant Paulus Petrũ ad gallatas am andern Ca. Als ein irrigẽ Dan wã ewer leer kayn nuͤtz ist vñ dz ir ander ding sagend dã dye recht gots leerist/ vñ vns vil an dy gots leer wolt henckẽ/ wem sol man dan volgen/ dan als ich von meim schuler be- richt binn. So stat Mathei am fuͤnfftenn nitt ein spitzli eins buchstaben sol zu dem gebot gots/ zu oder abgehn/ oder ge- than werden/ meer in Appocalipsi stat am letsten Cap. Der ist selig der da behuͤet die woꝛt der weysagũg dyß buchs.
ey lieber Shultheyß der schuler verstats nit/ last in nach par- tecken gehn. Wissent ir nit das dise vnsern oͤberstẽ vnd gay- stlichen nit zu straffen seind/ Vnd haben den gewalt võ got/ Fragend euwern schuler ob er nit wiß was Paulus zu dẽ Roͤ mern am xiij. sagt wer dem gwalt wider statt/ der widerstatt got. ꝛc
Lieber sagts vollẽ hinauß. Stat nit her- nach Der gewalt tregt das waffen nit vmb sunst. Da meint er das schwert des weltlichenn gewalts/ auch meer stat her- nach den selbigẽ gebt auch den zins/ oder den zol/ oder die eer oder wen meint yr/ den got oder sant Pauls anders gemeint hab.
den Bapst/ Cardinel all Bischoff Pꝛelaten/ vnd Pfarrer. Vꝛsach das ir vns schuldig seind zu opffern zehendẽ zu geben/ beicht gelt/ tauff gelt/ Sacrament gelt. Vñ des myr on not ist hie zu sagen.
Warumb hat dan gott der herꝛ gespꝛochenn/ da sein Junger fragten welcher vnderr in der oͤberster seyn solt. Da gab er yn antwoꝛt/ Welcher der oͤberst wol sein der sol der andern aller diener sein/ Er wolt in keinen in sunderheut ernennẽn. Er hieß sie alle gleich pꝛedigen/ auffloͤsen/ vnd binden. ꝛcꝛ. Jch waiß woll das ir vil begerẽd/ auch nement/ vnd haben wolt/ das wider recht noch zimlich ist. Wo her ist mann euch soͤllichs alles schuldig/ das mann euch sol so vil bꝛot vñ wein/ schmaltz mel/ vñ eyer vnnd geltt opffern. Das ir mit euwern bolster moͤmen verzerendt. Wyst yr auch das solliches opffer ein almussen ist. Vnd wo dy mẽ- schen auß andacht/ on bezwungen das her bringent/ so hoͤꝛtt es armen leuten. Vnd nit euch/ wie dan bey der ersten kirchen der bꝛauch gewesen ist. So habt yrs zu euch gezogen/ so kũpt yr mit dem zehenden. Da wolt ir vns gar mit schinden/ es sey von koꝛn Allerley getrayd/ kelber/ bynen/ schaff/ oder lemmer/ obst vñ alles/ nichts kan voꝛ euch auffkũmen. Warũb foꝛde- rent ir nit auch von newgeboꝛne kinder. So moͤchten wir tzu kũmen/ so huͤlfft ir vns auch di selbigen erzyehen. Dan was die selbigen sollend essen. Muͤssen wir alles euch geben/ zaygt mir an/ wo hats got euch also zu geben oder beuohlen. Vnd dar zu so doch ir sunst in allen dingen frey woltt sein/ kaynem weltlichen gewalt nichts zugeben/ euch genuͤegt nit so ir schõ in etlichenn reychstetten steur frey/ wach vnnd vmb gelt frey vnd wol verwardt sitzt/ yr woltend gern grund vnd boden thurn vnd thoͤꝛr darzu haben. Wolt doch got der herꝛ auch dem welichen gewaltt auff erdtrich vnderthenig seinn. Do er zu Petro sagt/ ganng annß moͤꝛ/ den ersten fisch den du fa- hest/ da sinst du ein pfennig bey/ den gib voꝛ mich vñ dich/ er hat nitt gehayssen denn pꝛisternn oder gleyßnern gebenn. Er meynt denn keyser/ vnnd weltlich gewalt. Meer hoͤꝛ ich von meym schuler/ dan aß ich red kumpt als auß meym schuler/ Jch kann wyder schꝛeybenn noch lesenn. Der selb spꝛichtt/ es stannd Mathei am x. Capittel. Gott spricht tzu denn Appo- stellen/ vnd tzu euch pfaffen allen/ pꝛedigent des hymelreichs zu nahung/ heylen die kranckenn/ erweckent die todtenn/ ray- nigendt die aussetzigen/ vergebenn habt irs entpfangen/ ver- geben solt yrs außgebenn/ nitt wolt besitzen gold oder silber/ meer muͤß ich euch weitter vonn gewalt fragen nach euwerm gedunckenn/ welche meynent yr die den rechtenn gewalt tra- gent/ die geistlichenn oder weltlichen.
die geystlichen tragent yn/ Dan wann man vns nit gibt das vns tzugehoͤꝛt/ Daruon yr vns nit reden werden/ So haben wiꝛr den rechten gewalt des bans.
