Lob deß Schöpffers darin ein kleines vvercklein seiner vveißheit, nemblich die vvunderliebliche handthierung der Immen oder Bienen beschrieben vvird
1.
Mit deiner lieb vmbgeben/
O schöpffer aller ding/
Im trawren muß ich leben/
Wan ich von dir nicht sing.
Von wercken deiner hände/
Von wercken auch gering/
Von bienen ich dir sende/
Waß ich heut new erkling.
2.
Wan ich bey deinen wercken/
Die wunder dein betracht/
Zur lieb sie mich erstärcken/
Der eyffer schöpffet macht/
O Gott wan dich zu loben/
Ich nit von hertzen denck/
Mich lebend vnuerschoben/
In tieff vnd grund versenck.
3.
Wolan will heut erklingen/
Ein wercklein deiner händ/
Wil zarte verßlein zwingen/
Von jmmen wol bekändt.
Nembt war/ jhr menschen seelen/
Dem schöpffer dencket nach/
Wil sauber nichts verheelen/
Waß euch belusten mag.
4.
Auff/ auff/ jhr kleine bienen/
Der Winter ist fürbey:
Schon gaffen jetz/ vnd gienen/
Die blümlein allerley.
Auff/ auff/ die blümlein gaffen/
Zu feld noch flieget heut/
Auff/ auff/ mit wehr/ vnd waffen/
Euch schickt zur blumen-beut.
5.
Ey da sie schon erbrommen/
Zu feld sich stellens ein/
Starck rühren sie die trommen
Die gelbe kriegerlein.
Sie weit/ vnd breit mit sorgen
Erforschen jhren raub/
So draussen ligt verborgen
In weichem blumen-laub.
6.
Vom raub sie nur sich nehren/
Nur leben sie der beut/
Doch jemand nit beschweren/
Verschonen landt vnd leuth.
Sie zihlen scharpff mit augen/
Zum reichsten blümlein zart/
Von jhnen schätz ersaugen/
In blättlein eingeschart.
7.
Sie gleich daß best erheben/
Daß beste blumen-blut/
Vnd bleiben doch beyneben/
Die blümlein wolgemuth:
Gar starck vnd immer zahlen
Die blümlein jhren zoll/
Vnd bleiben allemahlen/
Jedoch noch eben voll.
8.
Ob schon die schätz erhoben/
Ob schon sie plündert auß/
Doch schwebens je noch oben/
Verbleiben eben krauß.
Jhr zänlein wolgewetzet
Die Bienlein schlagen an/
Doch allweg vnverletzet
Die blümlein lassen stahn.
9.
Kein blättlein sie zerbeissen/
Kein härlein kränckens nicht/
Kein äderlein zerspleissen/
Alß wie mans täglich sicht.
O wol wie friedlichs rauben!
Wie süsser blumen krieg!
In honig/ muß ich glauben/
Verwendt sich aller sieg.
10.
In lauter wachs/ vnd hönig
Verwendt sich alle beut/
So mancher Fürst/ vnd König
Geneust mit hertzen frewd.
Von blumen waß sie schaben/
Waß da sie frücklen auß/
Wird gleich zur honig waben/
Wans jhnen kombt nach hauß.
11.
Drumb zeitlich dan sie rühren
Die schwancke federlein/
Den süßen raub entführen/
Vnd heimwarts kehren ein.
Mit flügeln dünn gezogen
Von gülden pergamen/
Sie dickmals (vngelogen)
Zwo kleiner meylen gehn.
12.
Man wil daß etlich storben/
Von viel zu stätem flug/
Weils sich zu gar beworben/
Wan sie nit funden gnug.
In stein vnd felsen-rissen/
An örten steinig-hart/
Offt habens abgeschlissen/
Wol halbe flügel zart.
13.
Sie fleissig aller enden/
Vnd orten späth/ vnd früh/
Den gelben safft entwenden/
Von bäum- vnd hecken blüh.
Wo nur sich bloß erweisen/
Die glitzend blümelein/
Da werdens gleich zur speisen/
Den honig-vögelein.
14.
Wan wol dan hat gezehret/
Daß völcklein honig süß/
Es mit dem rest beschweret/
Die beyden hinderfüß/
In lufft sie mütig tretten/
Mit brommen vnd gesauß:
Bey trommel/ vnd trompetten/
Sie fahren reich nach hauß.
15.
