Ein Anders
Christ sprach O Seel! O Tochter mein
Heb auff dein Creutz/ schick dich darein/
Es kan vnd mag nicht anders sein/
Das Creutz das ich getragen hab/
Mustu vom Hals nicht werffen ab.
2.
Die Seel zum Creutz sehr langsam kam/
Als wer sie aller Glieder lam/
Vngern das Creutz sie auff sich nam/
Als wann ein Laßt zu tragen wer/
Viel hundert tausent Centner schwer.
3.
Christ sprach O Seel! es hilfft hie nicht/
Es hilfft noch sawr/ noch süß Gesicht/
Dich in das Creutz nur wacker richt/
Es muß doch sein/ dich bieg vnd bück/
Das Creutz muß dir auff deinē Rück.
4.
Die Seel darauff kein Wörtle sagt/
So gar erschrocken vnd verzagt/
Der Angstschweiß ward jhr außgejagt;
Mit einem Fuß zum Creutz zu gieng/
Vnd das mit einer Hand vmbfieng.
5.
Christ sprach: wolauff: greiff zu greiff zu/
Gehertzt das Creutz angreiffen thu:
Berg auff/ Berg ab/ ohn Rast vnd Rhu/
Durch lauter Dörn vnd Distel geh/
Still nirgend steh/ nit vmb dich seh.
6.
Die Seel sprach: O Herr Jesu Christ!
Jch weiß daß du so gütig bist/
Dein Hertz auch lauter Zucker ist/
Warumb bistu mir dann so hart/
Da ich noch bin so iung vnd zart.
7.
Christ sprach: O Seel sey wolgemuth/
Mein Lieb das Creutz dir geben thut/
Das Creutz bringt dir all Ehr vnd Gut:
Mein Creutz das ist ein thewres pfand
Wem ich das geb/ ist mir bekant.
8.
Als hie die Seel ein Hertz gefast/
Sie allgemach das Creutz antast/
Probiert jhr Sterck/ versucht den Last:
Fragt auch vnd weiter wissen wolt/
Warzu das Creutz jhr dienen solt.
9.
Christ sprach: O Tochter! glaub mir frey/
Daß in dem Creutz dein Wolfahrt sey/
Jch durch das Creutz dich benedey.
Dir helff zu einem grossen Lohn/
Zum Thron/ zum Scepter/ vnd zur Kron.
10.
Darauff die Seel sich kurtz bedacht/
Hub auff das Creutz mit aller Macht/
Sie küst das Creutz/ vnd hertzlich lacht:
Vmb diese Gab danckt sie dem Herrn/
Vnd trug das Creutz von hertzē gern.