80. Hähnle und Hühnle.
Es ist emal a Gockeler und a Henne gwä, die sind mit anander g'reist. Da sind sie an-en Grabe kommen und sind nüber g'hopst; da ist dem Gockeler 's Bäuchle ufgsprunge. Da sind sie zu em Schuhmacher gange:
Schuhmacher, gib Du mir Draht,
Daß i mei Bäuchle zunaht!
Der Schumacher sait: »hol Du mir Borst!« Da sind sie zu-ere Sau gange:
Sau, gib mir Borst!
Borst i Schuhmacher gib,
Schuhmacher mir Draht,
Daß i mei Bäuchle zunaht.
Die Sau hat gsait: »gib Du mir Milch!« Da sind sie zu-ere Kuh gange:
Kuh, gib mir Milch!
Milch i Sau gib,
Sau mir Borst,
Borst i Schuhmacher gib,
Schuhmacher mir Draht,
Daß i mei Bäuchle zunaht.
Da hat die Kuh gsait: »gib Du mir Gras.« Da sind sie zu-ere Gräsere gange:
Gräsere, gib mir Gras!
Gras i Kuh gib,
Kuh mir Milch,
Milch i Sau gib,
Sau mir Borst,
Borst i Schuhmacher gib,
Schuhmacher mir Draht,
Daß i mei Bäuchle zunaht.
Die Gräsere hat gsait: »gib Du mir Weck!« Da sind sie zum Beck gange:
Beck, gib mir Weck!
Weck i Gräsere gib,
Gräsere mir Gras,
Gras i Kuh gib,
Kuh mir Milch,
Milch i Sau gib.
Sau mir Borst,
Borst i Schuhmacher gib,
Schuhmacher mir Draht,
Daß i mei Bäuchle zunaht.
Der Beck hat gsait: »gib Du mir Mehl!« Da sind sie zum Müller gange:
Müller, gib mir Mehl!
Mehl i Beck gib,
Beck mir Weck,
Weck i Gräsere gib,
Gräsere mir Gras,
Gras i Kuh gib,
Kuh mir Milch,
Milch i Sau gib,
Sau mir Borst,
Borst i Schuhmacher gib.
Schuhmacher mir Draht,
Daß i mei Bäuchle zunaht.
Der Müller hat gsait: »gib Du mir Frucht!« Da sind sie zum Acker gange:
Acker, gib mir Frucht!
Frucht i Müller gib,
Müller mir Mehl,
Mehl i Beck gib,
Beck mir Weck,
Weck i Gräsere gib,
Gräsere mir Gras,
Gras i Kuh gib,
Kuh mir Milch,
Milch i Sau gib,
Sau mir Borst,
Borst i Schuhmacher gib,
Schuhmacher mir Draht,
Daß i mei Bäuchle zunaht.
Der Acker hat gsait: »gib Du mir Mist!« Da sind sie zu-ere Miste gange:
Miste, gib mir Mist!
Mist i Acker gib,
Acker mir Frucht,
Frucht i Müller gib,
Müller mir Mehl,
Mehl i Beck gib,
Beck mir Weck,
Weck i Gräsere gib,
Gräsere mir Gras,
Gras i Kuh gib,
Kuh mir Milch,
Milch i Sau gib,
Sau mir Borst,
Borst i Schuhmacher gib,
Schuhmacher mir Draht,
Daß i mei Bäuchle zunaht.
Die Miste hat g'sait: »gib Du mir Stroh!« Da sind sie uf d' Heubühne gangen und habet Stroh 'runter gworfe und sind au mit runter gfallen, und da sind sie dod gwä.