Ludwig Thoma
Magdalena
Volksstück
Personen:
Thomas Mayr, genannt Paulimann, Gütler
Mariann Mayr, sein Weib
Magdalena, beider Tochter
Jakob Moosrainer, Bürgermeister
Lorenz Kaltner, Aushilfsknecht bei Mayr
Benno Köckenberger, Kooperator
Barbara Mang, Taglöhnerin
Martin Lechner, Bauernsohn
Valentin Scheck, Bauer
Johann Plank, Bauer
Ein Gendarm
Bauern, Weiber, Knechte, Mägde, Schuljugend
Die Handlung spielt im Hause des Thomas Mayr in Berghofen, einem Dorf des Dachauer Bezirkes. Zwischen dem ersten und zweiten Aufzug liegen sechs Wochen, zwischen dem zweiten und dritten einige Tage.
Erster Aufzug
Erste Szene
Thomas Mayr tritt von rechts langsam ein, in Hemdsärmeln. Er hat die blaue Arbeitsschürze vorgebunden und aufgeschlagen. Er nimmt seinen Hut ab und hängt ihn an einen Haken des Kleiderrahmens. Mariann hebt etwas müde den Kopf und lächelt ihm zu.
Mariann
Bist du da, Thomas?
Thomas
Amal nachschaug'n, wia's dir geht.
Mariann
Daß du weg'n meiner von der Arbet weggehst?
Thomas
I ko di net allaweil alloa lass'n.
Mariann
Dös hätt's net braucht. Kummt ja d' Nachbarin fleißig rüber.
Thomas
No ja, es treibt mi halt hoam.
Mariann
D' Nachbarin sagt, im Stall is all's in Richtigkeit, und an Gart'n hat s' mir aa  gossen. Sie is scho a guat's Leut.
Thomas
Ja - ja.
Mariann
Wia steht's denn im Feld drauß'n? Kimmt d' Gerst'n guat rei?
Thomas
Net b'sunders; an Hagel spürt ma stark.
Mariann
Dös is arg.
Thomas
Von mir aus! Was frag i danach?
Mariann
Geh weiter! Was host d' denn?
Thomas
I sag's, wia's is; dös bekümmert mi ganz wenig.
Mariann
So muaßt d' net red'n; du bist ja sunst net so g'wesen.
Thomas
Sunst!
Ablenkend
Und was machst denn du? Geht's a bissel leichter mit'n Schnauf'n?
Mariann
M - m — es is allaweil dös gleiche.
Thomas
Hat der Dokta nix g'sagt, daß er dir helfa ko?
Mariann
Er red't halt so rum, weil er mir d' Wahrheit net sag'n mag.
Pause. Thomas setzt sich auf die Bank vor den Ofen, legt die Arme auf die Knie und schaut vor sich hin, dann wendet er sich Mariann zu.
Thomas
bekümmert
Muatta, moanst d', du werst gar nimma?
Mariann
schlicht
Na, Thomas. Und es is g'scheiter aa, wenn's bald z' End geht. Schau, was is denn? Zu der Arbet taug i do nix mehr, und i mach dir grad Kosten.
Thomas
Daß du jetzt weg muaßt!
Mariann
Sag selber, was tua i do, wann i zu nix mehr nutz bin? Mi bekümmert's a so, daß du für'n Dokta so viel zahl'n muaßt.
Thomas
Wer red't von dem?
Mariann
Und mei Leich kost' di no mal a schöns Geld.
Thomas
Da braucht di nix reu'n.
Mariann
Wenn ma si do an jed'n Grosch'n hart verdeana muß.
Thomas
Es braucht di net reu'n; für wen soll denn i spar'n?
Mariann
in sich gekehrt
Ja - ja.
Pause. Thomas rückt mit derBank näher zu Mariann und nimmt ihre Hand in die seine.
Thomas
Wia lang san mir beinander g'wesen, alte Mariann?
Mariann
mit einem guten Lächeln
Auf Martini san's sieb'nadreißig Jahr g'wesen, und etla Woch'n davor hast du's Sach übernomma g'habt.
Thomas
Mit viel Schuld'n, han? Und hast di do traut mit mir?
Mariann
Und du di mit mir. I hab ja aa nix g'habt als a Paar feste Hand.
Thomas
Is viel Arbet g'wes'n umadum, und is letz g'wesen, aber do schö.
Mariann
Und hat mi koan Tag net g'reut.
Pause.
Thomas
Und jetzt willst d' geh?
Mariann
Woll'n? I wer halt aa net g'fragt.
Thomas
herzlich
Bist mei guate Kameradin g'wesen.
Mariann
Dös Zeugnis muaßt d' mir geb'n, gel?
Ihre Hände betrachtend.
G'arbet hab i allaweil gern.
Thomas
Und hast all's in Ordnung g'halt'n.
Mariann
still
All's?
Thomas
Was si halt'n laßt.
Stärker betonend.
Ja, Muatta.
Mariann
Aba jetzt werd's Zeit, daß i Feierabend mach.
Thomas
Und mi laßt d' alloa ...
Mariann
Vielleicht. . .
Stockt.
Vielleicht bist d' do net ganz alloa?
Thomas
finster
Laß s guat sei; über dös soll'n mir net red'n.
Mariann
I muaß red'n mit dir. I hab jetzt so viel Zeit zum Nachdenk'n, schaug - und da denk i mir oft, ob mir net aa schuld san, daß unser Madl schlecht worn is.
Thomas
Wia denn? Hat de bei uns a schlecht's Beispiel g'habt?
Mariann
Aba in d' Stadt hätt'n mir's net nei' lass'n soll'n.
Thomas
Hamm mir net lang gnua g'red't, und sie hat net änderst mög'n, und d'Bauernarbet is ihr allaweil z'hart g'wesen.
Mariann
Weil sie schwach g'wesen is; ja, Thomas, von kloan auf.
Thomas
Muaß sie desweg'n schlecht sei? Es gengan andere aa'r in d'Stadt und bleib'n brav.
Mariann
Mir wiss'n ja net, was sie so weit bracht hat und was an Madl unterkemma is.
Thomas
Da gibt's koan Ausred.
Mariann
Wenn s' aba jetzt von alle Türen wegg'jagt werd, muaß si do bei uns unterschliaf n derf'n . . .
Fängt bitterlich
zu weinen an.
Unser Kind!
Thomas
steht auf, geht zu Mariann und legt die Hand auf ihre
Schulter.
Laß's guat sei, Alte! Geh ... mach's net no ärger! Du bist a so von nix ändern krank wor'n.
Mariann
Wia dös in der Zeitung g'standen is, da is mir ei'wendig was g'rissen.
Thomas
Um de is wert!
Mariann
Muaßt d' net schimpfn!
Thomas
I schimpf net.
Mariann
I bin halt d'Muatta und hab s' auf d'Welt bracht und hat mir oft derbarmt, als a Kloana . . . und jetzt derbarmt s' mi erst recht.
Thomas
setzt sich wieder auf die Ofenbank, seufzt und schaut düster vor sich hin
Dös deriebt ma an die Kinder!
Mariann
I siech s' oft vor meiner, wia s' an Kopf ans Fenster druckt und einaschaugt zu mir, ob s' denn gar nirgends mehr dahoam is ... Wenn s' amal kummt und klopft drauß'n . . . bitt di gar schö ... tua s' net verjag'n!
Thomas
Mir san g'straft auf dera Welt!
Mariann
nach seiner Hand greifend
Tua s’ net verjag’n! I woaß g'wiß, sie kummt amal und suacht a Hilf.
Thomas
Ja ... sie kummt amal.
Mariann
Wenn sie an Weg suacht, der z'ruckführt aus dera Abscheulichkeit ... und sie hat's ja net von uns, daß s' schlecht bleib'n muaß ...
Thomas
Mariann ...
Mariann
Und wenn i nacha nimma da bin, muaßt du für mi denk'n, daß ...
Thomas
unterbricht sie
Mariann, i bin'net bloß weg'n deiner vom Feld hoamganga ...
Mariann
den Kopf langsam nach ihm wendend;
Was sagst d?
Thomas
I hab no weg'n was ändern hoam müass'n.
Mariann
erschreckend
Is scho wieder was ...?
Thomas
Brauchst net derschreck'n ... es is nix Neu's g'schehg'n.
Mariann
Aba mit da Leni was?
Thomas
Der Bürgermoasta hat mir de Botschaft bracht..., daß d'Leni hoamkimmt, . .
Mariann
Hoam? Zu uns?
Thomas
sehr gedrückt
Ja ...
Pause.
Mariann
zögernd und leise;
Thomas ... is 's was Schiach's?
Thomas
A Schand is, Muatta ...
Er sucht zitternd ihre Hand, mit unterdrücktem Schluchzen.
Sie kummt am Schub.
Beide schweigen.
Mariann
leise
Vata!
Thomas
Sieb'nadreiß'g Jahr hamm mir hart g'arbet und san rechtschaff'n g'wesen, und hat uns jeder de Ehr lass'n müass'n ... und jetzt, weil mir alt san, g'hör'n mir zu de schlecht'n Leut!
Mariann
Dös ko neamd mit Wahrheit sag'n ...
Thomas
Glaubst du, dös sag'n net alle?
Mariann
Sie wer'n's für an Unglück o'schaug'n.
Thomas
Na. Weil dös no koan troff'n hat. De sehg'n bloß d' Schand.
Mariann
Für de neamd was ko.
Thomas
Mir hamm s' aufzog'n; und lobt ma oan für guate Kinder, nacha färbt aa d'Schand ab. Es is net änderst.
Mariann
In unsern Haus is so richtig zuaganga wia'r in an jed'n.
Thomas
Wer siecht nei'?
Mariann
Na muaß unser Herrgott wiss'n, daß mir's Madl zum Guat'n hamm richt'n woll'n.
Thomas
Aba d'Leut wissen's net. Mögst du hör'n, was heut g'red't werd im ganzen Dorf?
Steht auf.
I net. Scho, wia mir's der g'sagt hat! Der Schandarm, bringt dei Madl daher! So dreckig hat er mir's hing'schmissen!
Mariann
vor sich hinsehend
Wann kummt s' denn?
Thomas
Woaß i?
Grimmig.
I hab scho g'moant, i paß ihr an Weg ab und hau s' z'ruck.
Mariann
ängstlich
Des sell derfst d' net!
Thomas
Hab koan Angst! Der Bürgermoasta hat mir's schon ausdeutscht, daß i 's Recht net hab.
Mariann
Wo soll s' denn hin, wann s' mir z'rucktreib'n? Soll'n s' fremde Leut mit Füaß'n tret'n? A Viech müaßt di derbarma.
Thomas geht an ein Fenster und schaut hinaus, Mariann den Rücken zukehrend.
Mariann
Wer soll s' denn auf n recht'n Weg bringa, wann's mir net tean?
Thomas
sich halb umkehrend
De liegt drin im Grab'n, und mir ziag'n s' nimma raus.
Mariann
Du woaßt dös net a so ... Ös Mannsbilder wißt's dös net a so. I hab's Deandl aufzog'n und hab ihr 's Bet'n g'lernt mit'n Red'n.
Thomas
Dös hat de all's vergess'n ...
Mariann
Auf a Zeit - vielleicht. Aba ganz vergißt sie so was net.
Kleine Pause.
Wia s' 's erst'mal mit da Prozession ganga is, da is sie hinter'n Pfarra daher trappelt, so fromm als wie de ändern. Und wia'r i ihr dös weiße Kleidl anzog'n hab, da fragt sie mi: Is wahr, Muatta, daß i mit'n Himmivata geh derf? Ja, sag i, Lenerl, heunt gehst amal mit'n Himmivata.
Thomas
ohne sich umzuwenden
Was woaß de no davo?
Mariann
Es fallt ihr scho wieda ei.
Thomas
aufgeregt das Fenster öffnend
Horch!
Mariann
sich aufrichtend
Kimmt 's Deandl?
Thomas
hat sich hinausgebeugt
Na. Es hat mi täuscht.
Mariann
O mei, Thomas! Dös is a schwäre Stund!
Thomas
setzt sich wieder
Wia'r uns der Bua tot aus'n Holz hoamtrag'n is wor'n, da hab i g'moant, es is uns des Ärgste g'schehg'n. Heut woaß i, daß dös a Leicht's war.
Mariann
Muaß 's Madl vo Prittlbach rüber?
Thomas
Ja. Z'erscht derf s' im Schubwag'n fahr'n.
Mariann
Nacha kummt s' jetzt den Weg daher, den s' so oft als Schuldeandl ganga is.
Thomas
Mit an Gendarm daneb'n, und vielleicht laff'n ihr d' Kinder nach.
Mariann
Wenn i aufsteh' kunnt, gang i ihr entgeg'n, und tat an Schandarm bitt'n, daß er s' mir laßt, und mir fand'n scho an Weg, wo uns neamd sehg'n kunnt.
Es klopft.
Thomas
Hat's net klopft?
Es klopft nochmal. Thomas steht auf,
mit gepreßter Stimme.
In Gott's Nam!
Er geht zur Türe, als diese
geöffnet wird und Kooperator Köckenberger auftritt. Köckenberger
spricht in singendem, salbungsvollem Ton.
Zweite Szene
Köckenberger
Gelobt sei Jesus Christus!
Thomas
In aller Ewigkeit, Amen.
Köckenberger
Hier ist eine Kranke, der ich Trost spenden soll?
Thomas
nach Mariann hin nickend
Dös is sie.
Köckenberger
Man hat mir aufgetragen, einen Besuch bei Euch zu machen.
Mariann
I dank halt schö, Hoch würden.
Thomas
San Sie g'wiß der neue Herr Koprata?
Köckenberger
Ja ... jawohl.
Zu Mariann
Dem Anscheine nach sind Sie in einem bedenklichen Zustande?
Thomas
Seit sechs Woch'n liegt sie und kummt allaweil mehra von der Kraft.
Mariann
Ma muaß nehma, was kummt.
Köckenberger
Man muß es mit christlicher Geduld hinnehmen, ja, und muß seine Gedanken vom Irdischen abwenden.
Mariann
Wollen S' Ihnen net setz'n, Hochwürden?
Thomas
bringt einen Stuhl und stellt ihn gegenüber von Mariann hin.
Köckenberger setzt sich und faltet die Hände im Schoß, die Finger
gerade ausgestreckt.
Köckenberger
Man muß seine Gedanken gänzlich abwenden von den Vergänglichkeiten dieses Lebens.
Mariann
demütig
So guat's geht ...
Köckenberger
eifrig
Nicht so gut es geht, sondern vollkommen. Sie müssen erfüllt sein von einer grenzenlosen Sehnsucht nach dem Jenseits ...
Thomas ist still hinausgegangen.
Dritte Szene
Mariann
demütig
Ja, Hochwürden.
Köckenberger
Sie müssen einsehen, daß die Güter dieser Welt nichts sind im Vergleich zu dem Schatze, den es zu erringen gilt.
Mariann
Mir liegt gor nix dro, daß i sterb'n muaß.
Köckenberger
Wie?
Mariann
I sag, daß i gern sterbat, wenn i ...
Köckenberger
eindringlich
Sie verstehen mich immer noch nicht. Sie sollen sagen, daß Ihre Seele nach jenen Herrlichkeiten dürstet.
Mariann
Es is bloß weg'n oan .. .
Köckenberger
unterbricht sie
Sie sollen mit einer wahren Ungeduld behaftet sein, dorthin zu gelangen.
Mariann
die Hände faltend
Ja ... Hochwürden.
Köckenberger
Denn nur so kommt man in den Zustand der heilsamsten Reue, und man soll sich auch ein Bild machen von der schrecklichen Pein, die den Unbußfertigen erwartet.
Mariann nickt ehrfürchtig, Köckenberger rückt eifrig auf dem Stuhle hin und her.
Diese ist über alle menschliche Vorstellung entsetzlich, und selbst der heftigste Schmerz, den man etwa hier erleiden muß, gibt uns keinen Begriff von jenen Qualen.
Mariann
Ja — Hochwürden.
Köckenberger
Jene Unglücklichen hören nichts als Heulen und Wehklagen; sie sehen nichts als Feuer, sie fühlen nichts als Feuer; sie befinden sich in einem Ozean von brennendem Pech.
