10.
Was trawr' ich noch! was zittern meine glieder?
Wie das mein abgemattes hertz
Noch mitt sich selbst will streiten/
Mein schmertz wird nuhmer ja zum schertz
In diesen frewden zeiten.
Was wanckt mein sinn den trawrig hin vndt wider?
Wie/ wen die winde streitten/
Vndt Nordt vndt Ost raast wider seine brüder:
Ein ast erbebt im arwen mertz.
Gib dich zue ruh' vndt las dein sorgen fahren.
Durch so viell noth bestürmbter Geist.
Die wehmutt/ die dich drücket/
Die geissell die dich schmeist vnd beist
Hatt Gott nun weggerücket:
Gott der dich offt gerissen von der bahren
Hatt dich mitt hülff erqüicket.
Vnd nach den truben/ rawen donner jahren
Dier gnad' vndt trew/ vndt gunst erweist.
Dv aller Herren Herr/ den Erdt vnd Himmell ehren.
Für dem die Hell erschrickt.
Du du hast mich/ du hast mich wollen hören
Da als ich gantz verstrickt/
Im jägergarn des Todes mich nach dir
Vmbsahe/ da mein heilãd hastu mir
Gebotten hülff vndt handt/ du hast das netz zutrennet.
Ich bin durch dich dem pfeill/ dem vntergang entrennet.
Die haisse flutt/ der trüben lichter brunnen/
Der schier erstartten augen röhr/
Die reichen threnen bäche
Ergossen sich je mehr vndt mehr/
Der strom von dem ich spreche/
Ist tag vndt nacht/ ja für vnd für geronnen.
Herr das ich itzt vorbreche
Mitt jauchtzen Herr! das machstu meine Sonnen
Mein trost/ mein schutz/ mein ruhm vnd ehr.
Dv hast mein Gott die immer nassen wangen/
Getrucknet mitt liebreicher handt/
Dein arm hatt mich erhalten
Wen ich den müden fuß verwandt
Den hastu lassen walten
Die süsse gunst/ durch die ich bin entgangen/
Wen mancher must erkalten/
Wen mancher fiell/ von dir hab ich empfangen/
Manch' ewig-trewer liebe pfandt.
Ich wil für dir/ mit dir/ durch dich/ in deinen wegen
Mit vollen schritten gehn/
Da wo kein sterben sich/ vndt keine seuchen regen
Wo keine gräber stehn/
Wo alles lebt/ wo alles singt vndt klingt
Vnd einen danck dir nach dem andern bringt;
Wo alle schmertzen frey/ dich der du selbst das leben/
Mit alzeit newem preiß in ewikeit erheben.