Ein lied auf seiner obgedachten jungfraw Braut Susannen Nuberin namen/ auf die weise der Avignone:
Sol ich denn nu sterben
Ererben/
Vnd in der liebe verderben/
Der puls lässt nach/
Vnd schlägt gemach/
Mein gantzer leib ist matt vnd schwach/
Mein leben
Wird/ eben
Als laub
Vnd staub/
Dem wind' ein raub/
Vnd kömmet noch
Ans todes joch
Das macht die liebe/ dencket doch?
Und wolt' ich mich wehren/
So mehren
Sich meine noth vnd beschweeren
Mein geist verweht/
Mein muth vergeht/
Mein sinnen-vrwerck stille steht/
Mein dencken
Ist kräncken/
Mein hertz
Für schmertz
Sinckt niederwertz/
Mit angst erfüllt/
Mit forcht gestillt/
Das macht ein schönes engelbild.
Solch bild mir im hertzen
Viel schmertzen.
Vnd angst erregt/ ohne schertzen
Wo ich hin geh/
Wo ich hin seh/
Wo ich tieff in gedancken steh/
Da stehet/
Da gehet/
Da strahlt
Gemahlt/
Mein auffenthalt/
Mein hertzengrund/
Mein rosemund/
Mein sonnenglantz so mich verwundt.
Ach dörfft' ich jhr sagen
Vnd klagen/
Was mir gebricht/ ich wils wagen:
Ich bin verwundt
Corallen-mund/
Durch euch/ wer macht mich nun gesund/
Ewr augen
Aussaugen
Mein hertz'
In schmertz'
Als wie der Mertz
Verzeert den schnee
Noch wird mir weh/
Wenn ich euch/ liebstes lieb/ nicht seh.
Nu wird ja gesunden/
Für wunden/
Wo mit sie werden verbunden/
Auch wird für brand
Kräfftig erkant
Die weisse lilge wol benannt/
Nun bin ich/
Besinn' ich
Mich recht
Und schlecht/
Ein schwacher knecht/
Ist denn für mich/
Mein ander Ich/
Kein artzeney/ ich bitte dich.
Noch werd' ich mich eigen
Erfrewen/
Vnd wie der Phoenix vernewen/
Wenn meine gonst/
Vnd hertzen brunst
An euch o schatz nicht ist vmbsonst.
Ewr wesen/
Erlesen/
Ewr gehn/
Ewr stehn/
Ewr schön entsehn/
Ewr höfflichkeit
Vnd freundlichkeit
Bewegen mich zur frölichkeit.
An euch wil mein leben
Nur kleben/
Seint dem ich euch bin ergeben/
Denn in euch hafft
Magneten krafft/
Die stahl vnd eisen an sich rafft/
Die jugend
Die tugend
An euch
So reich/
Dem golde gleich/
Nimmt zu sich hin
Mein hertz' vnd sinn/
Daß ich nicht mehr bin/ wo ich bin.