Er nimmt die Brille ab und putzt sie.
Mariann
Derfat i Eahna net was frag'n?
Köckenberger
Fragen? Was wollen Sie fragen?
Mariann
Ob S' mir koan Trost net wiss'n in a Sach, de mi recht bekümmert. Es is weg'n unsern Kind.
Köckenberger
Eine Tochter?
Mariann
Ja. Hamm S' g'wiß scho was g'hört?
Köckenberger
zuckt die Achseln.
Und lauter Schlecht's.
Köckenberger
Man hat mir erzählt, daß sie in der Großstadt untergegangen ist.
Mariann
Untergegangen?
Schweigt und blickt vor sich hin.
Es is hart, an dös glaab'n. Für a Muatta gar z' hart.
Köckenberger
Es mag wohl bitter sein, aber in Ihrer Lage sollten Sie nicht mehr daran denken.
Mariann
Net dro denk'n! Wenn's Nacht werd und staad, hör i 's Madl ruaf'n, grad so, wia's als a Kind nach meiner g'schriean hat, i sollt eahm helfn, und i moa, i muaß auf und zu ihr geh.
Köckenberger
etwas unruhig
Ja - - ja.
Mariann
Wissen S', Hochwürden: wenn ma'r a Kind aufziagt, de Angst bleibt in oan.
Köckenberger
Das ist begreiflich, aber ich möchte Ihretwegen, daß wir uns zu jenen ändern Dingen wenden.
Mariann
Derf i 's Eahna net verzähl'n? Vielleicht sehg'n Sie do an Ausweg.
Köckenberger
beunruhigt
N — ja ...
Mariann
Sie san do a studierter Herr, bal S' aa no jung san.
Köckenberger
Wenn es Sie erleichtert: in Gottes Namen; aber wir hätten unsere Gedanken auf Besseres richten können ... und . . .
Mariann
ohne auf ihn zu hören
Leni hoaßt s', Magdalena. Und is als Kind recht liab g'wen und guat zum hab'n. Daß s' in der Schul net recht weiter kumma is, des seil is wahr.
Köckenberger
Und habt Ihr sie zur Frömmigkeit angehalten?
Mariann
Wia's der Brauch is bei uns, und is nix übersehg'n wor'n. Freili, wia s' herg'wachs'n is, hat s' koa Freud zu da Bauernarbet g'habt; sie is ihr z' hart g'wen.
Köckenberger
Das ist es ebe
Mariann
demütig
Wie moanen S', Hochwürden?
Köckenberger
Der Müßiggang ist die Quelle schlechter Begierden, sagt der heilige Bernhard.
Mariann
Sie is viel krank g'wesen von jung auf.
Köckenberger zuckt die Achseln.
Mir hamm s' zua'r a Nahterin in d' Lehr geb'n, und da hat sie si recht g'schickt zoagt, und späterszeit'n hat sie durchaus in d' Stadt nei" woll'n, weil halt da der Verdeanst größer waar.
Köckenberger
uninteressiert
M — mh.
Mariann
Und da is sie etliche Jahr drin g'wes'n, und mir hamm des Beste glaabt. Aba nacha hat sie an Mensch'n kenna g'lernt, der hat ihr's Heirat'n versprocha und hat s' um ihre paar Grosch'n bracht und hat s' verlass'n.
Köckenberger
wie oben
M - hm.
Mariann
Und nacha — — ja nacha muaß sie völlig an Verstand verlor'n hamm.
Köckenberger
Und hat sich der Sünde ergeben?
Mariann
Is ins Unglück kemma — ja.
Köckenberger
Sie ist vom Gericht gestraft worden?
Mariann
leise
Ja. Am Johannistag hat uns d' Nachbarin d' Zeitung bracht. Da is drin g'standen.
Köckenberger
Das sind die Folgen.
Mariann
Glaab'n Sie net, Hochwürden, daß mir s' wieder z'recht bring'n?
Köckenberger
Ich weiß nur, daß Unlauterkeit eine Hauptstraße ist zum ewigen Untergange.
Mariann
Weil i mir denk, unser Herrgott ko net so schnell ferti sei mit an Mensch'n, und es müaßt eahm selber 's Herz weh toa, wann er siecht, daß so a G'schöpf nimmer in d' Höh derf.
köckenberger
unmutig
Liebe Frau, ich kann Ihnen da gar nichts sagen. Wirklich nicht. Vor allem nichts, was Ihnen ein Trost wäre.
Mariann
Und i hätt'n braucht, wenn dös arme Madl jetzt daher kummt.
Köckenberger
aufmerksam geworden
Wer kommt?
Mariann
Ja, Hochwürden ... dös is uns aa no aufg'setzt. D' Leni werd heut no herbracht.
köckenberger
aufstehend
Heute? jetzt?
Mariann nickt. Kökkenberger nimmt seinen Hut.
Dann muß ich freilich gehen, und ich willlieber ein anderes Mal nachschauen.
Mariann
Weil d' Leni kummt?
Köckenberger
Es ist mit meinem Kleide nicht vereinbar, und ich weiß auch wirklich nicht
. Er ist zur Türe gegangen.
Also ein anderes Mal.
Ab.
Vierte Szene
Mariann
Da derf n Sie net bleib'n?
Sie sieht vor sich hin und
wischt in Gedanken verloren über die Decke. Thomas kommt leise herein, bleibt stehen und sieht ihr eine kurze Weile zu. Sie sieht auf und nickt ein paarmal ernst.
Thomas
Der is g'schwind aus'n Haus.
Mariann
Vor uns laff n d' Leut davo, Thomas.
Thomas
So? Der aa?
Mariann
Von sein G'wand hat er g'sagt, daß 's net da rei" paßt. Wenn ma da aa koa Derbarma find't!
Thomas
Arm gnua, wer's braucht! Na siecht er, wia rar dös is.
Kleine Pause.
D' Nachbarin hat mir grad g'sagt, daß sie nimmer kemma ko.
Mariann
Desweg'n?
Thomas
bitter
O na! Weil s' am Feld sei muaß, weil s' dahoam sei muaß. Und weil. . . und weil! Aba ja net desweg'n! Jed's Wort a Lug und so hi'g'red't, daß ma's g'wiß kennt.
Mariann
Dös hätt i net glaabt von ihr.
Thomas
Ja, moanst denn du, sie ruck'n net allsamt weg? So weit, daß eahna Bravheit net o'stößt an uns?
Mariann
Jetzt host d' gar neamd im Stall, und mitt'n in der Arndt?
Thomas
Ah was!
Mariann
Wann i nur auf kunnt!
Thomas
Sei froh, daß d' da herin hockst. Siehgst wenigstens net, wia si d' Leut z'sammricht'n zu dera Gaudi.
Mariann
Han?
Thomas
heftiger, 's
ganz Dorf is lebendi. Als wenn a G'witter am Himmel stand, fahren s' vom Feld eina mit halbe Fuhren. Daß sie's nur ja net versamma!
Mariann
ängstlich
Weg'n der Leni?
Thomas
Weg'n was sunst? So was muaß ma do sehg'n, wia's an Mensch'n schlecht geht! Derf's de braven Leut gruseln.
Mariann
Dös is aba net schö.
Thomas
Da bist g'stimmt, dös is des Allerschönst, wenn ma'r an ändern sei Schand siecht. Da ko ma sei Ehrbarkeit an d'Sunn außa hänga.
Er geht gegen das offene Fenster im Hintergrund zu, bleibt aber einige Schritte davor stehen und schaut hinaus.
Da! Brauchst d' net weit schaug'n, wia d' Weiberleut am Zaun beinand stengan.
Mariann
Woher sie's no wiss'n?
Thomas
Frag an Bürgermoasta!
Gegen das Fenster zu redend.
Ja! Gafft's no her und schlägt's d' Hand z'samm! Es is scho a so, daß beim Paulimann d' Bagaschi dahoam is ...
Er tritt zurück und setzt sieb auf die Ofenbank.
Waar i a großer Bauer, na hätt ma's vielleicht hoamlicher mach'n könna, aba so derf ma de Leut a Freud lass'n.
Mariann
sehr ängstlich
Wenn nur 's Ärgste vorbei waar!
Thomas
Da gibt's koa Vorbei. Mirsannix mehr, dös is gar wor'n.
Mariann
schwach
I hab so Angst!
Thomas
stützt den Kopf in die Hände
No nimma naus geh müass'n, und 's Dach über oan ei'fall'n.
Mariann
leise
Thomas!
Thomas
Han?
Mariann
Geh, zünd an Wachsstock o und les mir was für!
Thomas
erschrocken aufspringend
Fehlt's so weit, Muatta?
Mariann
sehr schwach
I woaß net... so Angst hab i.
Thomas
Und i muaß di no derschreck'n!
Mariann
Ja no ... du ko'st ja aa nix dafür.
Thomas ist zu dem Wandschrank gegangen und holt daraus einen Wachsstock, ein Gebetbuch und seine Brille. Er stellt den Wachsstock auf den kleinen Tisch neben Mariann, zündet ihn an und setzt sich auf den Stuhl, auf dem Köckenberger gesessen war, und seh lägt das Gebetbuch auf.
Thomas
Was soll i les'n, Muatta?
Mariann
I hab's a so ei'g'mirkt... Gebet in einer schweren Stund ...
Thomas
schlägt auf und liest nun langsam und stockend vor
Allergütigster Herr und liebreichster Heiland, in meiner tiefsten Not rufe ich zu dir, o Herr, daß du dich in deiner unendlichen Liebe erbarmen mögest... mögest.
Mariann
hat die Hände gefaltet
Erbarme dich unser ...
Thomas
Und mich stärkest in dieser schweren Stunde meines Lebens ... meine Seele ist traurig in mir und will sich nicht trösten lassen ... lassen ...
Er horcht auf, da von ferne her Lärm zu vernehmen ist, der näher kommt.
Gram und Trübsal wollen mich übermannen, und bitter sind die Leiden, die ich erdulde. Hilf mir, o Herr, nach deiner Barmherzigkeit ...
Der Lärm kommt immer näher. Man hört Schreien und Pfeifen.
Thomas
steht auf, gepreßt
Jessas - Maria!
Mariann
greift nach seiner Hand
Bleib bei mir!
Thomas
Muatta — dös geht uns o ...
Er legt das Euch weg und löscht das Licht aus und steht regungslos, nach dem Fenster hinsehend. Der Lärm ist nun ganz nahe. Man hört Rufe
D' Paulimann Leni! Schaugt's hü D' Paulimann Leni!
Dazwischen Lachen, Pfeifen, Schreien. Die Türe wird geöffnet, und herein tritt Leni, gefolgt von einem Gendarm. Leni bleibt stehen und heftet die Blicke auf den Boden. Sie trägt schlechte städtische Kleidung, einen Strohhut mit einer großen, geschmacklosen Bandschleife, in der Hand eine kleine Tasche. Ihr Gesicht ist gerötet, und ihre Zeugstiefelchen sind stark verstaubt. Thomas tritt ein paar Schritte vor und sieht sie finster an.
Fünfte Szene
Gendarm
Sie sind der Gütler Thomas Mayr?
Thomas
Ja.
Gendarm
Ich muß auf Befehl die minderjährige Magdalena Mayr hierher bringen und selbe Ihnen übergeben.
Ab.
Sechste Szene
Thomas
tritt näher an Leni heran, losbrechend
Bist d' da - du?
Faßt sie am Arm.
Kimmst du so hoam? Du!
Leni
sich losmachend, wehleidig
N ... no!
Marjann
mütterlich
Leni!
Außen Stimmengewirr. Man sieht Weiber und Kinder, die sich an die Fenster drängen und hört Worte
Do steht s'! Schau hi, do steht s'!
Thomas geht an das offene Fenster und schreit hinaus.
Thomas
Habt's ös da was zum gaff n? Macht's, daß weiter kemmt's, oder i hau enk mit da Goaßl weg!
Einen Augenblick Stille, dann lautes Geschrei und Gelächter.
Leni
stampft mit dem Fuße auf und dreht sich gegen das Fenster zu
Nein! So was G'scheert's!
Die Leute entfernen sich, es wird still.
Mariann
hat während der ganzen Zeit unverwandt Leni angesehen
Leni!
Leni
trotzig
Is ja wahr! So a g'scheerte Bande!
Mariann
Geh her zu mir!
Thomas
faßt Leni hart am Arm
Host d' net g'hört?
Leni
schmollend und wehleidig
Laß mi do geh!
Mariann
beschwichtigend
Geh, Thomas!
Thomas
sehr barsch zu Leni
Zu da Muatta gehst hi, und tua den Huat runter - - oder i hilf dir.
Leni
schmollend
I tua'n scho runter.
Sie nimmt den Hut ab und nestelt an ihrem Haar. Der Hut fällt auf den Boden, und Thomas stößt ihn mit einem Fußtritt unter die Ofenbank. Dann geht er langsam hinaus.
Siebente Szene
Leni
N ... no! Mein Huat!
Sie hebt ihn auf und putzt ihn ab.
Mariann
Kumm zu mir her!
Leni
sich trotzig nähernd
Is ja wahr! Was braucht er denn mit mein Sach a so umgeh und glei mit'n Fuaß stössen!
Sie ist langsam zu Mariann herangekommen und richtet an ihrem Hut. Mariann sieht sie bekümmert an.
Mariann
gütig
Madl, is dir recht schlecht ganga?
Leni
Wenn d' Leut so ordinär san! Was geht's denn überhaupts de Leut o?
Mariann
Net dös! Ob's dir in da Stadt drin schlecht ganga is?
Leni
Besser scho als wia do, wenn s' oan nachlaffa und schrei'n ...
Mariann
müde
Du redst allaweil vo dem! Geh, sitz di her zu mir!
Leni
Warum denn?
Mariann
Weil i red'n muaß mit dir, schau!
Leni setzt sich zögernd auf den Stuhl neben Mariann.
Mariann
faßt sie bei der Hand: Madl, was hascht mir denn g'macht?
Leni
schmollend
Jetzt schimpf mi net du aa!
Mariann
I schimpf di net. Helf'n möcht i dir, daß d' wieder rechtschaffn werst...
Leni
schnupft auf und schaut zur Seite, dann trotzig
I hab no neamd nix g'stohl'n ...
Mariann
Du muaßt wieder zu da Reinlichkeit kemma und arbet'n und dei Brot redli verdeana.
Leni
Dös ko neamd sag'n, daß i was g'numma hab.
Mariann
streichelt ihr die Hand
Du vastehst mi scho, Madl. Un du derbarmst mi ja so viel! Wenn i di o'schau, ziagt's mir's Herz z'samm ...
Leni
die Achseln rückend
N ... no!
Mariann
I siech di vor meiner, wia's d' no dös kloane Schuldeandl warst ... und wenn i aa net all's vasteh, was d' to host... i hab koan Zorn über di... na, g'wiß net, Madl... grad Mitleid.
Leni
halb weinerlich
Was host d' denn allaweil?
Mariann
Weil i Tag und Nacht denk'n muaß, wia du so weit kemma bist ...
Kleine Pause.
Gel, des hat di so ausanand bracht, wia di der seil in Stich hat lass'n ...
Leni
lebhafter
Der Schuft!
Mariann
Und wia'r a dir dei Geld g'numma hat.
Leni
Der gemeine Mensch!
Ausspuckend.
Pfui Teifi!
Mariann
Aba schau, wenn di dös aa recht runterkümmert hat, nacha ...
Leni
lebhaft unterbrechend
Überhaupt's g'hört er ins Zuchthaus, und dös hat mir a feiner Herr g'sagt, der wo sie auskennt auf de Gerichtssach'n.
Hochdeutsch nachahmend
Indem es ein Betrug ist, hat er g'sagt.
Mariann
Freili muaß dös a schlechta Mensch g'wes'n sei, aba...
Leni
Weil er mir mei Sparkassabüachl g'nomma hat, damit daß er's aufhebt, und weil's uns mitanand g'hört, hat er g'sagt, wann mir heiret'n.
Mariann
streichelt ihr wieder gütig die Hand
Hast dir was derspart g'habt, Madl?