Soll das euwer schwert oder
B
waffen seinn/ Warumb werd ir nit dem Turckenn mitt ewe- ren schwert/ so nem er nitt so vil Christenlicher land ein/ Jch frag euch wr ist die recht uͤberkeyt der bapst oder keyser.
Der bapst/ dan er sol den keyser kroͤnen/ vnd der keyser den bapst nitt.
Solt darumb der bapst ob dẽ keyser seinn/ Da sag ich neynn zu/ so wer offt einn pfarrer geweltig vber sein lehen herꝛen der pfarr. Dann die kron gehoͤꝛt got zu als einn yetlich kyrchenn heyltum oder kleynat. Vnnd ist der bapst gottes vnnd der kirchendiener vnnd knecht. Also seind all pfaffen vnser diener/ so wir etwas von der kirchen begern vmb gottes oꝛdnung/ vnd notturfft willen. Vnnd sollent yr das vns vmb sunst geben/ wie yr fur gehoͤꝛt habt. Dann solt ein pfarrer ob vnns im doꝛff sein/ so muͤestenn wir ym rechen- schafft vmb alle ding thuͤn/ Vnnd nichts on yn handlen da wirt noch lang nichts auß. Jch wird auch bericht võ meim schuͤler das da geschꝛiben stand/ Petri die erst Epistel das an- der Capittel/ yr seind alle einn kunigliche pꝛiesterschafft/ seind vnderthenig aller menschlichen geschefnũg/ vmb gots willẽ/ Es sey dem kuͤnig/ als dem voꝛgeer/ es sey den hertzogen als denn gesanndten von ym/ Dann es ist der will gottes/ war- umb hat er nit nach ewer meynung gespꝛochenn/ dem bapst als dem viꝛgeer. Vnnd den Legatten/ vnnd Bischoffen/ als den gesandten/ er hatt euwer nye gedacht. Jr komment offt/ so nyemanndt nach euch schickt/ da hoͤꝛt mann woll das der keyser meer ist/ dan der bapst. Meinn schuͤler sagt es stanndt Pauls tzu denn Roͤmer die erst Epistel. das xij. Capittell. Jr solt gut wandel fuͤeren/ vnnd voꝛbildt/ nitt alleynn voꝛ gott besonder auch voꝛ den menschen/ Euch nitt gleichenn dyser welt. ꝛc. Wo wirdt sollichs gehalten/ yr vermeyndt des key- sers vnnd aller w
e
lt gewalt auch bey euch habenn. Zwar ich sich nicht anderst dann das ir schonn darnach greifft/ vnnd woll halbs bey euch habt/ yr richtennt all krieg/ vnd bluͤt ver- giessen/ vnd all hader auff/ bey keyser/ kunig/ fursten vñ herrn/ yr muͤest in allem spill sein/ was meynnt ir das ewer gewaltt/ vnd ampt sey/ wan yr es recht haltẽ wolt. Es sey Bapst Car- dinel/ Bischoff/ Pꝛelaten/ vnd Pfarrer/ vnd alle geistlich vmb ewere pfruendenn zu verdienen/ Das euch als einn almuͤsenn gestifft vnnd veroꝛdnet ist. Nichts annders dann ernnstlich vnnd andechtigklich betten/ vnnd pꝛedigen/ vnnd euch allein mit gott vnnd der geschꝛifft gots nach arbeitten. Meinnt yr man geb euchs von euwers huͤbschen hars willenn.
Nunn was geht euch dan in der kirchen ab. Wir haben teg- lich meß/ so helt man in allen styfften die siben tagzeit oꝛden- lich/ so werdt yr alle tzeit versehenn mitt den Sacꝛamentenn/ mit pꝛedigen/ mitt tauff/ Vnnd was yr vonn gesancknuß be- dorfft.
Wie werden wir versehen. Jr habennt voͤꝛ gehoͤꝛt das yrs vmb sunnst thun solt. So habt ir vberall groß zynnß/ vnnd guͤldt darauff gesetzt. Vnnd kan euch nye- mandt erfullenn. Dann so yemandt etwann einnes seiner ver- wandten/ oder sunnst zu besingen lassenn will/ es sey mitt vi- gilg/ besinncknuß/ siebennt/ dꝛeyßgost/ oder iartag/ was des ist. so habt yr eynn sollich wochenmarckt darauß gemacht mit dem auffschlag/ es sey auff dise voꝛgemelten stuͤck/ oderꝛ auff wachß. glocken gelt. Vnnd was des ist mit sampt dem opffer das mancher armer kaum zubezalenn souil hat/ vnnd sein haußradt oder kuͤ im stall darumb verkauffen/ vnd ver- setzen muͤß. ꝛc. Solt yr dan eym kranckenn das heylig Sacra- ment oder die heiligenn oͤlung zu hauß tragenn/ so habtt yrꝛ so vil auff schleg darauff gemacht/ eer dann yr eynn pfenn- ning eym armenn nach lyest/ yr truͤgt ym ee eyn pfanndt auß dem hauß. Das heyst dan die scheflin treuͤlich versehen. Wie bhalt yr so schoͤn des beuelch Chꝛisti. Petri. die erst Epistel. das letst Capittel. Fuͤerenndt die herdt gottes/ die da ist vn- der euch/ fuͤr sehenndt sye/ nitt bezwungelich/ aber willgklich noch gott. Nit vmb willen eyns schnoͤden gewyns. ꝛc. Auch so metckt yr dar bey das yꝛ vnns inn der beycht nitt beschwe- ret/ vnnd vber vnser gewissen nit ergrabenn solt/ vonn euch selber/ dann das vast euwer bꝛauch ist.
