Ein spiegel aller Jungfrawen S. Cæcilia
[1.]
Cæcilia
die Jungfraw zart/
die Jungfraw zart/
Ein Römerin von Edler Art/
von Edler Art.
Wie hoch zu preisen/
Jst wol zu weisen/
Auch wol zu mercken/
Auß jhren Wercken.
[2.]
Pueritia sancta.
Von jugendt wuchs jhr Tugendt groß
jhr Tugendt groß
Gieng auff vnd blüht gleich wie ein Roß
gleich wie ein Roß
Jhr kindisch Handel/
Ein Englisch Wandel/
Heylig jhr Jugendt/
Voll aller Tugendt.
[3.]
Contemptus mundi & vitæ rigor.
Sie haßt die Welt mit allem Pracht/
mit allem Pracht/
Sich selbst/ mit Gelt vnd Gut veracht/
vnd Gut veracht.
Sammet vnd Seyden/
Kont sie nicht leyden.
Jhr Hembder waren
Alle von Haren.
[4.]
Lectio libri Spiritualis.
Die Göttlich Schrifft mit grossem Lust
mit grossem Lust
Trug sie allzeit an jhrer Brust/
an jhrer Brust/
Darin gelesen
Das Geistlich Wesen/
Was da gefunden/
Vbt sie von stunden.
[5.]
Oratio & meditatio.
Ein Orgel jhr im Hertzen stundt/
im Hertzen stundt/
Lobt Gott/ vnd sang mit Hertz vnn Mundt/
mit Hertz vnn Mundt.
Betten/ betrachten/
Hoch thet sie achten/
Das war jhr singen/
Vnd Orgel klingen.
[6.]
Virginitatis amor.
Jhr Jungfrawschafft/ das Kleinot thewr/
das Kleinot thewr/
Jm streit probiert/ wie Gold im Fewr/
wie Gold im Fewr/
Liebt sie ohn massen/
Wolt das nicht lassen/
Eh hett sie geben
Jhr Leib vnd Leben.
[7.]
Virginitatis custodia.
Vom Himmel war jhr zugesandt
jhr zugesandt
Ein Engel mit gewehrter handt/
gewehrter handt/
Der acht sol haben
Auff diese Gaben/
Den Schatz erhalten/
Solch Gut verwalten.
[8.]
Zelus animarum.
Den Engel als nun bey jhr stehn/
nun bey jhr stehn/
Jhr Bräutigam klar hett gesehn/
klar hett gesehn.
Er sich bekehrte/
Vnd Christum ehrte/
Auch Gnad erworbe/
Vnd Marter storbe.
[9.]
Eleemosynæ datæ.
Darauff gieng sie von hauß zu hauß/
von hauß zu hauß/
Vnd theilt jhr Gut den Armen auß/
den Armen auß.
Darnach gefangen/
Zum Richter gangen/
Fieng an zu streiten/
Zur Kron zu schreiten.
[10.]
Fortitudo & Patientia.
Der erste Streit/ vnd erste Kampff/
vnd erste Kampff/
Ein Badstub war voll Fewr vnd dampff
voll Fewr vnd dampff
Da sie geschlossen
Blieb vnuerdrossen
Ein Tag vnd Nachte/
Doch nicht verschmachte.
[11.]
Martyrium.
Als Fewr vnd Flam durch Gottes Gnad
durch Gottes Gnad
Jhr nichts geschad/ in diesem Bad
in diesem Bad
Der Richter hiesse/
Die Jungfraw liesse/
Nach vielen Plagen/
Den Kopff abschlagen.
[12.]
Perseuerantia.
Am Hals verwund drey gantzer Tag/
drey gantzer Tag/
Die Jungfraw in der Marter lag/
der Marter lag/
Die zu jhr giengen/
Gut Lehr empfiengen/
Biß Christus kommen/
Vnd sie genommen.