Das liet: Anna du anfenklichen bist
verendert und christlich corrigirt.
1525.
1.
Ciste, du anfenklichen bist
ein wurzel unser selikeit;
Aus deinem tot gewachsen ist
ein ewig werend sicherheit
Zu dem vatter, gen dem wir ser
uns versünden teglichen:
o sun Davit, du für uns trit,
versün uns miltiklichen.
2.
Criste, du einiger tröster
aller betrübten herzen,
Zu dir all cristen rüfen ser,
das du uns helfst aus schmerzen.
Der feinde streit gen uns aus neit
all tag gar listiklichen:
o sun Davit, du für uns trit,
hilf kempfen ritterlichen.
3.
Criste, du von götlichem stam,
von got vatter geboren,
Der zu uns her auf erden kam,
auf das nit wurt verloren
Wer in dich glaubt; des bist ein haubt
aller Cristgelaubichen:
o sun Davit, du für uns trit,
dir sei lob ewiklichen!