6. In tonitru et iridem post triumfatos hostes facta
Fallimur? an divos præsentes noscimus ipsos?
Noscimus, et tanto stabimus auxilio.
Non obscura vides palmæ documenta futuræ;
Omnia nec dubiis emicuere notis.
Post stratas acies, post partos hoste triumfos
Annuit impluvio sole per æthra deus.
Ter tonat, et placido per sudum murmure nutat,
Verbaque grandiloquus ter glomerata facit.
Ter tonat, et subitis sunt facta silentia rebus,
Iris et innubi roscida visa polo est.
Hostes, quis dubitet, nutu haud cecidisse superno?
Signa stetere polo: signa stetere solo.
Credimus, et divos præsentes noscimus ipsos,
Firmiter ac horum stabimus auxilio.