Der Teuffel laßt stets einen gestanck hinder jm. Das ist / was der Teufel fürnimpt / das hat im anfang einē hüpschen schein aber im end ist es gifft. Salomon sagt: Es ist ein weg der scheinet richtig in der menschen augen / vnn sein außgang ist doch die ban zu dem tod. Mann nennet einn bösen geruch ein stinckend Gummi / Teufels dreck / zum zeychen / als sei des Teufels außfart vnd abscheyden nit gůt. Es wirt auch von vnehrlichen leuten gesagt / die sich übel letzen /vbnn im abschied vnehr nach sich verlassen / als dann spricht mann: Sie haben einn gestanck hinder jn gelassen / vnnd sich darauß gemacht.