Ein schalck weyß wie dem andern vmbs hertz ist.
Fur cognoscit furem. Lupus lupum.
Ein dieb kennt den andern / vnn ein Wolff den andern. Es sůchet keiner keinn hinder dem ofen / er sei dann vor darhinder gewesen.
Es sůcht keiner keinn in eim sack / er sei dann vor darinn gesteckt. Es ist böß stelen wo der Wirt ein dieb ist. Wie ein ieder gesinnet / vnn jhm selbs wissend ist / also vrtheylt er auß jhm selbs auß seinem hertzen einn andern. Ein frommer man on argelist /achtet iederman einfeltig / wie er ist / drumb wirt er offt geäfft. Die lieb schelckt nicht / denckt nichts args / glaubt alles / vnnd deut es nach ihrer gůten art / alles gůt. Der gotloß stecket dargegen voller böser list / die dicht er eim ieden an / wirt in seim vrtheyl weniger betrogen / dann er bei jm selbs wol weyß / wie eim schalck vmbs hertz ist.