Offt förchtens vnderwegen/
Daß nit von jhrem zweck/
Wan wind sich gunt zu regen/
Er sie mögt blasen wegk.
Sich drumb dan bas beladen/
Mit kleinen steinelein;
So schwebens ohne schaden/
Weil dan sie schwärer sein.
16.
Offt wan sie sich verweilet/
Auff gar zu blosem feldt/
Vom abend übereilet/
Ohn vnderschleiff vnd zelt/
Fürnemblich dan sie sorgen/
Für jhre flügel zart/
Daß die biß auff den morgen/
Für feuchte sein bewahrt.
17.
Damits dan je nit werden/
Berürt von feuchtem taw/
Sich legen sie zur erden
Mit vortheil gar genaw:
Sich legens auff den rucken/
Vnd also schlaffen ein:
So bleiben je noch trucken
Die gülden flitterlein.
18.
Bald wan die morgenstunden
Mit rosen roth vmbgürt:
Den süssen schlaff entbunden/
Gleich fassens jhre bürd!
Gleich wider sie dan schwingen
Die flachen federlein/
Nach hauß die beuten bringen/
Bey kühlem purpur-schein.
19.
Wan endlich dan sie kommen
Zur edlen wächsen-burg/
Für frewden stärcker brommen/
Sich tu ilens durch vnd durch:
Gleich rüstet sich zum grüssen
Waß blieben war daheim/
Den gästen streicht von füssen/
Daß honig/ wachs/ vnd leim.
20.
Wer mags dan je ersinnen/
Mit welcher zierd/ vnd kunst
Daß werck sie da beginnen
In lauter schwartzem dunst.
Viel wunder von gebäwen/
Viel häußlein auff das best
Im duncklen gar ohn schewen/
Sie da dan gründen fest.
21.
Die klare Sonn dort oben/
Der himmlisch augenball/
So sonsten hoch erhoben
Sich wirblet vber all.
Mit seinen starcken pfeilen
Mag da nit bohren ein/
Muß draussen ja verweilen/
Nimbt nie den augenschein.
22.
Dem tag sie weichen ferne/
Verkleben jhm die riß/
Daß niemand nichts erlerne/
Noch jhre stücklein wiß.
Die schöne kunst verborgen
Bißher bleibt in geheim;
Der leser muß mirs borgen/
Kombt nicht in meine reim.
23.
Ein König doch erwölen/
Die stoltze bürgerschafft:
Wie der dan thut befehlen/
Verwirckens jhren safft.
All ämpter er ertheilet/
Gibt alles weißlich an/
Gleich niemand sich verweilet/
Seind jhm gantz vnderthan.
24.
Gleich die dan jhn begleiten/
Vnd lauffen jhm zur hand:
Gleich die dan draussen streitten
Für jhre Burg vnd Land:
Gleich die den pöffel führen/
Versorgen alle wacht:
Gleich die den lufft erspüren
Auffs wetter gebend acht.
25.
Gleich die zu felde fahren/
Mehr arbeit führen bey:
Gleich die/ die flügel spahren
Daheim sich brauchen frey:
Gleich die daß honig tragen/
Gleich die den feuchten taw:
Gleich die den mörtel schlagen/
Vnd mawren jhren baw.
26.
Daß völcklein vnverdrossen
Starck bawt ohn vnderlaß/
Vnd brauchets ohn verstossen
Noch bley/ noch winckelmaß.
Von bretter/ holtz/ noch steinen/
Kein splitter brauchens nicht/
Vnd doch (wer wolt es meinen)
Der schöne baw geschicht.
27.
Von blümlein ist erwöhlet
Der bawzeug nagel new/
In häußlein vngezehlet
Sich theilt daß gelb gebäw.
Von wachs gar dünn getrieben
Seind alle mawr vnd wänd;
Balliert/ vnd glatt gerieben/
In zeltlein abgetrennt.
28.
Dort nemens dan besonder
Zur wohnung jhre plätz:
Dort samlens auch mit wunder/
Vnd mehrens jhre schätz.
Auch örtlein jhn erkiesen
Da ziehlens jhre zucht/
Biß die recht vnderwiesen/
Auch gleiche nahrung sucht.
29.
Die zimmer vnderscheiden/
Versüssens mit geruch;
Sie stanck noch wust erleiden/
Er draussen fält im flug.
Dan drinnen sie sich sparen;
Sich halten pur vnd rein;
Recht sauber sie bewahren
Die zelt- vnd kämmerlein.
30.