Leni
Dreiadachz'g Mark und zwanz'g Pfenning san's g'we-sen, und i hab's unterschreib'n müass'n, daß eahm dös Geld g'hört, weil's überall so is, hat er g'sagt, wann ma heiret.
Mariann
Da bist d' arm dro g'wesen.
Leni
Und ... und nacha hat er 's Geld rausg'numma und is durchbrennt.
Wieder hochdeutsch
Und das ist ein schwerer Betrug, hat der Herr g'sagt... nach dem Gesetze.
Mariann
Aba schau, wann di dös aa recht runterkümmert hat... dös, was d" nacha to host, hat nix besser g'macht.
Leni
Weil mi überhaupt's nix mehr g'freut hot.
Mariann
Hättst d' no richtig weiter g'arbet, da hättst ehn-der drauf vergess'n.
Leni
Zu was soll ma denn arbet'n, wenn oan' 's Geld auf de Weis g'numma werd?
Mariann
Oder waarst d' hoamganga!
Leni
Was hätt i denn dahoam to?
Mariann
Muaß jetzt aa sei...
Leni schaut verdrossen zu Boden.
Aba no, was vorbei is, könna mir nimma änderst macha, und du muaßt halt tracht'n, daß jetzt wieda all's recht werd.
Leni
Geh, fängst d' scho wieda o!
Mariann
I hab nimma viel Zeit, und mir müass'n do über dös red'n.
Leni
schmollend
Da soll ma hoam geh, wenn ma nix als wia g'schimpft werd.
Mariann
Koa unrecht's Wort kriagst d' von mir,
Leni
Ja ... und d' Leut laff'n oan' nach, als wann i was g'stohl'n hätt. Überhaupt's, was geht's denn de o?
Mariann
Fang net wieda von dem o!
Leni
Na! De geht's alle mitanand nix o! Was brauch'n mir de Nama geb'n und a so nachi schrei'n?
Mariann
Moanst d' net,
für
uns is no ärger g'wesen? ...
Leni
schweigt trotzig und schnupft auf.
Für dein brav'n Vata, der si seiner Lebtag g'schund'n und plagt hat, und hat nia nix Unrecht's to?
Leni
Für was braucht er denn nacha mein Huat so umanand schmeiß'n?
Mariann stützt müde den Kopf mit der Hand und schaut vor sich hin. Kleine Pause.
Leni
I hab'n aa zahl'n müass'n ...
Kleine Pause.
Mariann
Host du über dös nachdenkt, was jetzt sei werd?
Leni
N ... na.
Mariann
Was d' jetzt o'fanga willst?
Leni
I waar net hoam kemma, wenn i net müass'n hätt...
Mariann
Daß d' nimma in d'Stadt nei darfst, dös muaßt d' do selber wiss'n?
Leni
Halt auf a paar Jahr net.
Mariann
dringend
Deiner Lebtag nimma, Madl; dös muaß aus sei, und du derfst koan Gedank'n mehr an dös hamm. Es handelt sie um dös, daß du g'sund werst! Daß d' wieder
sauber werst!
Leni
weinerlich
Gel, na sagst d', du schimpfst net.
Mariann
wieder milder
Wia mir de Botschaft von deiner Straf kriagt hamm, bin i krank wor'n, und siehgst scho, wia'r i dro bin.
Leni
weinerlich
Du werst scho wieder g'sund.
Mariann
Na, dös wer i nimmer. Aber i sag's net desweg'n, daß i dir's vorhält. I hab an Vata bitt, er soll di dahoam lass'n, wenn i nimmer da bin.
Leni sieht zur Seite und schweigt.
Mariann
Und di bitt i, daß d' dahoam bleibst und brav werst. Dös muaßt ma auf d'Hand vasprech'n.
Leni
Anderne, wo's viel ärger treib'n, san net g'straft wor'n.
Mariann
dringender
Madl, vasprich mir's . . . es is ja bloß weg'n deiner ...
Leni
I ko aba de Bauernarbet gar it.
Mariann
De lernt si scho, wenn ma den recht'n Fleiß dazua hat, und da Vata geht dir scho an d'Hand.
Leni
Du host aba selber allaweil g'sagt, daß i z' schwach bin dazua.
Mariann
seufzend'.
I wollt, i hätt's nia g'sagt! ...
Dringend
Siehgst denn net, daß d' wieder rechtschaff'n wern muaßt? Bleib dahoam, arbet, vergiß all's, was amal unsauber g'wesen is ... da ... gib mir d'Hand drauf!
Sie hält ihre Hand hin. Leni legt die ihrige zögernd hinein. Sie sieht dabei zu Boden und schnupft ein paarmal auf.
Mariann
Halt dei Versprech'n ... vielleicht werd's no recht!
Leni
J ... ja.
Mariann
zärtlich
Ruck näher her zu mir!
Leni
I bin ja do!
Mariann
Ganz her!
Leni rückt mit ihrem Stuhl ein paarmal vor, so daß sie nun dicht bei Mariann sitzt.
Mariann
nimmt sie bei der Hand, sehr gütig
Woaßt d' no, wia's d' den erst'n Winta in d'Schul ganga bist, nach Prittlbach, und du bist so a kloana Zwazzel g'wesen ... und amal hat's so g'sturmt und g'schneit, daß i Angst kriagt hab, und i bin dir entgeg'n ganga, und beim Leitner bist d' hinter an Holzschupf n g'stand'n und hast grad g'woant. Und da hab i g'sagt: Lenerl, tuast di fürcht'n? Und du host g'sagt: Jetzt nimma, weil i bei dir bin. Woaßt d' dös no?
Leni
Dös is scho so lang her!
Mariann
Aba g'sagt hast d'as, und heut kunnt'st d'as wieder sag'n.
Leni
verständnislos
Was?
Mariann
Daß d' di nimmer furchst, weil's d' bei mir bist.
Leni
I furcht mi ja net.
Kleine Pause. Mariann streichelt in Gedanken verloren Lenis Hand. Dann spricht sie wieder leise und gütig.
Mariann
Und woaßt d' no, wia dei Schulkameradin, de kloane Kramerlis'l, g'storb'n is, und i bin mit dir ins Haus nüber, und d'Lis'l is in Sarg drinna g'leg'n. Woaßt d' dös no?
Leni
Geh, was du für alte G'schicht'n daher bringst! ...
Mariann
Und da hab i dir verzählt, daß d'Lis'l jetzt nimma in d'Schul geht, sondern als a Engel singa derf, und da host du g'sagt: »Dös möcht i aa.«
Leni
ganz teilnahmslos
So?
Mariann
I bin so derschrock'n, weil i mir ei'bild't hab, wia dös waar, wann du so im Sarg drinna liegetst mit an wachs-gelb'n G'sichtl ...
Verloren vor sich hinblickend.
Selbigs Mal waar mir dös als des größte Unglück fürkemma ... I hab wohl net g'wußt, daß so was des beste Glück sei kunnt...
Leni
Was für a Glück?
Mariann
sich besinnend
Na ... na, Madl! I wünsch dir nix Schlecht's. Muaßt d'aba oft z'ruck denk'n an Kinderzeit'n und an dei alte Muatta ...
Leni
I denk scho dro ...
Mariann
Woaßt d'as no, wia'r i dir 's erstmal Pfüad Good g'sagt hab? 's erstmal, wia's d' fürt bist... und ... i hab dir an Seg'n geb'n? ...
Sie führt ihn Hand an Lenis Stirne und macht ihr mit dem Daumen das Zeichen des Kreuzes auf Stirne, Mund und Ernst, dabei die Worte sprechend
Im Namen des Vaters und des Sohnes und des Heiligen Geistes — Amen!
Leni blickt stumpfsinnig zur Seite. Da bedeckt Mariann ihr Gesicht mit der Hand und fängt lautlos und bitterlich zu weinen an.
Vorhang
Zweiter Aufzug
Erste Szene
Stube wie im ersten Aufzug. Der Lehnstuhl, in dem Mariann gesessen hat, ist an die linke Wand gerückt. Leni steht vor einem kleinen Spiegel, der an der linken Wand hängt und richtet an dem schwarzen Bande, das sie um den Hals trägt. Sie betrachtet sich im Spiegel und dreht sich nach der Seite. Thomas tritt von links ein, und Leni geht verlegen und hastig vom Spiegel weg.
Thomas
knurrig
Host du koa Arbet in der Küchel?
Leni
I muaß zum Ess'n herricht'n.
Thomas
Vor'm Spiegel da?
Leni
Weil ma 's Band aufganga is.
Lern geht an den Tisch, sie holt aus der Schublade Löffel heraus und legt sie neben die Teller, die dort stehen.
Thomas
Im Stall war i drauß; host d' wieder an Barren net ausg'wasch'n ...
Leni
I geh nacha umi.
Thomas
Nach jeder Mahlzeit g'hört a putzt, und so will i's hamm. Net, daß i jed'n Tag red'n muaß.
Leni
I putz'n nacha glei, wenn i in der Küchel ferti bin; i gib ma g'wiß de größt Müah' ...
Thomas
Und wenn i net nachschau, g'schiecht nix.
Leni
Hat d' Mangin aa g'sagt, daß i mi ganz guat g'stell zu der Arbet...
Thomas
De muaß 's ja wiss'n ...
Er stellt sich an ein Fenster und schaut hinaus. Kleine Pause.
Leni
Vata, der Jud Männlein hat dir nachg'fragt.
Thomas
ohne sich umzuwenden
So?
Leni
Und der Bürgermoasta is aa da g'wesen.
Thomas
sich umdrehend
Was will denn der?
Leni
Er hat mir nix g'sagt, als daß er wieder herkummt, und g'fragt hat a, wann du hoamkimmst.
Thomas
Mö'cht i scho wiss'n, was der bei mir suacht.
Leni
gesprächig
Wia'r a bei uns außi ganga is, hab i g'sehg'n, daß er zum Wirtshaus ummi is, und da is der Männlein heraußd g'stand'n, und g'rad gnädi hamm sie's mitanand g'habt, und zu uns hamm s' herg'sch'augt.
Thomas
hat sich wieder dem Fenster zugekehrt
Was geht denn dös mi o?
Pause
Leni
Vata, gel, der Männlein möcht' dir gern abkaff'n?
Thomas
Ko scho sei.
Leni
zaghaft
Dös sollt'st aba net toa.
Thomas
sich umwendend
Han?
Leni
Dös sollt'st net toa, daß d' 's Sach hergibst.
Thomas
Z'weg'n was net?
Leni
I moan halt, es is do g'scheiter, du b'haltst äs.
Thomas
Weil di du so guat zu der Arbet schickst?
Leni
I gib ma ja g'wiß de größt Müah ...
Thomas
Dös siech i. Jetzt is d'Muatta vier Woch'n tot, und wia schaugt's denn aus bei uns? Moanst d', i hab koane Aug'n?
Leni
Wo schaugt's denn so aus?
Thomas
Du merkst äs freili net. Und nacha de Dreingab', dass i a Taglöhnerin neb'n deiner hamm muaß, de di o'lerna soll.
Leni
Sie lobt mi aba recht und sagt, daß i's jetzt scho ganz guat ko.
Thomas
Von dem G'red hab' i was!
Leni
Derfst g'wiß glaab'n, daß i gern mei Arbet tua . ..
Thomas
Geh, hör ma'r auf! A Stund im Tag tuast d' so, als wenn's d' an Eifer hältst, und in der nächst'n hockst wieda umanand, oder stehst vor'n Spiagl ...
Leni
Nach und nach lern i's scho bessa ...
Thomas
Wenn 's Sach amal hi is. Na! Dös G'red' hat koa Hoamat.
Leni
weinerlich
Was is denn nacha, wenn's d' verkaffst?
Thomas
setzt sich auf die Ofenbank
Ja ... was is nacha? So is nix, und änderst werd' s nix ...
Pause.
Wenn ma mit dir red'n kunnt, und wenn's an Wert hätt, na saget i, genga ma fürt von da ... wo änderst hi, wo di neamd kennt ... und neamd was woaß von dir ...
Leni
N ... no!
Thomas
Aba mit dir was Neu's o'fanga, dös waar ja no schlechta, und so weit kunnt'n ma gar net geh, daß uns 's G'red net nachlaffet.
Leni
Gar so arg sollt'st d'as na do net macha!
Thomas
Net, moanst d'? I sollt's halt a so o'schaug'n kinna wia du und nix g'spür'n vo dem, was um mi rum is!
Leni
D'Muatta hat's aa g'sagt.
Thomas schaut finster vor sich hin und schweigt.
Leni
Am letzt'n Tag hat sie's no g'sagt, daß ma dös vergess'n muaß, was amal g'wesen is ...
Thomas
Vergess'n ... ja ...
Leni
Und daß ma sunst net auf a Neu's o'fanga ko, wenn ma dös Alte net guat sei laßt...
Thomas
Dös host d' dir g'merkt, aba sunst net recht viel.
Leni
Und daß mir beinand bleib'n soll'n, hat s' g'sagt und hat di no so bitt'.
Thomas
aufstehend
Ja ... glaabst denn du, wenn dös net waar ... wenn i net an d'Muatta denkat... glaabst du, i gab de Leut da an Hanswurst'n ab?
Er ist nach vorn gegangen.
Tag für Tag an Verdruß und mi versteck'n, als wenn i was g'stohl'n hätt' oder an jed'n was schuldi waar? Na!
Er wendet sich gegen Leni
Und wenn's d'Muatta net g'wißt hätt... und wenn's i net wisset, daß du im Dreck derstickst, wenn i di weg laß ...
Leni
I will aba gar net weg.
Thomas
mißtrauisch
Daß du jetzt auf oamal vom Bleib'n redt'st? De erst Zeit host d' allaweil fürt woll'n und host d' soviel von deiner Nahterei g'sagt?
Leni
Selbig's Mal hab i's halt aa net so überdenkt.
Thomas
Hätt' ma di no um Gott's Wiü'n bitt'n müass'n, daß d' net davolaffst und dahoam bleibst?
Leni
Jetzt vasteh i's halt bessa ...
Thomas
Was vastehst d'?
Leni
Halt, daß halt, daß 's do g'scheiter is, wenn i do bin und arbet ...
Thomas
trocken
So an Ei'sehg'n host du auf oamal?
Leni
Und weil d'Muatta g'sagt hat, i sollt di net alloa lass'n.
Thomas
So?
Leni
weinerlich
Und jetzt is all's für nix, und du willst verkaff'n!
Thomas
Mach du dei Arbet und mach 's richti, und dös ander is mei Sach!
Zweite Szene
 Lenz tritt ein, hemdärmelig, eine alte Soldatenmütze in der Hand.
Leni
Guat Morg'n, Paulimann!
Thomas
Was gibt's?
Lenz
I hab dir sag'n woll'n, daß i mit'n Möslacker firti bin, und i möcht wiss'n, was d' jetzt o'schaffst.
Leni
die Lenz freundlich zugelacht hat, ohne daß dieser darauf achtet
Guat Morg'n, Lenz!
Lenz
trocken und ohne nach ihr hinzusehen
Guat'n Morg'n!
Wieder zu Thomas
I hätt ma denkt, ob i net an der Bachleit'n ackern soll?
Thomas
überlegend
An der Bachleit'n?
Lenz
Wenn's d' an Rogg'n o'bau'n willst, waar's jetzt g'rad recht und gang leicht.
Thomas
I ho's selber toa woll'n, aba wann du scho firti bist, is mir aa recht.
Lenz
Du kunnt'st halt vierzehn Tag mit der Saat wart'n, dass si der Bod'n setzat.
Thomas
Also pack du's o!
Leni
wieder sehr freundlich: Lenz,
mir ess'n fei bald! Net, dass d' wieda z' spat kimmst.
Lenz
gleichmütig
Is scho recht.
Zu Thomas
Nacha fang i heunt namittag o damit.
Er geht zur Türe und bleibt stehen.
Was i sag'n will, wia lang brauchst du mi no, Paulimann?
Thomas
Warum? Willst du scho wieda geh?
Lenz
Ja — woll'n ... A guate Holzarbet kunnt i kriag'n ... und du host mi ja g'rad zu der Aushilf g'numma.
