38.
Vber Abraham Ortels Parergon
Den schaw-platz alter welt/ in welchem noch zu finden
Was harter flammen grim/ vndt rawer feinde schwerdt
Was der geschwinde plitz/ vndt lange zeit verkehrt/
Schleust
Ortels
Handt hier auff. Mus gleich
Athen'
verschwinden
Bricht
Pergamus
schon ein; ob die von stoltzen Winden
Hoch aufgeschwelte See/ weit vber länder fährt/
Wirdt von der Erden schlundt die erden selbst verzehrt/
Ist doch ein freyer sinn durch keine macht zu binden.
Er reist die schrancken durch/ in dehn ihn fleisch vnd noht/
Vnd sterben pochen will/ vnd pocht den blassen todt.
Findt alles in sich selbst/ vnd findt sich selbst in allen.
Er siht was nicht mehr ist/ vndt was noch kommen soll:
Ihmb ist im vntergang vnd weh der Erden woll.
Vndt kan ob gleich der leib/ sein wohnhauß fält/ nicht fallen.