Gůt ding wil weil haben.
Droben ist gesagt: Es ist besser zweymal gemessen /dann ein mal das beste vergessen. Item / was bald wirt / vergeht auch bald / Das beweisen alle creaturn. Das ror wechst in einem halben jar fast hoch / vnd ist nicht dester stärcker. Fliegen / mucken / laub / graß /rosen / blůmen / werden bald / vergehn auch bald. Ein Eych wechßt langsam / vnd weret lang. Ein Elephant wirt getrogen zehen jar (Aristoteles sagt zwey jar) ehe es geborn wirt / vnn lebt doch biß in zwey / drei hundert jar. Der Löw wenn er geboren wirt / hat kein gestalt nach einem thier / vnd ist so klein wie ein Wisel oder Mauß. Vor zweyen monaten regt er sich nit / in einem halbē jar kan er nit gehn / vnnd wirt doch ein könig der thier / an stärcke vnd můt. Des Beernjungen seind auch wie meuse / sehr weiß / blind / vnnd on haar. Der Mensch / aller ding herr / wie schwach ist der? was kostet es mühe / eh er erzogen wirt / vnd mehr denn kein thier / auff das es war sei / Gůt ding wil weil haben. Wir brauchen dises worts zum spott /als wenn ein meyster etwas zůrichtet / vnd verzeucht lang damit / villeicht auß vergessenheyt oder faulheyt / vnnd köndt es wol eh fertigen / so sagen wir denen /die vns fragen / wie es komme / daß es nit fort gehe? Ey lieber / Gůt ding wil weil haben. Ein narr ist dar umb ein narr / daß er redet in eil vnbesunnen / was jhm einfellt. Ein weiser helt an sich nimpt jhm der weil / vnnd redet mit vernunfft / vnderscheydet zeit /stunde / person / vnd statt.