Lieber
B ij
Schultheyß. Es hat gar kein gestaldt sollich red vonn euch solt keyner vmb sein arbeyt nichts habenn. Wo woltenn wir vonn lebenn.
Vom Coꝛpus der pfruͤenndenn.
Wie kann yeglicher vom Coꝛpus gnung habenn. Man findt der meerteyl pfruͤend die grossen abtzynß muͤssen gebenn dem rechtenn Pfarrer zu Rom/ Straßburg/ oder an- ders wo. Wo sie dan yr wonunng habenn/ wan die rechtenn pfarrer sein nitt all tzu pꝛiester geweycht/ sie habennt nur einn scheynn. Paulus zu Thimotheo. ij/ Epistel. iij. Capittel. ꝛc. Auch so habenn ein teyll weyb vnnd kynnd/ so seynd ein teyll so ungelert das sie nitt ein Dominus vobiscum kunden ver- stan. So seynd ein teyl der Cardinell vnd bischoff kamer die- ner.
Wer leicht dan sollichen goͤtzen die pfruen- denn.
Der Bapst vnnd die Cardinell/ vnnd annder Bischoff vnnd pꝛelaten/ vnd warumb nit.
Ja nun merck ich erst wannen her die oͤberig schatzunng hie vor gemelt enntspꝛinngt. Dann wie ym sey das es nurꝛ vber dye armen tzu schynden/ erdacht sey. Jst das war das mann die pfruenden sollichen stocknarrenn leicht die sie nit verdienent oder verdienen kundenn. Vil besser werß es wuͤrd einner eynn schafhyrt/ dan ein seel versorger. Dann Chꝛistus hat nit vmb sunst tzu Petro gespꝛochen dꝛeymal/ Petre hast du mich lyeb/ so waydne meinne schefleinn/ wan er die lieb nit hat/ Die Pe- trus hat gehabt zu dem herren/ vnd nit gelert ist/ so ist es ver loꝛnn/ so weyß ich eynn gutte ertzney dartzu. Welcher nichts kan/ vnd nit geschickt tzu pꝛiester ist/ den nym mã die pfruen den/ vnnd iag yn auß dem lannd/ oder zwing yn zu arbeyten/ Vnnd sunst wellicher meer dan ein pfruend hat/ dem nem sie einn Lanndtfurst oder herꝛ/ vnnd teyll sye vnnder arm gelert pfaffenn. Vnnd laß fuͤrbaß keynn auff ein pfruend tzu Rom verharren/ vnnd verleyhents die Fuͤrsten furt meer selbst hin/ so werdenn die armenn leutt freyer/ vnnd vnbeschetzt. Dann es stat manicher oͤlgoͤtz auff die kantzel/ vnnd wil den Luther mit sein
e
n guͤtten buͤchern außrichten/ vnnd vermeynt er wol mit seinem klaffenn vnns all erschꝛeckenn vons Luthers leer tzu fallenn/ der dem frummen Luther nit kundt ein schuͤchrie- menn aufflosen/ ann seiner leer/ vnd wollent dennoch etlich Letzelltiat heyssenn/ das ist eynn bꝛott wider saurꝛ noch sueß/ vmb den kindlinßtag ist es werd. Vnnd etlich gut Magister im weyn glaß/ zwar sie gewinnendt nit vill ann sollichem pꝛe- digen/ dan wan man darnach auff den pletzenn/ oder in denn badenn tzusamen kumpt/ vnnd sollichs vonn in tzu red wirt So spricht mann / ey wie hatt sich dyser pfarrer/ oder yenerr Munch so weydelich vmb die narrenn kappen gerissen/ alßo kumpt yr grosse kunst ann tag/ da gewyndt er dann grossen gunst vnd lob/ dann er maint so ym nyemannt in der kirchen wider spꝛicht/ so stand sein sach wol/ wann er aber ym weyn- hauß auff dem ryng oder ym bad darbey werꝛ/ so hoꝛt er gut schꝛollenn.
Ach lieber Schultheyß. Jrꝛ treybenndt seltzame woꝛt/ warumb wolt mann vns vnsern lanng her ge brachtenn bꝛauch schwechen/ Das woͤll gott nitt. Der ketze- risch Muͤnnch der Luther/ oder yemanndts solß dartzu nytt bꝛ
in
genn.
