Vber den seeligen tod Der viel ehr- vnd tugendsamen frawen Susannen/ des edlen hn. Jan Barbiers ehlichen haußfrawen:
Gleich wie zur frülingszeit (wenn Zephyrus erfrewet/
Was Aquilo betrübt/ wenn alles sich vernewet/
Was aus der erden sprosst) die lilg' in ihrem schein
Fast aller blumen schmuck/ wie schöne sie auch seyn/
Mit schönheit vbertrifft. Wenn sie mit ihrem kleide/
(Die edle garten-zier/ der bienen beste weide)
Vns menschen fast entmenscht vnd gegen sich entzündt
Durch jhre weiss' vnd ruch/ vnd denn ein rauher wind/
Aus mitternacht erregt/ kömmt vnversehns geprauset
Vom kuhlen Belt daher mit grossem sturm gesauset/
Der solche lilie/ die vormals hertz' vnd sinn
Erquickte mit geruch/ reisst in der blüthe hin.
Die blätter fallen ab/ vnd werden gantz verstrewet/
Verwüstet vnd verweht/ jhr stamm/ als abmeyet
Neigt sich zur erden hin/ die seine mutter war/
Verwelcket vnd verdorrt/ vnd stirbet gantz vnd gar.
Nicht anders geht es euch/ jhr blume vieler tugend/
In dem der grimme tod/ fast noch in ewrer jugend
Ihr rechte lilie/ wie denn ewr name heisst/
Euch von den ewrigen gantz vnverhoffet reisst.
Doch jhr seid nur aus noth vnd schmertzen weggerissen/
Vnd könnt der ewigkeit in frewden nu geniessen/
Wir sterben täglich noch/ vnd jhr sterbt nimmermehr/
Ihr seyd/ Gott lob/ an port/ wir schweben noch im meer'
Als meer-graß/ wir seind hew/ jhr eine lebens blume/
Wir sterben noch der sünd'/ jhr lebt zu Gottes ruhme/
Weil aber anders nicht/ als nur durch todes pein/
Als habt jhr lilgenbawm auch must versetzet seyn.