Leni
lebhaft
Geh! Du ko'st do leicht bleib'n bei ins, wann di da Vata net gern her laßt! Host äs vielleicht net scho?
Lenz
ohne im geringsten auf sie zu achten, zu Thomas
Woaßt scho: a guate Akkordarbet laßt ma net gern aus.
Thomas
Ja - ja.
Lenz
Und i kunnt mir a schön's Geld dabei verdeana.
Thomas
etwas bitter
Und gar z' gern bist d' wohl net da.
Lenz
dreht seine Mütze verlegen in der Hand
Warum? Mir hat nia nix g'fehlt bei dir.
Thomas
resigniert: l
vasteh di scho.
Lenz
Wiaso?
Thomas
I vasteh di guat.
Leni
Geh, wem d' do net so eig'nsinnig sei! Bleib halt bei ins, wann ma dir all's tuat.
Lenz schenkt ihr keinen Blick.
Thomas
Mir waar's recht, wenn's d' da g'wesen waarst, weil i d' Dreschmaschin kriag.
Lenz
Daß i halt scho mit'n Eichmüller g'red't hab ...
Thomas
Ja no, i ko di net aufhalt'n.
Lenz
Weil i scho g'red't hab damit...
Leni
sehr freundlich
Überleg da's no ...
Lenz öffnet die Türe.
Leni
Und 's Ess'n is fei bald firti!
Lenz
M - hm - ja ...
Ab.
Dritte Szene
Leni
eifrig
Sollt'st 'n do bessa zuared'n, daß er bleibt!
Thomas
Da is nix mehr zum red'n!
Leni
Ma legt eahm do nix in Weg! Daß er so g'schwind fürt will?
Thomas
Er werd's scho wiss'n.
Leni
Weil du g'sagt host, du vastehst'n guat?
Thomas
Daß er in dem Haus net sei mag. Dös is net hart zum vasteh' ...
Leni
Warum denn, bal er's ganz scho hot?
Thomas
Wia oft glaabst d' denn, daß der o'g'red't werd um dös? Was er hör'n muaß von seine Kameraden?
Leni
Ja no!
Thomas
Und de altern Leut wern eahm aa an Deuter geb'n.
Leni
Was braucht er si um dös z' kümmern?
Thomas
Es is net a jed's a so, daß eahm all's gleich is.
Leni
Du host halt no net richti mit eahm g'red't.
Thomas
Daß di du um dös bekümmerst?
Leni
Weil du scho oft g'sagt host, daß er gar so fleißi is und si auskennt mit der Arbet.
Thomas
Na werd's aa wahr sei.
Leni
Und g'sagt host, daß ma net leicht amal so an braven und nüachtern Mensch'n auftrifft. .
Thomas
I schick'n ja net fürt. Oda glaabst du, i freu mi auf de Zeit, wo i mit dir alloa haus'n muaß?
Leni schweigt.
Wenn i den ganz'n Tag von dahoam weg bin, dös ko ja schö wern.
Leni
Vielleicht moant er, du verkaffst scho bald ...
Thomas
Ah was!
Leni
Dös werd überall'n verzählt. Hat's ja mir aa d' Mangin g'sagt.
Thomas
Dös is des wenig'st.
Leni
Er werd halt moana, daß er do net bleib'n ko.
Thomas
Und i moan, du werst jetzt in da Küchel was z' toa hamm.
Leni
I geh scho.
Macht ein paar Schritte zur linken Türe hin, und bleibt wieder stehen; einschmeichelnd
Waar's net g'scheiter, du redest mit eahm, wenn du 's Anwes'n b'halt'n willst?
Thomas
Na! Dös waar net g'scheiter.
Leni
Daß er si do auskennat!
Thomas
Wann di no du auskenna tatst!
Leni
I sag's ja bloß weg'n deiner, weil's d' do z' alt bist, dass d' de ganz Arbet alloa machst.
Thomas
A solchene Sorg' host du um mi? Dös hätt' dir ehnder ei'fall'n soll'n.
Leni
Und wenn's d' a richtige Hilf host, nacha b'halt'st aa 's Sach liaba.
Thomas
Jetzt geh amal zua!
Leni geht zögernd bis zur Türe und wendet sich hier wieder um.
Leni
Und ...
Stockt.
Und ... nacha kunnt ja dös aa 'r amal sei ...
Thomas
Was?
Leni
verschämt
No ... daß i heirat.
Thomas
verächtlich
Du?
Leni
Warum nacha net?
Thomas
Wen denn? Wer sollt denn di heirat'n? A Handwerksbursch? Und dag'rad der schlechtast!
Leni
weinerlich
N... no! Jetzt redt st scho wieda aso mit mir!
Thomas
nähert sich ihr
Bist du so dumm, oda g'stellst di aso?
Leni blickt zu Boden und zupft an ihrem Rock.
Wbaßt du net, daß du allssammete verspielt host?
Leni
I tua do nix mehr!
Thomas
Is dir dös nia ei'g'fall'n, wia's d' dös Leb'n g'fuhrt host? Daß 's aus is? Daß 's nix mehr gibt für di?
Leni
D'Muatta hat ganz änderst g'red't...
Thomas
Aba von dem nix, daß d'Leut dir z'liab all's vergess'n. Wenn wirkli a Mensch so hirnrissig waar, oder so schlecht, daß er di heirat'n möcht', glaabst denn du, ma lasset enk in d'Kirch eini?
Leni
De hätt'n aa net 's Recht dazua.
Thomas
Host d'scho viel über dös nachdenkt? Wia's d' mit da Musi ausruckst und de ganz Freundschaft ei'lad'st? Woaßt d' scho an Hochzeita?
Leni
Ma derf do red'n ...
Thomas
Dappig red'n — ja.
Er setzt sich auf die Ofenbank.
Ah mei! Es is scho bald a so, wia d'Muatta g'sagt hat, daß mehra dei Dummheit schuld war als wia d' Schlechtigkeit.
Leni
hat etliche Male aufgeschnupft
Wenn ma si de g roßt Müah gibt und muaß si allaweil des Alte fürhalt'n lass'n.
Thomas
Du host äs scho hinter deiner? Gel?
Winkt ihr mit der Hand ab.
Geh zua, und mach dei Sach' und traam vo was ändern!
Leni geht ab und zieht die Türe zögernd hinter sich zu.
Vierte Szene
Thomas
schaut vor sich hin, und schüttelt manchmal den Kopf
Na! ... Mögst d'as net glaab'n! De woaß heut no net, was s' to hat...
Es klopft.
Herein!
Fünfte Szene
Bürgermeister Lechner tritt von rechts ein, mit dem Hut auf dem Kopfe. Thomas bleibt sitzen.
Bürgermeister
S' Good, Paulimann!
Thomas
S' Good.
Bürgermeister
I bin heut scho amal da g'wesen und hab dir nachg'fragt.
Thomas
gleichgültig
So?
Bürgermeister
Weil i mit dir a weni was z' red'n hätt. Host d'Zeit?
Thomas
immer kurz angebunden
Vo mir aus red!
Bürgermeister
nimmt den Hut ab und behält ihn in der Hand
I kimm net als Bürgermoasta, i kimm g'rad aso ...
Er setzt sich
auf einen Stuhl, der neben der Türe steht.
Bal's dir recht is, sitz I mi a weng nieder.
Thomas
Meinetweg'n ...
Bürgermeister
Wie geht's dir nacha? Bist d' halt recht verlass'n?
Thomas
M - hm.
Bürgermeister
Es is a Kreuz, oaschichtig sei, wenn ma'r amal älter werd und ma is dös halt gar nimmer g'wohnt.
Thomas schaut ihn an, ohne zu antworten. Pause.
Bürgermeister
Es hat uns allesamt recht bedauert, daß die Mariann so bald sterb'n hat müass'n. Allesamt im Dorf.
Thomas
So?
Bürgermeister
Weil ma des Weibet's gern g'habt hat; is scho wahr.
Thomas
Du aa?
Bürgermeister
I mach da koan Ausnahm; derfst d'as g'wiß glaab'n.
Thomas
I ho's g'merkt.
Bürgermeister
ohne darauf zu hören
Weil a jeder sagt, daß sie a brav's Leut g'wes'n is, und a richtig's Leut, und a fleißige Hauserin. Durchaus!
Thomas
Sagt's ös?
Bürgermeister
Alle mitanand. Und red't ihr neamd was Schlecht's nach weg'n dera Sach.
Thomas
feindselig, aber ruhig
Was für a Sach?
Bürgermeister
No - woaßt d' scho. Aba ma denkt si, dös hätt an ändern aa passiern könna, und is scho de best'n Leut' g'schehg'n, daß amal a Kind net g'rat.
Thomas
Was geht's denn enk o?
Bürgermeister
Z'letzt g'hört ma do z'samm in der Gmoa und bekümmert si um dös, wann den ander'n an Unglück trifft.
Thomas
höhnisch: A —
freili!
Bürgermeister
Und nacha red't ma halt; net? Weil ma'f a Derbarmnis hat mit enk. Mit dir aa. Darfst d'as g'wiß glaab'n, Paulimann!
Thomas
Bist du desweg'n kemma?
Bürgermeister
Han?
Thomas
Ob du desweg'n kemma bist, daß d' mir dei Derbarmnis da eina bringst in d' Stub'n? De ko'st drauß'd lassen. I mag 's net.
Bürgermeister
Du host an Zorn auf mi, aba da host du koan Ursach dazua.
Thomas
bitter
Na! Gar koane.
Bürgermeister
Was i als Bürgermoasta hab toa müass'n, des seil derfst d' mir net für übl hamm ... dös waar des gleiche g'wen bei an jed'n.
Thomas
Net wahr is.
Bürgermeister
begütigend
Ja no, über dös kon i net streit'n, Paulimann. Aber des seil muaßt du glaab'n, i derf als Bürgermoasta net hantier'n, wia'r i mog. I ho meine Vorschrift'n.
Thomas
winkt verächtlich mit der Hand ab
Hör' ma'r auf!
Bürgermeister
Du werst äs net änderst wiss'n.
Thomas
I woaß, daß ma's so und a so macha ko.
Bürgermeister
Dös is! Dös hat ma davo, bal ma si für an Amt hergibt.
Thomas
Is scho recht, ja!
Bürgermeister
I sag mei Sach', wia'r i's denk, weil i an aufrichtiga Mensch bi... und i moan dir's nur guat, und hat koana a größers Bedauern mit dir, als wia'r i.
Thomas
Na mach i mei Danksagung...
Erstehtauf.
San mir jetzt firti?
Bürgermeister
I hab ja no gar net o'g'fangt.
Thomas
setzt sich wieder
Ah so ... Host d' no was anders zu'n auspack'n als wia dei Kümmernis?
Bürgermeister
lauernd
Ma hört, daß du verkaff n willst?
Thomas
I?
Bürgermeister
Ja. Daß da Jud Männlein dein Hof kriag'n soll zum Z'trümmern?
Thomas
Da woaßt du mehra wia'r i.
Bürgermeister
Hat ma's da Männlein selber ei'b'stand'n ...
Thomas
Desweg'n braucht's it wahr sei.
Bürgermeister
Ma hört dös nämli von alle Leut ... Und ... ah ... da hab i mir denkt, vor dei Anwes'n z'trümmert werd, es kunnt's oana in der Gemeinde kaff'n und beinand lass'n.
Thomas
Host d' dir denkt?
Bürgermeister
A richtiga Mensch, der wo a Geld auf da Hand hot und di baar auszahl'n ko.
Thomas
Der richtige Mensch waarst du?
Bürgermeister
I sag net na ...
Thomas
Da hätt'st du aa de Fahrt, über de mir g'stritt'n hamm ...
Bürgermeister
Ah mei!
Thomas
Wo's d' an Prozeß vaspielt host.
Bürgermeister
Dös hon i lang vagess'n.
Thomas
Du bist der net, der wo so was vergißt... Host's aa wieder hoamzahlt.
Bürgermeister
Dös hat koan Bezug auf dös ...
Da Thomas verächtlich mit der Hand abwinkt...
Na! Durchaus gar it! Und de G'schicht'n hamm koan Wert. Du kennst mi, daß i zahl'n ko, und machst a schön's Angebot.
Thomas
barsch
I mach koans.
Bürgermeister
begütigend
Überlegst da's halt. Es muaß ja net heut sei!
Thomas
Es werd gar nia.
Bürgermeister
wie oben
So muaßt d' jetzt aa net red'n, schau! Und net g'rad bockboanig sei! Du derfst ma's glaab'n, i moans nur guat mit dir.
Thomas
höhnisch
Des seil woaß i.
Bürgermeister
Und verkaff'n muaßt d' ja do.
Thomas
So? Muaß i?
Bürgermeister
Was willst d' denn sunst? Du bist alt, tuast dir hart mit'n Wirtschaft'n, und morg'n ko'st d' sterb'n. Was is denn nacha, bal de ander ...
mit dem Kopf nach der Türe links hinnickend
... 's Anwes'n erbt? Und muß's auf Schnall und Fall hergeb'n. Da werd s' net viel dafür kriag'n.
Thomas
Wenn sie's hergibt.
Bürgermeister
Du bild'st dir do net ei', daß de am Haus bleib'n ko?
Thomas
Dös werst d' ihr net verbiat'n kinna.
Bürgermeister
I alloa net.
Thomas
erregter
Und alle mitanand net.
Bürgermeister
I sag net vom Verbiat'n, aba i moan, si tat si a weng hart, wenn's neamd im Dorf leid'n will.
Thomas
lauter
Ah! So viel Kuraschi habt's ös geg'n an oa'schichtig's Weibsbild!
Bürgermeister
Geh zua! Dös Dischkrier'n hat koan Wert.
Thomas
schreit
Na muaßt ma du net so kemma, als wann's d' ma du 's Häusl abdrucka kunntst!
Bürgermeister
Von dem hon i nix g'sagt.
Thomas
Hint'n rum, wia ma's g'wohnt is von dir ...
Bürgermeister
Es is net guat red'n über de Sach, und dir brauch i nix sag'n; du woaßt äs so guat als wia'r i!
Thomas
Gar nix woaß i!
Bürgermeister
erregter
Wenn's d' äs net änderst hamm willst, na sag' i dir's pfei'g'rad.
Deutet mit der Hand nach der Türe,
De Schand tuat uns weh, daß so oane im Dorf is.
Thomas
schreit laut
Dir?
Bürgermeister
Da gibt's koan, vom Pfarra bis zum letzt'n, der net dös nämli sagt.
Thomas
Vo mir aus red't's zua!
Bürgermeister
Weil ma dös net woaß, so lang Berghofen steht.
Thomas
Red't's zua, sag i! Schimpft's beim Bier, wenn s' b'suffa seid's ... Da!
Er schnalzt mit Daumen und Mittelfinger.
Net so viel paß i auf.
Bürgermeister
Du bist aa net alloa Herr auf da Welt!
Thomas
schlägt auf die Bank
Aba da herin! Wen kümmert dös, was in mein Haus is?
Bürgermeister
Sie geht aa naus unter d'Leut...
Thomas
Net wahr is!
Bürgermeister
War s' net in der Kirch'n?
Thomas
zwingt sich zur Ruhe
Beim Begräbnis von ihra Muatta. Hätt s' enk frag'n müass'n, ob s' ihr de letzt Ehr geb'n derf?
Bürgermeister
kalt, die Achseln zuckend
Ma siecht's net gern.
Thomas
schreit;
Waarst d' halt wegblieb'n! Du und de ander Bande! I hart enk net braucht.
Bürgermeister
immer zurückhaltend
Mit'n Schimpf n is gar nix g'richt. Du tuast g'rad so, als wenn's d' mi net verstandst ... I möcht di hör'n, wenn dös bei an ändern fiir-kemma waar.
Thomas
Da wurd'st weni hör'n ...
Bürgermeister
M . .., hm . .. is scho recht...
Thomas
I hab mi um mei Sach kümmert, und net um ander Leut. Und dir stand's aa besser o!
Bürgermeister
höhnisch abwinkend
Ah - was!
Thomas
Paß no du auf dei Haus auf!
Bürgermeister
wie oben
Geh zua! Für dös kriagst d' nix!