Wie heyssett yr ynn eynn ketzer. Da last warlich vonn/ oder bey dem har in dem hoff vmbzogen Das sag ich euch tzu/ Er ist frum vnnd gerecht/ thutt nichts vmb gelt. Hatt ym doch der Bapst eynn bistum wollen ge- ben/ das er nit mer woder in schꝛeib/ das hat er nit wollen thuͤn Will eer arm seinn/ ee das er die warheit gots woll verlassen
Jch bin ein geweicht mann/ vergecht euch nit.
Was gat mich euwer weyhũg an/ yr pfaffen bochend alweg auff euwer weyhe/ vnd haben vns bißger offt groß ge plagt/ so einer eyn pfaffenn eyn wenig geschlagen hat/ so hat er mit grosser muͤe/ vnnd schwerem kostung/ kaum muͤegenn von euch kommen/ yr habt vns geplagt/ vnd genoͤt/ mit dem bann/ schawt aber gebt vnns uꝛsach mit mutwillen/ als voꝛr offt geschehen ist/ ob yr vnns meer muͤegt mit dem bann er- schꝛecken/ wir wissent yetz auch was der bann ist. Dan wann etwan ein boͤser pfaff eynem so groß uꝛsach gebenn hat/ dar-
B iij
umb er tzu todt geschlagen ist so habt yr Jntterdickt gehal- ten/ vnnd vonn eins todten boͤsen pfaffen wegen vill gutter seliger messen vndter lassen gehn/ vnnd habt vns bißher mit euwern karacktoꝛes/ also erschꝛeckt/ als ob yrr beser Chꝛistenn sollend seinn als wir/ vnnd die heiligkeyt der Chꝛistenlichenn kirchenn alleynn an euch legt/ un warumb achtet yr nitt auch hoch/ wann sunst eynn Ch
ꝛ
isten mensch zu thodt geschlagen woꝛden ist/ dartzu werꝛ hellt vber die pfaffen Jntterdickt/ die im krieg erschlagen vnnd erschossen werdent/ yr gebt offtt so grosse vꝛsach darzu/ mt boͤsen woꝛtten vnnd wercken/ auch mitt muͤtwill tzu nacht auff der strassen oder gassen/ mit vn- tzucht mit geplerꝛ/ mit verkertenn kleydunng/ oder wehr/ das es offt biliich gescheen sollt/ vnnd so ir dan auff euwer heilig keyt so vill schetzt/ so solt yr nit souil muͤtwil/ mit boͤsen woꝛt ten vnd wercken treyben/ vnd vns nit vꝛsach zu freuntschaft an euch geben/ meynt yr nitt ob wir auch als gutt Chꝛistenn seyendt als yr/ habt yr voꝛ gehoͤꝛt/ das got spircht das ander Capittel. Petre/ yr seinnd all eynn kuͤnigklichen pꝛiesterschafft er suͤndert keyn Chꝛisten menschen auß. Auch sagt mir meynn schuler das da stannd. Paulus tzu den Ephesiern am vierdẽ. Capittel. Seind soꝛgsam zubehuͤeten die eynigkeit des geysts in dẽ band des frids/ eyn leib/ einn geyst/ ein herꝛ/ einn glaub ein tauff/ eyn gott/ wann vnser yetlichem ist die genad nach der maß vnnd gab Chꝛisti gebenn ꝛc. Da merckt auff Pfarrer er suͤndert keyn von dem andern. Vnnd machtt auch keynenn heyliger dan den andern/ er vbe es dann mitt dẽ rechten glau benn/ vnnd guttenn werckenn/ auch sagtt yr der Luther sey eyn ketzer. So sag ich yr seinnd den mereꝛteyl selbst ketzer/ das das war sey/ so pꝛedigend yr vnns nichts rechts dann menns- chen tedinng. Auß Aristoteles/ vnnd der gleichen heydnische buͤecher. Wann yrꝛ schonn das Euangelium eynwenig vber lauffendt/ so ist die vberig pꝛeding darnach von kirchtagen verkuͤnden/ von ban bꝛieffen/ vnnd zehenden zusamlen/ vnnd an die kirchen bew zugeben. die voꝛ so vol seinndt/ Vnnd wie man nitt fur gott mit leren henden soll kommen. Was seindt aber die selbigen gabenn/ die got meynt/ der glaub/ hoffnũg/ vnnd liebe/ darauß wolt ir gelt vnnd opffer machenn. Auch weitter so kumpt dann etwan einn bettel Muͤnch/ der macht vnns eyn plamer voꝛr vonn seltzam heyltum/ vnnd grossem applas/ Da helfft ir dann zu/ dann euch wirt euwer teyl auch daruon/ da schindt man vnns vmb gelt/ keß/ vnnd flachs/ also muessen wir arm seinn. Volgent aber mir die pauren eyn mal/ so wollen wir sie zum doꝛff auß iagen/ das in die seck em pfalhenn/ das vnns keinner meer dareinn komptt. Dann sie liegendt was sie vns voꝛ sagendt/ sie sagendt offt/ wan es im Zenntono felld stuend/ so wer es spoͤtlich gnung Dar tzu wer weyß was sie in vnsern heusern suchent wen wir baurẽ nit da heym seind. Darumb ich aber spꝛich/ das meer ketzerisch seind/ dann Christenlicher werck voll. so sag ich auch/ das yr vnns offtt vnnd der meerteyll vonn dingenn her sagtt/ vnnd das selb an das Euangelium vnnd gots wort anhenckt/ das gar nit darzu gehoͤꝛt/ vnnd widerwertig ist. Vnnd hoͤꝛ auch von meim schuler sagenn/ das da stannd Mathei. am funfftenn Capittell. wie voꝛ gemelt ist/ nitt eynn spitzlin von eim buͤch- staben sol von dem