Homerus henkt sich selb
In dem vergulten ton Wolfram.
24 merz 1535.
1.
Homerus der poete
einsmals beim mer spazieret,
da saß der fischer rot
Die sich verlauset hete,
als er zu in refieret
und seinen gruß in bot
Und fraget, was sie da heten gemachet,
der schlechten frag wurd er von in verlachet
antworten im aus spot:
2.
»Die wir haben gefangen
die selben hab wir niemer«;
und meinten ire leus:
»Und die uns sint entgangen,
die selben hab wir iemer.
meister, die frag aufschleuß!«
Homerus trachtet nach der frag gar scharfe
und sein gedanken auf die fische warfe,
dacht, es wer etwas neus.
3.
Als er nit mocht erdenken,
zu lösen auf die frage;
wurt er sinnlos zerstreut
Und tet sich selber henken –
nach Policratis sage.
hie merkt ir weisen leut:
Wölt ir nit grab werden in kurzen jaren,
so brecht die köpf nit, all ding zu erfaren,
das der weis man verbeut.