Thomas
Magst d'as net hör'n? Gel? Hat net dei Madl a ledigs Kind?
Bürgermeister
Dös geht neamd was o.
Thomas
Ah so! Da is 's änderst!
Bürgermeister
erregter
G'stell di net a so! Du woaßt recht guat, daß dös net herg'hört.
Thomas
Da hat dir dei G'scheitheit nix g'holf n.
Bürgermeister
Daß junge Leut' Dummheit'n macha, dös woaß ma, und wenn's oan aa net freut, dös kummt amal vom Jungsei ... aba desweg'n is mei Resi do rechtschaff'n.
Thomas
höhnisch
Und brav!
Bürgermeister
sehr erregt
Und brav! Jawohl! De hat ihra Lebtag von der ehrlich'n Arbet g'lebt und net vo da Schlechtigkeit. Und was sunst is, dös geht den o, der wo s' amal heiret ... aba sunst neamd.
Thomas
Na muaßt d' di aa net um mi bekümmern.
Bürgermeister
I tat mi scho net kümmern, wann i net a Verantwortung hätt'.
Thomas
A Verantwortung host du für mi?
Bürgermeister
Na, aba für dös, daß de Sach' net gar z'weit geht. Du woaßt net, gel, daß mir bei alle Gemeinden rundum an Nama kriag'n, weil's des erstmal is, im ganz'n Bezirk, daß so oane da is.
Thomas
Was liegt denn da mir dro?
Bürgermeister
Aber ins! Geh' nüber ins nächste Dorf! Schrei'n dir's de Buab'n auf da Straß'n nach, was mir sin.
Thomas
Na zua!
Bürgermeister
Ja! No zua! Unsere Burschn derleid'n net gar so viel!
Thomas
schreit
Ah so! Host da s' scho wieda abgricht? Host da s' scho wieda aufg'hetzt?
Bürgermeister
Da braucht's koa Hetz'n ... de steck'n scho lang d'Köpf z'samm und frag'n, warum g'rad unser Dorf dös schlechtast sei muaß. Und dös geht mi o als Bürgermoasta.
Thomas
Freili! Wenn's d' dir a so nimma gnua bist für a Schlechtigkeit, na kimmst d' als Bürgermoasta.
Bürgermeister
Du werst mir koa Schlechtigkeit nachweis'n kinna!
Thomas
immer erregter
Sei staad ... du! Di kenn i guat. Du host ma's nia verziech'n, daß amal der kloa Bauer Recht kriagt hat geg'n den groß'n ...
Bürgermeister
Jetzt kam er mit dem daher!
Thomas
Weil's wahr is! Lüag du ander Leut' o mit deine scheinheilig'n Spruch! Mi net. I woaß lang, was du für oana bist!
Bürgermeister
Hab i dei Weibsbild aufzog'n?
Thomas
Auf da Paß bist g'stand'n und host g'wart, ob's d' mi net treff'n ko'st.
Bürgermeister
Hab i dei Weibsbild aufzog'n?
Thomas
Und g'rad taugt hat's dir ... gel? Wia de G'leg'nheit kemma is ... Du host g'wißt, wia arm und krankmei Wei da herin g'leg'n is ... und host a Lustbarkeit g'macht aus meiner Schand!
Bürgermeister
Bin i schuld .. .?
Thomas
laut schreiend
's Mau halt! Bist du net von oan Haus zum ändern g'loff'n, und host 's ei'g'sagt, wia r' a Hochzeit?
Bürgermeister
Dös muaßt du beweis'n!
Thomas
Ja du! Und mitt'n beim Tag hat's sei müass'n, damit das ganze Dorf sein Spaß g'habt hat...
Bürgermeister
Schimpf de in da Stadt, de s' raus g'schickt hamm!
Thomas
Waar's an anderer g'wesen, du hätt'st Mittel und Weg g'fund'n ...
Bürgermeister
I bin net bewandert g'wesen in dera Sach. 's nächst Mal mach i 's besser, wenn s' da s' wieder amal hoamschick'n ...
Thomas
geht auf den Bürgermeister los
Derfst du mi auszahna?
Der Bürgermeister tritt zurück.
Wenn s' ma s' 's nächst Mal hoamschick'n, sagst du? Und z'erscht host ma droht mit deine Lausbuab'n, de des Weibsbild net da lass'n woll'n!
Bürgermeister
I laß mi vo dir schlecht macha ...
Thomas
Und i mi zum Lapp'n! In mein eigna Haus! 's nächst Mal machst d'as änderst, host d" g'sagt? Mach's wieder so!
Er macht noch einen Schritt auf dm Bürgermeister zu.
Aber es is nimma wia selbigsmal, wo i mi net rühr'n hab derf n.
Bürgermeister
Schrei zua! I geh ...
Thomas
Und sag de ändern, sie soll'n ma wieda Haberfeldtreib'n ... aber der erst, der mir zum Fensta rei schreit ...den schiaß i nieder wia'r an Hund ...
Packt den Bürgermeister an der Brust.
Sag's eahna!
Bürgermeister
schrill
Laß aus, sag i!
Thomas
ihn schüttelnd
Hol deine Hetzhund! Du Pharisäer, du scheinheiliger!
Der Bürgermeister macht sich frei.
Bürgermeister
Vo dir laß i mir koan Nama net geb'n .. .
Er geht zur Türe.
Von so an net...
Thomas
Hol s' allsamt!
Bürgermeister
Dös ander werst d' ja sehg'n!
Thomas
Probiert's äs no!
Der Bürgermeister schlägt die Tür zu.
Sechste Szene
Leni kommt von links und bleibt an der Türe stehen.
Leni
Was gibt's denn?
Thomas
schaut zornig nach der Türe rechts, durch die der Bürgermeister abgegangen ist, ohne auf Leni zu achten.
Di kenn i und deine Hoamlikeiten, du Feinspinner ... aber jetzt is 's änderst ...
Leni
Hat's was geb'n?
Thomas
bemerkt sie erst jetzt
Was suachst denn du do?
Leni
Wann ma'r enk bis in d'Kuchel außi schrei'n hört...
Thomas
Dös werd di nix o'geh . ..
Leni
Hat da Bürgermoasta mit dir g'stritt'n?
Thomas
M - hm - ja ... g'stritt'n ...
Grob.
Waarst d' no herin g'wes'n und hättst d' all's g'hört... vielleicht gang dir a Liacht auf!
Leni
Soll i 's Ess'n einabringa?
Thomas ist am Fenster gegangen und dreht ihr den Rücken zu, ohne zu antworten. Von rechts tritt Lenz ein und hängt seine Soldatenmütze an den Rahmen.
Leni
freundlich zu Lenz
Geh fei nimma außi! Es is scho zun Mittag macha ...
Lenz
gleichgültig
I woaß scho ...
Leni links ab.
Siebente Szene
Lenz
sich räuspernd
I hab ma 's jetzt überlegt, Paulimann ...
Thomas, der die Hände nach rückwärts verschränkt hält, wendet sich nicht um und gibt keine Antwort.
Lenz
I ko de Akkordarbet net hint lass'n ...
Thomas
sich langsam umdrehend
Han?
Lenz
I sag, daß i de Holzarbet o'nimm, weil's halt für'n ganz'n Winter is.
Thomas
mürrisch
Ja ... ja.
Lenz
Und nacha steh i bei dir auf Micheli aus . ..
Thomas
Mein'tweg'n gnua!
Lenz
Weil du g'sagt host, i soll no dableib'n, wenn d' Dreschmaschin kummt, aba ...
Thomas
G'wiß net! I halt di net auf.
Lenz
Ja no ... i hab ma denkt, wann du notwendi an Aushilf brauchst, kunnt ja mei Bruada auf a Zeitlang kemma ...
Thomas
I brauch'n net.
Lauter.
I brauch überhaupt's neamd!
Lenz
freimütig
Dös waar mir z'wider, wann mir net guat ausanand kummat'n ...
Thomas
Warum net im Guat'n?
Lenz
No ... daß du an Zorn hätt'st auf mi, weil i net bleib ...
Thomas
I hab koan Zorn ...
Lenz
Mir kimmt's aso für ...
Thomas
Dös moanst d' grad ...
Bitter
Mei Liaba, i will net, daß im Dorf umanand g'red't werd, als wann oana in dem schlecht'n Haus da z'ruckg'halt'n wurd' ...
Lenz
I hoaß dei Haus net schlecht...
Thomas
Net!
Lenz
Na ... und i red a nix rum ...
Thomas
Nacha red'n anderne.
Er wendet sich wieder um.
Lenz
gekränkt
Vo dem woaß i nix ... und bekümmer mi net drum ... Hat ma no neamd nachsag'n kinna, daß i was aus 'n Haus trag ...
Kleine Pause.
Thomas
sich umwendend
Du! Du kimmst do mit de junga Bursch'n z'samm?
Lenz
Moanst d', weg'n dem?
Thomas
I moan was anders. Sagst d' eahna, sie soll'n sie net auf'n Bürgermoasta verlass'n . . .
Lenz
versteht ihn nicht
Was?
Thomas
Ja ... ja ... sie soll'n sie net z'viel trau'n, sagst d' eahna!
Lenz
I vasteh di net...
Thomas
Denkst d' halt a weng nach! Und dös sag' eahna von mir: es kunnt amal schlechter ausgeh', als sie glaab'n ...
Lenz
Was woaß denn i von de Bursch'n? I laff net damit rum.
Er bricht ab, da Leni mit dem Essen hereinkommt. Sie stellt die mit Kraut und Knödeln gefüllte Schüssel auf den Tisch.
Achte Szene
Leni
Geht's halt her!
Thomas geht langsam an den Tisch und setzt sich auf die Bank, das Gesicht dem Zuschauerraum zugewendet. Lenz bleibt rechts, Leni links vom Tische stehen. Lenz macht das Kreuz und spricht mit eintöniger Stimme das Gebet.
Lenz
Himmlischer Vater, segne uns Speis' und Trank, die wir von deiner großen Güte empfangen haben ...
Leni betet nun auch laut mit...,
und gib uns Gnade und Gedeihen dazu, damit wir zu deinem Lobe gereichen mögen. Amen!
Beide machen das Kreuzeszeichen und setzen sich, Lenz rechts, Leni links. Thomas hat nicht mit gebetet, sondern finster vor sich hingeschaut.
Leni
zu Thomas
Vata — fang o!
Thomas
Was?
Leni
Ess'n sollst d'...
Thomas
Ja ... iß!
Er stößt den Teller zurück, steht auf und geht links ab
Neunte Szene
Leni
ihrem Vater nachsehend
Was hat a denn?
Lenz gibt keine Antwort. Er nimmt sich Kraut und Knödel aus der Schüssel und fängt zu essen an.
Leni
Woaßt du, warum er so zorni is?
Lenz
mit vollem Munde
I net.
Leni
Der Bürgermoasta is voring da g'wes'n, und da müas- sen s' was g'habt hamm mitanand.
Lenz antwortet nicht,
sondern ißt weiter.
Leni
I bi ganz daschrock'n ... a so is zuaganga ...
Sie nimmt sich heraus und ißt; Pause. 
Wia schmeck'n dir nacha de Knödl?
Lenz
Wia s' halt schmeck'n.
Leni
De hab fei i kocht.
Lenz
gleichgültig
So?
Pause.
Leni
Du, Lenz, was hab' da denn i to?
Lenz
Nix.
Leni
Daß d' nacha so häßli bist auf mi?
Lenz
gleichgültig
I?
Leni
Ja ... red'st nia mit mir, und wann i di was frag', gibst d' ma gar it o!
Lenz
mit vollem Mund
I hab koa Zeit zun Red'n.
Leni
Net amal an Gruaß gibst d' ma z'ruck.
Lenz
Da is mir nix bekannt.
Leni
Erst gestern bist d' hintern Stadel ganga, und i hab dir nachg'schrian ... ob's d' net was zun Vespern mitnehma magst... und du host gar it umg'schaugt.
Lenz
I muaß auf mei Arbet schaug'n.
Leni
schmollend
So viel Zeit hätt'st d' scho g'habt... aba sie wern die halt aufg'red't hamm geg'n mi?
Lenz
grob
Mi red't nearnd auf.
Leni
Ja ... i woaß scho. I hab di scho g'sehg'n am Sunntag.
Lenz
Siehgst mi jetzt aa!
Leni
I hab di scho g'sehg'n, wia's d' nach da Kircha bei da Glonner Marie hibei g'stand'n bist.
Lenz
Ko leicht sei.
Leni
Wia si de draht hot, als wenn s' woaß Gott was für oane waar!
Lenz
brummt
M — hm.
Leni
G'rad gnädi hat's des Weibsbild g'habt, und gar net g'wißt hat s', wia s' geh muaß vo lauta Ei'bildung.
Lenz gibt
keine Antwort und ißt.
Leni
Und nacha, wia'r i bei da Tür außi bin, habt's herg'schaugt und habt's g'lacht.
Lenz
So?
Leni
Jawohl! I hab's deutli gnua g'sehg'n.
Lenz
Werd ins halt was g'freut hamm.
Leni
De moant vielleicht, sie derf mi auszahna.
Lenz
Du werst ihr 's Lacha net verbiat'n könna.
Leni
De braucht si gar it so aufführ'n, über mi ... De soll si no selber bei da Nas'n nehma!
Kleine Pause.
D' Mangin sagt's aa, daß de gar koan Ursach net hat.
Lenz nimmt sich wieder aus
der Schüssel heraus.
Leni
Von dera werd gar nix Guat's g'red't.
Lenz
Von mir aus.
Leni
Ja ... is dös vielleicht net wahr, daß zu da Glonner Marie a jeder an's Kammerfensta hat kemma derf n?
Lenz
höhnisch
Dös nimmst ihr du für üb'l?
Leni
I sag g'rad, daß si de net so auffuhr'n braucht über mi.
Pause.
Vielleicht bist du aa scho bei ihr g'wen?
Lenz
trocken
Na.
Leni
neckisch
Du sagst äs halt net?
Lenz
kauend
Sag'n tat i 's aa net.
Leni
Da brauchetst dir fei nix ei'bild'n auf de! Mit ihre Summermirln!
Lenz
I bild ma scho nix ei.
Leni
Und mit ihre fuchsrot'n Haar! Da gibt's scho anderne.
Lenz
grob
Herrgott! Laß mi amal mit Ruah ess'n! Was paß denn i auf d' Weibsbilder auf?
Leni
neckisch
Paßt du gar it auf?
Lenz
Waar ma z'dumm!
Leni steht auf und rückt in die Bank hinein neben Lenz.
Leni
kokett
Dös glaab i dir fei net, daß du dir gar nix bekümmerst um d' Mädeln.
Lenz
Na glaabst d'as halt net!
Leni
Du bist a recht a Hoamlicher ... gel? Du g'stellst di g'rad aso, als wann's dir nix o'gab.
Lenz
M — hm ... ja ...
Leni
Stößt ihn mit dem Ellenbogen an
Wia muaß denn oani ausschaug'n, de wo dir g'fallt?
Lenz
grob
Jetz sag i dir's no'mal, daß i zun Ess'n herin bi und net zun Dischkrier'n.
Leni
dumm verschämt
Du bist aber oana!
Pause.
Leni
zutulich
Du, Lenz, host dir's net änderst übalegt?
Lenz
Was?
Leni
No ... mit'n Furtgeh?
Sie lacht Lenz an, der nicht darauf achtet; Leni rückt näher zu ihm.
Leni
Wer woaß, wia's amal geht, wenn's d' dableibst!
Lenz
I bleib net.
Leni
Du werst halt glaab'n, daß da Vata verkafft!
Lenzantwortet nicht.
Er verkafft aba net, sinst hätt a mir scho was g'sagt ...
Pause, Leni wartet auf Antwort und fährt erst fort, da
Lenz unbekümmert weiter ißt.
Und weil er si mit'n Bürgermoasta so z'kriagt hat, woaß i's g'wiß.
Lenz
Was geht denn dös mi o?
Leni
I hab ma denkt, du gehst desweg'n ...
Stockend.
Und wann's d' äs inne werst, daß da Vata 's Anwes'n b'halt, hab i ma denkt, nacha bleibst d'.
