Einn gůten Engel haben.
Ein Engel hat befelch von Gott die seinen zubehüten. Also liset mann im Daniel vnd Zacharia / daß Babylonien hab einen Engel gehabt / der des Königreichs gehůtet habe.
Wer nun in einem vnglück vnnd schwinden vnfall gewesen ist / vnnd jhm wirt geholffen / da alle menschen verzagten / vō dem sagt man: Der hat einen gůten Engel gehabt / der jhm geholffen hat. Der Prophet Daniel war gelassen vnder siben löwen / biß an den sechsten tag. Aber der Engel des Herren füret Abacuc bei dem schopff seins hars auß Judea in Babylonien / auff das er dem Daniel brecht / das er seinen schnittern bringen solt aufss feld. Da hat Daniel einen gůten Engel gehabt / der jhn behütet hat. Das Euangelion sagt: Wee dem / der einn von den geringsten argert / dann jhr Engel sihet das angesicht des vatters der im himel ist. Dann wo die engel nit stritten wider die teufel / so můsten wir all stund an leib vnd seel verderben / Noch dancket niemandt Gott für seine wolthat / diß singt der xcj. Psalm.