Ein anders auff der braut namen/ Catharina/welcher zu deutsch Reine/ lautet:
Trochaicum:
Gleich wie fewr im pulver lebet/
Vnd im zunder veste klebet:
Also hafftet/ jederzeit/
Reine lieb an reinigkeit.
Dessen kan vns/ recht vnd eben/
Dieses paar ein beyspiel geben/
Dieses paar; das allezeit
Liebet zucht vnd reinikeit.
Reinikeit/ du werthe tugend/
Reinikeit/ du preis der jugend/
Reinikeit/ du jungfraw-pracht/
Reinikeit/ du liebes-macht/
Reinikeit/ du sitten-mutter/
Reinikeit/ du ehren-futter/
Reinikeit/ du frawenzier/
Reinikeit/ du hold-gebür/
Reinikeit/ du freundschafft-amme/
Reinikeit/ du liebes-flamme/
Reinikeit/ du tugend-kost/
Reinikeit/ du laster-rost/
Reinikeit/ du schmuck der Esther/
Reinikeit/ du schönheit-schwester/
Reinikeit/ du augentrost/
Reinikeit/ du sommerost/
Reinikeit/ dich muss man preisen/
Dich vnd die dich kan beweisen
Beid' im namen vnd der that/
Die dich ehret früh vnd spat:
Deiner hat sich/ wie wir wissen/
Höchstes fleisses wol beflissen
Vnsre tugendreiche braut/
Derer name reine lautt.
Rein; in liebe/ rein; in trewen/
Rein; im reden/ rein; im schweigen/
Rein; in süsser freundlichkeit/
Rein vnd sauber allezeit.
Rein; in arbeit/ rein in feyren/
Rein; im waschen vnd im scheuren/
Rein; im wircken/ rein im nähn/
Rein; im sitzen stehn vnd gehn.
Rein; im kochen/ rein im essen/
Rein; im drincken vnvergessen/
Rein; im haus' vnd für der thür
Rein vnd sauber da vnd hier.
Rein; zu tische/ rein zu bette/
Rein mit andern in die wette/
Rein; zur frewde/ rein; zu leid/
Rein; für leuten vnd beseit.
Reiner augen/ reiner ohren/
Reiner zungen/ vud bevoren
Reines hertzens/ rein vnd klar/
Rein vnd sauber gantz vnd gar.
Reiner lippen/ reiner keelen/
Reines leibes/ reiner seelen/
Reines namens/ wie bewust
Rein vnd schön; nach allerlust/
Reiner füsse/ reiner hände/
Rein; von anfang bis zu ende/
Rein vnd sauber als Crystall/
Rein vnd sauber vberall.
Weil jhr denn/ herr bräutgam habet/
Die mit reinigkeit begabet/
Vnd mit vieler tugend prangt/
Von dem reinen Gott erlangt/
Wünsch' ich euch aus reinem hertzen/
Durch das reine liebe-schertzen/
Was der reinen liebes-lust
Nur in tugend ist bewust.