Christian Egenolff
Sprichwörter / Schöne / Weise Klůgredenn
Darinnen Teutscher vnd anderer Spraachen Höfflicheit / Zier / Höhste Vernunfft vnn Klůgheit /Was auch zu Ewiger vnd zeitlicher Weißheit / Tugent / Kunst vnd Wesen dient / gespürt vnn begriffen. Von Alten vnnd Newen im brauch gehabt vnd beschriben /In etliche Tausent zusamen bracht
Cum Privilegio. Franck. Chr. Egenolff.
Vorred / Vom vnderscheyd vnder Spruchwörtern / Gesatz vnd Lere.
Bei den Alten ist vnd heyßt Sprichwort / Ein kurtze /weise klügred / die Summ eins gantzen handels / gesatz oder langen Sententz / als der kern / in ein enges sprüchlin vnn vborgen grifflin / verfaßt / da mehr /etwa anders verstanden dann geredt wirt. Vnd hat von Leren vnd Gesatzen disen vnderscheyd / Daß Gesatz vnnd Lere mit vil worten außgefalten / den menschen werden fůrtragen / Aber die rechten natürlichē Sprichwörter sind abkürtzt / vnn seltzam gefunden / mit einer figur vnd Tropo / inn ein summ begriffen / Vnnd ist bei allen Nationen vnnd Jungen die gröst weißheyt aller weisen in solch hofred vnnd abgekürtzte Sprichwörter / so die Griechen
Apophthegmata, Parœmias,
Die Latiner Dicteria vnn Pro verbia nennen / als inn einn verschlossen kasten / alle irrdische vnnd ewige weißheyt eingelegt. Es ist auch vnder allen leeren /menschen vrtheylen vnd Sententzen nicht war ers noch gewissers dann die Sprichwörter / welche die erfarung gelert / auch die natur vnnd vernunfft in aller menschen hertz vnnd mund geschriben vnnd gelegt hat / Da etwa mit zwey oder dreien worten ein ganz Predig begriffen ist / davon recht / nach der lenge zureden / vil tausent wörter vnd bogen Bapier nicht gnug weren. Da die alten wichtige mechtige grosse vrteyl vnnd Schlůßreden in ein Facit oder Summa summarum / wöllen schliessen / In kürtze / wegweiß recht vnd wol zureden vnd leben anzeygende / wie meniglich inn disem Bůch zuersehen hat. Darzů Gott Genad verleihen wölle. Amen.