94. Bedencke die kürtze dieses lebens
Wie mancher mensche muss aus diesem leben scheiden/
Der noch nicht hat gewust/ was tod vnd leben ist!
Wie mancher muss/ der sich auf lange zeit vermisst/
Eh' er sich des versieht/ den todes rachen weiden!
Dis leben hie ist kurtz vnd hat sehr kurtze frewden/
Die man/ eh man sie recht genossen hat vergisst/
Ist gleich/ (in dieser zeit/ die vns verzeert vnd frisst/)
Das leid nicht kurtz/ das wir in solcher kürtze leiden.
Dis leben ist ein trawm ein wasser-schaum ein plitz/
Dis leben ist ein schall/ ein wasserfall/ ein sitz
Des todes/ der in vns/ weil wir noch leben/ lebet.
Wer denn nu leben wil/ wenn er gestorben ist/
Der dencke stets an die sehr-kurtze lebens frist/
Durch diesen tod/ dem man vergebens wieder strebet.