Das baner der warheit.
Die baner, die sie lassen fliegen,
Wöln sie mit list euch mit betrigen.
Das erst, das sie der warheit nennen,
Das selb wir baß dan sie erkennen
Vnd haben fünfftzehen hundert iar
Das selb getragen hoch embar,
Mit aller warheit her getragen.
Got geb doch, was drei ketzer sagen!
Ob dis vnd das ein warheit sei,
Cristlichen oder ketzerei,
Das hat die frum cristenheit
Mit grosem kosten, vil arbeit
Alles wol vnd recht erkant,
Gegeben trüwlich zů der hant
Vnd hat euch warlich nit betrogen,
Vff dise stund auch nichtz erlogen,
Vß got vnd nit den fingern gesogen.
Der warheit baner ist beliben,
On alle lügen hoch beschriben
Von den lerern vß der gemein
Vnd nit von dreien erst allein.
Was vnsere lerer beschriben hant,
Warhafftig hon wir das erkant.
Vnß sol als billich geglaubt werden
Als zwenen, dreien mit geferden.
Sol man zwenen glauben geben,
So glaubt man billicher da neben
So vil tusent cristen man,
Die nie kein mensch erzelen kan.
Darumb laß dich ir list nit schedigen,
Wa du die lügner hörtest predigen.
Die warheit sag ich dir.
Würff in das cristlich baner für
Vnd sag, ich glaub die cristlich gemein
Vnd halt für warheit das allein,
Was mir erkent die cristenheit
Vnd nit, was ieder prediger seit.
Die gemein hat zů erkennen das,
Was warheit oder lügen was;
Was antrifft die gantze gemein,
Das sol nit handlen einer allein.
Die cristen das für warheit hant,
Was gemeine cristen hon erkant
Vnd nit, was einer in sunderheit
Für ein warheit predigt, seit.
Es sein freuel böse wicht,
Die irer eren achten nicht
Vnd nemen sich zů erkennen an,
Das vor die gantze gemein hat than.
Der warheit baner ist der gemein,
Das sie in eren tregt allein.
Wer das vff würfft in sunderheit,
Thůt wider eer / sein pflicht vnd eidt.
Wa du nun hörst von warheit sagen,
Da soltu bald vnd ernstlich fragen,
Ob das die gemeine cristenheit
Auch für ein warheit halt vnd seit.
Halt sie es dan für warheit nit,
So weich vom selben schneller drit
Vnd lauff dem grosen huffen zů,
Da findstu sicherheit vnd růw.
Dan billich mir zůhanden stat,
Wie es dem merern huffen gat,
Den cristus nimerme verlat.