Lenz
höhnisch
Moanst du?
Leni
No ja ... weil's nacha do änderst is ...
Lenz
Da bischt weit irr.
Leni scheint die Zurückweisung etwas zu verstehen, zieht ihren Teller von ihrem früheren Platz zu sich herüber und ißt ein wenig.
Leni
Host d' no gar nia Obacht geb'n, daß da Lechner Martl jed'smal nach'n Feierabend beim Zaun hibei steht?
Lenz
Na.
Leni
Und er schaugt allaweil nach mir umma.
Lenz
Schaugst d' halt wieda hi.
Leni
I mag net . . . aba wahr is.
Dumm koken.
I glaab, der möcht was.
Lenz
I vergunn's eahm.
Leni
Geh! Wia du daher red'st ... Hätt'st d' mi halt in da Stadt drinna sehg'n soll'n ... in mein blau'n Kleidl mit rote Schnür ... da bin i fei schö g'wen!
Lenz
So?
Leni
Änderst scho als wia d' Glonner Marie mit ihr'n g'scheert'n Kopftüachl... und an woll'na Unterkittl.
Lenz brummt
etwas Unverständliches, indes er mit vollen Backen kaut.
Leni
Und Hemmata han i g'habt... net so grob, als wia de ...
Zupft an ihrem Ärmel...
ganz feine ... Vielleicht hätt i dir guat g'falln ...
Lenz
sehr grob
G'wiß net!
Leni
immer noch zutulich
Hätt'st mi no g'seg'n!
Lenz
mit der Irland abwehrend
I dank schö dafür!
Leni
halb beleidigt
N ... no!
Lenz
Solchene hab' i ma gnua g'seg'n, wia'r i Soldat war.
Leni
Was für solchene?
Lenz
legt seine Gabel weg
Wia du oane warst! Aba i hab mi nia abgeb'n damit. Da bin i ma z' guat g'wen für solchene!
Leni
weinerlich
Sei do net gar so abscheuli zu mir! Was hab i dir denn to?
Lenz
I sag da's g'rad, daß di amal auskennst!
Leni
Von erst'n Tag o bin i freundli g'wen zu dir und ho dir nia koan unrecht's Wort geb'n.
Lenz
M - ja!
Leni
Und is dös vielleicht net wahr, daß i dir dei Sach' g'flickt hab?
Lenz
Hab i dir's o'g'schafft?
Leni
Vergelt's Gott hätt'st d' aa sag'n derf'n, und so grob brauchet'st d' net sei mit mir!
Lenz
erregter
Weil i mei Ruah hamm möcht!
Leni schnupft ein
paarmal auf und macht ein weinerliches Gesicht.
Lenz
Moanst d', i merk's net scho lang, daß du mir schö tuast? Aba du spannst äs net, daß mir dös z'wider is!
Leni
sehr weinerlich
Dös is dir z'wider?
Lenz
Ja. I muaß da's scho pfei'grad sag'n, weil's d'as sunst net kennst! Glaabst denn du, i mag mit dir ins G'red kemma?
Leni
weinend
Hör amal auf!
Lenz
Waar mir scho z' dumm, daß de Bursch'n hinter mir drei'lach'n, g'rad als wann i was hätt mit dir!
Leni
mit erstickter Stimme
N ... no!
Lenz
Du muaßt da scho an ändern raussuacha! Koan richtig'n Mensch'n net! Da behaupt i mein Charakta ...
Leni
wischt sich mit dem Handrücken über die Augen.
Lenz
Und daß d'as woaßt, desweg'n geh'n i... weil ma dös z' dumm werd. Bloß weg'n deiner mag i nimmer bleibn!
Leni
zornig, unter Tränen
Geh halt zua! I brauch di net ... i ho scho anderne g'fall'n ... i wer scho oan find'n.
Lenz
Find no zua!
Er leert mit dem Löffeiden Teller aus, schleckt ihn ab und legt ihn auf den Tisch.
Aba mir werst d' jetzt mei Ruah lass'n.
Leni
I brauch di net.
Lenz
Is scho recht...
Er steht auf und fängt wieder eintönig zu
an
Himmlischer Vater, wir danken dir, daß du uns Unwürdige gespeiset hast und deiner Gnaden teilhaftig machest und nimmer aufhörest, deine Wohltaten gütig mitzuteilen. Amen!
Er geht nach der Türe und nimmt seine Mütze vom Nagel herunter.
Leni
sich hastig die Tränen abwischend
Geh no weita! Mi hamm scho Besserne mög'n als wia du! An dir liegt ma gar nix dro!
Lenz geht ohne Antwort hinaus.
Leni
ihm nachschreiend
An dir liegt ma gar nix dro!
Sie sieht nach der Türe, legt sich in den Tisch hinein und fängt laut zu weinen an.
Vorhang
Dritter Aufzug
Erste Szene
Stube wie in den beiden vorhergehenden Aufzügen. Sonntagsstimmung. Man hört die Kirchenglocken läuten, die bald verstummen. Leni sitzt auf der Ofenbank, näht an der Bluse, die sie bei der Heimkehr getragen hat, die letzten Stiche, hält sie vor sich hin und streicht sie glatt. Von rechts tritt Barbara Mang ein, in sonntäglichem Gewand mit Kopftüchel. Sie trägt ein Gebetbuch in der Hand. Leni sieht unordentlich und verstört aus.
Barbara
Guat Morg'n, Leni!
Leni
Guat Morg'n!
Barbara
I ho di g'rad frag'n woll'n, ob's d' mi net brauchst.
Leni
Heut net.
Barbara
Bist d' scho firti mit da Arbet?
Leni
mürrisch
I bin scho firti.
Pause.
Barbara
In da Kircha bin i g'wen; da hat's heut änderst viel Leut geb'n.
Leni
So?
Barbara
gesprächig
Ja, weil da neue Koprata zun erst'nmal predig'n hat derf n, durch dös, weil da Herr Pfarra krank worn is. De ganz Kirch'n is g'steckt voll g'wen.
Leni antwortet nicht und packt ihr Nähzeug zusammen.
Barbara
anzüglich
I woaß gar it, was er g'habt hat. Grad von Ärgernis hat er predigt.
In geziertem Hochdeutsch.
Daß diesen Übles geschiecht, die wo Ärgernis geben. Waar scho bald aso g'wen, als wann er auf was g'spitzt hätt'.
Leni
gleichgültig
Was moanst d'?
Barbara
No ja! Weil er grad allaweil 's Ärgernis daher bracht hat. Und d' Glonner Marie hätt'st d' sehg'n soll'n. De hätt' si aso bald an Hals auskegelt, so hat s' oiwei uma-g'schaugt auf mi her.
Leni
Vo mir aus.
Barbara
Weil s' eahm denkt hamm werd, i sag das wieder. Aba de bal i amal alloa derwisch, nacha frag i s', ob sie vielleicht glaabt, frag i s', daß bloß ander Leut an Ärgernis geb'n und ob's z'Berghofa net mehra gibt, frag i s', de wo si aus dera Predigt was außa nehma hätt'n kinna. Ja ... aso frag i s'.
Leni
Zweg'n meiner brauchst d'as net frag'n.
Barbara
Weil's wahr is. Zweg'n was muaß denn de oiwei zu mir umaschaug'n?
Leni
Vielleicht müassen si de Berghofer nimmer gar so lang ärgern über mi.
Barbara
Was host d' denn?
Leni
A so halt!
Barbara
Du red'st ja, als wann's d' nimma dableib'n mögst.
Leni
Mög'n! Mög'n tua i g'wiß net.
Barbara
So waar i net. Erst recht gab i net nach. Du host dei Straf ausg'halt'n, und de ändern geht's nix o.
Leni
müde
J — ja.
Barbara
Und von so oana lasset i mir scho durchaus gar nix g'fall'n, de wo si z' allererst schama müaßt.
Leni steht auf und nimmt Nähzeug und Bluse an sich.
Barbara
Was feit denn dir?
Leni
Nix.
Barbara
Dös sagst d' grad; i kenn's guat.
Leni
ungeduldig
N ... na! Mir feit nix.
Barbara
Und nacha brauchst d' mi heut net?
Leni
Na.
Barbara
I hätt da gern g'holfa.
Leni
Da Vata ißt heunt aso net dahoam. Er geht auf Arnbach umi, hat er g'sagt, zu sein Bruada.
Barbara
Ja ... und ...
Leni
Und der ander steht heunt aus.
Barbara
Der Lenz?
Leni
Ja.
Barbara
Siehgst d'as, na is 's do wahr! Weil d' Hotzin zu mir g'sagt hot, da Lenz, hat s' g'sagt, bleibt aa koan Tag nimmer da drent, sagt s'. So? Heunt steht er aus?
Leni
Is ja Micheli!
Barbara
Daß der auf oamal geht?
Leni
Er werd scho an ändern Platz hamm.
Barbara
D' Leut hamm g'sagt, daß er überhaupts ganz bleib'n möcht, und du host äs ja aa'r amal glaabt.
Leni
I?
Barbara
No ja! Weil mir halt g'red't hamm über dös. Net? Und i hab nix anders net denkt, als daß er's so an Sinn hot.
Leni
Geh, laß ma mei Ruah!
Barbara
Weil du g'sagt host, wer woaß, wia's amal geht, und daß er dir g'fall'n tat.
Leni
Der?
Barbara
Net grad oamal hamm ma davo g'red't, daß er a sauberner Bursch is und ... wia ma halt red't.
Leni
heftiger
Der is ma z' g'scheert!
Barbara
Ah so?
Leni
Ja. Auf den paß i gar nix auf! Der braucht si nix ei'bild'n. Da hon i scho Feinere kennt als wia den!
Barbara
neugierig, lauernd
Is er g'wiß grob g'wen geg'n deiner?
Leni
wieder verschlossen
I woaß it, vo was du oiwei red'st.
Barbara
No ... weil's d'halt 's letzt Mal ganz anders g'sinnt g'wen bist... net? Ma sagt grad vo dem ...
Leni
Jetzt bin i aso g'sinnt.
Barbara
I sag dös, daß er aa nix Guats hot, wann er liaba a Deanstbot bleibt und si von de Leut aufhetz'n laßt...
Leni
Von mir aus tuat er, was er mag.
Barbara
Nacha geh'n i.
Leni
Adjä!
Barbara
Braucha tuast d' mi net, host d' g'sagt?
Leni
Na!
Barbara Mang wendet sich zum Gehen und macht ein paar Schritte gegen die Türe rechts, bleibt stehen und kehrt sich wieder Leni zu, die langsam nach links abgehen will.
Barbara
Du! Paß auf
Leni
mürrisch
Wos denn!
Barbara
lauernd
D' Leut red'n vom Lechner Martin, als wann's da was geb'n hätt'.
Leni
hastig
Von Lechner?
Barbara
I hab nix glaabt, weil i dös überhaupts net mag, dös G'schwatz überanand, und weil i sag, daß d' Leut überhaupts gern lüag'n.
Leni
verlegen, erschrocken
Hamm s' ...? Was hamm s' denn g'red't?
Barbara
mit gespielter Entrüstung
Dös mag i dir gar net sag'n . . . na! De machen's a bisserl gar z’ braun ... und Sach'n bringen s' daher, wo si inseroans gar nimma auskennt...
Leni
Hätt' vielleicht da Lechner Martin was sag'n mög'n über mi?
Barbara
I woaß aa net so g'nau ...
Lauernd.
Warum? Bist du mit eahm beinand g'wen?
Leni
wieder bockig
Waar ma scho z' dumm!
Barbara
Dös seil lasset i mir net g'fall'n, daß mi oana so rumziagt... g'rad häuf'nweis san d' Leut beinand g'stand'n, und Ausdrück hamm s' g'habt.
Leni
Geg'n meiner?
Barbara
I mag dir's net sag'n ... und überhaupts bin i wegganga, weil i dös net leid'n ko, wann's a so hergeht...
Leni
Vo mir aus sag'n s', was s' mög'n. I muaß ja net da sei!
Barbara
lauernd
Host du 's Furtgeh in Sinn?
Leni rückt unwillig die Schultern.
Du host ja nix z'fiircht'n, bal's net wahr is!
Leni
I wer mi von de G'scheert'n da aso herstell'n lass'n!
Barbara
Arg is scho, wia unverschämt de Leit daher red'n ...
Leni
mit einem plötzlichen Entschlüsse
Du, Barbara ... Du derfst aba neamd nix sag'n!
Barbara
eifrig
G'wiß net! Du kennst mi guat für dös!
Leni
Du host amal g'sagt, daß du den Spenser von da Muatta hamm mögst?
Barbara
Den greana?
Leni
I gib dir'n ... für a paar Mark.
Barbara
Aba dei Vata?
Leni
Der braucht's ja net z' wiss'n ... und 's G'wand von da Muatta g'hört mei.
Barbara
zögernd
A paar Mark, host d' g'sagt?
Leni
I mag net oiwei da hocka ohne an Pfenning Geld ... und wann i fürt bi, glaabt da Vata halt, i hab an Spenser mitg'numma.
Barbara
neugierig
Mögst du scho bald weg?
Leni
wieder unwillig
Frag mi net aso aus! ... I geh scho amal.
Barbara
I ho jetzt koa Geld net bei mir ... bring i dir's halt nacha umma.
Leni
Gibst d' ma's in da Kuchl.
Barbara
Is recht . . . aba net, daß i an Vadruß kriag ...
Leni
bat nach der Türe hin gehorcht, halblaut
Sei staad!
Zweite Szene
Thomas tritt ein von rechts, sonntäglich gekleidet. Er nickt kurz zum Gruß und hängt seinen Hut an den Rahmen.
Barbara
laut und freundlich
Also na geh'n i ... und wann's d' mi brauchst, sagst d' ma's. Pfiiad Good, Leni!
Zu Thomas'.
Pfiiad Good, Paulimann! In da Kircha bist d' heut net g'wen?
Thomas
Na.
Barbara
Hätt'st d' den neu'n Koprata predinga g'hört.
Thomas
M - hm ... ja ...
Barbara
Nacha pfiiad Good beinand!
Ab rechts.
Dritte Szene
Thomas
zieht seinen Rock aus und hängt ihn an den Nagel.
Morg'n in da Fruah muaßt d' mit in d' Bachleit'n zu'n Ruab'n klaub'n.
Leni
kleinlaut
Ja.
Thomas
Nach da Fuattazeit. Und heut an Na'mittag, wann i in Arnbach bin, daß d' ma net aus'n Haus gehst! I will nix hör'n.
Leni
I geh net außi.
Thomas
der sie jetzt erst ansieht
Was host denn du? Was machst denn du für a Trentsch'n?
Lenk
I mach koane.
Thomas
Weil i 's net siech! Is mir gesta'n scho so ftirkemma.
Leni
Wenn ma oiwei ei'g'sperrt is!
Thomas
Ah so! Dös hat sein Grund ... und laß da no nix traama, daß 's änderst werd!
Leni
N ... na!
Lenz tritt von rechts ein, feiertäglich angezogen. In der linken Hand trägt er seinen Hut, mit der rechten trägt er einen kleinen Koffer, den er neben der Türe hinstellt. Bei seinem Eintritt zieht Leni den Kopf ein, sieht ihn scheu an und geht still nach links ab.
Vierte Szene
Thomas
,
freundlich
Bist d' zum Geh' g'richt?
Lenz
Ja.
Er zieht sein Dienstbuch aus der Tasche.
Wenns d' so guat waarst und tatst mir a Zeugnis schreib'n ...
Thomas
nimmt das Euch
An Lohn host d' kriagt?
Lenz
Feit si nix.
Thomas
im Euch blätternd
Drei Monat bist d" da g'wesen . . . und hast dei Arbet richti g'macht. I muaß di lob'n.
Lenz
I bin aa gern da g'wen.
Thomas
Gern? Ja - ja.
Lenz
verlegen den Hut drehend
Wann i 's an Eichmüller net zuag'sagt hart', und Überhaupts ... wann i net...
Thomas
Is scho recht, Lenz. Mir brauchst d' nix verzähl'n.
Lenz
Na, is wahr! Wann si dös net aso auftroffa hätt' ...
