Gesprech: Sanct Peter mit den lantsknechten
Neun armer lantsknecht zogen aus
und garteten von haus zu haus,
dieweil kein krieg im lande was;
eins morgens da trug sie ir straß
hinauf biß für das himeltor;
da klopften sie auch an darvor,
wolten auch in dem himel garten.
Sanct Peter tet der pforten warten;
als er die lantsknecht darvor sach,
wie balt er zu dem herren sprach:
herr, draußen stet ein arme rot,
laß sie herein, es tut in not,
sie wolten geren hinnen garten.
Der herr sprach: laß sie draußen warten.
Als nun die lantsknecht musten harren,
fiengens an zu fluchen und scharren:
marter, leiden und sacrament!
Sanct Peter diser flüch nit kent,
meint, sie redten von geistling dingen,
gedacht in himel sie zu bringen
und sprach: o lieber herre mein,
ich bitte dich, laß sie herein,
nie frömmer leut hab ich gesehen.
Da tet der herr hinwider jehen:
o Petre, du kenst ir nit recht,
ich merk wol, das es sint lantsknecht;
solten wol mit mutwilling sachen
den himel uns zu enge machen.
Sanct Peter der bat aber mer:
herr, laß sie herein durch dein er.
Der herr sprach: du magsts laßen rein,
du must mit in behangen sein;
schau, wie dus wider bringst hinaus.
sanct Peter war fro überaus
und ließ die frommen lantsknecht ein.
Balt sie in himel kamen nein,
gartens herum bei aller welt,
und balt sie zsam brachten das gelt,
knockten sie nider auf ein plan
und fiengen zu umbschanzen an,
und e ein vierteil stunt vergieng,
ein hader sich bei in anfieng
von wegen einer umbeschanz,
so wurden sie entrüstet ganz,
zuckten von leder allesamen
und hauten da mit kreften zsamen,
jagten einander hin und wider
in dem himel auf und auch nider.
Sanct Peter diesen strauß vernum,
kam, zant die lantsknecht an darum,
sprach: wolt ir in dem himel balgen,
hebt euch hinaus an liechten galgen!
Die lantsknecht in tückisch ansahen
und teten auf sanct Peter schlahen,
Das in sanct Peter must entlaufn,
zum herren kam mit echzn und schnaufn
und klagt im über die lantsknecht.
Der herr sprach: dir gschicht nit unrecht.
hab ich dir nit gesaget heut:
laß sie drauß, es sint freche leut!?
Sanct Peter sprach: o herr, der ding
verstunt ich nit, hilf, das ichs bring
hinaus, soll mir ein witzung sein,
das ich kein lantsknecht laß herein,
weil sie sint so mutwillig leut.
Der herr sprach: eim engel gebeut,
das er ein trummel nem zuhant
und für des himels pforten stant
und einen lerman darvor schlag.
sanct Peter tet nach seiner sag.
balt der engel den lerman schlug,
loffen die lantsknecht on verzug
eilent aus durch das himeltor,
meinten, ein lerman wer darvor.
Sanct Peter bschloß die himelpforten,
versperrt die lantsknecht an den orten,
das seit keiner hinein ist kummen,
weil sanct Peter mit in tet brummen.
doch nemt auf schwankweis diß gedicht,
wie Hans Sachs on als arges spricht.
Anno salutis 1556, am 19. tag May.