Kein vbelthat bleibet vngestrafft. Wir wehnen wann Gott nit gleich über ein iede mißthat rachgirig das schwerdt zuckt / er sehe oder straff es nit / so doch diß sein langmütigkeyt erfordert. Also haben sich auch an dem etwa die heyligen geärgert /Als Dauid Psalm 37. 73. Abacuc cap. 1. vnd 2. Hiere. cap. 22. Job cap 12. 20. 21. aber das end hat jrn wohn zuschanden gemacht. Jederman wil vnd begert eins gnädigen Gotts / der langmütig durch die finger zu vnser vntugent sehen könne / aber gegen andern hett ein ieder gern einn gerechten / strengen / rachgirigen Gott Damit verraten wir vnser boßheyt vnd thorheyt.