gesetz gots nit ab oder zu gehn Des glei chenn sagt er das in Detronomi. am xxviij. Capittel. stanndt Jt solt euch nit von dem gesetz gottes wenden/ weder zu der gerechtenn oder zu der linckenn/ meer das auch stanndt Pau- lus ad gallatas im erstenn Capittell/ ob ein eingel von hymell kem der annders leret dann die leer Chꝛisti/ das soll verflucht sein/ meer weytter. Ezechielis am. xviij. Capittel. welcher be- huet mein gebot/ vnd bereuͤwet sein sund/ vnd helt dy werck der barmhertzigkeyt/ der wird nit sterben des ewigen todts ꝛc. Des dings ist vill/ das sollichs als vonn meym schuler hoͤꝛre angezeygt wirdt/ vnnd auch so hoͤꝛ ich sagenn/ das da stand Esaie. am xxjx. Capittel. Das gott der herꝛ des menschen ge- setz neben seinem gesetz nitt haben wil/ des geleichen auch Je- remie. am. xviij. Da vermaledeyt gott alle die vonn seiner leerr auff menschen gesetz sich verlassend. Soͤlichs alles nempt zu hertzen/ lieber Pfarrer/ vnnd bꝛauchen nur das Euangelium vnnd die gutten leer/ dye daran hangent/ vnnd nitt weytter/ vnnd last den frũmen Doctoꝛ Martinus Luther der dan soͤl lich mißbꝛauch/ schinderey/ vnnd menschenn gesetz/ das yr all pꝛedigent/ furt hin vngescholten/ wolt yr anderst gut pauren habenn.
lieber Schultheyß. So der Luther alleynn den Bapst mit den geistlichen fur sich genommen hat. War umb nympt er auch nitt fur sich Euch weltlichenn/ yr sechtt das alle boßheyt vnder euch auff gestanden ist. Von erst võ der rauberey auff der straß/ da ist nyemannts sicher/ fur das ander/ so ist alle vnoꝛnung in allen empter der herschafftenn vnd alle hertigkeyt vber arm leutt vonn euch allenn/ Pflegerꝛ Voͤgtenn/ Amptleuttenn/ Schultheyß/ oder weyblenn/ winn eynn paur ein freuell verfelt
/
oder der herschafft den zineß nit auff yede stunnd reycht/ so schindenn yr in mitt dem rechtenn/ oder ploͤchten vnnd setzt in ein/ so dann einn paur abstirbt/ er sey wie arm er woll/ er hab verlassenn vill ider wennig kynn- der. So seind yr oder alle geweltig Amptleut hie/ vnd nemẽt denn fal mit gewalt. Vnnd besonder der herschafft das best roß/ vnnd euch Amptleutten den besten rock/ vnnd wan nitt meer da wer/ so lassent ir nichts dahinden/ vnnd solt schonn weyb vñ kind zum bettell kommen. Vnd keyn acker von inen gebauwen werden. Wo stett das selbich geschꝛiben.
Lieber
Parrer
/ das ist eynn ander dinng. Sye sitzenndt auff der herschafft grundt vnnd boden/ Vnnd muͤß man sy beschuͤtzen vnd beschirmen/ vnd mit tryb vnd trab/ vñ holtz versehen/ vnnd wann wetter oder pꝛunst in etwan schadenn thuͤt/ so thut ym die herschafft eyn ablassung das zeinß. Das thund yr nit/ ir lißt nit eynn heller nach keynem armenn ob er schon auff der gassen muͤest ligen.
ich muͤß euch auch meer sagen/ deßgleichen secht in stetten was mißbꝛauch ist yn
enn hendlen/ mit kauffleutten boͤser warꝛ/ kleynen gewicht/
urtzer elen/ vnnd des dinngs vil/ Des gleichen ist betrug inn allen handtwercker/ dar von vil zu sagen wer/ es bedoꝛfft al- lein eins grossen buchs. So vil groß falsche
t zuschꝛeiben ye- der steygt auff geitzigkeyt/ kein treu vñ glaub ist vnd in/ auch ist betruͤg mit essen/ trncken von den mans kauffen muß/ die wirtt felschendt den weyn mit allerley gemecht/ mitt wasser/ vnd andern boͤsen stucken/ das bꝛot ist kleyn/ das zermieß ver mist/ das gewuͤrtz oder spꝛzerey ist geferbt/ vñ vermengt/ kei- ner bleybt von dem andern vnbetrogen/ Auch meer so seinnd die bauren follerꝛ boͤser list/ mit was sie zu marck fuerennt/ es sey koꝛn/ gersten/ habern darin vil vnflat staub treffts wickẽ ratten/ fast vnlautter/ des gleichen holtz aussen schoͤn geladẽ/ innen faul krum vnd kurtz/ auch meer wie das heu vnnd stro so spoͤtlich vnnd betriglich geladen ist/ es schluͤff ein kuͤ hin- durch/ aussen hats ein schein/ innẽ ist moͤsig vñ rentig/ bꝛingt einer dan eyer/ so seinds halber faulstinckent/ des gleichen võ oͤbst/ pirn/ oͤpffel/ klein steinig/ faul/ hagelschlechtig. Wie sol- licht geschicht von disem allem
/
vnnd gebts doch all voꝛ ve- recht vnd gut mit der zal hln. Jst nit auch sund/ ists nit auch geytz. Spꝛicht nit Paul. zu Thymotheo am vj. Capitel. Es sol nyemandt neid/ kryeg gotzlesterũg in im haben. Vndd sol nyemant reichtumb/ geytzigkeit suchen/ Wer das thut felt in den strick des teuffels.