Thomas
Du bist a richtiga Bursch und host dein Stolz ... und host recht, daß d' gehst.
Er geht näher zu ihm heran.
Glaabst denn du, wann's bei mir net mehr brauchet, als dass i mein Koffer nahm und an Huat aufsetzet, glaabst denn du, i bleibet?
Lenz
verlegen
Ja ... no!
Thomas
Na, mei Liaba! Am erst'n Tag waar' i fürt, und mi hätt' neamd mehr g'sehg'n in Berghof'n.
Legt das Dienstbuch auf den Tisch.
Es is nix Schön's, in an Haus leb'n, wo d' Leut koa Ehrbarkeit mehr suacha.
Lenz
Dös muaßt d' na aa net glaab'n!
Thomas
Net? Mög'st du mir a Zuckerl geb'n? Aba dös friß i net. I g'spür's am Buckel, wenn ma d' Leut nachschaug'n.
Lenz
Auf de passet i net auf.
Thomas
Dös sagst d' aso ... aba du selber host das ja nimmer derlitt'n, daß d' Leut mit de Aug'n blinzeln, wann s' di frag'n, wia's da bei mir g'fallt! Und di braucht nix druck'n ... Ja, Mensch! Schand tuat weh.
Lenz
verlegen
Geh ... Paulimann! Wann's d' mir jetzt 's Zeugnis schreibest!
Thomas
Ja so! Gel, 's Zeugnis?
Er nimmt das Euch und legt es wieder hin.
Daß du Überhaupts oans willst vo mir? Waar 's net g'scheidter, in dein Büachl stand mein Nama gar net drin?
Lenz
I brauch mi nix z' schama ... i hab mei Sach to.
Thomas
I sag's ja grad weg'n deiner ... aba wann's d' willst, schreib i's.
Er geht an den Wandschrank, holt Tinte und Feder und seine Brille, die er aufsetzt, während er sich an den Tisch setzt.
Thomas
Auf 'n erst'n Juli bist d' kemma?
Lenz
Ja.
Thomas
Den Tag woaß i no guat.
Schreibt.
Lorenz Kaltner ist bei mir eingestanden zur Aushilfe den ersten Juli...
Ersetzt aus...
Selbigsmal is grad da Dokta dag'wen und hat ma's g'sagt, daß 's schlecht steht bei da Mariann ... Die Frau, hat er g'sagt, hat sich in ihrem Leben zu viel geplagt... ja, dös hat ma davo!
Lenz
I ho mir aa nix Guat's denkt, weil s' so schwach g'wen is ...
Thomas
Schwach g'wen ... ja!
Gibt sich einen Ruck und schreibt wieder.
Also ... den ersten Juli und ist ausgetretten den ersten Oktober ... und war sehr treu und fleißig.
Er legt die Feder hin.
Dös schreibt ma heuntingtag's bei an jed'n ... aba bei dir is 's wahr.
Lenz
I mach halt mei Danksagung, Paulimann.
Thomas
Nix zum dank'n. Dös Beste kon i dir net neischreib'n, daß du dir nia was host o'kenna lass'n, vor mir und da Mariann net ... von dera G'schicht.
Lenz
Da hon i koa Recht it g'habt.
Thomas
Aba G'leg'nheit. Und de lasset si net a jeda auskemma.
Er gibt ihm die Hand.
Für dös dank i dir no b'sunders, und wann dir aa nix dro liegt, sag' i's do, daß i vor dir an Respekt hab.
Lenz
fährt sich verlegen durch die Haare
Ja no ... i sag' dir aa Vergelt's Gott!
Thomas
gibt ihm das Dienstbuch
Da hast d' dei Büachl, und i wünsch Glück überall'n.
Lenz
herzlich
I dir aa ... daß 's da guat geht, Paulimann!
Thomas
resigniert
Werd ma guat geh', ja! Wann i jetzt an Karr'n alloa schiab'n muaß!
Lenz
I hätt' ja g'moant, du sollt'st mein Bruada auf a Zeit ei'stell'n.
Thomas
Daß er nach drei Tag den nämlich'n Grund zum Geh' hat wia du heunt? Na! Liaba racker i mi z'samm ... und wann's nimmer geht ... mir is 's net z' fruah. Na! I woaß, du moanst äs guat... aba i bleib alloa. Jetzt pfüad du
Lenz
Adjes!
Thomas ist ans Fenster getreten und schaut hinaus. Lenz bleibt an der Türe stehen und dreht verlegen seinen Hut in beiden Händen. Er kämpft sichtlich mit einem Entschlüsse.
Lenz
Paulimann!
Thomas
sich halb umwendend
No was?
Lenz
etwas stockend
Du host neuling zu mir g'sagt, daß i weg'n de Bursch'n ... daß i de Bursch'n warna sollt, wenn's grad was ... a so ... an Sinn hätt'n ...
Thomas
Seim war i zorni. I woaß scho, daß dös grad an Bürgermoasta sei G'red war.
Lenz
entschiedener
I woaß net, ob dös bloß a G'red' is.
Thomas
sich ganz umwendend
Han?
Lenz
Mir g'fallt de Sach net. Seit gestern is grad, als wenn oana in a Wespennest nei'sticht. De Bursch'n hamm was.
Thomas
überrascht, aber ruhig
Ah, so moanst d?
Lenz
Es is net sauber.
Thomas
drohender
Laß s' no! Sie wer'n si net gar so leicht toa mit mir.
Lenz
Wenn aba . . .
Stockend...
wenn's aba änderst geht, als du moanst?
Thomas
Es werd so geh', daß i rnei Recht behaupt'. A Buaberei laß i net ausüab'n an mir.
Lenz
unsicher: Ja ...
scho! Freili net! Aba ...
Thomas
Da brauchst d' koan Angst hamm.
Lenz
Es gibt halt Sach'n, wo ma si net dageg'n rühr'n ko!
Thomas
Sach'n?
Lenz
Du woaßt halt no net, was 's geb'n hat?
Thomas
lauter
Geb'n? Mit da Leni was?
Lenz
I ko aa net red'n über dös ...
Thomas
dringender
Aba du woaßt... daß was fürkemma is?
Lenz
Dös sag'n s' dir bald gnua.
Thomas
schreiend
Herrgott! Mensch, marter mi do net her!
Lenz
Schau!
Thomas
Red! sag i, und lass' mi net im Ung'wiss'n! San dir de Bursch'n so viel wert?
Lenz
Net de Bursch'n. Na ... aba schau, i ko da aa nix geg'n d' Leni red'n ... sie hat ma nia nix to ...
Thomas
Ja, muaß i di lang bitt'n um dös? lenz
in sichtlicher Aufregung
Na! Des seil geht net!
Thomas
Aba o'fanga host d' kinna ... und mi hetmartern!
Lenz
Weil i mir denkt hab ... i muaß di warna ... und dös ander sag'n s' dir scho.
Thomas
sehr dringend
Lenz! Red aus! Jetzt muaßt d' all's sag'n.
Lenz
I... i ko net.
Thomas
Na laß bleib'n!
Lenz
Weil...
Thomas
Geh zua! Sag i.
Lenz geht langsam zur Türe hinaus.
Fünfte Szene
Thomas sieht ihm nach und bleibt unschlüssig stehen. Erfaßt einen Entschluß, geht zur Türe, nimmt seinen Hut vom Nagel und setzt ihn auf; bleibt wieder stehen, die Hand an der Türklinke, und schaut finster vor sich bin. Er geht zum Tisch, legt seinen Hut hin, sinnt nach und geht zur Türe links, öffnet sie und ruft hinaus.
Thomas
Leni!
Pause.
Es kommt keine Antwort.
Thomas
lauter und ungeduldig
Herrgott! ... Leni!
Lenis
Stimme von außen, verdrossen
Was denn?
Thomas
grob
Da geh amal eina!
Er tritt von der Türe zurück; Leni kommt scheu und langsam herein.
Sechste Szene
Leni
Was willst d' nacha?
Thomas
,
schaut sie finster an
Mir hamm was
z
red'n mitanand: kimm no her!
Leni kommt zögernd näher und heftet die Blicke auf den Boden.
Thomas
Mir hat wer g'sagt, daß 's was geb'n hat mit dir ...
Leni
furchtsam
Mit mir?
Thomas
Mit dir - ja! Schau ma no ins G'sicht! I brauch bloß naus geh', hat wer g'sagt, nacha derfrag' i 's von an jed'n ...
Leni
aufsehend, lebhafter
Hat da Lenz ...?
Thomas
Der — oder an anderner.
Kleine Pause.
Muß i nausgeh' und frag'n?
Er sieht Leni drohend an, die wieder zu E öden sieht. — Pause.
Thomas
An Antwort will i!
Leni
zögernd und furchtsam
I woaß net, was du moanst...
Thomas
faßt sie beim Arm, sich zur Ruhe zwingend
Du! Wenns d' aa net viel Verstand host, des seil werst d' begreif n, dass dir 's Lüag'n nix mehr hilft!
Leni
weinerlich
I woaß aba net...
Thomas
mit unterdrückter Heftigkeit
Wenns was geb'n hat ... sag's! Es is bessa, als i derfrag's da drauß'n.
Er wartet auf Antwort. Leni schweigt und sieht nicht auf.
Thomas
Is g'wes'n, was mag — red! Mach's mit mir aus!
Leni
I woaß net, was du moanst ...
Thomas
zornig und verächtlich
Ah! Lüag du!
Er gebt zum Tische hin und nimmt seinen Hut, wendet sich aber wieder gegen Leni.
Thomas
Bist d' amal aus 'n Haus?
Leni
eifrig
Mit koan Schritt net, weil du g'sagt host, i derf net außi, und . . .
Thomas
Na is wer bei dir g'wen?
Leni
wieder zaghaft
N ... na!
Thomas
auf den Boden stampfend
Ob wer bei dir g'wesen is?
Leni
weinerlich
Dös is scho ausg'schämt, daß da Lenz so was behaupt' geg'n meiner, und daß a mir so was o'hängat, vor er geht, und ...
Thomas
sie verächtlich ansehend
Na muaß i d' Wahrheit drauß'n hör'n.
Er setzt seinen Hut auf und geht zur Türe. Indem er sie öffnet, tritt sein Nachbar Johann Plank ein. Leni ist zuerst
zögernd, dann rasch nach links abgegangen.
Siebente Szene
Thomas
überrascht und unruhig
Bist du da?
Flank
verlegen und auf geregt
Ja... i bin da... hat mi net recht g'freut, 's Hergeh'... aba weil i mir denkt hab, mir san alla-weil guate Nachbar'n g'wen ... bin i jetzt herganga ...
thomas
: Was is?
Plank
hat den Hut abgenommen und glättet sieb verlegen mit der Hand die Haare
I sag dir all's ... aba net, daß d' moanst, i bin gern her ... i ho ma denkt, es is dir liaba, wann i mit dir red, vor de ändern kemma ...
Thomas
De ändern?
Plank
No ja ... der Bürgermoasta ... und i woaß net, wer vom Ausschuß no mitgeht...
Thomas
Zu mir her?
Plank
Freili... zu dir ...
Thomas
heftig
Da muaß da Bürgermoasta erst sehg'n, ob i 'n einalaß!
Plank
Paß auf ... laß da sag'n ... i verzähl dir all's ... Nach da Kirch' is da Ausschuß z'sammkemma, und da hamm s' de G'schicht fürbracht.
Thomas
aufgeregt
Von mir was?
Plank
Vo dir? . . . Na! Von dir net ... aba ... ko'st da 's leicht denk'n.
Thomas
mit dem Daumen nach der Tiire deutend
Vo dera?
Plank
nickt bejahend, dann kratzt er sich heftig hinterm Ohr
Ah! Es is a Kreuz! Es is a Kreuz! I sag's ja, wenn ma Kinda hot, woaßt d' nia, wia's amal geht.
Thomas
stampfend
Mach zua!
Plank
No ja ... sie hamm de G'schicht fürbracht ... Hat denn dir no neamd was g'sagt?
Thomas
An Deuta hab' i kriagt... Schneid net lang' um!
Plank
spricht stockend mit Pausen
Wia muaß i das sag'n? Seit gestern auf 'n Abend is 's im Dorf, als wann d' Imp'n auskemman ... An Lechner sei Martl ... kennst 'n scho ... hat de G'schicht ausanand bracht ... no ja ... er is bei deiner Leni g'wen ... sie ... hat'n in d' Kammer ei'lass'n . . . waar ja net so weit g'feit ... aba ... wia soll i da's sag'n ... no ja, sie hat a Geld von eahm verlangt.
Thomas
schreit
Plank!
Plank
freier
Da Martl is von ihr weg zum Bäcker Hans'n umi ... und verzählt's an Kamerad'n, und der verzählt's wieda ... und gestern nach Feierabend is scho des ganz' Dorf aufmahrig g'wen ...
Thomas
ruhiger
Vo wem hast du's?
Plank
Vo wem hab's i? Vo dem ... und dem ... von an Dutzed.
Thomas
schreit wieder
A Lug is!
Plank
kratzt sich hinterm Ohr
Ja schau!
Thomas
Da, wo du stehst, is vor etla Tag der Bürgermoasta g'stand'n! Hätt' ma d' Ohr'n voll g'red't, daß i verkaff n muaß ... daß ma d' Leni net im Dorf leid't ... mit die Bursch'n hätt' a ma droht... und jetz' waar's a so!
Plank
Nachbar ... i sag da ...
Thomas
Dös trifft a bissei schö z'samm ... na, mei Liaba! Den Feinspinna kenn i... a Lug is
Plank
Laß da sag'n ...
Thomas
Er braucht bloß 's Mau aufmacha ... und ös müaßt's äs glaab'n!
Plank
sich wieder hinteren Ohr kratzend
Es is a Kreuz! Es is a Kreuz!
Thomas
Aba i kimm eahm hinter seine Gang', dem Judas! Und auf da Stell sag i 's eahm
... Er will zur Türe. Plank vertritt ihm den Weg.
Plank
Geh ... laß mi aa was sag'n ... Du woaßt, i bi die Feind net... schau. Thomas! So was ko der Bursch it aus der Luft greif'n ... da is er gar it der Mensch dazua ... der war eahm net hell gnua ...
Thomas
Der net! Aber der ander, der dahinter steckt ... Den kennst du z' weni!
Plank
Wia kunnt dös sei!
Thomas
Den kennst du z' weni!
Plank
I sag dir do! In da Fruah, von da Kamma weg is er zu'n Bäcker Hansen g'laffa und hat's brüahwarm verzählt. Der Bursch hot eahm gar it denkt, daß a so a Ramasuri d'raus werd!
Thomas schweigt und schaut finster vor sich hin.
Plank
Und ... es is hart zu'n sag'n ... i will di g'wiß net beleidig'n ... aba nach dem, was scho amal passiert is ... braucht's oan z'letzt net gar a so wundern.
Thomas
auffahrend
Da hab i enk!
Plank
Sag selm ... es is ja an Unglück, aba . ..
Thomas
Ös moant's, so oane is leicht nunterstöß'n, de scho im Rutsch'n is.
Plank
Wer sollt dös toa?
Thomas
De ko ma leicht mit Füaß'n tret'n, de scho am Bod'n liegt...
Plank
Nachba!
Thomas
in großer Erregung
Und i ... moant's ös ... muaß zuaschaug'n mit bundne Hand ... wia ma s' ... wia ma s' auf'n Mist wirft...
Plank
fährt sich über die Haare
Es is a Kreuz!
Thomas
Dös g'ringste Viech tat si wehr'n ... i derfat's not... moant's ös.
Plank
Was sollst d' da sag'n?
Thomas
faßt Plank am Arm und zieht ihn zum Lehnstuhl hin, der an der linken Wand steht. Sie sind im Laufe des heftigen Gespräches schon auf die linke Seite hinübergekommen,
Plank! Dir is aa dei Bäurin g'storm, und de mei hat ihr aufg'wart... bis z'letzt.. .
Plank
I woaß wohl ... i woaß wohl...
Thomas
in höchster Erregung, schlägt auf die Stuhllehne
Da! Da herin is mei alte Mariann g'leg'n ... Dös Letzte, was s' g'sagt hat ... laß 's Madl net fürt! ... Wia ihra Hand in der mein kalt wor'n is ... no amal hat sie s' druckt ... und is a Bitt g'wesen ... Laß 's Madl net fürt! ...
