Vntrew schlecht jrn eygen herrn.
Vntrew wirt gern mit vntrew bezalt.
Wer vntrewlich handelt / dem geht es ein weil zugůt / aber endlich lonet die vntrew selbst dem der sie übet vnd treibt. Achitophel was bei Dauids zeiten gehalten wie ein Engel Gottes / also vil galt sein rathschlag. Diser Ahitophel riete Absolon / daß er sich solt auffrürisch wider seinn vatter Dauid aufflehnen /vnd selbs König werden. Auch solt er in ansehen des volcks bei seins vatters kebsweibern schlaffen. Endlich aber blib Absonon hangen an einem baum bei seinen haren / vnd ward mit dreien lantzen durchstochen. Ahitophel hieng sich selbs / vnd starb jämerlich.