Jr habt vil gemeldt da mit die welt beschwert ist. Yedoch so ist die geitzickeit võ erst bey euch auff gestanden/ vnd besonder da Chꝛistus der herꝛ die gelerten auß dem tempel mit der geysel treyb/ als sy dy tau ben verkaufften die man in wider opffern muͤst/ vnd wie die wegsler gelt außleihent den armen/ damit sie on gab nitt auß dem temppel solten gehn. Da selbst ist ewer opffer vnnd ewer geytzigkeyt her kommẽ Die yr noch in der kirchen vermeynnt zu haben/ das als wider got ist/ vnd wil also setzen wir seind alle ein leyb geystlich vnd weltlich. Chꝛistus ist vnser haubt im hymel/ so ist der Bapst vñ all ir der geystlicheit nach/ mit pꝛedigen/ beten/ sacrament reychen des haupts knecht vñ die- ner. So dan der gantz leib kranck ist/ vnnd des hapts dienner
C
von der vernufft kommen. So muß man der vernunfft zũ ersten helffen/ vñ sie ertzneyen/ so werden die glyder auch dar- nach gesund/ darũb hat Doctoꝛ Martinus Luther ann euch angefangen/ dan ir solten die lerer seinn/ vnnd wir die volger als Mathei am. xxiij. Capittel. stat. So legt ir vnns wie da selb stat/ die buͤrde mit hauffen auff den rucken/ vnd ruͤerennt irs mit ewer handt nit an darzu so hauffet/ vnnd meret sich ewer geytzigkeit/ ein tag vnd alltag/ wan schon einn mensch in der wochen stirbt/ so besingt yr in nit biß an feyrtag so vil leut zum opffer koͤmpt in allẽ doͤꝛffern. Auch wã zwey in eym doꝛff mit todt ab gehn/ so besinget irs nit mit einander/ sond
dickes d
nach einander als von des opffers wegenn. Auch ist ein sol- licher auff schlag in den doͤꝛffern/ mit dẽ opffer mit mel/ wein ayer/ schmaltz. Das gehoꝛt dẽ demßner/ das gehort meim herꝛ Pfarrer/ da her kuͤmpts/ das die pfaffen nit kunnẽ erfuͤlt wer- denn/ das macht des Pfaffers putan die muß vill meel vnnd schmaltz diß iar haben Daruon der arm paurs man meynnt es mueß also geopffert werden. So dann ir vnser seel soꝛger solten sein/ vnd nit geschicht. Als nach bericht meinns schul- lers geschꝛiebenn stat. Petri die ij. Epistel. das. ij. Capitel. Es werden kommenn falsch pꝛophetenn/ luegenhafftig meister/ vnd einfueren falscher leer der verdamnuß/ vñ habẽt geirꝛt. ꝛc. So wollen wir glider mit fleyß dem haubt helffen von erstẽ vnnd ewer seel soꝛg tragen/ wo mit aber. Wir wollen dy Fur sten/ vnd herschafften bitten/ vnnd in darzu treulich helffenn das man euch die oberigen pfruenden wider nem. Jch mueß herfur tretten vmb gottes eer/ vnnd namen willen/ auff mich ladenn feyntschafft aller menschen/ wie Chꝛisttus spꝛach tzu seinnen iungern. Es werdẽ euch feind sein vmb meins namẽs willen/ alle menschen. Hie muessen wir vatter vñ mutter/ vnd besten freund ertzoͤꝛnen, Hie muessen wir wie ich voꝛ auch ge- melt hab/ einem nit mer lassen/ oder geben dã das er ein rechte zymliche narung hab. So doꝛfft yr keiner beschwernuß war- ten/ von oͤberiger boͤser weyber die euch abziehent/ vnnd euch zu nacht vngeschlaffen legẽ/ mit vnruwe des kriegs vnd ha- ders/ soꝛg vnd angst/ fur weyb vnd kind zu erneren/ auch furꝛ vberig starck speyß vñ tranck. Damit yr mit keyner kranckheit/ ptogram oder anderm vberfallen werdent. So dã sollichs geschech so moͤcht ir der kirchen ruͤwig auß warten/ mit bettẽ/ pꝛedigen/ studieren/ mettin/ pꝛeym/ tertz/ ser/ non/ vesper/ rõplet vnd alles ruͤig volbꝛingẽ Also wurdt ir an leyb/ vnd seel ruͤig vnd gesundt. Vnd so gutte ertzeney an euch frucht bꝛecht/ so wuꝛd vns darnach ewer leer baß zu hertzẽ gehn/ so woltẽ wir vns treulich nach euch besserẽ. Jn solichem wurd ir in alweg enntschuldiget. ꝛc. Wie gfil euch solich seelsoꝛg.