Schreit
Ja ... glaabt's ös ... i wehr mi net?
Plank
Ja ... mei Mensch ... du muaßt...
Thomas
Nix muaß i!
Zur Türe rechts herein kommen der Bürgermeister und Valentin Scheck.
Achte Szene
Plank
auf die Eintretenden blickend
Da san s' scho.
Thomas
hat sich gefaßt und geht entschlossen auf den Bürgermeister
zu
Host du was z' toa da herin?
Bürgermeister
ruhig und fest'
Ja! I hab was z' toa.
Fragend zu Plank
Du host scho g'red't mit eahm?
Plank
I hab eahm halt g'sagt, was furkemma i s ...
Thomas
zum Bürgermeister
Was du z'sammg'log'n host!
Bürgermeister
Z'sammg'log'n? I?
Thomas
Ja du! Wann du's aa no so fei o'gehst... i kenn di!
Scheck
Paulimann! Dös seil hat koan Wert! Du muaßt'n hör'n.
Thomas
I hab'n scho g'hört .
Scheck
Dös werst du wiss'n, daß mir richtige Leut san . .. Da gibt's nix mit Lüag'n und a so
Plank
zu Thomas
Laß 'n sei Sach fürbringa!
Bürgermeister
Es is bald ausg'red't. I hab an Ausschuß z'sarnm g'ruaf'n, weil dös mit deiner Leni fiirkemma is.
Thomas
schreit
Du lüagst!
Bürgermeister
nun auch zornig
Dös werd sie aufweis'n. Weil's furkemma is, sag' i ... und weil de Bursch'n ganz off'n z'sammstengan und Drohunga daher bring'n.
Thomas
Mir?
Bürgermeister
Dir! Ja ... daß s' liaba 's Haus ei'reiß'n, als dös Weibsbild im Dorf lass'n ...
Thomas
Laß s' kemma!
Bürgermeister
Na! Dös woll'n mir net! Für dös san mir da, daß koa Unglück rauskimmt ... desweg'n hon i an Ausschuß z'sammg'ruaf'n.
Thomas
Und host deine Lug'n fürbracht.
Scheck
Dös hat a net... Mir hamm aso all's g'wißt.
Plank
ruhig
Du muaßt äs glaab'n, Thomas, daß dös ganze Dorf überanand is.
Thomas steht mit geballten Fäusten da und schaut Plank und die ändern finster an.
Bürgermeister
Mir hamm den Bursch'n herkemma lass'n . .. an Lechner Martin... und der hat de Sach b'steh' müass'n.
Scheck
Auf a G'red' alloa hätt'n mir nix geb'n ... und überhaupts ...
Bürgermeister
Da lass'n mir uns nix nachsag'n.
Thomas
befug
Red aus!
Bürgermeister
Und der Ausschuß sagt... alle mitanand . ..
Zu
den beiden ändern
Is it wahr? ...
Plank und Scheck nicken zustimmend ...
daß da nix anders gibt ... daß du dei Lern weg toa muaßt...
Thomas
höhnisch
Auf da Stell?
Bürgermeister
ruhig und gewichtig
So schnell, als d' ko'st, Paulimann.
Scheck
Sinst geht de G'schicht net guat.
Bürgermeister
Und mir kennan da koa Verantwortung net übernehma.
Thomas
sich zur Ruhe zwingend
Ös kemmt's zu mir ins Haus . . .
Scheck
Mir san für dös do.
Thomas
schreit ihn an
Jetzt red i! ...
Zum Bürgermeister
Ös kemmt's zu mir her, in mei Haus ... und sagt's ... du bischt net Herr da herin ... du muaßt dös Weibsbild ... du muaßt dei Kind nausjag'n auf d' Straß'n ...
Losbrechend
Ja, bin i enker Läpp ... Derft's ös Schindluada treib'n mit mir?
Plank
G'wiß net! Dös will neamd.
Thomas
keuchend
Net? Z'erscht bringt mir der da ...
auf den Bürgermeister zeigend ...
dös Weibsbild ins Haus ... schreit mei Schand im Dorf rum . . . bringt s' da rei zu da krank'n Muatta ... i derf mi net wehr'n ... na! I muaß s' hamm ... und heut kummt er, i derf s' in mein Haus nimmer g'halt'n ... i muaß leid'n, daß s' draußd im Dreck der- stickt ... Derf mi der zum Narr'n halt'n? Schaugt's mi z'erscht o! I vertrag nimma viel .. .
Bürgermeister
schreit
Bin i all's schuld? Woaßt du koan ändern als mi ...?
Thomas
Koan ändern als du
Bürgermeister
Nachageh zu de G'richtsherrn! Frag' de, was 's G'setz is! Warum s' dei Weibsbild aus der Stadt g'haut hamm ...
Thomas
Und hamm sie s' nausg'haut, na is s' jetzt da!
Immer heftiger
Da herin in mein Haus! Dös ma'r i vadeant hab' mit meine Hand! Und wo s' dahoam is ... host d' g'hört ... dahoam!
Plank
legt ihm beschwichtigend die Hand auf die Schulter
Geh! So könna mir it red'n!
Thomas
ihn abschüttelnd
So net! Na! Hörst du net, daß er 's G'setz daher bringt? Is dös mit 'n G'setz, daß ma bei oan insHaus ei'bricht? . . .
Sich aufrichtend
Und koan will i mehr hamm da herin! Macht's, daß naus kommts ... alle mitanand, sag i!
Bürgermeister
sich zum Gehen wendend
Na g'schiecht, was mag! I geh!
Plank
hält ihn auf
Net! Bleib!
Beschwörend zu Thomas.
Paulimann! du muaßt an Zorn net Herr sei lass'n! Dös hat koan Wert! Schau, mir hamm ja das größt' Derbarma mit dir!
Scheck
Weil a jeda woaß, daß du a richtiga Mensch bist ...
Thomas
Und enker Hanswurst! Moant's ös! Daß si der ...
Auf den Bürgermeister zeigend
vor mi hi'stellt und mir an Befehl gibt ...
Bürgermeister
Von an Befehl is nix g'sagt wor'n ... aba i woaß, daß de Bursch'n Ernst macha. Schaug naus, siehgst äs bald gnua!
Thomas
schreit
Bist du fürs Gesetz?
Bürgermeister
I muaß Acht hamm, daß a Ruah is in da Gmoa ... dös is mei Pflicht.
Thomas
schreit
Bist du fürs Gesetz?
Bürgermeister
auch schreiend
I bin für dös, daß brave Leut net ins Unglück kemma weg'n schlechte ...
Thomas
auf ihn losstürzend
Derfst du mi schlecht hoaß'n, du Kerl!
Scheck
dazwischen springend
Halt! Aso geht dös it!
Plank
Thomas haltend
Laß guat sei!
Bürgermeister
zornig
San mir schuld, daß du a schlecht's Mensch host? Hättst d'as änderst aufzog'n!
Thomas
Ah, kimmst d' jetzt so? Zoagst d' jetzt dei G'sicht her?
Plank
energisch zum Bürgermeister
Du hörst mit'n Schimpf n auf!
Bürgermeister
Muaß i mi an Kerl hoaß'n lass'n? In an sellan Haus?
Thomas
Schimpf zua! Vielleicht sagst d' Wahrhet aa no ... daß koan anderner Mensch de Bursch'n aufg'hetzt hat wia du ... mit deiner abkart'ten Lug!
Bürgermeister
Mit meiner Lug ...
Flank
Jetza ... dös hat koan Wert ...
Dem Bürgermeister abwehrend: ...
Laß mi red'n ... Thomas, du derfst ma's glaab'n, es muaß an End hergeh ...
Scheck, der nahe bei der Tür gestanden ist, geht von den ändern unbemerkt hinaus.
Neunte Szene
Thomas
bitter zu Plank
Tuast du aa mit?
Plank
Weil's sei muaß! Mir kinnan do net zuaschaug'n, dass dös Ärgste g'schiecht ...
Da Thomas eine ungeduldige Bewegung macht, eindringlicher
Was kam da raus, wann's de Kamerad'n mit da G'walt probier'n?
Thomas
I müaßt ma 's Recht nehma lass'n?
Plank
's Recht!
Thomas
Vielleicht net? In mein Haus?
Plank
Aba du werst aa net leid'n, daß so was g'schiecht in dein Haus!
Thomas
Was g'schiecht?
Plank
Geh! Mögst ja du selm nimma drin bleib'n.
Thomas
sieht ihn schweigend an.
Plank
Und mir müass'n ins dageg'n stell'n. Dös muaßt ei'sehg'n ... Dös derf amal it sei ... und is no nia g'wes'n. Mir hamm Kinder im Dorf.
Bürgermeister
grob einfallend:
Und mir leidÄn amal koane, de si mit da Schand ‚s Brot vadent.
Thomas
auffahrend
Hat de koa ehrlich's Brot bei mir? Willst du dös sag'n?
Von der Straße heran dringt Lärm, der schon vorher undeutlich zu hören war; er schwillt jetzt stark an.
Bürgermeister
nach dem Fenster deutend
Es sag'n 's dir scho de ändern. Frag de da drauß'n!
Thomas
wild um sich blickend
Ah ... so is 's g'moant? Hast da s' herb'stellt?
Plank stellt sich ihm in den Weg
Weg von da Tür!
In diesem Augenblicke wird die Türe aufgerissen; Scheck kommt mit Martin Lechner herein. Ihnen nach drängen einige Burschen. Thomas bleibt regungslos stehen.
Zehnte Szene
Der Bürgermeister geht den Eindringenden entgegen.
Bürgermeister
fest und ruhig
Da Lechner Martl bleibt do ... aba ös ändern geht's naus!
Einer von den burschen
Mir san Zeug'n für dös ...
Bürgermeister
energischer
Naus! Sag i.
Sie ziehen sich zurück, und Scheck schlägt die Türe zu.
Elfte Szene
Scheck schiebt Lechner Martin vor.
Scheck
Da! jetzt geh no fiiri und red!
Vor den Fenstern sammeln sich viele Leute an, hauptsächlich Burschen; aber auch Weiber und Bauerndirnen. Der Lärm ist allmählich verstummt. Thomas ist ein paar Schritte zurückgetreten und sieht den Burschen finster an. Martin redet zuerst stockend, später wird er dreister.
Bürgermeister
zu Lechner'.
Host d' g'hört, du sagst jetzt dei Sach, als wia bei ins!
Lechner
Warum net? I sag's, wia's war, und brauch ma nix z' fercht'n.
Bürgermeister
Dös brauchst aa net!
Lechner
Überhaupts hätt' i nix g'sagt, wenn net des ander g'wen waar ... aba dös geht na do it, daß ma'r a Geld verlangt!
Thomas
scharf
Wer hot a Geld verlangt?
Lechner
frech
Dei Leni! Daß d'as woaßt!
Bürgermeister
Laß di auf nix ei und verzähl!
Lechner
Da is net viel zum verzähl'n. I ho mit ihr o'bandeln woll'n ... no ja ... wia's halt is ... net... und de erst Zeit hot s' mir net o'geb'n ... aba ... am Donnerstag ... no ja ... da bin i zu ihr in d' Kamma ... net...
Scheck
Und nacha?
Lechner
Und ... no ja ... nacha hat sie zu mir g'sagt... i soll ihr a paar Markl geb'n ... indem ... daß sie koa Geld gar it hot...
Alle schweigen. Thomas streicht sich mit der Handdie Haare in die Stirne und wiederholt die Bewegung immer wieder wie geistesabwesend.
Lechner
wieder verlegener
I hätt's liaba net verrat'n ... aba de Burschen sag'n allsammete, daß i recht g'habt ho ... weil dös arnal ausg'schämt is.
Bürgermeister
ruhig zu Thomas
Glaabst du, daß der lüagt?
Lechner
Des werd sie net laugna kinna ... und Überhaupts kon i schwör'n auf dös!
Von außen wird wieder dumpfer Lärm vernehmbar. Thomas, der auf den Bürgermeister nicht hört, faßt Plank am Arm.
Thomas
heiser.
Hans!
Plank
gut zuredend
Schau, jetzt muaßt d' wohl toa, was recht is.
Thomas
ruhig, mehr für sich hin
Was recht is ... gel?
Plank
Ko'st ja dem Weibsbild net helfen.
Thomas
wie oben
Und derf net halt'n, was i der alt'n Mariann versproch'n hab ... muaß zuaschaug'n, wia ma s" nausjagt...
Plank
Was is aso?
Thomas
Nausjagt auf d' Straß'n, daß s' schlechta z'grund geht wia des ärmst Viech.
Plank
Geh, Thomas! So is 's koa Leb'n für di!
Thomas
wischt sich mit dem Ärmel aber die Stirne
Is wohl koans mehr.
Der Lärm auf der Straße, der in dumpfes Murmeln übergegangen ist, schwillt stärker an und geht plötzlich in wildes Johlen und Pfeifen und Schreien über. Man sieht die Leute sich lebhaft nach der linken Seite der Bühne wenden und mit den Armen gestikulieren.
Bürgermeister
ist an das Fenster geeilt und reißt es auf, schreit
Was is dös? Schämt's enk net?
Viele stimmen
D' Leni! D' Leni! Da is s'!
Bürgermeister
beugt sich weiter hinaus; sehr laut
Ös da!
Die stimmen
Da is s'! D' Leni!
Bürgermeister
überschreit den Lärm
Sepp! Sepp! Du führst dös Weibsbild reu Und ös läßt's äs in Ruah! Habt's g'hört?
Der Lärm legt sich. Der Bürgermeister tritt vom Fenster zurück.
Bürgermeister
De soll's jetzt laugna, wenn s' ko,
Scheck
Is sie drauß'd g'wen?
Bürgermeister
De werd glei do sei...
Zwölfte Szene
Die Türe geht auf; Leni kommt herein, hinter ihr fünf, sechs Bauernburschen, die nachdrängen. Draußen drücken sich die Leute an die Fenster, an dem offenen stehen sie Kopf an Kopf. Leni kommt zögernd vorwärts; sie trägt das Kleid, in dem sie heimgekommen ist, auch den Hut mit der schwarzen Schleife und die Handtasche. Die Haare sind unordentlich gekämmt und etwas zerzaust. Sie bleibt furchtsam stehen und zieht den Kopf ein.
Bürgermeister
Aha! De hat weglaff'n woll'n.
Thomas
ruhig; zum Bürgermeister
Du red'st koa Wort!
Er geht auf Leni zu
Du!
AufLechner deutend
Woaßt du, was der sagt?
Leni wendet ihren Kopf langsam nach Lechner hin und schaut zu Boden. — Pause.
Thomas
Daß du a Geld von eahm verlangt host.
Leni
sehr furchtsam
Is net wahr!
Lechner
grob
Wos? Wia ko'st denn du so lüag'n?
Leni
wie oben
Net wahr is.
Lechner
auf sie zutretend
Host d' net g'sagt... a paar Markl muaßt d' hamm ... hast d' g'sagt.. .
Thomas
reißt Lechner heftig zurück
Weg da, Kerl!
Ruhiger zu Leni
Willst du lüag'n, wenn dir a jeda d' Schuld vom G'sicht runter lest?
Leni
mit verhaltenem Weinen
Weil i fürt hab woll'n ... weil's ma do nix hilft ... weil i schlecht bleib'n muaß ...
Thomas
schreit
Du!
Leni
wie oben
Weil mi da Lenz aa schlecht g'hoaß'n hat ... und weil i koan Pfenning g'habt hab zum Furtgeh' ...
Thomas
schreit
Und host mir dös to!
Leni
Weil da Lenz g'sagt hat ...
Thomas hat blitzschnell sein Messer gezogen und sticht sie nieder. Sie bricht mit einem schwachen Schrei zusammen. Alle weichen entsetzt zurück. Plank ruft
Jessas Maria!
Draußen kreischen die Weiber, die Burschen rufen
Er hat s' derstocha!
Dann plötzliche Stille.
Thomas
dumpf
Jetzt reißt's äs naus in d' Schand!
Vorhang