Sie häuffig sich vermehren/
Doch keusch/ ohn heyrath sein;
Ohn lieb sie sich beschwären
Mit süssen kinderlein.
Sie nur von blumen lesen
Die kleinen jhrer art;
Da findet sich daß wesen
All jhrer Erben zart.
31.
Wan dan die schöne jugent
Sich nehret allgemach;
Sie gleich der vätter tugent/
Vnd freyheit strebet nach.
Sie sich von mitgenossen
Im schwarm zertheilen ab/
Von hauß mit frewden stossen
In vollem flügel-trab.
32.
Starck blasen sie zum lermen/
Gar schwirig von geblüt:
In stoltzem zug vnd schwermen/
Daß munter bürßlein wüt.
Ade du süsses heimet;
Ade du mutter-schoß;
Hinaussen vngezeimet
Sich waget vnser stoß
33.
Schaw da/ wie schön muntiret/
Wie schön gebutzter hauff!
In lüfften er braviret/
Zun wolcken schwebet auff.
Frisch hin vnd her sich schwencket
Die gülden-gelbe schaar/
Nach frembdem land gedencket/
Ihr hauß verlasset gar.
34.
Her/ her nun pfann/ vnd becken/
Schlagt auff daß gütlich kling/
Vnd last den schwarm erschröcken/
Daß nit er gar entspring.
Schlagt auff ting-tang: ting-tyren:
Ting-tang: ting tyren-tang:
Laß jhm noch baß hoffiren
Mit lindem becken-klang.
35.
Gleich da laßt jhm gesagen
Der stossend bienen schwarm/
Schon kühlet/ vnd zerschlagen
Ist jhm das müthlein warm/
Er herwarts thut sich lencken/
Wil schon sich kleben an;
Schaw dorten er bleibt hencken/
Man jhn dort fassen kan.
36.
Der hüter sich bereite
Zum newen bienenstock/
Da drein dan er sie leite/
Sie sanfft- vnd süßlich lock:
Der stock soll sein bestriechen
Mit edlem Thymian/
Wans nur das kräutlein riechen/
Sie gern sich halten lan.
37.
Gleich hebens an zu wohnen
In also frischem sitz/
Vnd reichlich den belohnen/
Der sie nimbt in besitz/
Die jung/ vnd alte Bienen
Gar häuffig ohne zahl
Den menschen trewlich dienen/
Zur süssen speiß/ vnd mahl.
38.
Gar sparsam sie sich nehren/
Gar leben sie genaw:
Nur wir/ wir jhn entlären
Die körb/ vnd reichen baw.
Sie nur den frembden gästen
Die reichthumb haben spart/
Vnd vns gethan zum besten
So manche blumen fart.
39.
Wer wil nun vberdencken/
Waß hoch- vnd schwären tax/
Der welt sie jährlich schencken/
An honig/ vnd an wachs?
Mit vielmahl tausend/ tausend
Ducaten roth von goldt/
Vnd je noch tausend/ tausend
Mans nie bezahlen solt.
40.
Wer mensch mags auch erdencken/
Was jährlich ohn verzug
Dem lieben Gott sie schencken
Auß jhrem blumen-flug?
Sie tausend/ tausend/ tausend
Ihm liechter zünden an/
So tag vnd nacht in tausend/
Vnd tausend kirchen stahn.
41.
Dem Schöpffer sie zun ehren
In lind gewircktem flachs
Vnzahlbar fewr ernehren/
Von gelb- vnd weissem wachs.
Vnzahlbar jhm laternen
Erhaltens tag zu tag.
In warheit sie den sternen/
Mit nichten gebens nach.
42.
O schöpffer der naturen!
Hoch schwellet mir der mut/
Wan dich der Creaturen
Man danckbar loben thut:
Nun dancken wir von hertzen
Den schöpffer lieb vnd werth/
Dem sie so manche kertzen
Verehren vnbeschwert.
43.
Ihr völcker vil auff erden/
Ihr menschen allegar;
Frisch/ frölich in geberden
Vor jhm euch stellet dar:
Im dancket seiner gaben/
Der vöglein wunder fein/
Deß wachs/ vnd honig waben
So wunder süß/ vnd rein.
44.
Steigt auff/ vnd steigt hinunder
In allen wercken sein:
Rufft vberall/ wie wunder
Muß er doch selber sein!
Rufft vberall wie wunder
Seind alle wunder sein!
Wie wunder/ vnd wie wunder
Muß er dan selber sein!