Ich binn da gewesen / ich komme nit hinwider.
Man můß mit schaden weise werden / On schaden wirt niemãd witzig / er můß leergelt geben / es můß jhm ein rad über ein beyn lauffen / daß er daran gedencke / soll ehr auß jm werden. Vil bawen im Bergwerck / hoffen vil gůts zuerwerben / in dem schlecht es vmb / vnd berget / daß er im thal nichts behalt /můß mit schade vnd schanden ablassen. Diser ist da gwesen / vnd hats da gelassen. Andere haben übrigs gelt / vnd lust zum Bergwerck / die vermanen disen gewitzigten / er soll mit / aber er sagt: Ziehet immer hin / ich binn da gwesen / ich komm nit hinwider Bald hernach begibt sichs / daß diser einer auch schaden leidet / so sagt er: Ich binn auch da gwesen / ich komm auch nit hin wider.