Jch sag euch also/ ir seind nit geweicht darzu/ vñ hoͤꝛt euch nitt zu vns zustraffen/ der bapst vnd die bischoff/ vnd manicher ge- lerter pꝛelat/ vnd Pfarrer habent so vil gestudiert/ in allẽ gut- tenbuͤchern vnd geschꝛifften das sie vnd wir all wol wissent was wir thuͤn sollẽ/ sieder aber ewer neyd also in die geistlichẽ gewachsen ist. Vnd der schentlich Munch mit seim ketzeris- chen schꝛeiben euch zu lieb darzu kumpt/ so meynt ir/ yr woltt vns alle fressen.
Jch sag euch pfarrer/ hoͤꝛent auff von diser ketzerey zusagẽ/ oder warlich ir werdt vbel gerauft/ ich sag euch nit meer/ yr sagt von grossen streichen/ vnd kuͤn- sten so der bapst/ vñ ir all kunt vñ gelerent habt/ warũb habt yr dan nit Doctoꝛ Martinus Luther mit disputieren yetz tzu Woꝛms vberwunden/ da er sollichs voꝛ mengklichem begert hat/ vnd seiner buͤcher bestendig gewest/ vnd wo sollichs ge- schehen wer/ Hat er sich selbs wollen in die straff begeben/ vñ all sein ding widerrueffen. Es hat aber nyemãt an in gewoͤlt habt in also wider heim lassen ziehen/ wie seindt ir so gelert/ wie ir euch beruempt/ darumb bedurfft ir nit sagenn das wir vergeben neyd zu euch tragent/ dan allein vmb ewer spoͤtlich vnwesen/ grossen geytz/ vns zu schinden. Vnd vnergrundte leer vns voꝛzusagen/ auch boͤß exempel So ir vns verfuerent darũb freylich wol war ist/ das Capiettel Paulus zu Thimo- theo im. ij. vñ iij. Capit. Sye haben ein schein eins geistlichen
C ij
lebẽs. Vñ lernent ye mer vñ kũmen nit zu der warheyt. Was sagt ir darzu herꝛ Pfarrer. Jch sag nichts darzu/ wan es al- so ist/ als ir sagt/ Das der Luther tzu Woꝛms erschinen ist/ Vñ sein ding also verantwoꝛt/ vnd bey seiner geschꝛifft also bley ben will/ vnd die also zu probieren sich erbeut/ vnd im es nye- mãt widerfechten kan/ so will ich auch fur nyemãt meer fech- ten/ wie es eim andern gee/ so gehe es mir auch. Jch wil auch durch sellichs furt hin dester meer von im haltẽ Jch wil euch auch bitten lieber Schultheyß Vnd all ir nachpaurẽ hab ich zu vil geredt/ vñ wider fochtẽ ir wolt mirs verzeyhẽ dan ich kan mit disem wol mercken das der Luther vil gelerter ist dã der Bapst/ Cardinel/ Bischoff/ Pꝛelatẽ/ Doctoꝛes/ Pfarrer/ vñ pfaffen. So sunst voꝛhandẽ seind/ dan was ich da than hab mitt widerpart haltenn/ darzu hat mich doctor Murnar tzu Straßburg gebꝛacht/ der hat sich offt vil beruempt/ vñ ge- schriebenn wider den hochgelertenn Doctor M. Muther/ so er aber nit gen Woꝛms ist kõmen/ darzu auch D. Eck. von Jn- golstat/ der sich auch mit seiner bull vil beruͤempt hat. Vñ be sonnder so hab ich auch gehoͤꝛt das diser Eck mit D. M. L. zu Leyptzigk gedisputiert hab/ vñ ein grosse saw daruõ getꝛa gen. Yedoch was er
z
u Leypsigk mit spot gelitten/ hat er
tzn
Neuburg ob Jngolstat/ mitt schoͤner hofzucht wider gebes- serdt/ da er die grossen kuͤnnst fand/ das er die heuͤser da selbst mit den klafftern abmessen wolt/ vñ vnderstundtsich zu lernẽ auff dem kopff zu gehn. Darzu hat der Karstãs den Mur- ner auch spaͤtlich gnung außgericht/ vnd hat im auch rechtt gethan/ da diser Roͤlling sich auch vnderstãden hat/ den Lu- ther zustraffen/ on kunst vnd vernunfft/ den ich glaub er wer besser zu eim bengel pꝛediger/ dan die heilig geschꝛifft zuwi
dickes d
