50. Elias Der Flammen aus der Brust der Mutter hat gesogen; Der von der heilgen Flam des eyvers heiß entbrandt/ Deß Fürsten grim verlacht/ vnd dem verführten Land Durch flammen hat entdeckt/ wie Kron vnd Hauß betrogen: Der Mann/ auff dessen wortt die flammen abgeflogen Durch die erhitzte Lufft/ vnd die der König sandt Mit schneller glutt verzehrt, ist als jhn GOTT entbandt Auch in dem Fewr'gen Sturm aus dieser welt gezogen. Er fehrt/ doch vnversehrt/ kein fewrig Roß vnd Wagen Letzt den/ der Fewr im Mund vnd Hertzen pflag zu tragen Mit dem Er Hertzen mehr deñ Marmorhart/ zusprengt Der gantz von Fewer war/ muß mit dem Fewr hinscheiden: Fragt jhr warumb sein kleidt nichts kan von flammen leidẽ: Mich wundert/ daß es nicht weil er es trug/ verseng't. Ende deß zweites Buchs. der Sonnette.