fechtenn/ dann er hatt es vor woll bewerd besunder da er fur sich nam/ vñ auß seiner hohen/ scharpfen siñigẽ speculatz der welt zu schoͤner andacht/ vñ vnderweisung/ her furgebꝛacht hat/ dy hoch er grundtẽ leer/ mit namẽ die Narꝛẽ beschweꝛũg dy schelmẽ zunft/ der Gretmuͤllerin iartag/ Auch dẽ Vlenspie- gell/ vñ andꝛe schͤne buͤchle meer/ darin er freylich wenig auß der bibel alligert/ so hat er auch nit vil/ wider kriechisch noch kaldeyscher spꝛach darzu gebꝛaucht Jch rechten wol/ er hab solche hohe spytzige kunnst zu Freyburg im faulenn hoͤltz er- schnapt/ yedoch singt er nach seins schnabels at. So dann der Bapst sein kirch/ vnd heiligkeit zubeschirmẽ an die tapf- fern leut henckt. Darumb so wil ich dem frũmen Luther auch zu fallen/ vnnd will auff dise blodier all nichts meer halten. Wil mich auch furbaß auff sein leer gantz legen/ vñ euch voꝛ- gehn als ein trewer hyrt. Dan ich hoͤꝛ es seind sunst vil geler- ter leut auff seiner seytten/ besonder Doctoꝛ Erasmus Roter- dam der schꝛifft ein starcker ecksstein/ deßgleich Doctoꝛ Andꝛe as Karol stat ein kron der heiligen geschꝛifft/ auch Oecolam padius/ vnd der noch vil meer. ꝛc. Dan ich vernym dise hoche gelerten menner habenn den rechtẽ kern der gutten buͤcher/ in uͤbung kriechisch/ hebꝛeisich
/
lateinisch/ vñ villeicht kaldeyisch/ auß den allenn die dann bey kurtzen iarn herfur kũmen seind. Ligt als ich hoͤꝛ der recht schatz der heiligen geschꝛifft ꝛc. Dar umb last mich furbaß ewer Pfarrer sein/ so wil ich euch thun was euch lieb ist. Dan ich hab mir lang gedacht als wir pfaf fen vns haltẽ thuͤnd/ got der wurd es etwã endern/ das es an tag kem/ vñ wir gestrafft wurdenn.
Lieber herr Pfarrer ir habt gleych war/ ich hab dar fur die zeit sey schonn vorhandẽ Warlich hat solich vbel wesen/ vñ boͤse oꝛdnung vñ regiment/ bey den grossen heuptern/ die sich geistlich nen- nendt/ wol vierhundertiar gewerdt/ dar wir all vñ vnser alt voꝛfarẽ/ die lanz zeit her/ hinder euch allẽ/ des geystlichẽ hauf fens betrieglich gefangẽ gewesen seind. Vnd als ich auch dã bericht bin von meinẽ schuler/ das da stand Actiñ am vij. ca. Spꝛicht got der herꝛ zu Abraham/ dein sun wirt ein woner in eim frembder land. Vñ sie werdẽt sie vnderwerffen dẽ dienst/ vnd sie vbelhalten vierhundert iar/ vñ de leuten sie dyenent die vꝛteylich/ spꝛicht der herꝛ. ꝛc. Wen meynt ir dẽ got gemeint hab. Da merckt asff. Also sein wir vnuerstẽdigẽ/ warlich ewr
C iij
diener bezwangenlich/ die lange zeyt her/ gefangen gewesen- und was wir/ vnnd all vnser voꝛfarn/ mit vnserm bluͤtigenn schweyß lang her hertigklich erkratzt gabẽd/ ist schier als mit ewern listen von vns zu euch kũmen/ yr habt schon dꝛey zypf- fei am petr. Vnd wan got der herr/ vnd der frum Luther len- ger geschlaffen vnd zugesehen hetten/ so het ir den vierdtenn zypffel auch gar bald vberkũmenn/ ir habt ye starck darnach gegriffen/ vñ noch reyst yr euch. Vnd ist vns not das wir in fest halten das er vns nit entwisch. Dan ir habt den golter so hart von vns vbergezogen/ Das wir schier erfroꝛẽ seind/ es ist tzeyt das wir auch wider erwarmen/ das vꝛteyl gots ist euch/ vnd vns allen woll zufurchten/ darũb lieber herꝛ pfarrer. So habt ir schon ein gutte Chꝛistenliche meynũg voꝛ euch. Wol- lendt die andern nit/ dem rechten weg nach/ so schawẽt was ynen darnach kumpt. ꝛc. Auff sollichs so trinckent lieber herr Pfarrer. da mit vns allen/ vnd sey alles ab vnd verzygen. Vñ geb vns got gluͤck. ꝛc. Vnd zu eim guten muͤt/ wollen wir am Sontag all mit euch zu moꝛgen essen.
Das gelt woll lieben nachpauren. ꝛc.
Also schied yeder ab/ vnd heym in seynn hauß. Vñ der Pfarrer auch/ der wardt also zechfrey gehalten.
A
M
E
N
Nichts on vꝛsach. ꝛc.